للعلم .. مريخ موردة بالمقبرة ..!

ناس المريخ قالوا دايرين ينظموا بطولة سيكافا وطبعا الموضوع ما داير ليهو درس عصر .. الموضوع واضح وضوح الشمس في رابعة النهار انو المجلس الاحمر اراد ان يلهي جماهيره الصابرة عن موضوع الخروج من دور ال32 في دوري رابطة الاندية الافريقية قال اصلو جماهير المريخ دي مسكينة شديد واي حاجه ممكن تمشي فيها عشان كده احسن نفكر ليهم في حاجة كده تلهيهم عن التفكير في وداع بطولة افريقيا .. يعني دايرين يقولو لجماهير المريخ السنة دي لازم تشيلو ليكم بطولة .. انتو عارفين مشو فكروا في سيكافا ليه ؟ لسبب بسيط للغاية لانهم ببساطة شديدة ما واثقين ان فريقهم ممكن يشيل بطولة الدوري الممتاز قالوا احسن نمشي لي سيكافا اصلا هي مضمونة اكتر من الدوري الممتاز لانو بعد الخروج الافريقي ممكن الموردة تجي وتغلبهم ويتلاشي فارق الثلاث نقاط بينهم والهلال قالوا احسن لينا نعمل في المضمون والمضمون سيكافا ..!
تعالوا نشوف ردود الافعال او التخدير القاعدين يمارسوه علي تلك الجماهير المسكينة الصابرة .. ابوجريشه نائب رئيس القطاع الرياضي بالمريخ وفي تصريحات له حمل وزر الخروج الافريقي للمنتخب الوطني واكد ان معسكرات المنتخب الوطني غير منضبطة الامر الذي اعاق المريخ وتسبب في خروجه ؟
عليكم الله هسي الواحد يقول شنو ويعمل شنو ؟ يا عزيزي ابوجريشة كل نجوم المريخ في المنتخب كانوا نجوما مع منتخب بلادهم .. امسك مصعب عمر كان احد ابرز اللاعبين في بطولة الشان التي نظمها السودان .. قول واحد ..!
امسك سفاري كان واحدا من افضل نجوم منتخبنا الوطني في بطولة الشان ومباراة سيوزلاند الاخيرة ولعب بثبات حتي ان جميع اهل المريخ اتفقوا علي ان المنتخب الوطني اعاد سفاري للتالق من جديد قول اتنين ..!
امسك الشغيل كان من ابرز اللاعبين قول تلاتة ..!
نجي لراجي منو القال ليك انو اصيب في مباريات المنتخب الوطني .. يا عزيزي راجي اصيب في نهائي كاس السودان في اللقاء الذي جمع الهلال بالمريخ بدليل ان راجي لم ينضم للمنتخب الوطني في معسكره التحضيري الذي اقامه بارتريا ..قول اربعة ..!
امسك موسي الزومة اصلا لم يشارك في الشان والمباراة الوحيدة التي شارك فيها هي مباراة سويزلاند ولم يكن سئيا .. قول خمسة ..!
تعال لي بله جابر كان الطرف الايمن الاساسي للمنتخب ؟وظهر بمستوي طيب من خلال تلك المباريات .. قول ستة ..!
نجي لفيصل العجب اصلا لم يتم اختياره للمنتخب برغبته بحسب افادة الاطار الفني للمنتخب الوطني وتم اختياره للمنتخب مؤخرا وشارك في مباراة سيوزيلاند الاخيرة ولعب ثلثي المباراة وقام بتجهيز اكثر من فرصة للمهاجمين .. قول سبعة ..!
تاني عندكم منو في المنتخب الوطني ..اا اي اتذكرت محمد كمال لم يشارك اصلا في الشان ..!
سعيد السعودي لم يتم اختياره .. وطارق مختار شرحه قول تمانية ..!
