همسات دافئة
افتحوا فضائية الهلال .. اقصد فضائية ( حضرونا ) فيها مسلسل رهيب ، تم تصوير حلقاته بام درمان وكفر البطيخ ، وبطل المسلسل اسمو عصمونا ، ممكن تلحقوا باقي الحلقات لان المسلسل بدأ يسخن يا دوووب ، غايتو انا بحكي ليكم قفشات من الحلقات الفاتت عليكم عشان تكونوا في الصورة وبعد داك تابعوا الباقي بطريقتكم .
المهم ياجماعة الخير البطل عصمونا جاء من كفر البطيخ عشان يزور الوالي بتاع المدينة عشان المدينة قبل مايجي كانت حزينة .. طبعا الوالي جهز الجيوش .. ورشّ الحوش .. والبلد اتملت زهور اشي احمر وشيء اصفر وبقت نور في نور .. وبمجرد وصول طائرة الضيف استقبلوه باللافتات حتي انا بتذكر فى لافته صفراء مكتوب عليها بالاحمر ( نهديك الحب ) . ووالي المدينة ماقصر شيء حمام بالفريك وشيء سمك مشوي وشيء ضبيحة وسليخة . ونقنقة وحاجات كده تفتيحة .
أها قام الوالي بتاع المدينة سافر والجماعة انقلبوا علي البطل عصمونا وأدوه قفاهم .. أشي سخينة وشيء فتة فول وشيء لقيمات والبوش ما يديك الدرب وبتاع البقالة الجنبهم مبسوط انعشوا ليه دخل البقالة .. وشوية شوية طردوا صاحبنا من القصر ، وجدعوا ليه عفشو بره من عصر .. عصراً بدري .. صاحبنا زعل .. عليكم الله ماليه حق يزعل ؟ وطوالى علي المطار ولا مودعين ولا يحزنون ركب طيارة ودربو عديل لكفر البطيخ . وقالوا في المطار ملأ الدنيا صريخ .
ولما والى المدينة سأل من الضيف لما رجع من السفر.. قالوا ليه : ( فرتق وركب القطر ) . طوالي مسك التلفون واعتذر ليه وقال ليه يا عصمونا خليك حنون . ورسل ليه طيارة خاصة وقال ليه معليش نحن آسفين وضروري تجي نحن ليك محتاجين .. عشان انا عندي حرب مع غريمي هلال ومن غيرك خربانة يا عصمونا عليك الله تعال ..وبيني وبينكم عصر ليه صُرة فيها دريهمات .. وبالامريكي دولارات حارّااات .
بعد الحرب طوالى قال ليهم : امي مريضة وماشي ازورها وسافر عشان يشوف امه ( الله يشفيها .. اشفها انت الشافي لا شفاء الا شفاءك شفاء لا يغادر سقما ) . لكن كان اصلها حقيقة كان جابوه في المسلسل وهو في المستشفي مع امه وكانت الفضائيات نقلتها والجرايد جابت الصور لكن اتاريه كضاب . يعني ما قادر يصبر يومين بعد تنتهي معركة انقولا ويسافر علي راحتو .. اصلو شنو الحكاية الدنيا طايرة ؟ وانت امك دي ما عندها صليح في الدنيا غيرك انت ؟
المهم مشي شاف امه ومن الكفر سافر انقولا عشان يلحق الحرب . وقال ليهم أكان امشي جالولا .. كِضب . وعلي ما اظن شاف الجولة خاسرة والردم بكتر عليه ومن مطار انقولا قال بلا حرب بلا لمه ( وفرتق ) من انقولا لكفر البطيخ راس .. طيب بدل ما تمشي الكفر اكان ترجع للمدينة وتقول للوالى الحاصل كلو !!
