وليله تزكرنابموت الفجاءه
تكلمنا امس عن استماته الفرق امام الزعيم وماهي الاسباب الخفيه للعب بكل الطاقه امام المريخ اتابع الصحافه الرياضيه واتابع المريخ من سنين توقفت كثيرا في العناوين الرئيسه للصحف بشقيها الحمراء والزرقاء،فاتضح جليا علي مدى ايام ان الصحف الزرقاء والاعلام الازرق وراء هذه الاستماته من جميع الفرق داخليا وخارجيا
معقوله بس عناوين بصيغه حربيه تتصدر تلك الصحف صباح كل مباراه للمريخ طالعو للعناوين والمنشتات الصحفيه تقليل من قيمه المريخ وبث الحماس في الفرق المنافسه لم يتوقف دعمهم الاعلامي لكل الفرق المنافسه علي صدر جميع صحفهم ارجعو لارشيف الصحف الزرقاء في كل مباريات المريخ داخليا وخارجيا ولاحظو الفرق بين العنوان التحفيزي واثاره الحماس لكل الفرق التي تواجه المريخ وفي كل الاوقات يسبق اسم الفرق المنافسه لاسم المريخ علي صحفهم وتم استخدام الاعلام بصوره بشعه وبالمقابل اعلام سلبي واعلام مثالي من الاقلام الحمراء وراجعو الصحف صباح كل مباراه للند التقليدي لاترى اي عنوان يثير الحماس للانديه المنافسه وفي اغلب الاحيان لايتم التنويه للمباراه من اصلو
اراهن انو نص الشعب المريخي لم يعلم بمواعيد مباراه الند التقليدي الا قبل المباراه بساعه او ساعتين وفي ناس لقوها شغاله فجاءه في النيلين
معقوله ياصحافتنا الحمراء معقوله الاعلام الازرق يعمل العمائل في كل مباريات المريخ وتحس انو المريخ في معركه حربيه معقوله يبوظو اعصاب الجمهور المريخي وينفخو الروح في الخصوم اتمني من كل مريخي ان يرجع بالتاريخ قليلا وشوفو الشحن من الاعلام الهلالي لكل الخصوم وشوف رده اعلام المريخ والبرود
ومرات كتيره منشيتات زرقاء لا تصلح للسماع في المجالس الخاصه لكن تلاقيها في عينك في كل المكتبات وبرضاك ولاغصبا عنك تقراها
وفي مباريات المريخ الافريقيه تحس انو اللاعب فريق خارجي ما المريخ تحس انو المريخ دا عدو
ياصحافه المريخ السلبيه ماحبابها والمثاليه مابتاكل عيش واصغر مشجع عارف المجتمع الرياضي مامجتمع مثالي مجتمع عايز الناس المصادمه
ارحمونا من صحافه التحليل الفني والتحليل القانوني وعاملو بالمثل المريخ مامحتاج تحليل فني ولامحتاج البحث عن الحقوق القانونيه والملاحظات الفنيه والقانونيه دي ممكن تسلم في ورق مروس للمجلس يعني الجمهور عايز شنو بالتحليل الفني
الشفوت والحمهور عايز الرد بالمثل والخروج من جلباب المثاليه
ماعيزين نعيش في جلباب ابي عشان الصياح الفي الصحف الزرقاء اصبح كل يوم في تمادي وصفويتنا مابتخدم الكيان
راجعو المنشتات الرئيسية وشوفوا الفرق وشوفوا المعارك الحربية المعلنة من الصحف الزرقاء وتجيك الفرق المنافسة بشحن زايد وعينك ماتشوف الا النور
وصحفنا ماشة بسياسة الدنيا منى واحلام
المجال الرياضي مامجال سلبية او مجال كبقيه المجالات مجال عايز تحكي حقك بالصوت العالي
راجعو الفترة الفاتت وشوفو الفرق وشوفو الاندية
وخلونا من الخانات والمدرب سافر وفات
صحافتنا موجهة للجمهور والجمهور فاهم الكفر دا كويس وعارف اللاعبين لو لعبو او خارج الخدمة يعني فلان لعب ولاقاعد كنبة والله ماهمينا
راجعو مانشتات صحفنا قبل فوات الاوان مهوو منتظر عناوين تتحسسنا انو في صحف ناطقة باسمنا
ومن اسه ولي قدام شوفو عناوين الصحف الزرقاء وشوفو المنشتات ولاحظو الحروب النفسية والدوافع لكل الفرق البتواجه المريخ وشوفو الفرق
يااعلامنا اتشفتنو وعيشو معانا في مدرجنا واكتبو علي لسانا
ماضروي الخروج خارج النص ذي الباقين لكن ممكن المقارعه بكل ادب


نحن علي المدرج ونتفرج ومنتظرين عناوين تعرف كيف ومن اين تؤكل الكتف وعارفه الشارع الرياضي عايز شنو خلونا من عناوين ومنشتات المثالية والصفوية بعد دا عايزين نحس بعنوان يحرك المدرج ويحرك الاجواء
دي اسمها كورة وكرة القدم المثالية فيها مابتجيب نقاط ولاتخلي اللعيبة يلعبو بثبات
ارجعوا للارشيف ومابتندمو وتعرفو ليه الفرق جاية كوره في شكل حرب والكورة لو فلتت منهم وانهزمو يقلبوها تصفيات جسديه
والحكم متروك ليكم

ختاما
تمر علينا ذكري رحيل ايداهور اليوم والناس عاشت رحيل الدكتور الترابي امس ومفروض قبل كل شئ نتعلم من موت الفجاءة ونعمل لاخرتنا كاننا نموت غداً لانه لاندري ماذا نكسب غدا ولاندري باي ارض نموت
معقولة القروبات اصبحت خلافات علي الموت وكل زول يكتب بانفعال والناس تضايق من اقل خلاف في الراي
ياجماعة الناس تقيف حبه وتراجع تكتب في شنو ممكن تفارق الدنيا وانت علي خلاف او متخاصم وممكن انفعالك زاتو يدخلك مستشفي وماتعرف انت وين وتتعب من حولك
الناس تخت الكوره واطه وتروووق والنقاش يكون بعيد عن الانفعال الناس اتلمت في خير مفروض ماتزعل الا للخير