الولايات المتحدة المعتصميه...!
 وجولة ثانية...
 والفرحة برضو كانت غاااامره...
 والمرة دي دكتورنا معتصم قالوا عمل ليه عرضه عديل كده وهتف حصاحيصيا ( فيفا.. فيفا.. فيفا)...وتلفت الحضور نحو البوابة فربما كانت هنالك مفاجأة بقدوم ست الصون والعفاف وملكة هز الوسط الما خمج المحترمه اوي فيفا عبده سيدة حواشة (الهشك بشك وارخي الستارة اللي فرحنا)...
 جولة ثانيه وربما مكسبها دولارات جديدة لأهل الولايات ( كدي شوفوا ناس الهدف ديل ما يكونوا رسلوا تحت تحت قروش مشروعهم السنوي)...
 ود عطا المنان دا كان هوب على البنك اياهو الايام الفاتت بيكون الرصيد اتدفس...
 والدفسيبه بتصرف نواب الولايات المتحدة المعتصميه...عيدية الف..
 جولة جديدة وربما تكون أيضاً ونسة...
 فما بين تصريح شداد وطعونات الارباب لن تسلم الجرة التى يحملها مجدي وصحبه...
 ثمانية طعون بشر بها محارب الداخل الارباب...
 وطلقه مميتة انطلقت من فوهة عنترة بن شداد مع ابتسامة رقيقة: (وايه يعني ونسة جديدة ساكت)...
 والشيخ طه اسماعيل يصبح معتصماً بمعتصم اكثر من اعتصام المفوضية العصية على الاعتصام الا بالمعتصم باجعفر...
 أليست المفوضية الابن المدلل للوزير سوار..
 ومش المثل بيقول احاطة المعتصم بالسوار...(وليه ما نهرف اذا كانوا جميعهم يهرفون الكلم عن موضعه)..(أخير انحنا بنهرف الامثال مش التحويلات)...
 نجم اليوم بلا شك هو الشيخ ود طه جنا اسماعيل....
 فلقد تحدث بلسان الفيفا مع انه جاء كمراقب...وربما من ينزل في برج الفاتح يسمح له ان يحول الصفة التى أتى بها وعلى عينك يا فيفا...
 البدخل برج الفاتح كان قافل على مراقب ممكن يفتح بي مشرف...
 والشكة الجديدة مام معرفوه ماشه وين...لانو الكنج اسمه فيفا وقاعد يشك هسه في الورق...
 الله يستر ما يرموا الجمعية بايظ وكما حدث من قبل..
 والاسوأ ان قامت الفيفا بدك الورق...
 والورق المدكوك يعني انه التجميد...
 ونعود للقول وان حدث فانها المعركة التى لن يكتب لها التوقف...
 الحرب الشعواء ما بين شعب الهلال وشعب المصالح الذاتية المقيته...
 ومتى ما دخل شعب الهلال مجابهة الجميع يعرف أن الغلبة لهم...
 وحديث قصير مع الدكتور معتصم جعفر عبر موبايل الزميل خالد ابوشيبه احد قلاعهم بـ(حبيب البلد)...
 ومعتصم يؤكد انها بلغت نهاية المطاف ولا رجعة...
 والدكتور أتانا بنبرة هاشه باشه لو عرفها علم الدين هاشم لهراه انتقاداً غليظاً لانه هنا تحدث مع احد الذين خالفوه الطرح...
 اصلو ناس علم الدين هاشم ديل عايزين يلهفوا اي حاجة وبرضو يظهروا للناس انهم محايدين واصحاب منطق ومن يرسخون للنقد العفيف...
 صورة جميلة يا علم بس مش صحيحه لأن الغل الكامن في دواخلكم ضد الهلال سيظل متقداً الى ان يرث الله الارض ومن عليها من عباده الصالحين...
