• ×
الإثنين 1 مارس 2021 | 02-28-2021
بابكر سلك

وعايشين مـع الكافــر ده كيف

بابكر سلك

 2  0  2834
بابكر سلك


* الزنق زمن كردنة
* أقصد الزمن زنق كردنه
* بعد ده لو جابم من أصلاب آباء مشلخين وأمهات داقات شلاليفهن ما بلحق السيستم
* وسوق الخضار قرب يقفل
* الخضار السمح عزلوهوا بدرى بدرى
* فضل الخضار الكعب وطماطم الملاح
* لذا يضطر كردنة يشيل من المعفص والمكسر وينقل فى طماطم الملاح
* وفطومة أختى تعجبك
* أكيد حاتقول ليهو أبشر يا عراب
* طماطمك الجبتها كلها سمحة
* والخوف فطومه من الطماطم المخفجة دى تقول دايرة تعمل محشى
* وتجيب قلمها وتقعد عشان تقرقر طماطم الملاح الجابها كردنه
* المخمرة أجدعيها يا فطومة عشان ما تعمل تسمم لجماهير الهلال الوفية البتأكل من

جنس المحشى ده
* لكن صدقينى تعملى طماطم الملاح محشى الرز كلو يمرق براااااااااهو
* طماطم الملاح داقه سيستم والرز بنصل
* أقول ليك يا فطومة
* أخلطى طماطم الملاح دى كلها
* وصفيها لما مويتها تكمل
* أغليها فى النار وأعمليها صلصة بيعوها فى أديس قدر ظروفك بالملعقة
* الحبش ديل مافى خوف منهم
* بلدهم فيها أكبر مصنع مويه عصرى
* مصنع موية صحه
* لكن الغريبة الحبش ديل كيف يستعملوا موية الصحة ومطرتهم قرش ونصهم؟؟
* خاص صفحة الأحمر الوهاج
* حاجة تحير
* المهم طماطم الملاح الجابها كردنه دى ودوها الحبشه
* ولو تذاكر الطيران زادت ودوها الديم
* برغم انو الديم زى ما قال الحبشى عيبو السودانيين كترو فيهو
* المهم
* هلالابى محترم سألنى
* إنت ليه بتكتب أحلامكم جزء من ماضينا؟؟
* قلت ليهو إنتو أحلامكم شنو؟؟
* قال لى نعتلى منصات التتويج الأفريقية
* قلت ليهو ده ياهو زاتو الجزء المن ماضينا
* سكت
* صنقع ودنقر وقال لى
* حانسجل أوكراه
* قلت ليهو
* غاية طموحكم جزء من ماضينا
* المهم
* المدرب برضك قنبلة يا روشا ولا صاروخ ساااااى؟؟
* حقيقة فرق المريخ من الهلال زى فرق الدولار من جنيه كده
* المهم
* الليلة الأهلة الشرفاء على وعد بقيد طماطم الملاح على كشفهم
* فريق ولا حلة دمعه يا محمد عبدالماجد !!!!!!!!
* سمعنا تحت تحت قالوا واحد من طماطم الملاح نزل من الطيارة بالقلبة
* نزل السلم ووشو مقبل على الطيارة
* خاص صفحة الأحمر الوهاج
* البص واقف باليمين
* صاحبنا مشى بالشمال
* يجيبوهوا بى هنا
* يمشى بهناك
* الجماعة هللوا وقالوا لياقتوا ميه الميه ما داير يركب البص
* داير يتمشى كتمرين
* وقالوا ده المحترف يا بلاش
* عينو على مبانى المطار
* مشى على الساحة الخضراء
* رجعوهوا مشى على حى الصفا
* أحى أنا
* ماقلتوا القوة المالية الضاربة لكن السؤال يا خالدونا
* هو مالو بمشى كده وكده ؟؟؟
* أيها الناس
* سمعنا انو طماطم الملاح الجايبه كردنة دى عملوا ليها الكشف الطبى بره
* فهل يقبل إتحادنا والذى يمثل الجودة والمواصفات فى هذه الحالة بنتائج الفحص

الطبى المعمول بره ؟؟؟
* أفرض واحد فيهم عندو إيدز حمانا الله ولا كبد وبائى
* يقوم يعادى لينا أولادنا داخل الملعب ليه ؟
* أفرض واحد سعران
* السعر ده كمان معاهو لعب !!!
* السعران ده لو قاموا عكسوا ليهو كورة قام عضاها ؟؟؟
* القصه دى على الهلال ولا على الكاردينال ولا على الإتحاد ؟؟؟
* قبل كل ذلك
* خاص صفحة الأحمر الوهاج
* طماطم الملاح دى عندها كروت حمى صفرا ولا خميتوها بى جقورها وجبتوها يا

روشا ؟؟؟
* أيها الناس
* الرأى عندى أن يتمسك الإتحاد بإجراء فحص طماطم الملاح دى فى البلد دى وفى

جهة معترف بها زى مستشفى حاج الصافى
* وعلى الأندية المشاركة فى الممتاز الضغط على الإتحاد فى الحياة دى لو عمل فيها

ما بعرف يقرا برتغالى
* ذنبهم شنو ناس تريعة البجا أولادهم يتعرضوا لخطر إنتقال أمراض خطيرة ليهم

بسبب التجاوزات
* أيها الناس
* إن تنصروا الله ينصركم
* أها
* نجى لى شمارات والى الهرتوم
* أكان شفت يا والينا
* إتنين بتاعين بحر من اهلاً لينا
* الله يهديهم ويهدينا
* واحد فيهم كان بره البلد زمن طويل ما شاف سنينا
* أول من وصل لى صاحبو يا والينا
* وإتجهوا للبحر القديم الوحشوا سنينا
* قاعدين كده يا والينا
* المغترب قال للزول الهنا
* أحكى لى قصص عنكم وعن البلد يا المحينة
* المحينة خكى تمنين قصة حزينة
* المغترب قال ليهو ما عندكم حنك سعيد يا محينة!
* المحينة قال ليهو حنك سعيد من وين والجوع سيد الموقف فينا
* الجوع كافر يا أخينا
* المغترب قال ليهو نعم الجوع كافر
* لكن عايشين مع الكافر ده كيف يا محينة !!!!!!!!
* خاص صفحة الأحمر الوهاج

سلك كهرباء

** ننساك كيف والكلب قال المادة الأولى من دستورنا نحنا الكلاب بتقول الكلب لو

جاع شديد بسعر بسعر وبتغابى فيك العرفة وبعضيك بعضيك .. من ناحيه بعضيك

يعضيك ؟!!!
والي لقاء
ســـــلك
امسح للحصول على الرابط
بواسطة : بابكر سلك
 2  0
التعليقات ( 2 )
الترتيب بـ
الأحدث
الأقدم
الملائم
  • #2
    كمال الدين حسن 11-20-2016 12:0
    والله ده كلام خارم بارم لايستحق ان ينشر وغير مفيد البته .
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019