• ×
الخميس 23 سبتمبر 2021 | 09-23-2021
حسن عبدالرحيم

ﺍﻧﻘﻼﺏ في الهلال

حسن عبدالرحيم

 0  0  7912
حسن عبدالرحيم


ـ الهلال لا يغيب إلا ليظهر بدراً..
ـ هكذا ختمت الكاتبة الأستاذة نانا عبد المجيد منصور، زاويتها المقروءة استرخاء في عدد الأمس بهذه الصحيفة..
ـ ولكن علينا أن نتساءل لماذا يغيب الهلال ومن هم الذين تعمدوا غيابه؟.. وجعلوا البعض يردد ويغني للهلال غيابك طال كفاية تعال.
ـ ومتى يظهر الهلال ويهل بدرا لنغني له يا الهليت وفرحت قلوبنا..
ـ الحكاية سادتي ما حكاية فريق تعادل في مباراة دورية..
ـ والحكاية ما حكاية مدرب فشل في وضع التشكيلة أو اختبار عناصرها..
ـ الحكاية ما حكاية أن الحظ عاند الهلال وابتسم للآرسنال.
ـ الحكاية أكبر من كده..
ـ وما حكاية نفر أو نفرين اجتمعوا واتخذوا قرارا بإعفاء لافاني..
ـ أو الناس (اتخمخمت) وجات اجتمعت وجابت الديبة مدربا والسادة مديرا للكرة.
ـ الحكاية حكاية مجلس ضعيف هش واهن .. أعضاؤه لا يملكون الرأي ولا يحاولون.ابداء الرأي.
ـ يعرفون فقط للبصمة..
ـ لم نسمع بأن هناك عضوا في المجلس تحفظ على هذا القرار أو اعترض..
ـ وهل يعقل يا ساده يا كرام أن نادي الهلال والذي يمثل بالنسبة لأهله حكومة قائمة لابد من خلاف داخله..
ـ هل كل القرارات التي تتخذ صحيحة؟..
ـ ولا يوجد اعتراض عليها..
ـ الحكاية أكبر من كده..
ـ حكاية اجتماعات تنعقد دون علم أعضاء المجلس وحقد وكراهية وخلافات وحفر وضرب تحت الحزام (فقراء وأناطين) وبتاعين كجور وسفلي وكتابة.
ـ ده الهلال من الداخل..
ـ تغييب للبعض في اتخاذ القرارات.
ـ الرواية ليست في إعفاء لافاني ولا تعيين الديبة ولا إعفاء طارق ولا هروب الطبيب ولا إعفاء البوص المشكلة أكبر من كده بكتير!
ـ تحالفات داخل المجلس وشلليات وتكتلات وكل اثنين خاتين راسهم مع بعض وكل شبيح يحوم بين هؤلاء.
ـ والرئيس مغيب وما عارف الحاصل شنو والمعلومات التي تصله مضللة.
ـ قالوا مشكلة الهلال في لافاني هكذا بكل بساطة تم تشخيص مشكلة الهلال.. وهناك بعض المقتنعين بأن راس لافاني المعلق على مشانق استاد الهلال هو الحل للأزمة..
ـ وأن إبعاده هو الجراحة التي كانت لازمة وواجبة لاستئصال السرطان الذي يهدد الهلال بالعجز والموت..
ـ ويمشي لافاني ويأتي من يأتي من بعده وتدور الساقية وهي لسه مدورة..
ـ شوفوا كم سنة ونحنا لا بنتغير ولا بنتبدل والحال يا هو نفس الحال..
ـ مشى ومشى ومشى ومشى ومشى ومشى ومشى ديل كلهم مشوا وهم قاعدين.
= وقاعدين ليه ما تقوموا تروحوا!!
ـ والهلال يختار الديبة وأعضاء المجلس ما عارفين وخلافات وانقسامات وأعضاء غاضبون بسبب التهميش ونافشين ريشهم على الفاضي..
ـ وأول ما يرن تلفونو ويظهر اسمو.. يكون الرد والله يا ريس كأنك بتقرأ أفكاري أنا كنت قبل تلفونك بفكر في الديبة، يا أخي ده ود الهلال وزول شاطر وكراعو خضراء.. أي عيونو ما خضر لكن عندو فكر تدريبي محترف زي الخواجات المواسير الجبناهم لا قصدي زي المعلمين لا زي الحلب لازي أبو الرخا لا زي العاطلين من الشغل التدريبي اقول ليك كلام والله يا ريس قراراتك صحيحة..
ـ وتاني يقول ليهو عليك الله يا ريس أنت الأفكار الجهنمية دي بتجيبها من وين؟ يا أخي والله أنت شفت ومقرم.
ـ وتلفونات بين الأعضاء دي ما طريقة تعامل وده ما مجلس ليه نحنا نكون مغيبين وليه ما يكلمونا أي حاجة نقرأها في الفيسبوك أو الواتساب أو الجرائد، يا جماعة نحنا لازم نتحرك.. لازم نثور.. وانقطعت المحادثة..
