((())) انبراشة بطل اللقيمات :

ولسان حال المريخاب يقول : يارب سمكرة يا اتحاد

لقد كنا بالامس جلوسا امام التلفاز وامامنا شاهي العصر وصحن اللقيمات المدنكل

ودخل علينا جارنا متسائلا : ليه بتشوفوا مباراة مازيمبي مره تانيه ؟

قلنا ليهو دي ما مباراة مازيمبي والمريخ دي مباراة اهلي مدني

قال ما شاء الله اولاد حداثه

وعينك ما تشوف الا النور و بدأت الاهداف تتساقط علي المريخ

وواحد واتنين وتلاته ونحن ناكل في اللقيمات ونضحك علي الاراجوز

وقد كانت احلي لقيمات لاحلي جلسة كرويه مع الاصدقاء ومنهم مريخاب اعزاء

حتي ان اصدقائنا المريخاب قالوا للاعبيهم : ياجماعة نلملم فى النقاط بلشكاوى تجو تفضحونا فى المناقل

وبصراحه حداثة قلب كل مواجع ناس المريخ وذكرهم بموقعة مازيمبي وناس ساماتا

الفنايل نفس الفنايل

والنتيجه نفس النتيجه

والخطه نفس الخطه

وكان ناقص كسكيتة كاتومبي

(أبو مريخـة) ظهـرت عليهـو خزينـة

درعـاة بطـانة .... وسيكـو فايف عينا

في التلفـزيـون... لـمَّـن تعاين فينـا

كاتِم صوت... في الضلع القصـار هارينا

المناقل اخوتي اسم مشتق من المناجل

لذا تم تقطيع مريخ ونسي بثلاثه مناجل حاده

وديما تسطع.. شمس تطلع

نيل يدفق ويبقى منبع

وغيرا حالف ماني قابل

من زمان ليها حانِي

وبيها جاني

إلا حامياني المشاغل

ولو لقيت الحب سحابة

ناس بتقدل في مهابة

عِزّة عنوان للغلابة

والمكارم فاتحة بابا

ابقى داخل.. دي المناقل

وفضيحة بجلاجل في ارض المناقل

والليله شوارع دفاع المريخ ذكرتني بشوارع بكين الواسعه

وانبراشه قويه لبطل اللقيمات فوق النجيل الصناعي الذي وصفه المعلق بالافضل

واكيد مزمل ( العبقري ) وكما يصفه بعض السذج بصدد تجهيز شكوي عاجله في اولاد حداثه

وممكن تقديمها ضد العجب لانه يشبه العجب سيدو

وحيثيات الشكوي ستتهم الاهلي مدني باشراك لاعبا اسمه العجب

واسامه ومجدي والاستئنافات جاهزين مويه ونور للسمكرة

وقد يشرعون بان تشابه الاسماء في قانون اتحاد اللقيمات ممنوع

وممكن الطعن في فانيلات اهلي لانها تشبه كثيرا فانيلات مازيمبي

وهزيمتين مدويتين من الاهلي مدني للمريخ

٣ -١

وولاء الدين


((())) ولحبينا ود المجذوب كلمة في الثلاثيه :

تلاتة لساتك الركشـــة
اتنـين قالو بالجمبة
ولستك اسفل اللمبة
وحلوة الركشة حركاتا...
تلاتة بلابل السودان
اغاني جميلة في الوجدان
وكل الروعة في ذاتا ...
تلاتة ..تلاتة نيسانات
تلاتة مع التلاتة بنات
تلاتة كفاية يا شمــات
دحين ما قلتــو شفاتــــه...
تلاتة بقولو بتطلق
تلاتة لكل متمــــلق
في ناس يا اخوانا بتفلق
مع النجمة وتلاتاتا...
تلاتة قوية يا الاهلي
تلاتة حقيقة ما سهلي
قول للدمعة انبهلي
شريط مازيمبي ساماتا...
تلاتة لكل متمادي
تلاتة علي الوصيف عادي
سمعنا الكورة في الرادي
تلاتة علي رفيقاتا...
تلاتة بشة في المريخ
كرنقو ووردة للتاريخ
عمر ايفوسا والترديخ
تلاتة بويا ما بتشيـــخ
ونحن بنحفظ الداتــــــا


((())) اضحك مع سلك قبل مباراة اهلي مدني حيث كتب :

نلتقى اليوم بأهلى مدنى على أرض المناقل

* المباراة ضمن مبارايات الدورى الممتاز

* الممتاز شديد

* ما درجه أولى ساكت

* وعلى أولادنا إمتاع شعب الجزيره كلو

* أهلى العرب جايين يستمتعوا

* جايين يشوفوا بطل الممتاز والسودان وكأس إفتتاح إستاد دنقلا

* جايين يشوفوا الفريق المرشح للأميرة الأفريقية وطار منها ساكت بس

* جايين يشوفوا بكرى هداف البطولة الأفريقية

* جايين من كل حدب وصوب

* لازميرجعو مستمتعين

* ونرجع بالتلاتة نقاط إن شاء الله

* حداثه ما ساهل

* لازم يعرف الطفى النور منو


ختام السطور :

*** المريخ يعاني كثيراوقد فشل في تسجيل لاعب نعسان وكيف مع الصاحيين ؟

*** غرفة دبي بدأت في تصدير المحترفين بعد ان اكتمل عقد المحليين وفي واحد جاي الحجل بالرجل وامسكوا الخشب

*** ونسي وجماعته وقفوا حال المريخ وقد ظهر ذلك جليا في تصرفات غارزيتو وايمن سعيد ونتائج المريخ

*** الهلال ماشاء الله جايب محترفين من غانا ونيجيريا والمريخ يا عيني ما جايب حتي من الصومال اوبوروندي او حتي الحبشه

*** حمدي لاعب الامل فضح ادارة المريخ ومدي درايتهم بالانظمة والقوانين وطلع الراجل مسجل في الامل سنه اخري

*** وحتي بعد انسحاب الهلال من الدوري يخطط المريخ الحفاظ علي وصافته

*** الهدف الصاروخي الثاني في مرمي جمال سالم من لاعب الاهلي ايدبولا النيجيري هو احلي هدف في الدوري حتي الآن

*** لماذا لم يحكم عمار كريمه مباراة المريخ واهلي مدني ( كان المريخ حصل علي ضربة جزاء )


محمد حسن شوربجي