• ×
الثلاثاء 20 أبريل 2021 | 04-19-2021
خلف الله ابومنذر

له بين أطراف الأسنة مطلب

خلف الله ابومنذر

 9  0  1484
خلف الله ابومنذر
تسلمت حكومة ولاية شمال كردفان عصر أمس بمقر حكومة الولاية من وفد يمثل مجموعة شركات الكاردينال، تسلمت مبلغ ستة مليار جنيه سودانى عبارة عن الدعم المالى الذى وعد به رجل المال والأعمال الأخ الأستاذ أشرف سيد أحمد الكارينال رئيس نادى هلال السودان عند زيارته الأخيرة لمدينة الأبيض حاضرة الولاية وذلك دعما لمشاريع الولاية فى المجالات المختلفة ولتأهيل عدد من المؤسسات التعليمية والصحية وخلافها.
* نسأل الله ان يجعل الدعم المالى فى ميزان حسنات الأخ الأستاذ أشرف الكاردينال ويعود بالخير والنماء والتطور والازدهار على انسان الولاية ويسهم فى نهضة شاملة تنتظم الولاية وترفع المعاناة عن كاهل أهلها .
* الاشارة لهذا الدعم الكبير ليس من باب المن أو التباهى ولن يكون كذلك لأن الأخ الأستاذ أشرف الكاردينال مواطن سودانى يدعم وطنه من حر ماله لبناء وتأهيل المؤسسات الصحية والتعليمية وخلافها من مرافق خدمية كما سبقه العشرات من رجال المال والأعمال الذين شيدوا المدارس والمراكز الصحية والمستشفيات وأطلقوا عليها أسمائهم خدمة للوطن والمواطن وكان مستشفى ومدرسة البلك ومستشفى وابراهيم مالك وعبدالمنعم محمد وغيرها
* الاشارة لهذا الدعم من باب التأكيد والجزم فقط بان الأخ رئيس نادى الهلال صاحب قدرات مالية مهولة بالداخل والخارج ليطمئن الجميع ان تأخير حسم صفقات المحترفين الأجانب لا علاقة له بعدم قدرة الأخ رئيس الهلال على الايفاء بالقيمة المالية للصفقات كما روج البعض عبر الأسافير لأن الذى يقدم الدعم للآخرين بملايين الدولارات ومليارات الجنيهات نقدا لا يعجزه القيام بالتزاماته والايفاء بما وعد به جمهور النادى الذى يترأس مجلسه خاصة الأخ الأستاذ رئيس نادى هلال السودان الذى وضع الانجاز الخارجى هدفا وان كان بين أطراف الأسنة فهو مطلبه وسيسعى للظفر به.
* نعود ونقول تبقى لفترة انتدابات اللاعبين الرئيسية أكثر من اسبوعين ونؤكد ان حسم ملف المحترفين الأجانب مسألة وقت ليس الا ولا يوجد ما يحول وحسم الصفقات خاصة من الناحية المالية وان حدث تأخير ولم تحسم الصفقات فى الموعد المضروب مسبقا من قبل المجلس فذلك وكما اتضح للجميع يعود لعدة عوامل لعل أولها تدخل المدير الفنى غارزيتو الذى أبدى بعض الملاحظات وطالب بمحترفين غير الذين رصدهم النادى واتصل بهم وفاوضهم وذلك قبل ان يصرف النادى النظر عن فكرة ومبدأ التعاقد معه
غيض
* الكل ظل يطالب بمحترفين أجانب من العيار الثقيل ليس لاحراز الممتاز الذى شبع منه الهلال وانما ليخوضو خضخاض المشوار الأفريقي الشرس وبخبراتهم وقدراتهم يصنعون الفارق الفنى الذى يؤهل هلال السودان للمنافسة بقوة على اللقب الأفريقي من ثم الصعود لمنصات التتويج باذن فاطر السموات والأرض وهؤلاء لا يتم حسم صفقاتهم بين عشية وضحاها.
* طالما جمهور هلال السودان تشرئب أعناقه ويناجى محترفين من العيار الثقيل على قدر طموحاته وتطلعاته التى تجاور الثريا فعليه التزود بالصبر ولا يملك سماعيه ولبه للمرجفين والموتورين وقد تبقى أكثر من اسبوعين
* صدقونى وحسب علمى ومن مصادر على مستوى فى محترفين من العيار الثقيل فى طريقهم للدفاع عن شعار هلال السودان باذن الله تعالى
* وعشان أثبت ليكم صحة كلامى المهاجم المحترف المن العيار الثقيل قال ما بوقع فى كشف الهلال الا يشوف تقارير طبية تثبت ان صلاح نمر وضفر وأمير كمال والنعسان بصحة جيدة عشان ما عايز يرتكب جريمة
* لو عايزين محترفين من نوعية العجوز باسكال وعاشور الأدهم والمحترف أبوسن دهب اللابس عراقى وساعة سيكو داك ممكن بكره دى تمشوا المطار تلقوا أخونا الكاردينال شاحن ليكم كونتير من النوع ده.
* نجمة المسالمة مع الفلس استعجلت ومشت جابت محترفين من النوع البكلف خمسمائة دولار وكرتونة أندومى وكرتونة شيبس وصندوق بارد
* طيب الحصل شنو مع المحترفين الرخاص ديل.. كل يوم يمشوا من الصباح يستقبلوا محترف فى المطار ويركبوا ركشة يمشوا مستشفى حاج الصافى للكشف الطبى يطلع عندو التهاب كبد وبائى وتمزق فى المرارة
