عجبونى الليلة جو ترسوا البحر صددوا
عجبونى الليلة جو دخلوا البلد طمنوا
يا جنيات يا مسره يا جنيات القمري فرّه
كان تجروا تجيبوا العرّه لساني راجيكم برّه
عجبوني الليلة جو ترثوا البحر صددوا
الكوراك فى الضهاري مرقوا اخوان السرارى
كان تجرى يا العشارى حشق النيل خوروا جارى
عجبوني الليلة جو ترثوا البحر صددوا
الكوراك فى الطلوح مرقوا اخوان ام شلوخ
مرقوا اخوان ام شلوخ ديل بقرات المسوح
عجبونى الليلة جو ترثوا البحر صددوا
الخواف لبدوهو لمن تمشو وتجوهو
طمبرولوا ورقصوهو لى بيت امو وصلوهو
عجبوني الليلة جو ترسوا البحر صددوا
وصلت بعثة الجمال وحمد الله علي السلامه
وكنا في الموعد واستقبلناهم كما يجب ان يكون
وبدون مبالغات وميكروفونات وزغاريد
فالتعادل وان كان مفرحا في ارض المال الا انه مخيف
ويستوجب علينا التجهيز لاولاد باسكال الفرنسي
ودون الركون الي التصريحات المخدرة والتي تصدر هنا وهناك
والتي قد يطلقها احيانا الاعلام السالب المهزوم في التمهيدي
والذي يريد للهلال خروجا مماثلا
اليكم بعض الاخبار المخدرة :
طالبت الصحافة المالية الصادرة امس فريقها من الحذر في الخرطوم و عدم الاندفاع الى الجانب الهجومي على حساب الدفاع و طالب الصحافة المدرب باسكال بالعقلانية بجانب الابتعاد عن التصريحات المستفزة حتى لا تحدث له فضيحة في الخرطوم بهزيمة قد تفوق الـــ(خماسية) و يجدر ذكره بان الصحافة المالية وصفت الهلال بالغول و الوحش على ملعبه
قال مدرب الملعب المالي الفرنسي باسكال بانه مبهور للمستوى الكبير الذي قدمه نادي الهلال في مالي و قال بانه كان يعلم بان الهلال خطير و شرس على ملعبه و لكنه لم يتوقع ان يكون قويا خارج اسواره و قال بان موقفنا صعب في الخرطوم و نحتاج الى مجهودات كبيرة من اجل الخروج بنتيجة ايجابية فضلا عن المصاعب التي سنمر بها باعتبار ان الازرق يملك جمهور شرس لا يعرف التوقف و يساند لاعبيه حتى آخر دقيقة
لن يلتفت فريق الهلال لهذه الشائعات
ولن يتحدث كتاب الهلال عن الفريق وخطط الفريق وتكتيك الفريق
لن يتحدث الصحفيون عن من يلعب النابي ومن يجلس علي الدكه
لن يتحدث الصحفيون عن لماذا لم يلعب صلاح الجزولي
ولن يتحدث الصحفيون عن ٣/٣\٤ او ٤/٣/٣ او ٤/٢/٢
ولن يشكل الحاج عطا المنان الاسماء التي ستلعب مع المالي
ولن يكون اخو البشير كجمال الوالي مدرب للفريق بلعب من يريد
جربنا كل هذه السخافات فخرجنا والكئؤوس علي مرمي من قبضة الهلال
جربنا كل هذه السخافات فجنينا الخسران المبين
دعونا نجرب تكتيك النابي
لا نريد ادمانا للفشل
نريد هلالا مغايرا
وتفاءلوا بالخير تجدوه
المحطه الثاني:
والله ضحكت ومازلت اضحك علي ما كتبه اخونا الرائع دوما الاستاذ محمد عبد الماجد بخصوص اتوفيستر حيث قال :
> ديل كلهم كوم ..واتوفيستر كوم براهو.
