• ×
السبت 15 مايو 2021 | 05-14-2021
الرشيد علي عمر

شريان رياضي

الرشيد علي عمر

 0  0  13731
الرشيد علي عمر

سحر الهلال مغطينا...!
 مين زينا...؟
 ولن نسمع إلا هدير اهل الغلبة وباستغراب يثير الاعجاب (هو في حد غيرنا)...؟
 وحدنا نرفل في النعيم وغيرنا يتوهط في الجحيم...
 وحدنا نرسم الابتسامة العذبه على المحيا الجميل وغيرنا يمنح التكشيرة العبوس على المحيا القمطرير..
 وحدنا نجوب بدواخل هذا الشعب الى مرافىء الفراديس وغيرنا يقذف باهله حيث اللظى والسعير..
 وحدنا من نستمتع ببركات الشهر الكريم وغيرنا جوع وعطش وزعل وغيظ مكتوم خلي الوجوه تشبه حبوبة ام كلتوم..
 نحن اهل السعد...
 انحنا سيد البلد الجد...
 انحنا البنوقف الخصوم حد الحد...
 انحنا مو الوصيف المحل ما يقبل بيقدها قد...
 في السكة موج ازرق هدر ...تاريخ ندر...اسمه الهلال...سيد البلد سيد البلد..
 نحن من يسعد هذا الشعب لاننا اهل الموهبة الحقه...محلي ومحترف موهبة عيار (24) قيراط...
 جيل قال حقاً أن المعاناة تولد الابداع...فعانوا وقدموا لوحات المتعة الضافية لان ما في القلب اكبر من تداعيات الزمان المادي الرمادي..
 فمن اجواء التوتر...واستفحال الازمات...ونشوب الخلافات...وكثرة المطامع...جاء جيل سيدا ليقول نصنع من الفسيخ شربات ونوزعه ليتجرعه الشعب الكريم الابي الذي ما بخل بجمهوره ولا حناجره ولا راياته...
 ولقاء الجيش خاضه الاسياد بنظرية الحلومر...
 لعبوا بتلك النكهة الحلوه التى تغوص في اعماقها مرارة خفيفه تكمل لوحة الطعم الخرافي..
 نكهة سودانية خالصه تماثل سر انوثة المرأة السودانية دلكه وخمره ونقش حنه...
 ابداع محلي..ابداع بلدنا..حلو مر بخمرة النشوة الغارقه في بحر المتعه الخالصه..
 الهلال يتقدم بثبات لانه امتلك واحد من اعظم الاجيال...
 اخلاص..وفاء...قتال...بساله...رجاله...وحب عميق للشعار...
 وكلمة قالها الفتى النضير عمر بخيت في حواره مع خلف الله ابومنذر: (دي فرصة عظيمة عشان نحقق مكسب لجيلنا ولابد ان نغتنمها مهما اشتدت علينا الازمات)...
 هذه هي الطريقة التى يفكر بها الاسياد...
 وهذا هو هدفهم النبيل لقناعتهم ان الهلال ومنذ امد بعيد كان ينبغي ان يكون مثقلاً بالبطولات التى تتناسب وقامته...
 ونحن نعلم بأن الحظ كثيراً ما عاندنا في مختلف الاجيال وآخرهم جيل 2006 ومن قبله جيل 87 ...
 فجيل 87 يماثل عندنا المنتخب البرازيلي الذي خاض فعاليات بطولة العالم 82 ...
 وملاعبنا حتى اللحظة تتوق الى هداف ماركة وليد طاشين ومدفعجي بمهارة صبحي ووزير دفاع على شاكلة طارق وراقص على طريقة كندورة وطرف ايسر يشبه تنقا وموسيقار وسط بقامة حمد دفع الله وغيرهم من الفطاحله...
 وهاهم فتية ألفين وعشرة عشرة على عشرة...
 هلال الفين وعشرة متماسك..فنان..حماسي...قلبه حار وبعرف يجيب للعيال كمان التار...
 ايوه والله قربنا ننسى...
 هم العيال دول حيروحوا فين بعد كده...؟
 يا لخيبتهم...البشوف البرادو والكوريلات والاسكودا اوكتافيا آخر موديل يقول اولاد برشلونه حاصد البطولات مش الوصيف حاصد العدم...
 اجمل ما في تجربة جمال أن الكورة لا تدار فقط بالمال...
 كدي ورونا شنو الما سواهو ليهم ...؟
 والاستمتاع هذه الايام بكتابات سلك الذي يعيش انهيار زي الانهيار...
 بتخيل سلك بكتب واسلام بته بتقش في العرق والسيجارة مترين وكباية الشاي دخانا في السما والتوتر في البيت التقول في البلد انقلاب...
 سلك هالته سأبا هالس..هالس...
 قال يشطبو المجلس قبل اللاعبين...طيب الاستاد الجميل دا تحولوه للحركة لامتحانات السواقه ولا شنو يا سلك...؟
 وسلك البقى ضارب سلك عنوان عموده (ريدتك بقت هي المشكله)...عفارم عليك يا اسلاك الحلنقي...غايتو بتتلم مع فرفور في الصلعه غير كده انسى..
 وحماده ما بنطير برانا زعله يقطع المصارين من الضحك..قال ايه: (جيل النكسه يواصل انكساراته)..يعني خلاااااص غير فرمالة مانديلا والتى اختفى منها ستة لاعبين من الفريق المنافس شلتو كاسات الدنيا والعالمين..؟
 .وحماده ما بنطير برانا قال انو الوصيف بيتعرض لي بهدله...وقال ان اقبح جملة يرددها الوصيفاب كالببغاوات هي: ( ان المريخ يمتلك افضل اللاعبين في السودان وافريقيا ولكنهم يحتاجون الى التوظيف)...
