• ×
الجمعة 17 سبتمبر 2021 | 09-16-2021
بابكر سلك

KNEE BROPLEM

بابكر سلك

 16  0  2733
بابكر سلك


* انقرا تيقا باخوخي فنجاك اقيم دافو ميغا كروكوري افونقا جاجا خرباستون
* انتوا قايلين الكلام الفوق ده رطانه ??
* دي مارطانه
* سمح قايلنها كجور ???
* ده ما كجور
* لكن اكيد قايلنها تعويذه
* وبرضو ماتعويذه
* قايلنوا كلام خارم بارم ???
* برضك ما كلام خارم بارم
* الكلام الفوق ده هو اسماء اجانب الهلال
* تلاته بي الف
*و عنوان العمود الفوق ده يعني مشكلة في الركبة
* الكلام ده مكتوب في موقع النادي الجايبين من الزول
* الناس ديك مابكضبوا
* مازي الناس ديل
* مشكلة في الركبة
* بوكس بس
* بكونوا الجماعه قالوا لي كردنه مشكلة الركبة ما مشكلة
* نعدلها ليهو بهاي لوكس يحرق تش
* يعني جايبنوا وعارفنوا مكوك ومتوك
* وناس الموقع لما عرضوهوا ماكضبوا
* ختوا النصيحين بي جاي
* وطماطم الملاح بي جاي
* كردنه طبعا بحب طماطم الملاح الزهيدة التمن
* وخم منها
* وطبعا طماطم الملاح بتخمر سريع
* يقوم كردنه يجدعها ليك قبال الطبيخ يستوي
* زي ماجدع طماطم الملاح بتاعت الموسم الفات شهر تلاته والتسجيلات شهر ستة
* تلاته بي الف ماركة الكسكتة
* غايتو كردنة ذكرني الناس ديك
* كلو خمسة سنين يقولوا لينا الخمسة سنين الجايات نوعدكم برفاهية
* وتجي الخمسة سنين الجايات وتبقي لارفاهية ولا ماهية
* يقوموا يقولوا لينا الخمسة سنين البعدن ماحايبقي في فقير في البلد
* وتجي الخمسة سنين البعدن والبلد تبقي بلد فقرا
* الناس كلها ترقي وتحوط وتهمهم بتسبيحات لا يعلمها الا الله
* مابخجلوا
* يجونا ناطين تاني من جديد بعد جديد
* وآخرتها لما يزيدوا الاسعار يصفقوا في البرلمان للقرار
* قالوا لينا حانطلعكم من عنق الزجاجة
* بس نحنا الماقبلنا عشان كده حتلنا بعد مرور خمسة سنين خمسة مرات في قاع الزجاجه
* وهكذا كردنه
* القنبلة السبت
* ويمر السبت
* وبدون خجله القنبله الاحد
* ويمر الاحد
* ويتوسد بعض الاهله الشرفاء ود اللحد
* ويوم الاتنين يقول القنبلة انفجرت في الطريق
* لكن في قنابل غيرها في الطريق بتصل الاربعاء
* ويمر الاربعاء والخميس والليلة الجمعه
* ويستجلب الهلال طماطم ملاح وفطومة وروشا يصفقان في برلمان كردنه
* خليكم جوه عنق الزجاجة ده ياروشا مع صفركم
* منظركم ببقي زي البلية
* بره قزاز وجوه ظهرية
* و ارجوا الخمسة سنوات القادمات
*KNEE BROPLEM* ياروشا ?