> طبعاً نحن الزول البنتلّحو لو ما رجعناه اهلو ما بنرتاح.
> عشان كدا اتوفيستر دا مسؤوليتنا نحن.
> زول عمرو (77) سنة جايبنو للمريخ يعمل شنو؟.
> أنا اول يوم سمعت الخبر ...افتكرت (اتوفيستر) دا ماشي (البجراوية).
> افتكرتو جاء (سياحة).
> قلت يمكن عجبتو ليك حكاية جبل مرة ..وجبال التاكا...وجبل البركل.
> اصلو ما اتخيلتو ليك جايبنو (مدرب).
> تاني قعدت افكر براي.
> قلت يمكن يكون (مدرب) اسود.
> الناس البدربو الاسود غالباً بكونوا كبار في السن.
> رجعوا صححوا لي المعلومة.
> قلت يكون دا المبعوث الامريكي.
> المبعوث الامريكي كيف يعني وهو (الماني).
> الكلام دا كدا ما بجي.
> ما اتوقعت لحظة واحدة ...يكون جايبنو (مدرب) للمريخ.
> يا جماعة ناس المريخ ديل قبل (7) سنوات انهوا التعاقد مع (اتوفيستر) عشان كبير في السن.
> الزول بمشي كبير ..ولّا بمشي صغير.
> يعني اتوفيستر دا في الـ (7) سنوات دي كبر ولّا صغر.
> قالوا ليك اتوفيستر ...اول تمرين ليه في المريخ ..شاف ليك (هيثم مصطفى).
> صاحبكم اتلخم.
> الموضوع ما وقع ليه.
> قال يمكن عامل السن يكون خلاه يتخيل هيثم مصطفى جاء من الهلال إلى المريخ.
> افتكر الحكاية (كبر).
> تاني شعر ليك الموضوع في منتهى الجدية.
> صاحبكم افتكر (جمال الوالي) الزول الاتعاقد معاه مشى الهلال.
> اصلو ما اتخيل هيثم مصطفى يكون جا المريخ.
> زول بلعب (17) سنة في الهلال ...وجمال الوالي في المريخ ليه (11) سنة.
> يعني اقرب جمال الوالي يمشي الهلال من هيثم مصطفى يمشي المريخ.
> اتوفيستر صدق الرواية دي.
> لكن تاني الحكاية جاطت ليه في رأسو...لقى ليك هيثم مصطفى لابس اصفر واحمر ...ولابس (النجمة) كمان في صدرو.
> يا ربي الحصل شنو؟.
> في حاجة غلط.
> معقولة هيثم مصطفى بلعب في المريخ.
> اتوفيستر جرى على الشنطة ...عاوز يشوف (عقدو) مع المريخ.
> اتوفيستر لقى ما في (عقد).
> اتوفيستر شغال في المريخ الان بدون (عقد).
> عقد شنو كمان مع زول عمرو (77) سنة؟.
اسئله حائره :
(()) لماذا بنيت دكاكين الهلال مخالفه للمواصفات الهندسيه ولماذا لا يحاسب البرير علي هذه المخالفات ؟
(()) الاعيسر اتهم الشروق بالرشوه والشروق تشكو الاعيسر علي اشانة السمعه اين الحقيقه ياتري ؟
(()) في الاخبار ان المريخ في طريقه لمبارة عالمية ثانيه وفي باريس ضد برشلونه الاسباني هل المريخ عالمي بالجد واحنا ما عارفين ؟
(()) المريخ يريد سرقة فكرة بطولة حوض النيل من نادي الخرطوم هل سيساند الاتحاد الاحمر فريق المريخ ضد فريق الخرطوم ؟
(()) روابط تشجيع الهلال مطالبه بتوحيد اهازيجها في تشجيع الهلال في مباراة الرد وان يزلزلوا الارض تحت اقدام الماليين فهل تتوحد هذه الروابط ؟
محمد حسن شوربجي
