* في العام 1927 وفي بيت من بيوت المسالمة بأمدرمان جلس مجموعة من الرجال في أحد الحيشان الواسعة يتشاورون في أمر ما ، وقفت سيده عبدالمسيح بجلبابها الطويل وقوامها (الذي بدأت تظهر عليه علامات مشروع ترهل قادم) غير بعيد منهم وهي تحمل صينية عليها براد شاي وأكواب أنيقة وقطع من الكيك المعمول منزلياً شأن أغلب بيوت الأقباط في المسالمة آنذاك ونادت على أخيها عبدالسيد ودار بينهما الحوار التالي :
ـ ياعبدو..
ـ ـ نعم يا أختاه
ـ تعال هاك الشاي ده!
جاء عبد السيد مسرعاً وهو يرشف آخر نفس من سيجارته قبل أن يرميها على الأرض ويدوس عليها بحذائه ويتسلم صينية الشاي من شقيقتهياخوي الليل هوّد ..لحدي هسه مالقيتو ليكم إسم؟)
ـ ـ لسه بنتشاور
ـ شوفوا النجوم دي وروعتها ليه ماتسموه النجوم أو الكواكب أو المريخ؟
ـ ـ والله فكرة ..يمكن إسم كوكب المريخ أجمل.
عاد عبدالسيد إلى الجماعة وعرض عليهم اقتراحات شقيقته فاختاروا إسم المريخ.
* * *
في العام 2012 اجتمع نفر من مشجعي نادي المريخ في مطعم بطه بائعة الأطعمة الشهيرة وهم يحملون رزمة فيها 20 مليون جنيه بالقديم وبدأ بعض المصورين في التقاط صور لهم وهم يسلمونها المبلغ بمناسبة انسلاخها عن تشجيع الهلال حسبما نشرت الصحف التي ينتمون لها صبيحة اليوم التالي.جاءت إحدى جارات بطه (أو هكذا ينبغي أن يكون سار السيناريو) في السوق تجرجر أقدامها وتهز يديها المخضبتين بالحناء يميناً ويساراً في استعراض لاداعي له و لايتناسب مع سنها الكبيرة ، بدات بخطة هجومية بعد سلام سريع..
ـ ـ ياكعبة تجيبي ناس الكورة يصوروك ويغمتوا ليك عشرين مليون قايلة خبرك مامعاي ؟ مالك ماجارتك وحبيبتك وزميلتك والبياكل براهو بخنق ، قالوا خليتي تشجيع الهلال واتحولتي للمريخ ، مالك كان حولتيني معاك؟
ـ هي اسكتي ساكت دي جاتني في صمة خشمي ، عليك الله هلال شنو ومريخ شنو؟ديل ناس فارغة ومقدودة ساكت وشن عرفني بالكورة؟ نجن جاريين في ارزاقنا ، الأولاد زبايني بي هظار سألوني بتعرفي كورة قلت ليهم بسمع بالهلال ، تاني يوم قالوا لو خليتي تشجيع الهلال واتحولتي للمريخ ليك الحلاوة وأريتا حلاوة السرور.
ـ ـ كان كدي معليش ما أظلمك ساهي بس حولي لي الوليدات ديل قولي ليهم في واحدة هلالابية على السكين وحرداناهو ومكجناهو بتفتش ليها في فريق تاني وليك علي الحلاوة..أها ودعتك الله.

* * *
في العام 2013 خطرت لي فكرة الكتابة عن قضية الحضري مع المريخ بعد دخول لاعب جديد في الأزمة هي والدته فانتهزت فرصة وجود بعض أبناء النيل معي في الصحيفة التي أعمل بها وسألت أقربهم مني يا أبو محمد تعرف إسم والدة عصام الحضري ؟)، ردآه لحظة وأديهولك).أخذ إبن النيل يبحث في جواله فاستغربت وسألته بتعمل في إيه؟).فأجابنيبكلم مراتي !)، فرديتهو أنا سألتك من مراتك؟)،أجابني بهدوءماهي صديقتها!)، قلت بحركة لاشعورية (واااااو ، طب هات ياعم).وأخذ صاحبي يتحدث مع مراته وقفل الخط وهو يقول(إسمها فتحية).. شكرته وقلت أستغل الفرصة وطلبت منه ترتيب لقاء معها فوعدني خيراً ولازلت انتظر الفرصة المناسبة لأنه واضح أن(طنط فتيحة)مبيتة النية وزعلانة من الإدارة المريخية وقالت في تصريحات إعلامية قوية (هو لو ما إبني كانوا هايكسبوا الهلال ولايفوزوا بالدوري؟ عالم ماتستحيش)!!.
أصداء
* اللاعب الذي (تلب بالشباك) من غرفة تسجيلات الهلال وسجل في كشوفات المريخ قبل أربعة مواسم وتم شطبه مؤخراً اخذ ينغزل في الهلال ويحلم بالتوقيع له.. عشم إبليس في الجنة.
* قبل سنوات فرط الهلال في إعادة واحد من أفضل مهاجميه في القبن الماضي هيثم طمبل بسبب خطأ إداري من التجاني أبو سن آنذاك..فذهب طمبل للمريخ وبقي أبوسن .. الموسم الماضي وبسبب فشل إداري لم ينجح الهلال في تسجيل سيدي بيه وتكررت المشكلة في التسجيلات الحالية.. لازم لاتتم إقالة المسئول عن الخطأ الساذج الذي لايشبه فريقاً كبيراً مثل الهلال؟.
* عصام (الهاج) سجل هيثم مصطفى بخدعة بعد ان تم رفضه بالإجماع في الاجتماع الشهير ، وبعد ان (راحت عليه)حالياً أخذ يهاجم في الوالي والحضري..ماقلت خطري؟!.
*زمان قال يسن عمر الإمام أن لكل حزب صعلوك ، وإنه صعلوك الجبهة الإسلامية! حالياً صعلوك الاتحاد العام قال أن الفيفا سيعاقب الهلال .. وبعد ساعات قال مامعناهو الهلال ماتجيهو الحبة!ألعب غيرها ياحبة!.
* صلاح إدريس تغدى بإدارة المريخ قبل أن تتعشى به في صفقة باسيرو.. نادي الوالي غرقان في الملايين ويريدون شرائه بملاليم.. لعاب يا أرباب.