* عبد المنعم الشفيع ضحك عليكم شديد
* ده علاج نهي يا روشا
* ايها الناس
* فشل الهلال في ادارة ملف الاجانب لان كردنة يريد ان يبنيهو بالخطب الحماسية وجدعت الطاقية ووعود الخطة الخمسية
* كده مابتجيبوا بطولة افريقية يافطومه واسألوا مجرب
* نحنا لما جبناها قبل سبعة وعشرين سنة ماجبناها ساي
* اسألونا عشان تستفيدوا يا محمد عبدالماجد
* المهم
* اذا مشيت السوق داير ليك صابونة
* اذا قلت للبائع بي كم
* وفتحت خشمو قال ليك بي خمسة
* ضرب علي تلاته بتشيلها
* وفي بعض البائعين قبل يقول ليك السعر بمسك ايدك عشان ما تمشي
* يقول ليك بي سبعه
* تحاول تفك ايدك يقول ليها شيلها بي اربعه
* تخرخر يقول ليك دايرة بي كم
* تقول ليهو بجنية
* يلفها ويديك ليها
* اها دي طريقة اجانب كردنة
* يقول ليهم الماسورة ده بي كم
* يقولوا ليهو بي تلتين الف دولار
* يحاول يمشي يقولوا ليهو شيل اتنين بي خمسين
* كردنه ود سوق والدنيا خلقت منو زول مقرم
* يعدل الكسكته
* يقولوا ليهو شيل تلاتة بالخمسين
* يقول ليهم اربعه
* يقولوا ليهو ماعصرت علينا ??
* يقول ليهم خلاص تلاته و معاهم اب ركبة داك المابضحي ده
* يلفوهم ليهو في كيس
* يجيبهم البلد
* روشا يعرض وفطومة تزغرد و جماهير الهلال تستني الخطة الخمسية القادمة
* الموسم ده محمد عبد الماجد حايكتب لينا عن عثمان حسين والنصري وخوجلي عثمان ومحمد الامين
* السنة دي يا محمد عبد الماجد ابقي الدكشنري يا اخوي واقع الحقيبة
* ناس اب ركبة ديل مابدوك فرصة كتابة في الكورة
* الناس راجية دوروقبا تجيب ليهم معطوب ركبة !!!!
* ايها الناس
* نشكر مجلسنا علي دوره الطليعي و الرائد ونهجه العلمي الذي اتبعه ومن سكات
* لان مجلسنا شعاره
* حانبنيهو البنحلم ليهو يوماتي
* وذلك البناء لا يتم بالخطب الحماسية ولا بالضجه في الرادي
* وشكر خاص للاخ محمد الريح السنهوري الذي تكفل بكل نفقات تسجيل لاعبنا الاخير القادم من ابي سعد
* سنهوري دفع كاش للنادي وللاعب وفي صمت مقدس
* ايها الناس
* ان تنصروا الله ينصركم
* لها
* نجي لي شمارات والي الخرتوم
* كان شفت يا والينا
* كلو يوم الصباح نقيس نشوف السكري عمل كم والضغط عمل كم والدولار عمل كم
* يوماتي يا والينا ده الحال الفينا
* والغريبة برغم كل العلاجات مافيهن واحد ساكت نزل لينا
سلك كهربا
ننساك كيف والكلب قال الجماعه ديل غلبتم عديييييل كدة و رقد اتمدي طويييل واتمغي وناااااام.. عرفها ابن الكلب