بالحساب ده يا ابوجريشه نجوم فريقك بالمنتخب الوطني لعبوا مباريات كبيرة للحد البعيد وادوا بمستوي مشرف وكان المنتخب واحدا من الاسباب التي ساعدتهم في الظهور والعودة مجددا للتالق فكيف يدعي ابوجريشة ان المنتخب تسبب في الخروج الافريقي للمريخ .. الاسباب التي خرج بها المريخ عزيزي ابوجريشة انت تعلمها جيدا وكل جماهير المريخ تعلمها .. الخروج من بوابة الدخول الذي حدث للمريخ بشهادة كل الاعلام الاحمر تسبب فيه المدير الفني لفرقتكم بالطريقة العجيبة التي خاض بها المباراة وباشراكه للاعبين غابوا فترة طويلة عن الاجواء التنافسية (سعيد السعودي وطارق مختار ) فهل كان طارق مختار والسعودي في المنتخب الوطني عزيزي ابوجريشة ؟
في السابق كنا نقول ان المنتخب الوطني يستفيد من المعسكرات التحضيرية التي تقيمها اندية القمة ولكن هذا الموسم ونسبة لاستعدادات المنتخب لبطولة المحليين التي نظمها السودان والتي انتهت فبراير الماضي فكان ان سبق المنتخب الاندية في الاعداد واقامة المعسكرات التحضيرية وبالتالي فان الاندية هي التي استفادت من معسكرات المنتخب والتجارب التحضيرية والرسمية التي خاضها فكيف يتسني لابي جريشة ان يتهم اعداد منتخبنا الوطني بانه السبب الرئيس في خروج المريخ من دور ال32 الافريقي ؟؟
ان كان لك سببا اخر عزيزي ابوجريشه فقله ولا تحمل المنتخب الوطني نتيجة الفشل التي حققه المريخ في البطولة الافريقية لان حديثك الذي ادليت به للصحف تبرير فطير لا يمكن ان تقنع به احد ..!
خرج المريخ عزيزي ابوجريشه من هنا بعد فشل خط هجومك في استثمار الفرص التي سنحت له .. خرج فريقك من هنا من امدرمان حينما كسب المهدية بخلع الضرس بهدف يتيم .. خرجك فريقك عزيزي ابوجريشه بعدما ادخلكم فريق الخرطوم في حسبة برمة فكيف لك انت تتهم المنتخب الوطني بخروج فريقك من الدور الاول للبطولة الافريقية ؟؟
اخيرا اخيرا ..!
بالمناسبة ناس المريخ ديل غربين جدا اي اخفاق عندهم ليهو مسبباته جاهزة زمان بعد حصولهم علي المركز الثاني في بطولة سيكافا التي نظموها قالوا انهم ما نظموا البطولة عشان يشيلوها .. قالوا نظموها عشان الاعداد للبطولة الافريقية .. المرة دي ما قالو التنظيم عشان الاعداد للبطولة الافريقية جمال الوالي قال انهم عايزين ينظموها عشان يدوا الجهاز الفني الفرصة الكافية للتعرف علي امكانات نجوم الفريق .. اها قول حسام البدري عرف امكانات اللاعبين كويس دي كلو لي شنو للدوري الممتاز وكاس السودان يعني ؟
طيب الدوري الممتاز وكاس السودان داير ليهو جهاز فني مصري ومدير كرة مصري ومدرب حراس مصري ومدرب احمال الماني عليكم الله ؟
وكاس السودان ما طوالي قاعدين تشيلهو الحصل شنو واصلا هو قاعد يعمل ليكم شنو .. حتي البطولات القاعدين تشاركوا فيها (بطولة رابطة الاندية الافريقية ) بتدخلو فيها عشان السيد الهلال .. ما نمشي بعيد هسي البطولة الدخلتوها دي وخرجتو منها من دور ال32 دخلتوها عشان انتو بطل الدوري الممتاز ولا عشان السيد الهلال ؟
اخيرا جدا ..!
يا مجلس المريخ ويا اعلام المريخ بالله عليكم كونوا ولو لمرة واحدة صادقين مع جماهيركم المسكينة .. قولوا لها ان المريخ الان غير جاهز للتنافس الافريقي .. قولوا ليها المريخ يضم لاعبين كبار في السن .. حدثوهم عن الدلال الذي يمارسه مجلس الادارة مع اللاعبين ..حدثوهم عن الاموال الضخمة التي صرفت علي اللاعبين والاجهزة الفنية من اجل البطولة الافريقية ودعوا التضليل وقتها يمكن للمريخ ان يعود كما كان ..!
اقول ليكم حاجة ابنوا ليها طابق تاني في الاستاد .. وجيبوا للاستاد لوحة الكترونية وافتحوا ليها حوض السباحة .. المهم اعملوا اي حاجة عشان ينسوا.!
هسي المريخ جاي وعندو تمارين استعدادا للقراقير اوعي تقولوا الملعب مقفول عشان الصيانة وكدا ..!
للعلم فقط القراقير اختارو المقبرة مسرحا لمباراة المريخ يعني الحاضر يكلم الغائب .. وانت يا زغبير كراسي الاستاد دي مسؤليتك اعمل حسابك ..!