* مسكين المريخ فقد اصبح ملطشة لكل الاندية التي تواجهه في المنافسة المحلية.. وكل نادي تقول ليهو امنيتك شنو يقول ليك الاقي المريخ المترنح هذه الأيام.
* فالمريخ انكشف من خلال مستواه الأخير في المباريات المحلية التي لعبها.
* وكما قال احد الظرفاء أن المريخاب مصابين (بالخلعة) على اعتبار انهم لأول مرة في تاريخهم الكروي يصلون لدوري الاربعة في البطولة الأفريقية وليس الكونفدرالية أو سيكافا.
* فالمريخ الذي شاهدناه مؤخراً وضح انه صناعة اعلامية.. للاعبين اطلقوا عليهم العديد من الاسماء وتم تضخيمهم بأنهم الأفضل والأحسن بين سائر لاعبي الأندية الأخرى.
* وظل اعلامهم ينفخ فيهم حتى كادوا يطرشقوا وكان المستوى المضحك الذي ظهر به المريخ مؤخراً.
* دفاع المريخ بات مثل موقف جاكسون زحمة يا دنيا زحمة.. ما تقدر تفرق بين الريح علي وعلى جعفر (الله لا حرمنا منهم) بوجودهما في التشكيلة.
* فعندما تكون في موقف جاسكون لازم تأخذ ليك نفس طويل عشان تقدر تفرق بين مواصلات بحري والكلاكلات.. الحاج يوسف والثورات.
* ده حال دفاع المريخ جوطة وزحمة ودروشة ولاعبين ما عارفين يعملوا شنو.
* لقد انكشف المستور في المريخ.. وحتى جمال سالم الذي كان رهان جماهيرالمريخ خلال الفترة الماضية وضح انه مهزوز للغاية في ظل وجود مدافعين يشكلون عليه خطورة أكثر من لاعبي الفرق الاخرى.
* وامير كمال ما عارف يراقب عنبكة ولا علي جعفر ولا الريح علي.. ومصعب تايه ووسط المريخ هلكان.. لا نفع ديديه ولا اوكرا ولا شيبون ولا حتى جابسون وهجوم المريخ عليه العوض ومنه العوض في ظل عدم وجود ولدنا بكري المدينة.
* غارزيتو كشف لاعبي المريخ وقال للجماهير ديل لاعبين الفريق.. أجيب ليكم لاعبين من وين.
* ومافي حل الا تنتظروا انتهاء عقد بشة ومساوي وكاريكا واطهر ونيمار وماكسيم ومالك ونزار وكيبي ووليد الشعلة وبويا وسيسيه مع الهلال وتقوموا بتسجيلهم للمريخ.
* وبعد ما تسجلوا ديل في المريخ (لوموني) لو ما جبتا ليكم كأس أفريقيا.
* أو اشنقوني في ميدان عام انتو حرين والعايزين تعملوا اعملوا انا راضي.
* المريخاب زعلانين زعل شديد قالوا ناس الهلال بشمتوا فينا.. معقولة في بطل يشمت في وصيفو.
* والسنة دي يا خسارة احتمال كبير ما تكونوا الوصيف بتاعنا بسبب شكوى الامل.
* وما ننسى شكوى الاهلي الخرطومي وناس الاهلي ديل عكاليت وحالفين ما يخلوا حقهم ومستعدين يمشوا لاعلى المستويات.. وديل شفوت بتاعين كورة وشكاوي.
* يعني محمود صالح والفاتح التوم يسكوا لهيم شكوى فالصو.
* وشكوى الاهلي في المريخ ضمان الا ناس الاتحاد يتلاعبو.. والمشكلة أن الاهلي في منطقة الخطورة وهو محتاج لنقاط المباراة يعني تفريط (نهي زندقي).
* والاهلي معتمد في شكواه على قرار لجنة لااستنئافات التي طالبت باعادة مباراة المريخ والامل و تصحيح مسار اللاعب بكري المدينة والمريخ لم يقم بتصحيح مسار اللاعب.. وتعتبر أي مشاركة له غير قانونية وناس الاهلي الشفوت مسكوا في هذا القرار.
* طيب الأهلي شال (3) نقاط.. والأمل ضرب المريخ بهدف من رزاق.. يعني المريخ فقد 6 نقاط.. والستة نقاط دي بتلحق المريخ امات طه وتخليهو الرابع والعجب كمان لو واصل هلال التبلدي انتفاضته احتمال المريخ يبقى في المركز الخامس.
* كل شئ وارد.. في كرة القدم.
* والمركز الخامس معقول للمريخ في ظل مستواه المتدني الذي ظهر به في المباريات الأخيرة.
* واعلام المريخ يواصل التخدير ويكتب القادم أحلى.. وفعلاً القادم أحلى بالنسبة للاندية التي تواجه المريخ لو ما شالوا الثلاث نقاط بتخارجوا بنقطة.
* ونسيت نقاط الهلال من المريخ ليبقى (9) نقاط.. والله الحساب اتخلبط علينا احتمال يصبح المريخ مهدد بالهبوط او يلعب سنترليق.
* لالا ما للدرجة دي احتمال السادس او السابع. برضو مكسب يا مريخاب في ظل فريقكم التعبان ده.
* سلك قال علي جعفر والريخ علي اذا ركبا طيارة يهددان حياة الركاب فما بالك اذا لعبا في خط دفع المريخ.
* أها الشكوى الحصل فيها شنو..
* وجمال الوالي قال امبارح الحساب لسة وقتوا ماجاء.. والليلللة..!!
* اللهم حوالينا ما علينا..
* ناس افراحها زايدة وناس بتألموا
* الهلالاب ما شغالين الشغلة بالمريخ فرحانين ومبسوطين بتألق بشة وعودة كاريكا وظهور كيبي والغربال.
* هلال ماشي تمام.. ومدرب شاطر وقطاع رياضي مفتح وأدارة شغالة بمزاج.
* نحمدك يارب.
آخر المشاوير!
* صفحة الرائع الساخر ورائد أدب العكننة دكتور احمد دولة نالت الاعجاب وتلقت الصحيفة العديد من الاشادات بهذه الصفحة شكراً للرائع دوماً ابو دولة.
* مجادعة الثلاثي الارووع سوهندا.. وود البشري وأحمد مجذوب كانت ابداع.
* عالم النجوم ستقدم العديد من المفاجآت لقرائها في مقبل الايام وتغطية متميزة لكل الاحداث.
* وشكراً لقارئي عالم النجوم المميز الذي ظل على اتصال دائم بالصحيفة.
* غداً يواجه الهلال النسور في كأس السودان.
* وغداً تعود المتعة لاستاد المريخ بوجود بشة وكاريكا وكيبي والغربال واندريا ونيلسون.
* غداً سيأتي الجمهور لاستاد المريخ لتشجيع اللاعبين وتحفيزهم قبل السفر للاسكندرية.
* ثلاثة ايام راحة للاعبي المريخ من كثرة النقاط المفقودة.
خبر طازج: والله حالتكم تحنن!!
>>>