طبعاً طلع خائن . والجماعة كونوا ليه مجلس محاسبة ، قال ليهم انا عصمونا حامي العرين بجلالة قدري اجلس للمحاسبة ؟ انا برسل ليكم وكيلى يقعد معاكم وفكونا من حروبكم الديمة عليها خسرانة . . انا امي عيانة .. قالوا ليه : يا عصمونا قبل كده رسلنا ليك جواب قلنا ليك ما تفلت كلامك بعد ما عذبتنا عذاب .. المندوب جاء شايل الجواب وقال رفض يستلم مني الجواب . اكلناها وقطعناها في حشانا .. وانت القايلنك دخرينا وعشانا .. وتاني تجي تقول برسل ليكم زول يفكنا منكم يا شوم ؟ وتاني اضحكوا عليّ اكان جيت الخرتوم .. الكلام ده عيب منك يا عصمونا .
طيب يا عصمونا قول لينا مشكلتك شنو ونحن بنحلها ليك .. واي حاجه عايزها ماعليك .. قال ليهم : اول حاجة امي عيانة والأمن عندنا فى الكفر معدوم وعيالى براهم ومنهم محروم . اعد النجوم والليل كلو ما بنوم .. وفكوني بالتراضي واوع تدخلوا القاضي .
انت ياعصمونا قاعد معانا في المدينة سنتين .. امك دي ما مرضت الا هسع ؟ يا ابو طبعاً شين .. والأمن في الكفر معدوم من قبل تلاتة سنين .. واولادك فارقتهم من قبل سنتين يعني الجديد شنو يا عصمونا ؟ زمان وكت المحمر والضلع المقمر كلامك ده ما قلتو ليش ؟ يعني وكت النعيم الداير .. كفر البطيخ كلو اريتو طاير ؟؟ .
اها يا جماعة الخير المخرج شيطان قام قطع الحلقة لما قالوا ليه يوم 23 في الشهر ده تجي لمجلس المحاسبة وقال ليهم السماء قريب اكان اجيكم . والله المخرج شحتف روحنا يعني قطع الحلقة في وكت خلانا ننتظر الحلقة الجاية بفارغ الصبر . ماتنسوا يا جماعة قناة حضرونا علي التردد ( . com نكتوت www.) والمسلسل اسمه ( من الحمام بالفريك أكلوه مساويك ) .
***خربشات :
حلقات المسلسل مهداة الى العزيز الاستاذ/ نادر التوم
اقعدوا بالعافية ...
افتحوا فضائية الهلال .. اقصد فضائية ( حضرونا ) فيها مسلسل رهيب ، تم تصوير حلقاته بام درمان وكفر البطيخ ، وبطل المسلسل اسمو عصمونا ، ممكن تلحقوا باقي الحلقات لان المسلسل بدأ يسخن يا دوووب ، غايتو انا بحكي ليكم قفشات من الحلقات الفاتت عليكم عشان تكونوا في الصورة وبعد داك تابعوا الباقي بطريقتكم .
المهم ياجماعة الخير البطل عصمونا جاء من كفر البطيخ عشان يزور الوالي بتاع المدينة عشان المدينة قبل مايجي كانت حزينة .. طبعا الوالي جهز الجيوش .. ورشّ الحوش .. والبلد اتملت زهور اشي احمر وشيء اصفر وبقت نور في نور .. وبمجرد وصول طائرة الضيف استقبلوه باللافتات حتي انا بتذكر فى لافته صفراء مكتوب عليها بالاحمر ( نهديك الحب ) . ووالي المدينة ماقصر شيء حمام بالفريك وشيء سمك مشوي وشيء ضبيحة وسليخة . ونقنقة وحاجات كده تفتيحة .
أها قام الوالي بتاع المدينة سافر والجماعة انقلبوا علي البطل عصمونا وأدوه قفاهم .. أشي سخينة وشيء فتة فول وشيء لقيمات والبوش ما يديك الدرب وبتاع البقالة الجنبهم مبسوط انعشوا ليه دخل البقالة .. وشوية شوية طردوا صاحبنا من القصر ، وجدعوا ليه عفشو بره من عصر .. عصراً بدري .. صاحبنا زعل .. عليكم الله ماليه حق يزعل ؟ وطوالى علي المطار ولا مودعين ولا يحزنون ركب طيارة ودربو عديل لكفر البطيخ . وقالوا في المطار ملأ الدنيا صريخ .
