• ×
الأربعاء 23 يونيو 2021 | 06-21-2021
معاذ ابو مؤيد

النيلين تسقط للمرة العشرين وعطبرة تحتاج لروابط ومشجعين

معاذ ابو مؤيد

 6  0  1597
معاذ ابو مؤيد


المسلسل مستمر من غير اعلانات وفواصل
المسلسل ليس علي قناة النيلين دراما
المسلسل مستمر في قناة النيلين رياضة
نفسي افهم الناس دي شغلتهم شنو غير نقل المباريات واقديم برامج رياضية مصاحبة للبطولة!!!
لاعندهم زحمة برامجية
ولاعندهم اصلا خارطة برامجية
يعني شغلتكم كرة قدم
يعني استعدادكم مفروض يكون من النهار،،،
يجوك وقت المباراة ويقولوا لينا عطل فني !!!
انت من النهار لحدي وقت المباراة عندكم شنو!!!!
في حاجه اسمها (تست)
(التست) بيتعمل للصوره والصوت ويتعمل ربط بين الاستديو والملعب وتست مع مدينه الانتاج الاعلامي
هل الصوره واصلاهم والصوت معاه،،،،
لو قلنا العطل مرة واحدة نقول حاجة فجائية لكن طوااااااالي كده!!!
والسر شنو في كميرات مباريات المريخ ضاربة الوان!!!
وبعض الملاعب الوانكم الي حد ما جيدة!!!
ليه مباريات المريخ تنقل بكميرات تعباااااانة!!!!
انا واحد ناس خاتيكم (ان فوكس)
عايز اعرف فهمكم شنو !!!!
انتو قناة متخصصة رياضيا
وماعندكم شغله تااااني،،،
احترموا المنشط
احترموا المشاهد
احترموا المهنة
المنتج البتقدموه ليس بمنتج جيد ويعتبر مشوه تماما
منتج لايصلح للبث الفضائي ولا حتى بث ارضي
اتعبتونا ونحن نتحدث عنكم
ماعارف بتقدمو عرض للاتحاد ليه لنقل المباريات وانتوا ماعندكم امكانيات !!!!!
ارحمونا وارحلو من فضائنا واتركو العيش لمن يستطيع ان يصنعه،،،

الحمد لله الايام دي المتعة الكروية ممتده معانا طول اليوم
كل الدوريات تتنافس في الامكانيات والخدمات المقدمة للمشاهد داخل وخارج الملعب
نحن اي شي عندنا مشوه!!!
ملاعب تفتح النفس
نقل تلفزيوني يعيشك داخل الاستاد
معلقين ولا احلي
تنافس في حاجه اسمها كرة قدم
الدوريات كلها كوم ودورينا كوم تاني!!!!
ختام سهارتنا امس مع ابطال افريقيا
الوداد واسك العاجي
متعة كرة القدم الحقيقية
فنون في الميدان وخارجه
جماهير لاتفقد الامل حتى اخر دقيقة من المباراة
اطراف الفريقين الشمال لاعبين يصنعون الفارق اتمنى ادارة النادي تلتفت لهم ويكونوا مرصودين ،،،،،
مبروك للفرق المتاهله
الوداد وزسكو وصن داونز والزمالك غالبا
دورى الاربعة سيكون من نار
ومتعة المشاهدة حاضرة
كرة القدم صناعة
وللاسف نحن صناعتنا يدوية وغير متقنة ،،،،،
نحن بعيدين خالص
لا بنية تحتية ولا برامج مساعدة لانتاج بطولة غير مشوهه
محتاجين سنين ضوئية للخروج من النفق المظلم دا
والي ذلك الحين نعيش مع المريخ الا ان ينصلح الحال،،،،

ونحن علي المدرج ندعم ونشجع ونتفرج
انطلقت نفرة شهر سبتمبر في تجمع قروبات المريخ
والحمد لله الحصيلة جيدة حتى الان
والتنافس محتدم بين القروبات
الصفوة لم تعجبهم نفرة اغسطس ويريدون التعويض بنفرة سبتمبر
وباذن الله سيتحقق المراد
تجمع القروبات يفتح ابوابة لمن اراد الالتحاق بالركب
بوابة تجمع القروبات مفتوحة علي مصراعيها لكل من اراد الالتحاق بهم
ومشروع القروبات المهنية ايضا يفتح باب الانضمام للجميع للتسجيل حتى تنطلق التنمية الفعليه في مؤسسة وكيان المريخ
انضمامك للقروبات المهنية
فرصة حقيقة للاحتكاك بزملاءك
من نفس المجال
وفرصة حقيقة لتوفير فرص وظيفة للاخرين ،،،،
انضم ولن تندم
قروبات المريخ المهنية
هي الحل