* تانى يوم الصباح بدرى يركبوا أمجاد ويمشوا المطار ويستقبلوا محترف من الرخاص ويمشوا بيهو مستشفى امبريال للكشف الطبى يطلع عندو اسهال مائى وغضروف فى الرقبة وبرجم والدكتور مانعو من الشعيرية
* أخيرا ركبوا موتر فيسبا ومشوا المطار بدرى وجابوا ليهم محترف قالوا هداف البطولة الأفريقية للأندية وأخونا الحاج مزمل أبوالقاسم كتب عمود وقال المحترف صاغ سليم وممكن يضرب الحيطة بلنجة يقلبها كمنجة.
* بعد كلام الحاج مزمل ده كلو المحترف طلع عندو فايروس نقص المناعة الطبيعية (ايدز) شفاه الله وحمانا وحماكم الله ولا حول ولا قوة الا بالله .
* يا حاج مزمل أخوى قلت المحترف صاغ سليم وطلع عندو (ايدز) نسأل الله له الشفاء يعنى اذا ما كان صاغ سليم كان طلع عندو(ايدز) وحصبة؟
* غايتو بالمحترفين ديل بدل تشاركوا فى البطولة العربية شاركوا فى كأس الثورة الصحية ومنظمة الصحة العالمية بترسل ليكم حقن ومضادات حيوية
* اكتشفت من خلال بعض مواقع التواصل الاجتماعى ان التعليم بالسودان بالفعل انهار فى السنوات الأخيرة ويكفى ان بعض من الاخوة الذين يدعون حصولهم على درجة الدكتوراة يرتكبون أخطاء املائية شنيعة لا يرتكبها تلميذ المرحلة الابتدائية زمان أما الأخطاء النحوية فحدث ولا حرج.
امسح للحصول على الرابط
بواسطة : خلف الله ابومنذر
 9  0
التعليقات ( 9 )
الترتيب بـ
الأحدث
الأقدم
الملائم
  • #1
    الفيل 11-13-2016 06:0
    الشىء الوحيد الذي يستحق التعليق فى عمودك هو انهيار التعليم في السودان والدليل عمودك هذا
  • #2
    عزالدين وديدي 11-13-2016 04:0
    يا اخي انت رجل كبير وتكتب تريقة سخيفة وكلام ينافي الواقع وكذب كمان تتحدث بلسان المحترف الفي الغيب. ضفر ونمر وباسكال افضل اللعيبة الحالية في السودان. خليك كبير في كتاباتك زي عمرك. اكتب كلام مفيد وبطل الكلام الفارغ
  • #3
    نعمان عمر 11-13-2016 02:0
    كسار التلج ده شنو البتسوي فيهو ده يا راجل استحي محترفين شنو اوكرا المشطوب من خارج حسابات المريخ بقى من العيار الثقيل يا سقيل انت كفاية .. كاس شنو وتتويج منو يا الحبوب كردينالكم ده زول كضاااااب يوعد ويخلف ما اظن الهلال قادر في زمان هذا الرجل المشعوذ بتخطي دور ال٣٢ في البطولة الافريقي .. اها وين ساماتا اللهم لا سماتا فيكم ..
  • #4
    دفع الله الشريف 11-13-2016 01:0
    لو كنت مكان البارودى لإقمت دعوى ضد كاتب المقال بإشانة السمعة .. كيف يقتبس بيتا من قصيدة عصماء تعتبر من عيون الشعر العربى لتكون عنوانا لمقال هايف !!!!
  • #5
    باكمبا 11-13-2016 09:0
    مسئول من الخير ياخ الكاردينال معروف رجل أعمال وله مصانع وشركات في السودان ,اثيوبيا، بس السؤال إنت مرجان أحمد مرجان ده شغال شنو؟ بالجد والله، أوعا تقول لي عضو في الحزب الحاكم وبس، وبيأكل زي ناس حامد ممتاز من ضهر الشعب السوداني،
  • #6
    عزالدين تنزانى 11-13-2016 09:0
    ياخ خليك واضح من كلامك دا انت بتقصد منو؟ نحنا ما عارفين والعارف عزو مستريح _ وضح_ افصح_ اشرح_ ولو ماعاوز تقول اسمو ورينا اول حرف منه
  • #7
    جلابي - الدوحة قطر 11-13-2016 09:0
    الاشارة لهذا الدعم الكبير ليس من باب المن أو التباهى ولن يكون كذلك لأن الأخ الأستاذ أشرف الكاردينال مواطن سودانى يدعم وطنه من حر ماله لبناء وتأهيل المؤسسات الصحية والتعليمية
    والله ضحكت لامن وقعت ..يا زول انت بتتكلم عن منو الكردنه البنعرفه ولا ترامب الامريكي ؟ دي قروسش الصفقات الهلاليه مع الابن ..زقال حر ماله قال
  • #8
    د الشريف 11-13-2016 09:0
    وعشان اثبت ليكم صحة كلامى المهاجم المحترف ( المن ) ( العيار ) ( الثقيل ) قال ما بوقع فى كشف الهلال الا إذا ... يضرب الحيطة بلنجة يقلبها كمنجة .. ما هذا الهبل والخبل ؟؟؟ هل عقمت حواء الهلال ؟؟؟ خفة الدم هبة ربانية يمنحها لمن يشاء من عباده .. الصحافة مهنة رسالية تستحق الأحترام حولها البعض مسرح للعبط و التهريج .. الصحافة مجال واسع للرزق الحلال وليس للإرتزاق .. عيب والله ان يكون ثمن الصحفى صحن فول وتحويل رصيد !!!
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019