• ×
الخميس 28 مارس 2024 | 03-27-2024
معاذ ابو مؤيد

قناة النيلين متاكدين فضائية ولايوتيوبية

معاذ ابو مؤيد

 1  0  1484
معاذ ابو مؤيد

والمباراة القادمة للمريخ تحتاج لوقفة الارادة المريخية

اولا نبارك لجمهور المريخ حصاد كامل نقاط كوستي ونتمني التجويد في قادم المباريات
والاعتمد علي الشباب عمرو ظنو ماخاب،،،،
لن نتحدث في تفاصيل المباراة الفنية لكن نتحدث عن الحالات المصاحبة من رداءة نقل والخ...

كالعادة ياسادة
قناة النيلين مصدر التعاسة
ماعارفين ناقلين الكورة بالنت وبي كم ميغا!!!
كورة فجاءة تقيف في الهواء
وفجاءة تلاقيها في يد الحارس
ومرة تلاقي الصورة في الجمهور ثابتة!!!!
دي حرق اعصاب
ولا دي القراية ام دق البقولوا عليها!!
معقولة لكن
كورة تقطع اكتر من تشتغل !!!
الجمهور دا ماهو الزنب الذي اغترفه!!!
لو ماقادرين علي نقل المباريات امشو شارع بيويوكوان افتحوا ليكم تصوير مناسبات!!!
المحتكرين ليها شنو
ليكم حق تكونوا في العربسات
لو النايل سات مع تقطيعكم الكتير دا كان مسؤل الاقمار طلع اعلانات!!!
لكن العرب سات الصورة لو استل او شغالة مافي زول جايب خبر الي جمهور كرة القدم السودانية
حتى الاستديو التحليلي
جودة غريبة لاتفريغ كرومة ذي الناس ولاحتى المخرج عارف الفاصل من مواصلة الحالات!!!
بالله عليكم الجودة حقتكم كم ميغا!!!
وترددكم دا حيصل لجودة الHD
ونحن علي قيد الحياة ولا بعد الممات!!!
والله نقلكم دا اخنق فطس
ناقلين شوط والشوط التاني بيكون عدد دقايق التوقفات!!!
محمد فضل الله جهد مقدر
لكن كمان ياخوي عويناتنا ديل طششن !!
وحالتو الكورة ملعوبة بالنهار
كان ليل غايتو الواحد الا يلبس دبل نظارات !!!
دورينا ياسادة محتاج مشاهدة
وانتو بي وضعكم دا بتطردوا في المشاهدين
وبتقولها بالبارد لينا
ورونا مقاس (كتفكم) اقصد عويناتكم
النشوف نهايتكم شنو
ويامخرجنا ركز هلي الكميرات العالية طشاش لطشاش احسن نشوف كامل الميدان

لن نناكفكم
ولن ندع اقلامنا تجاريكم
ولن نكون بنفس اقلام من يخدرون ناديكم
سنرتقي بالطقطقة عليكم
ليس باقلامنا
ولكن نتائجكم من تشمت فيكم
لن نشمت في العرضة شمال وابناء الكاردنال
ولكن سنقول لهم
الكورة مدورة وانتم لستم بفريق الاحلام!!!!
من يتكبر علي الكرة ستتكبر علية وان طال الزمن
تناولت صحافتكم لكل الفرق بالسخرية ورسمتم هيلمانة لفريق محدود الامكانيات وخاب ظنكم
والقادم سيجردكم ويكشف حجمكم الطبيعي امام العالم
طالما نتائجكم ترد علي السنة اقلامكم وبائعي الترماي في حارتكم فذلك يكفينا طقطقة
من يقودون اعلامكم يتوارون عند هزائمكم
نكتفي بذلك لان اوجاعكم تحتاج الي مضادات حيوية اربعة حتي تفوقوا من احلامكم المرسومة في اعمدة بعض كتابكم
نرجع لمدرسة المريخ
ونرجع لتربية المريخ
ونرجع لشباب المريخ
قلنا الصبر ياناس علي الشباب
واتركوا لهم الفرصة وابعدوهم عن الضغط الجماهيري والاعلامي
سنجني صبرنا قريبا
المهم العودة بالثلاث نقاط في ظل الاجواء الخريفية وكل المطبات
اصبروا وادعموا حتى ننال مانريد
ياشعب المريخ

مسك الختام
متى مااعطيت كرة القدم اهتمامك وانضباطك واحترمتها
ستعطيك من اوسع الابواب
دعونا نحترم تلك الكرة
ودعونا نساعد مجلسنا في الانضباط
ودعونا نبعد الضغط عن لاعبينا ولانطالبهم باكثر من الثلاثة نقاط
لو تمت هذه الاشياء سنرى التجويد في مقبل الايام
وقبل هذا رسالتنا للاعلام
ابعدونا عن التطبيل والمهاترات واعمدة التحليل
ادعموا نفرتنا واللاعبين في حدود الواقع بعيد عن الخيال
مافي شي بيضيعنا غير
الغزل في داك الشبال
وفلان الليلة نجموا فات الكبار والقدرو
وعلان داك نقط الكورة كما في الكتاب