ولما والى المدينة سأل من الضيف لما رجع من السفر.. قالوا ليه : ( فرتق وركب القطر ) . طوالي مسك التلفون واعتذر ليه وقال ليه يا عصمونا خليك حنون . ورسل ليه طيارة خاصة وقال ليه معليش نحن آسفين وضروري تجي نحن ليك محتاجين .. عشان انا عندي حرب مع غريمي هلال ومن غيرك خربانة يا عصمونا عليك الله تعال ..وبيني وبينكم عصر ليه صُرة فيها دريهمات .. وبالامريكي دولارات حارّااات .
بعد الحرب طوالى قال ليهم : امي مريضة وماشي ازورها وسافر عشان يشوف امه ( الله يشفيها .. اشفها انت الشافي لا شفاء الا شفاءك شفاء لا يغادر سقما ) . لكن كان اصلها حقيقة كان جابوه في المسلسل وهو في المستشفي مع امه وكانت الفضائيات نقلتها والجرايد جابت الصور لكن اتاريه كضاب . يعني ما قادر يصبر يومين بعد تنتهي معركة انقولا ويسافر علي راحتو .. اصلو شنو الحكاية الدنيا طايرة ؟ وانت امك دي ما عندها صليح في الدنيا غيرك انت ؟
المهم مشي شاف امه ومن الكفر سافر انقولا عشان يلحق الحرب . وقال ليهم أكان امشي جالولا .. كِضب . وعلي ما اظن شاف الجولة خاسرة والردم بكتر عليه ومن مطار انقولا قال بلا حرب بلا لمه ( وفرتق ) من انقولا لكفر البطيخ راس .. طيب بدل ما تمشي الكفر اكان ترجع للمدينة وتقول للوالى الحاصل كلو !!
طبعاً طلع خائن . والجماعة كونوا ليه مجلس محاسبة ، قال ليهم انا عصمونا حامي العرين بجلالة قدري اجلس للمحاسبة ؟ انا برسل ليكم وكيلى يقعد معاكم وفكونا من حروبكم الديمة عليها خسرانة . . انا امي عيانة .. قالوا ليه : يا عصمونا قبل كده رسلنا ليك جواب قلنا ليك ما تفلت كلامك بعد ما عذبتنا عذاب .. المندوب جاء شايل الجواب وقال رفض يستلم مني الجواب . اكلناها وقطعناها في حشانا .. وانت القايلنك دخرينا وعشانا .. وتاني تجي تقول برسل ليكم زول يفكنا منكم يا شوم ؟ وتاني اضحكوا عليّ اكان جيت الخرتوم .. الكلام ده عيب منك يا عصمونا .
طيب يا عصمونا قول لينا مشكلتك شنو ونحن بنحلها ليك .. واي حاجه عايزها ماعليك .. قال ليهم : اول حاجة امي عيانة والأمن عندنا فى الكفر معدوم وعيالى براهم ومنهم محروم . اعد النجوم والليل كلو ما بنوم .. وفكوني بالتراضي واوع تدخلوا القاضي .
انت ياعصمونا قاعد معانا في المدينة سنتين .. امك دي ما مرضت الا هسع ؟ يا ابو طبعاً شين .. والأمن في الكفر معدوم من قبل تلاتة سنين .. واولادك فارقتهم من قبل سنتين يعني الجديد شنو يا عصمونا ؟ زمان وكت المحمر والضلع المقمر كلامك ده ما قلتو ليش ؟ يعني وكت النعيم الداير .. كفر البطيخ كلو اريتو طاير ؟؟ .
اها يا جماعة الخير المخرج شيطان قام قطع الحلقة لما قالوا ليه يوم 23 في الشهر ده تجي لمجلس المحاسبة وقال ليهم السماء قريب اكان اجيكم . والله المخرج شحتف روحنا يعني قطع الحلقة في وكت خلانا ننتظر الحلقة الجاية بفارغ الصبر . ماتنسوا يا جماعة قناة حضرونا علي التردد ( . com نكتوت www.) والمسلسل اسمه ( من الحمام بالفريك أكلوه مساويك ) .
***خربشات :
حلقات المسلسل مهداة الى العزيز الاستاذ/ نادر التوم
اقعدوا بالعافية ...