• ×
الأربعاء 22 سبتمبر 2021 | 09-21-2021
بابكر سلك

بيتهم داير يبقى من قزاز

بابكر سلك

 2  0  1671
بابكر سلك


> قفل استاد المريخ للصيانة ورفض طلب الاتحاد ببرمجة مباريات عليه
> اسعد خبر سمعته بعد تولي التسيير تو للجام القيادة
> حقيقة استاد المريخ نسى حاجه اسمها صيانه ليهو سنين
> فالقلعة الحمراء التي شرفت الكاف قبل السودان بهاءً وألقا ًقبل ان تشرف الاتحاد السوداني يوم فاصلة مصر والجزائر
> لا اظنها قد عرفت الصيانة بعد ذلك الحدث
> الملعب السندسي الذي كنا نباهي به اضحى شبيه براسي ده
> وأخير راسي
> الصلعة منتظمة في راسي
> ولكن الصلع بارضية ملعب المريخ متناثرة بدون عنوان وبدون حجاب وبدون انتظام وبدون اهتمام وبدون خجلة
> حتي اصبح ما يميزنا محرجاً جدا ًلنا
> حتى محاولات تأهيل النجيل كانت تتم الموسم الماضي بضغوط من المعلم غرزة
> ومن فرط الصلع المتناثرة على ارضية ملعبنا كدنا نطلق عليه الصلعة الحمراء بدل القلعة الحمراء
> ايها الناس
> أي زول ممكن يبني فيلا
> ولكن ليس المهم كيف تبني
> ولكن المهم وين تبني
> فمثلاً محاولات كردنة لالحاق استاد الهلال بالقلعة الحمراء
> هي محاولات فاشلة جدا ًبحسب تقديري
> لان الموقع الذي يسكب فيه كردنة أطنان السيخ وجبال الاسمنت
> ماهو إلا امتداد شرقي للمنطقة الصناعية
> وماهو الا امتداد جنوبي لحوش البلدية
> وماهو الا امتداد غربي لموقف امبدة
> ويجاور تجمع الحمامات مدفوعة الاجر مقدماً
> المهم وين تبني يا كردنة
> واختيارك للموقع ما كان مناسب
> ما يجري باستاد الهلال ذكرني بالقصر العشوائي
> بتتذكروا القصر العشوائي ولا نسيتوهو!
> بخلاف موقعنا
> على الشارع الرئيس والرئاسي
> ويطل على جامعة الاحفاد للقوارير المنيرة والمستنيرة
> ثم تحتضنه بنايات شاهقات كأنهن وجدن خصيصاً ليزدن قلعتنا ألقاً وتألقاً
> الصيانة مهمة
> ما مهم كيف ووين تبني
> بقدر ما المهم هو كيف تحافظ على بنيانك متألقاً رائعاً مدهشاً
> وعلى بنياتك بكامل عتادها تؤدي الغرض منها
> ولكن السؤال
> لماذا هذا التدهور???
> الاجابة طوووويلة
> ولكن أهم الأسباب
> وبكل صراحة
> ومع احترامنا للقوات النظامية
> إلا أنها اول اسباب الاضرار بالاستاد والملعب.
> أوريكم كيف
> قول في تخريج في الاستاد
> الاستاد بشتغل بروفات العرض اسبوع قبل التخرج
> الموضوع ده فيهو مليون بوت يهردن النجيلة هرد ويزيدنها هري
> وان هري كمان
> بسرعة شديدة
> وفي سيخ بتقطع وبتدفن في ارضية الملعب عشان لزوم الطابور والمسير
> بعد يقبضوا دبابيرهم بمشوا يخلوا لينا سيخهم ومواسيرهم مدفونات في الملعب
> يجيهن الصدأ
> ويفرزن من المواد ما يكفي لإبادة غابة خليها نجيلة
> ومن هنا يبدأ التدهور
> ثم الاهمال
> ثم تظهر الثعلبة
> والصلع تتطاقش
> اول خطوات المحافظه على الملعب هي الاعتذار عن تخاريج القوات النظامية مع احترلمنا لها وتقديرنا لجهودهم الثرة
> ايها الناس
> الكلام في الموضوع ده طوييييل
> نعود ليهو بي روقة
> ولكن المهم
> تكلفة الصيانة دي كالعادة دافعها جمال لوحده