والي لقاء

سلك

امسح للحصول على الرابط
بواسطة : بابكر سلك
 16  0
التعليقات ( 16 )
الترتيب بـ
الأحدث
الأقدم
الملائم
  • #2
    كاتوله 11-19-2016 03:0
    على الطلاق لو انا محلك تاني ما اكتب
    يا اخوان معقول عندنا ناس جلدها تخين بالطريقة دى
    قال BROPLEM قال
    انت لو مابتعرف لغة انجليزية الفلسفة وخفت الدم شنو ؟
    كدى اعرف اكتب بالعربي اول
    اقول ليك حاجة استشير الكلب ابن الكلب
    وخليه يراجع ليك المقال
    مقال شنو ? اقصد يراجع ليك الغثاء الفوق ده
  • #3
    عبدالله ولد محمد الدنقلاوي 11-19-2016 01:0
    عليك الله ماتمشي ساااي خلاص ماتزعل
    شيل الخمسة ب تلاتمية ومعاهم انبوبة اسبير
    اها قصرت معاك والله زعلك ما بنرضاهو
    يعني حله وغطا حله
    ياابرهيم الحلبي جااااك زبون
    نجيك بمواصلات جامسكا ونمشي الشنقيطي والباقي كداري
    وننساك دا كلام ننساك والله حرام - ننساك انت انت بتتنسي ما انت روحنا وحبنا
  • #4
    الامين محمد نور 11-19-2016 10:0
    نسالكم . نسال مجرب . اي مجرب الجاب الكاس بالصدفة و حاجات تاني حامياني . طيب نسال المجرب . قبل 27 سنة جبتوا كاس و اصبحتوا عندكم خبرة .السؤال : خلال ال 27 سنة خبرة كم كاس جبتوه ؟ كم عدد كاسات الابطال ؟ كم عدد كاسات الكونفدرالية يا زنطور ؟ يا مهرج . يا خي خليك في كسير التلج للوالي لزوم المعيشة ما دام الخطة الخمسية ما جابت حقها .هذا النوع انت بارع فيه فلا تقتل هذا الفن و هذا الابداع .سر في هذا الطريق و ابدع . الشيك و الدولار و الجنيه يختموك و يعقبوك .
  • #5
    ابو مازن 11-19-2016 10:0
    الحمد لله انك اعترفت يا عم تنقو ان بطولنك ليها سبعة وعشرين عاما " اكثر من ربع قرن من الزمان " أها في السبعة والعشرين عاما بعد بطولتك الوهمية دي عملتوا شنو وجبتوا شنو ؟؟!! عالم وهم ودلاقين .
  • #6
    ابو مازن 11-19-2016 10:0
    الحمد لله انك اعترفت يا عم تنقو ان بطولنك ليها سبعة وعشرين عاما " اكثر من ربع قرن من الزمان " أها في السبعة والعشرين عاما بعد بطولتك الوهمية دي عملتوا شنو وجبتوا شنو ؟؟!! عالم وهم ودلاقين .
  • #7
    عباس عبدالرحمن بشير 11-19-2016 09:0
    أن الكلاب لطويلة الاعمار. . أظنه بسبب مستوى كتابتك ما قدرت تدخل تترافع في المحاكم. لكن يلا أهو برضو الصحافة بتاكل رغيييييف
  • #8
    أبو انس 11-19-2016 09:0
    لما تعرف كيف تكتب باللغة العربية بعدين امشي جرب تكتب كلمات باللغات الأخرى . ممكن تدعي إنك قاصد لكن أجزم انك لا تعرف ال spelling الصحيح للكلمة التي وضعتها عنوان لمحاولتك كتابة عمود صحفي ولا أقول عمود صحفي لأنك لم ولن
  • #10
    أسامة باكمبا 11-19-2016 01:0
    Broplem حقتك دي يا سلك بتتكتب problem وكمان مع إصرار على تكرار الخطأ .. الله يسلك شنو اقول ليك
  • #14
    كردنة 11-18-2016 10:0
    هههههههة وكل إناء بما فيه بنضح. ال Broplem ال. ما بلومك ما !!!! PROBLEM وليس BROPLEM.
    هبالة العواجيز شينة
  • #15
    ابوناصر 11-18-2016 10:0
    والله انت أظرف زول وكتاباتك فيها ابعاد لكل البلد والليلة ضحكتني شديد لك تحياتي
  • #16
    قـدر ظروفك 11-18-2016 10:0
    انت يازول فعلاً سلك أول ما مزمز يختك في الكهربه طوالي تمسك في الهلال وأصبحت تركب الموجه زي شعبوط المجنون وحالتكم الاتنين تحنن معقولة الوضع الاقتصادي وصل للدرجة دي وبعدين الوالي (مش والي المريخ) لما قفل الماسورة قبلت عليهو
    اها نجي لي شمارات الوالي المره دي والي المريخ
    ننسااك كيف والكلب عمل اللي عليهو وكتب في الهلال / قدر ظروفنا
    هؤلاء هم الصحفيين حسبي الله ونعم الوكيل
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019