> أفقدان المريخ للنقاط بالولايات أصبح شيئاً طبيعياً > والتبرير بسوء أرضية الملاعب تبرير فطير
> يفقد المريخ نقاط الولايات لان ناس المريخ ما بعرفوا شغل الكورة
> لاحظوا لما نكون ماشين ولاية
> حشد جماهيري وتوجيه معنوي كبير يحدث في تلك الولاية للوقوف بشدة في مواجهتنا > من يحرك تلك الحشود ليس الفريق المنافس
> ولكن يحركها منسوبو الفريق المنافس
> وقعت ليكم موش؟
> ونرفع نحن شعارات لن ندعك تسير وحيدًا يا مريخ
> ويرافق المريخ خمسطاشر مشجع من تجمع الروابط كتر خيرهم
> استنفار لجماهير المريخ بتلك الولاية لا يحدث
> استنفار لجماهير المريخ من المدن المجاورة لا يحدث
> وللبعض يصنع الإشكالات بانفعال شديد مع الحكام بغرض التأثير عليهم
> هم ناقصين الحكام ديل
> ولما يجي الفريق المنافس لنفس الولاية لمقابلة الفريق المنافس
> لانرى حشودا منفعلة ولا ثورة ضد التحكيم
> بل نجد سكوت جماعي من نفس الجماهير حال تدخل التحكيم بخطأ كعادته وهزم فريقهم الولائي أمام أعينهم ولكنه لم يظلمهم على حد تعبيرهم
> تتكرر هذه المشاهد في كثير من المدن الولائية
> لدرجة صنعت من جماهير بعض المدن اعداء لنا بخشم الباب
> سمعنا ما يحدث لبعثاتنا في الولايات
> فهل حدث حدث واحد مشابه في نفس تلك الولايات للفريق المنافس؟؟
> طيب ليه؟؟
> انه شغل الكورة
> شغل الشفتنة
> الشغل الذي يتطلب مجلس قوي يضع حدا لأخطاء التحكيم التي تهزم ولا تظلم
> الشغل الذي يتطلب ولاء لحد الانتحار بفدائية من اللاعبين
> الشغل الذي يستند الى جمهور بعرف كيف يحمي فريقو ويخت خط أحمر للتجاوزات والمجاملات التي تحدث عنوة للفريق المنافس
> الشفتنة لا تعني الخروج عن النص ابتداء واعتداء
> ولكنها تعني حماية حقوق الفريق والفرق المجاورة في بطولة الممتاز
> الشفتنة هي صنع الأحداث
> والصفوية لا تعني الخضوع والخنوع والإجماع السكوتي السلبي في كل الأحوال
> ولا تعني بالتأكيد التأقلم مع أحداث يصنعها الغير
> وهي تمرد على الواقع ان كان سيئا واستبداله بواقع شريف وعفيف ونظيف شرف المنافسة فيه هو الهدف
> أيها الناس
> أيعقل ان يكون مجلسنا لا يعلم بحدود العقوبات الموقعة من الكاف على بعض لاعبينا؟؟ > ان كان كذلك تبقى مشكلة
> يبقى مجلس ريفي ساكت
> المهم
> اذا أردنا بناء فريق افريقي قوي
> أكررها للمرة الألف
> مع احترامي لهما
> برهان ومحسن ما معلمين السقالة في هذه المرحلة
> ممكن يقلبوا الملطم
> يشيلوا القدح
> يجيبوا مكنة الطوب
> لكن بناء صعبة شديد
> المهم
> طالب برهان بمعسكر خارجي اختار له القاهرة
> المجلس رفض
> الأمر مشى عادي
> ما في زول قال ليه يرفض
> فهل اقتنع الناس بوجهة نظر المجلس أم أضحت معسكرات الخارج غير مهمة!!!!
> أم أنه الكيل بمية مكيال!!!
> أيها الناس
> ان لم نقتنع بأن مصلحة الكيان فوق الجميع لن نعمل بمصداقية وشفافية
> وسياسات الخيار والفقوس تؤدي لإهدار مصالح وقيم عليا
> وزولي بجبرني على التأييد المطلق في كل الأحوال
> وزولك بيفقدنا كوادر يمكن ان تحقق صالح الكيان
> يبقى زاوية النظر مفروض تتغير
> ننظر من زاوية مصلحة الكيان لتذوب قصة زولي وزولك غير المجدية دي
> زولي المريخ وزولك المريخ
> ولما يكون الهدف نبيل
> يستطيع الإداري ان يصمد في وش الريح ويتحدى
> بل ينجز ويحقق حلم القاعدة بقوة وثبات
> ووقتها سيركب الجميع على قطار الإنجاز
> أيها الناس
> ما كعب الميدان
> ميدان شنو الكعب
> أصلو بنجري فيهو برانا
> كعب القلب الكعب
> الخنوع وفقدان الأمل والشمس يا دوبها تتوسط السماء
> المهم > جمهور نيجيريا في مباراتهم ضدنا على أرضنا كان ضعف جمهور السودان > ولا تعليق
> أيها الناس
> ان تنصروا الله ينصركم
> أها
> نجي لي شمارات والي الخرتوم
> كان شفت يا والينا
> الرغيف زادوهوا لينا
> الناس طوالي جرت للحكومة يا والينا
> سوء الظن ده المشكلة الفينا
> أسي منو القال الرغيف ده زادتو الحكومة لينا؟؟
> موش يمكن ماهي يا والينا
> موش يمكن تكون ما سمعت بالزيادة أصلاً وقاعدة في اضنينا
> موش ممكن تكون زي، زيادة السكر الزمان اللي أسي ماعرفنا منو الزادو لينا
> لا الشعب عارف منو البزيد ولا البرلمان ولا الزول المسئول عن الزيادة لينا
> غايتو الرغيف زاد يا والينا
> وحقو الناس ما تظلم الحكومة لأنها يمكن تكون ماعارفه منو الزادو لينا
سلك كهربا
ننساك كيف والكلب قال الزيادات بقت زي زيادة البحر مضمونة وبراها بتجينا.. بس البحر برجع
وإلى لقاء
سلك
غايتو السنة دي انسحبو