 معتصم جعفر أعرفه بعيداً عن مريخيته واحترم فيه تلك الشخصية الباسمه النقيه وحلو المعشر ...ولكن مجيئه على ظهر الوصيفاب يجعلنا نشهر نحوه كل العتاد..
 يقول الدكتور احكموا علينا باعمالنا...
 وهذا تحدٍ جهير يقابلنا به...
 وان قدر ألا تكون هنالك جولة ثالثه وعلى طريقة التلاتة واقعة فسيكون علينا ان نتقبل تحديك ..
 ونرجو ألا تخسر التحدي وتثبت لنا حينها ان الوصيفاب لا يسيرون هذا الاتحاد..
 ومن لجانك حنعرفك شايت وين...!
 ----------------------------------------
وااااااانهيارااااه...!
 صالح ولدن فالح..
 وحسون ولدن مجنون...
 والوسيفه فارق الصدارة وبقى خالص مغبون...
 أملنا الباسمك كتبنا ورطنا...احبك...احبك وفي الاحضان... ألبك...
 العرجا لي الوصافه....
 والصدارة لي اسيادا...
 والشبعانين ..بره وجوه.. مدلقنين...
 امل الجدود نفديك بالارواح نجووووووود ..املي...
 اتوصفي واتوصفي...ومع الفهود ما تجازفي...
 الحاله عملوا ليها دورة وديه في دبي...والله ديل كان حقو تودوهم يعسكروا في فتاشه وبعد داك يحرسوا ابيي...
 زمان قلنا ليكم الوصيفاب ديل ما ممكن يصمدوا في مكانا ما مكانهم...
 مشوا عطبرة وغنوا للوصافه..رجعناااالك وجييييينا...
 ومن راهن على عاصمة الحديد والنار ما كضب وما اتخذل...
 حديد ونار وتيمان جابوا التار...يا هلاااااوة...
 هو الأمل العصي على من يبحثون عن النصر المزعوم...
 هو الأمل الذي رفع راس عطبرة عاليا لتقول بملء الفي: (الليلة نتلقى معكم العزاء وابكوا بجد موت ايداهور)...
 الأمل أدب الوصيف..وجضمه..وكدره...ونجضه..وعذبه...وقلم اظافره..وقال لهم البخش عطبرة بيلقى الهبرة..وبدل الهبرة هبرتين...كل شوط عنده هبرة بطعمها...هبرة اولى وهبرة تانية..
 هبرتي المست غرورك ووصفتك يا وصيييييييفي...
 هبرة حسون هبرة زولن مجنون...
 وهبرة صالح هبرة ولدن فالح..
 هبرة واحده لليمبي والتانية لجبرة ..جيمي دا حبيبنا خلوه بعيد...
 هبرة بس جمرة...
 يا جبرة ككيف الهبرة الجمرة...
 أهبروا انتو يا املاب تفرحونا بعذاب الوصيفاب...
 وياله من تار..وقصاص...وفي عز الخريف هو بعينه الدعاش...
 انار فتية الامل الدروب...وضربوا الوصيف الكذوب...ورفعوا راية الاسلاف والجدود...وخلوا ناس مزمز شغالين لطم خدود وشق جيوب...ويا لعظمتك يا عطبرة وانتي تزيلي من محيا التنافس الوجه الملىء بالتقيح والدمامل والبثور والعيوب...
 صه يا كناري وهس يا وصيف ...ياااااا ضلنا لقيتنا كيف..؟
 ألم نقل انه الضل الوقف ما زاد...؟
 يزيد وين واللعنة شغاله عمال على بطال...
 ومزيداً من كراهية الهلال ياهو دا الحال..
 طهروا نفوسكم تصحّو...
 وسخوها تنجلدوا...
 وبدل الجلدة جلدتين...
 تيمان انين انين...
 توم للشوط الاول ..
 وتوم للشوط التاني..ومن هوانك آه يا وصيف ياني...