 طيب كلامك ده ما كويس يا حماده...
 وظفوهم...
 العطله ما حلوه...
 ناس يدوهم قروش كتيره كده يمرضوا فيكم في الكور وباقي اليوم يصاقروا الشيشه حلو ليهم المشكله...
 العطله بتجيب مبارات الضلله....
 شوفوا ليهم مكاتب راقيه في سوق نمرة اتنين وكل واحد جيبوا ليه سكرتيرة جميله وكتروا التلفونات عشان يردوا على المعجبين...المشكلة شنو يعني..؟
 وعلم الدين هاشم قلب هلالابي...
 اصلو دي المكنة بتاعت مزمز ابوالقنابل الزماااان لمن يلقى نفسه اتزنق ومريخه واقع واطه والهلال مولع ينجبر يتغزل في الهلال...
 اها ناس علم الدين وفي سياق ان ما يكتبه مزمز ينبغي ان ينفذوه بالحته ويحذون حذوه قلبوا بلا خجله يتغزلون في الهلال لابسين شعار القومية..
 وتقوم بينا القومية تودينا للاسياد...
 الكلام الوحيد البتبلع هو كلام عبد المجيد عبدالرازق لأنو ما جديد عليه...
 نعم هو وصيفابي بس من زمان بتعجبه اللعبه الحلوه وبيعترف بيها..ما بيدسها ..وما بكابر...
 وتعالوا شوفوا مجدي مطبات المن جاب عموده في سوبر الوصيف ما ضاق عافيه..عافيه حسن هيييييكا...
 قال (قلنا ليهم قرضوا مشوا فرطوا)...التقريض جاب تفريط...والتفريط ما حبابه...وقنب يغني ما بنمشي لي ناس ما بجونا ومن عطبرة رجعوا يعذبونا...
 واختتم قلنا الكورة واطه طلع المستوى واطه والنتيجه واطه والنفسيات واطه ...ما فضل ليهو الا يقول الوصيف واطه بس خجل...!
 وبدر الدين الفاتح ود حمش خالص...
 ود الفاتح جنا فالح..شديد الباس...ايوه كان صاحب جمال بس اصلو ما بجامل لانو بديه في التنك..ومشى جمال وليبيا فتحت...وكانت خاتمته الاقوى (البطولة دايرة رجااااااال)....ولمن نرجع للافتة التراس الجوارح الحمراء ( العبوا كالرجال او اتركوا نادي الابطال ) بنعرف حاجة وحاجات..
 اما ابوبكر طملبيني قال مستقبل الادارة في المريخ مظلم..طيب ياخي نكلم ليكم وزير الكهرباء يدخل ليكم العواميد...
 وابراهيم بن عبدالله جاء عنوانه (تركيبه هشه جداً)...بختكم يا عشاق البسكويت جاكم صنف جديد اسمه الوصيف...
 بسكويت الوصيف زيو مافيش...
 بسكويت الوصيف جيتا جيت..
 بسكويت الوصيف لذيذ...هين..هش ..وفي الكور بيساعد على الهضم لانه خفيف...
 وحقاً صدقت يا هيما في التشبيه..هش وضعيف وفي الجد خالص خفيف..
 ونبقى نحن اسياد التيوة...
 والسحر يغطينا وكما يفعل ثابت مع الاثير...
 سحر الهلال يغطينا وكما ثااااابت يا مزمز...
 سحرنا يغطي حتى الاثير...ويذوب برقه مع اجواء الطهر الملائكية...وبين طيات السحاب...وعز العز وفخامة الفخامة وألق الألق..
 نتدثر بالسحر الشفيف ونمنح العشاق الدعاش اللذيذ...
 والايام دي نستمتع بموسم الهجرة الى الهلال...
 ومفاجأة لم تكن في الحسبان...
 مفاجأة ضخمة ستهز كافة الاركان...
 مطرب..وكبير..وجداً...
 وفي طريقه للانعتاق من براثن الوصيف الضعيف البقى مع جماهيره ما بختشيش...
 وعندما نعلن عنه سيطول الحديث ويطول ...
 بس اهم حاجة انو الفرحانين حيكونوا تلاتة اضعاف الزعلانين...
 والهلال سيحتفي به في النادي في اروع تدشين بعد انعتاقه من جحيم الدلاقين..
 ونحن فقط في انتظار قرار الوزير...
 الهلال في انتظار القرار الرقم خاصة وان العمدة سعد كشف نوايا الارباب العدوانية تجاه الهلال...
 العمدة سعد أوضح ما توضح فيه (حبيب البلد) من زماااان أن الارباب دائن للهلال وليس بداعم...
 والدائن ليس بعاشق..
 والدائن عبارة عن مستثمر يهمه جيبه وحسب..
 ونعتقد بأن العمدة سعد قد فتح الباب واسعاً لتحريك ملف مديونية الهلال نحو مكاتب ديوان المراجع العام...
 فالحديث تخطى المنطق ودخل حوش الفساد...
 والارقام التى سمعنا بها شتل وفتل وكضيب الكضيب..
 فلا ستة مليار ولا تلاتين وما معروف الحقيقة وين...
 والطريق الوحيد لمعرفة الحقيقة كاملة هو ديوان المراجع العام...
 فمن دفع للهلال وجد أيضاً...
 ومسألة الكيس البجي شايله المكاشفي السكرتير الخاص لا ينبغي أن تمر مرور الكرام...دا مال الهلال...ومال عام...والسؤال المباشر الذي اطلقه العمدة ود سعد على الهواء مباشرة جاء في الصميم.. وما علاقة المكاشفي بالهلال...؟
 إتمكشفي..!
امسح للحصول على الرابط
بواسطة : الرشيد علي عمر
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019