ونحن علي المدرج ندعم ونشجع ونتفرج
قبل فرجتنا دعونا نتقدم بالشكر الي سكان مدينة كوستي وكنانة
ونشكر ادارة الرابطة كوستي ومريخ كوستي علي الحفاوة والاستقبال لروابط المريخ وادارة المريخ واللاعبين
كوستي تعكس وجه مشرق لبلادي
في الكرم والاحترام والتعامل الاكثر من راقي
شكرا لكم نيابة عن جماهير المريخ ومجلس المريخ وامة المريخ
شكرنا يمتد لااهل كنانة وكل التسهيلات التي اتقدمت للبعثة من اقامة وتدريبات واهتمام من اجهزة الدولة والولاية
فعلا كوستي بوابة جديدة للسودان
اها مشجعي المريخ نايمين امس في زحمة نعم
نعمة الرجوع بالنقاط
وهزيمة الجار
يلا عشان المعنويات دي
ساعدونا بالنفرة
الزمان ٢٠١٦/٨/١٠
المكان نادي المريخ
تحت شعار بنفرتنا نسدد غرامتنا
يلا شارك وكن فعال
تواجدك في القروبات ليس فقط في المشادات وقراءة اقوال الصحف وبعض الاعمدة وكتاب المقال
لاتنتظر نداء المشرفين وكن مبادر
وتحية للقروبات الشغالة نفرة الان بقيادة الديناكوردات والصفوة ٣ وقروبات ناديك ومريخ البطولات
الهمة ياشباب
الزمن جاري ونحن جارين وراهو

همسة اخيرة
لن نبالغ في الافراح وعلينا الاستعداد منذ اليوم لقادم الايام
ومباراة الامير البحراوي تحتاج الي مجهود مضاعف
الامير ليس بالفريق السهل وليس بفريق الدورة الاولي
معظم اللاعبين في الامير من مشاطيب المريخ
من حقهم ان يثبتو لنا ان شطبهم خطاء
لكن من حق شبابنا الرد عليهم بان هذه سنه الحياة واننا الاجدر للتمثيل بعدكم
كل مشاطيب المريخ سيلعبون كما لم يلعبوا من قبل بقيادة بلة جابر وطارق مختار
لكن شبابنا سيردون باننا هنا باذن الله
الرسالة للمجلس واللاعبين والجهاز الفني وقبلهم الجمهور
تعاملوا مع المباريات بحساب النقاط وعدم التفريط
وباذن الله الفارق يصبح في الايام القادمة عكس النقاط
تعاملوا مع المباريات بالقطعة وستكسبون الرهان

خارج النص
نتمني مشاهدة نجم الجالية السودانية في مقبل المباريات
هجومنا يحتاج الي تجريب كل النجوم واعطاءهم المساحة
وطالما نبحث عن الثلاثة نقاط لابد من الهجوم
لكن محسن وبرهان حابسين بعض النجوم في الدكة
اطلقوا ارجلهم في الميدان
ياكباتن
نتمني من اعلام وصحف المريخ الارتقاء الي مستوي فهم القراء
ونشر مايفيدهم ومايدعم الكيان
والعناوين البراقة واعمدة التحليل لن تخدم قضيتنا
خلوكم قريبين من نبض المدرجات
وصيتنا ليكم
الجمهور الجمهور الجمهور
لولا الجمهور لما كانت كرة القدم وحلاوتها
لولا الجمهور لما اتباعت صحفكم واستمرت التجارة
ولولا الجمهور لما اتت ادارة ولم تحقق دخل لشراء لعيبة
الجمهور هو عمود كرة القدم الحقيقي
احترموه في اعمدتكم وعناوينكم
وخلوا صحفكم ذات محتوى جاذب للمدرجات
والي تغريدة اخرى في مقبل الايام
لم ننسى الاحصائيات لكن سنعود قريبا باذن الله

المريخ مريخ الشعب والشعب هو الجمهور
المريخ وطن للشعب والشعب هو الجمهور
المريخ وطن مساحاته شااااسعة وابداعاتة كثير لايتنفس هواءه النقي الي صاحب الرئة التي تنبض وتنطق بكلمة (نحن)
اصحاب رئة (انا) كالمتناول للدخان رئته يكسوها السواد لانها استنشقت كتير من حب الذات

(القصة ماقصة بطولة القصة عشق لكيان ونادي منذ الطفولة)


# هاشتاق طبي
الانتباه الي لون اللسان
يمكن للون اللسان ان يكون مؤشرا لمشكلات صحية لذا احرص على لونه واكتسابه لاي لون مختلف ، فاللون الابيض يدل على ضعف في جهاز المناعة واللون الاصفر يدل على الافراط في الطعام والشراب والاحمر في طرف اللسان يعتبر مؤشرا على الاجهاد النفسي .
وربنا ينعم عليكم بالصحة والعافية

# هاشتاق عام
من مقولاتهم

(جون كيهو )
إن كنت ترغب في التعرف على سبب سعادتك أو تعاستك في الحياة فليس عليك إلا أن تنظر في داخلك



هذه اراء التغريدة اقبل منها ماتشاء وارفض منها ماشئت..
التغريدة تنقل نبض المدرج والقروبات وتقف في مسافة واحدة من الاحداث ،،،،،
نحاول ان نلفت الانتباه لبعض الاحداث والنقاط بواقعية........
التغريدة لن تخرج خارج نطاق المجتمع المريخي نهائيا الا ماندر
ونقد الذات يوصلنا الي الامام والي المنصات باذن الله ،،،،،
ادعمونا بالنصح والارشاد وصححونا إن اخطأنا في يوم من الايام ،،،،،،،،
***تغريدتنا ونسة وحكاوي ونقاط بصوت مسموع*
امسح للحصول على الرابط
بواسطة : معاذ ابو مؤيد
 1  0
التعليقات ( 1 )
الترتيب بـ
الأحدث
الأقدم
الملائم
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019