 كده وانت شبعان ككيف لمن تجوع يا دلقان...يا والي الرسول ترجع طوالي..
 دي ما هزيمة دا دمار...
 اقلوا ايه انحنا مع الكبار...؟
 اللسان الطويل اتقطع من لغاليغو ....لا لسان حال الا الهلال...لا فارس يستحق الاطراء الا ملك الجمال...لا راية ترفع الا لانبل الرجال...قال ثورة جياع قال...؟
 واليوم ترون كيف نستأسد على اس فان....
 وليكم ناخد القصاص ...
 وكتائب سيدا تؤكد اليوم ان الكونفدرالية ليس ببعيده...
 والجيش نستضيفه في مقبرتنا..دروتنا..وضرب رصاص...
 طاخ طراخ وتراخ تيخ عشان ناخد حق الهلكان السموه المريخ..
 شكراً جماهير عطبرة الوفية التى وفت بما عاهدت عليه...
 شكراً رابطة موجنا الازرق وحناجر قياداتها تتواصل معنا قبل واثناء اللقاء وتمدنا بالثمين من المعلومات الجنرال مهندس اباذر عبدالله النوّر براياته كل الحله...
 وشكر خاص للوصيفابي جناح ليمونة بكري جوجل الذي امدنا بادق الاسرار قبل ان يتذوق وصيفنا الدمار كل الدمار..
 عطبرة اشرقت بالضياء في كل البلاد لتعم الفرحه كل العباد..
 عطبرة معقل الوطنية وقلعة الصمود دحرت اي وصيفابي فات الحدود..
 عطبرة حبنا....الله اكبر ولله الحمد...
 والليلة نكمل الفرحة..
 وعلى مقبرتنا نزين جيد الوطن بانتصار يكلله الفخار كل الفخار...
 بواسلنا على الخط يتاهبون ولجيش النيجر باذنه تعالى ملتهمون...
 الأمل اتعشى بالوصيف وانحنا نتسحر بالجيش...
 واملنا الباسمك هرسنا وخمشنا..
 هرس الهريس للدلاقين الهردبيس..
 وخمش الخمش للوصيف الما بختشي..
 نريدها اكتظاظاً في المدرجات غير مسبوقه يا هلالاب...
 لا تتركوا شبراً الا واحتللتموه مبكراً لاجل مساندة كبير البلد في لقاء يهم البلد...
 المحلي أنسوه بكرة الصدارة تأتيكم صاغرة راكعه تتوسل اليكم بعد ان اكتوت بمن لا يستحق...
 نريدها فرحه لا يشق لها غبار ...
 بكرة عايزين نغني زي ما كل مره بنغني ...ناس افرحا زاااايده وناس بتألموا...
 هو جنس ألم...وكربجة الامل هي بعينها الالم...
 بعثروا حروف الامل تجدوها الالم...اتألمي...
 الم الامل مؤلم للبأمل ..فتأمل يا وصيف...
 مسكين البدأ يأمل وامله يغلبو ..انين انين ...
 امل كتبت...ومزمز قرأ..
 امل كتبت حسون حسون..
 ومزمز قرأ صالح صالح...
 ونزل المطر وبرد الجو وذهب العطش واتسحري..
 و..ارتعشت كل النجوم عشية السبت ..قال بتفاءلوا بيه...
 هبي ايتها الجحافل الزرقاء نحو المقبرة لكي تصدقوا قول ميشو الذي صرح ( مرحباً بالجيش في الجحيم)....
 الخواجه دا سريع كده عرف المقبرة وجحيمها...ياااا منت كريم يا رب...
 أملي السبب لي ازايا...يسلم لي حاحا من المحايه...
 شفتو ليكم محايه بتشتغل في رمضان كان ما غبيانين...اليسوا الدلاقين..؟ وما تيب...
 يا عشاق الهلال سيدا يناديكم لتستمتعوا بالعيدية الحلال..
 إتعيدي..!