ـ واجتماع بين ثلاثة وتلفونات اثناء الاجتماع الناس اختارت كابتن السادة مديرا للكرة بالهلال بديلا عن البوص والبصمجية بصموا واي واحد اتصل بصحفي قالوا ليه رأيك شنو في السادة أنا عايز اجيبو مدير الكرة. وبيني وبينك اتفقت مع عمك على كده.
ـ ويقول ليهو شوت الخبر بس ما تقول أنا ويظهر الخبر في الموقع الرسمي للنادي ويتداول في الواتساب والفيسبوك وبعد ساعتين خبر تاني تجميد القرار.
ـ وقبل الساعتين ماذا حدث هرج ومرج تأييد ومعارضة للقرار.
ـ ورسائل في الواتساب وعلى الفيسبوك وناس أمام بيت الرئيس.
ـ وعضو مجلس بارز يطالب بالابقاء على القرار ورسالة واضحة من الرئيس جمدوا القرار ويطالب كل زول يلزم حدو..
ـ واتصالات باعضاء المجلس بعد التجميد والرد والله انا ما ما كملت الاجتماع طلعت كان عندي مشوار..
ـ والناس المع السادة في المجلس مادين بوزهم ومشاكل وخلافات.. والهلال يضيع يا ولدي..
ـ وهكذا يدار الهلال.. لذلك ننتظر ولا نتحرك نلطم الخدود ونبكي على اللبن المسكوب ونكب التراب على رؤوسنا والرماد كال حماد.
ـ ونعيش في أحلام اليقظة وننتظر المعجزات ونطالب شيخ فلان بالدعاء للهلال .. وبجينا الفكي فرتكان ويقول لينا انتو غالين وادخلنا مفاهيم غريبة وعجيبة في العقول.
ـ فالعقول دخلتها مساحات اخطر من الخرشة..
ـ والناس تشاكل وتختلف وكل واحد يقول ليك العنوا ابليس يا جماعة .. الموضوع ده ما يستحق كده.
ـ وناس مع الكاردينال وناس ضده.
ـ انت ما تتكلم معاي انت اربابي وانت بريرابي.
=وتاني يا جماعة العنوا ابليس
=ويرد شيخ وقور يازول شنو انت اي حاجة العنوا ابليس والله مافي ابليس غيرنا نحنا البشر.
=اي واحد يرتكب معصية او يغلط يقول ليك ابليس غشاني وخدعني هو ابليس ده بجيب المدربين ولا بسجل اللاعبين ولا بتخذ القرار ولا بقول ليكم ما يكون عندكم رأي وابصموا بس.
=والناس تمشي الحج وتضرب وتلعن وتشتم في ابليس ولكن هل ده ابليس حقا وفعلا؟.
=ابليس يسكننا في دواخلنا والنفوس البقت خربة خربة وضعيفة لا تنظر حولها بصدق ولا تتعامل مع نفسها بصدق لذلك كثرت الاخطاء وبتنا نتوهم الاشياء.
=والديبة يقود المران والجماهير تستقبله بالتصفيق وتردد.. أنت حاجة عجيبة.
=والكاردينال في الميدان وعماد الزعلان وهارون الفرحان وظهور دكتور حسن ومحمود عبد الكريم والبقية غياب في دفتر الحضور إن شاءالله خير.
=وروح جديدة وسط اللاعبين ومعنويات عالية.
=واللاعب بشه يعود وفرحة في المدرجات التي تردد عاد الحبيب المنتظر.
=وهذا هو الهلال لا يغيب إلا ليظهر بدرا.
=وحليلو هو..
آخر المشاوير
= من هو الشخص الذي أبلغ لافاني بالإعفاء؟
=من هو عضو المجلس الذي قال لزملائه يا نبقى رجال ويكون عندنا موقف موحد يا نستقيل؟ وماذا قال في الاجتماع وخذل من كان معه.
=مهما اختلفنا مع البوص لا يمكن لنا ننكر هلاليته وحبه وعشقه للهلال بس البوص جاء في الزمن الغلط ولا مش كده يا جنرال؟؟.
=أخبار الفاضل شنو والحاصل عليهو شنو شالو ولا لسه؟.
=من الذي دبر وقاد الانقلابات في الهلال؟
= هل يكون سيف نوري مدير دائرة الكرة؟
=هل هناك العديد من القرارات في قادم الأيام؟
=هل يعلم أعضاء المجلس أن طبيب الهلال التونسي فد غادر لبلاده؟
=منو الورط الكاردينال في بعض القرارات؟
=منو صاحب القرار في الهلال؟
=منو الماسك الريموت ويحرك الأشياء؟.
=منو الإداري الذي رفض مصافحة زميله؟
=منو العقل المدبر لكل ما يحدث في الهلال؟
=برضو الهلال لا يغيب إلا ليظهر بدرا.
خبر طازج.. انقلاب في الهلال.
امسح للحصول على الرابط
بواسطة : حسن عبدالرحيم
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019