* أكثر مايعجبني في المريخ انه يعرف قدر نفسه جيداً.. ولا يتطاول.. ولا يحاول أن يلبس قميصاً ليس قميصه..
* فالمريخ يعرف ان المركز الثاني هو حكراً له لذلك فان يكره الشلاقة القتلت اشراقه ولما جلس مع الصدارة مؤقتاً كان شكله غريب وعجيب وحتى اللاعبين لم يصدقوا انهم يجلسون على صدارة الدوري.. يعني زي الزول لما يمشي لناس خالتوا وعموا ما بقدر ينوم والليل كلو قاعد يتململ ومتين الواطة تصبح عشان يتخارج ويمشي لناس بيتو.
* ده المريخ ذاتو..،،، وتخلي عن المركز الثاني.. وكل المريخاب وما تشوفوا الزعلة دي والهيجة والزمبليطة العاملنها هم في جواهم عارفين ده مكانهم الطبيعي.
* لكن النصيحة الهزيمة جوة الاستاد بهدفين ما فيهم كلام ولاشق ولا طق بتزعل.
* وناس هلال الابيض ذاتهم شغالين يعني في داعي يغلبوه كده ويبشتنو الدفاع وجمال سالم بالشكل ده.
* والله العظيم حنيت على حال علي جعفر وهو جاري يحصل عنبكة ياخي ده كان منظرو يضحك.
* لكن بيني وبينكم كده الخواجة غارزيتو ده مدرب غتيت يعني في داعي يشرك علي جعفر والريح علي في المباراة دي.. وهو عارف انهما تعبانين وانا ومعاي عمرابي احسن منهم.
* لكن رغم هذه الغتاته ربنا لا يحرمنا من وجود هذا الثنائي في التشكيلة المريخية عشان نستمتع بغلطات وجلطات ودفاع المريخ وينكشف لينا حال الحارس جمال سالم.. الذي لم تعد شباكه سالمة وأصبح الوصول اليها اسهل من الوصول لمشوار في شارع الجمهورية وقت الزحمة والزنقة.
* والله دفاع المريخ ده ،،، .. والعجب امير كمال.. والله ده ال،،، وفاكيها في نفسو كان تسجل وتقبض هسه بعد عنبكة وفريد ورزاق وغير الجزايرين البسجلك منو تاني.
* فالحنين الى المركز الثاني هو سر هزائم المريخ.. لم يصدق اللاعبون أنهم يتربعون على المركز الأول (مؤقتاً) فقرروا العودة آلى مغالبهم السخيفة وانهزموا امام هلال التبلدي بجدارة واستحقاق.. بعد أن ظلوا يتفرجون على خفة ورشاقة لاعبي هلال الابيض بالذات الثنائي كول وحمود.
* ولو ما عنبكة راعى للعشرة مع المريخاب كانت الهزيمة أكبر في ظل دفاع متهالك وحارس سجمان ووسط رمدان وهجوم تعبان.
* حتى البلنتي المريخاب ضيعوه.
* لم يستفيدوا من الزمن الذي منحه لهم الحكم.
* اها بمناسبة الحكم حيكتب شنو في تقريرو عن التحرش ومحاولات الاعتداء من الجهاز الفني والاداري للمريخ.
* يعني المريخ ده لازم يغلب ولو ما غلب لازم يعمل مشاكل.
* والله جماهير المريخ حالتهم تحنن بعد المباراة الواحد فيهم ما عارف يمشي وين.
* معقوله اشجع لي فريق لعب ٣ مباريات انهزم في عطبرة.. وتعادل في كادقلي وانهزم في ستاده.
* ما أظن أن المريخاب متذكرين آخر مرة فازوا فيها متين.
* المهم المريخ جالس في مكانه الطبيعي ولو اتعثر تاني بلقى الخرطوم الوطني ناطي في محلو واحتمال أهلي شندي.
* اللهم حوالينا وما علينا.
أضحك مع المريخاب
* مريض راح للدكتور.. الدكتور اداه قطرة قال ليهو كل أسبوع تأخذ نقطة.. المريض قال ليهو أنت دكتور ولا غارزيتو.
* عاجل المريخ يشتكي حكم المباراة ورجل الراية.. وبتاع الدكان.. والمراقب.. وهلال الابيض وستات الشاي وبائعي الفول والتسالي.
* رسالة من المواقع منشورة في الواتساب الليلة المريخ في استادو كوروروك عوك مسكين يا وصيف في الاعلام غشوووك ناس التلبدي خاتم في يدهم لبسوووك الليلة الخوف يا عنبكة في الاتحاد يشتكووووك.
* اغنية جديدة للفنان المبدع علي كبك بعنوان المريخ المضروب وظهور العيوب.
* شاعرة الهلال سوهندا عبدالوهاب في مجادعة مع احمد بشرى واحمد مجذوب كبت
كم فرق النقاط انا ،،، عديل شابة
بين بدر التمام ونجمة العلماية
الخبر السمعتو بدون حكاية ورواية
دايرين نقطة بس ونذكرهم شلباية.
آخر المشاوير
* مطلوب من الاتحاد العام وضع مادة في القانون بان لا ينهزم المريخ في اكثر من مباراة.. داخل ملعبه.. او هزيمتين او تعادلين خارج ارضه..
* مطلوب من مجلس المريخ اصدار بيان لجماهيره يعلن من خلاله ان حدنا هو المركز الثاني فقط.. وعلى الجماهير الوفية ان لا تطمع في المركز الأول.. وعليها أن تلوك الصبر وتحافظ على هذا المركز وعدم التخلي عنه.
*جماهير المريخ شدت ما بتجب المركز الثاني (الوصيف) تغني ليه مش حاتنازل عنك ابداً مهما يكون.
* كبكبة دفاع المريخ ورجفتو تخجل.
* الشطب في المريخ يعني واضح وظاهر.
* غايتو الريح وعلي جعفر ديل راجعين الاهلي واحتمال معاهم مصعب اما احمد الباشا فربما تتم اعارته لهلال التبلدي.
* هل صحيح ان المريخ في شكواه ضد عنكبة اكد بان اللاعب المعار لا يحق له احراز هدف في شباك الفريق المعار منه.
* صديق كوباني مالو زعلان.
* لو كان مهند الطاهر شارك كانت النتيجة كم.
* جمهور المريخ مغلوب على أمره.
* الهلالاب فرحانين ليس لهزيمة المريخ وانما بفريقهم المولع نار.
* بعد غضب جماهير المريخ الأخير حقو تمارين الفريق يعملوها في كشك بسط أمن شامل.
* المريخاب قالوا نحنا ما عايزين المحلي همنا الكأس الأفريقي يا أخي والله صدقناكم.
* كباية التبلدي في الأبيض بقت بي ٢ جنيه الحمدلله عنبكة ما جاب الثالث ومحمدوالرابع وكول الخامس كانت مشكلة.
* الخوف تاني تظهر السواطير والمطاردات في تمارين المريخ.
* واعلام المريخ يواصل تخديره للجماهير.
* من علي كبك لجماهير المريخ يا قلبي لا تحزن.
* جماهير المريخ زعلانة وحردانة.
* خبر عاجل أغنية علي كبك الإن نحنا غلبنا وفاق سطيف ومركزنا الوصيف.
* ماذا قالت جماهير المريخ للاعبين عقب المباراة.
خبر طازج: انتو بتلعبوا بينا.
<<<<