همسة اخيرة
المريخ يعيش في استقرار ويقدم السهل الممتنع
كل ذلك يرجع لسببين
الابتعاد عن الاعلام
والانضباط
لو تعاملنا بنفس المبداء طوال العام سنحقق فريق محترم ومنافس خارجيا وداخليا
ابعدوا عن الاعلام
وطبقوا الانضباط
سنجني الثمار لسنوات وسنوات
فلتستعد جماهير المريخ للوقوف خلف المريخ في عطبرة منذ الان
ويامريخاب نهر النيل
الحوبة حقتكم والدور دوركم
والساساب اعلنوا الرحيل خلف الفريق الي عطبرة
فهل نشوف تنظيمات اخرى
والالتراس يرفعون راية التحدي والسفر
ننتظر الايام كفيلة لاعلان معظم الروابط التشجيعية والالتراس السفر خلف المريخ
ولو العدد كبير
لاضير من الاتفاق مع السكة حديد لتسير رحلة مخصصة الي عطبرة ذهاب واياب
وبالتاكيد السكة حديد سترحب لانها تنافس في العودة الي سيرتها الاولي
ولابديل للسكة حديد الا السكة حديد نفسها
خاطبوهم وافتحوا الفرصة للجميع للسفر والسفر بالقطار اجمل وامتع
جربوها ياشفوت المريخ هذه المرة
وستكرروها طوااااالي
والي لقاء في تغريدة اخرى
هذه اراء التغريدة اقبل منها ماتشاء وارفض منها ماشئت..
التغريدة تنقل نبض المدرج والقروبات وتقف في مسافة واحدة من الاحداث ،،،،،
نحاول ان نلفت الانتباه لبعض الاحداث والنقاط بواقعية........
التغريدة لن تخرج خارج نطاق المجتمع المريخي نهائيا الا ماندر
ونقد الذات يوصلنا الي الامام والي المنصات باذن الله ،،،،،
ادعمونا بالنصح والارشاد وصححونا إن اخطأنا في يوم من الايام ،،،،،،،،
***تغريدتنا ونسة وحكاوي ونقاط بصوت مسموع***

للتواصل
واتس اب/ ٠٠٩٦٦٥٩٢٠١٦٨٤٨
تويتر abumoshtaha@
abumoshtaha77@gmail.com

امسح للحصول على الرابط
بواسطة : معاذ ابو مؤيد
 6  0
التعليقات ( 6 )
الترتيب بـ
الأحدث
الأقدم
الملائم
  • #3
    طارق 08-15-2016 11:0
    محتاجين نفره لشفوت جده وسترون الابداع باذن الله ومريخاب جده غير
  • #4
    باكمبا 08-15-2016 10:0
    خربت عمود بحديثك عن مباريات المريخ فقط، أيه العقلية التأمرية والدونية دي، إن شاء الله تكون شفت آخر مباراتين للهلال عشان تشوف ، هههههه
  • #5
    الجعلي 08-15-2016 09:0
    والله أولا احييك علي كلامك الجميل وتحفيزك لمريخك من دون المساس بالند الهلال وهذا يعتبر فهم راقي منك .. فكل واحد منا حر في تشجيع فريقه والتغزل فيه ولكن دون تجريح المنافسين والإساءة اليهم ..
    ثانيا اتفق معك تماما في نقدك لقناة النيلين .... فهذه قناة غير جادة وعلي ما يبدو ما عندها إدارة زاتو .. لان الشي البعملوا فيهو دا ما عندو علاقة بالنقل والبث المباشر .. كلام فاضي وعدم اهتمام بالمنافسة وينقلوا بي مزاجهم ... التحليل سئ جدا خاصة الزول الاسمو إسماعيل عطا المنان يا اخي دا بقول كلام ساي والسلام ... فقرة التحكيم بايخة وساذجة والنقل لا يساعد علي الحكم علي أي لقطة ومقدم الفقرة زاتو لا يعرف كوعو من بوعو ؟؟؟؟ يا اخي مرض بس والله ..
  • #6
    وطن الجمال 08-15-2016 08:0
    "ليه مباريات المريخ تنقل بكاميرات تعبانة". الزول دا شغال معاكم فنى اصلاح كاميرات يا مدير التلفزيون! احنا والله ودنا واملنا تنقل مبارياتكم بي ان سبورت عشان نشوف خيباتكم ظاااهرة وواااضحة.
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019