> ام دين علي المريخ يستقطع من الدخل؟؟
> واذا اصلو الموضوع عاملو جمال لوحدة او بالتقسيط
> باقي الروزا ديل راكبين لي شنو؟؟
> واذا كان راكبين ساي
> لزومو شنو روزا
> نبيعها ونجيب ركشة
> صيانتها ما مكلفة
> ومنسابة بتدخل اي حتة
> يسوقها جمال
> ويركب معاهو فيها تلاتة
> صمدو ودكتور علاء والتالت يكون منوووووو؟
> وهل سدد اعضاء المجلس ما التزموا به من دعم في الاجتماع الاول
> ام القصة كانت نفخة وشوبش ساكت؟؟
> ايها الناس
> من دخل المجلس شوفونية ما حبابو
> ومن دخل المجلس ليضيف لسيرته الذاتية ما بلزمنا
> ومن دخل ليستفيد عجاج كرعينو
> وبرضو حانرجع للموضوع ده
> والموضوع برجعنا لنفرة القصر
> اتسمينا بيها ساكت ولا سددت؟؟
> ولا طلعت هوا ساكت
> ولو لو كنا عارفنها نفخ ساكت
> كان جبنا كمبرسوناتنا وجينا
> هو الكلام بقروش!
> عالم بنشرجي
> ايها
> حسبنا الله نعم الوكيل
> حسبنا الله نعم الوكيل
> حسبنا الله نعم الوكيل
> بقلوب راضية موضية ننعى للامة انتقال الكرة السودانية للرفيق الاعلى بالامس بودمدني حاضرة الجزيرة
> وشارك التشييع للمقابر آلاف المواطنين
> وعبر شاشات التلفاز كان الملايين يذرفون الدمع على فقيدة الوطن الراحلة المقيمة الكرة السودانية
> ومما يجدر ذكره انها انتقلت نتيجة خطأ طبي حيث انها تناولت كميات كبيرة من يخطئ ولا يظلم
> وكان للمدير الطبي المدعو صلاح دور كبير في الافراط لاعطائها ذلك العقار المميت
> ونحن اذ نحتسبها عند الله تعالى شهيدة
> نسأل الله ان يتقبلها قبولا حسنا ًويجعلها من اصحاب اليمين مبعداً ايها من اصحاب الياقات السوداء
> ايها الناس
> كانت الفقيدة هي اخواتها من المناشط الرياضية الاخرى
> وبرحيلها انطوت صفحة الرياضة في هذا البلد الطيب اهلو
> ايها الناس
> ان تنصروا الله ينصركم
> اها نجي لي شمارات والي الخرتوم
> والينا > موضوع تندلتي عملت فيهو شنو لينا!!!
> حقنا بجينا
> ولا يجي بايدينا؟؟
سلك كهربا ننساك كيف والكلب مكوع ويردد. اجي يا تندلتي!!! بالغتي يا اختي
والي لقاء
سلك

امسح للحصول على الرابط
بواسطة : بابكر سلك
 2  0
التعليقات ( 2 )
الترتيب بـ
الأحدث
الأقدم
الملائم
  • #1
    النورس 07-31-2016 11:0
    الجوهرة الزرقاء ليس من مال الغلابة والفقراء من بلادي الحبيبة عشان كدة حارقاكم يا دلاقيييييييييييييييييييييييييييييييييييييين بعدين الصلعة الحمراء مش كردنة والارباب مساهمين فيها... واليوم دكتور المريخ المقال قال مريخكم فيه هلالاب كتار وانا بقول الهلالاب في المريخ هم سلك ومزمز وكابو وهيثم صديق
  • #2
    النورس 07-31-2016 11:0
    الجوهرة الزرقاء ليس من مال الغلابة والفقراء من بلادي الحبيبة عشان كدة حارقاكم يا دلاقيييييييييييييييييييييييييييييييييييييين بعدين الصلعة الحمراء مش كردنة والارباب مساهمين فيها... واليوم دكتور المريخ المقال قال مريخكم فيه هلالاب كتار وانا بقول الهلالاب في المريخ هم سلك ومزمز وكابو وهيثم صديق
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019