* بسم الله وعلى الله نبدأ .. وكل ما نتمناه ان يتسع صدر القراء لما سنورده في المساحة التالية.. فقط كونوا معنا..

* خسر المريخ امام أهلي شندي بسبب المعز محجوب.. لكن المعز ده يا جماعة عايزنو يتقطّع ليكم..؟! الزول حارس كبير.. يعني ما في زول يقول لي ان التعاقد مع المعز خطأ فني او اداري.. المعز لم يكن في حسابات غارزيتو نهائياً..!!

* طبعاً جمال سالم لم يشارك لأنه أصيب قبل المباراة بلحظات.. و(الحركة دي) معناها انو في واحد هلالابي حاقد (أداهو عين) عشان كده تم ابتعاد والاستعانة بالمعز الذي لم يكن في الجاهزية المطلوبة من الناحية النفسية..(شفتو كيف)..!!

* مريخنا ده.. (آآي المريخ حقنا براانا) ما فيهو اي عيب، ولا يشتكي من السماسرة ولا يحزنون مريخنا ده زييو ماااااااافي لا في افريقيا ولا بقية القارات.. مريخ فريد وعجيب بس قولوا لأخوانا الهلالاب يبعدوا عننا ويبطلوا (تربيط لاعبينا)..!!

* تراوري يا جماعة لاعب منتخبات.. ومافي زول يقول لي الزول ده بيقعد احتياطي لأن كل محترفي الهلال ما فيهم ولا واحد اختاروه لمنتخب بلاده.. يعني فريقنا عال العال ولا فيهو شق ولا طق بس انتو ساعدونا بالصمت..!!

* الرئيس الطوالي قال ليكم بطولة الدوري ملحوقة.. ونقول نعم بطولة الدوري ملحوقة ولسسسسسة بدري عليها نحن ح نغلب الهلال ونقلص فارق النقاط.. وكما يقول المثل (العارف عزو مستريح)..!!

* الهزيمة في كرة القدم واردة لكنها لم تكن في يوم من الايام دليل فشل.. وكيف تكون دليل فشل وبايرن ميونيخ والريال وبرشلونة تجرعوا الهزائم المتتالية سواء في الدوري المحلي او الأوروبي.. مالكم كيف تحكمون..؟!!

* لقد تسبب الحكم الراجف في افساد مباراة (الزعيم) الاخيرة بصرفه اكثر من ضربة جزاء للضيوف.. والى جانب ذلك فقد عاند الحظ نجمنا الأول الملتزم والمتفاني الخلوق عاشق الفانيلة الحمراء تراوري في اكثر من فرصة امام الشباك الخالية..!!

* ثم ان بكري المدينة (الحارق فشفاش الهلالاب) سيظل باقياً في التشكيلة.. ولا ادري كيف يطالب بعض من ملأ الحقد قلوبهم باجلاسه على دكة البدلاء..؟! بكري ده لو قعد برة نلقى لينا حاجة وين نكاوي بيها الهلالاب..؟!!

* يا جماهير المريخ الصفوة الرجاء عدم الالتفات لهواة التعامل بالنظرة التشاؤمية والذين لا هم لهم غير ممارسة الشماتة في المريخ كلما سقط في اي مباراة (مريخنا) أقصد (مريخكم) يحتاجكم فلا تتأخروا عن تلبية النداء..!!

* انها دعوة للاقطاب ورجال الاعمال لفتح باب التبرعات من جديد لدعم النادي بالمزيد من (الخرفان) و(العجول) ليتم ذبحها قبل كل مباراة سواء بام درمان او في الاستادات التي يلعب فيها الزعيم بالولايات..!!

* وفي الختام اود التأكيد على ان المعز أفضل حارس في افريقيا، وبكري حارق الفشفاش سيظل اساسياً في التشكيلة حتى ولو لم يسجل اهدافاً.. (انحنا عايزنو كده) عشان نبيع بيهو جرايدنا (انتو مالكم)..؟!!

* تخريمة اولى: اذا فكر الوالي في التلويح بالاستقالة فعلى كل الصفوة الاستعداد لتسيير مواكب التمسك الى منزله.. خاصة وان المريخ لا ولن يتقدم اذا غادر الصراف الألي منصبه..!!

* تخريمة ثانية: استغفر الله العظيم لي ولكم.. ونهمس في اذن كل قارئ ونطالبه ان يسامحنا.. السمااااااااح..!!

* تخريمة ثالثة: منكم لله حيرتونا و(حلجتو لينا اقلامنا، وكملتو فهمنا) سامحكم الله وهداكم وحفظنا من شروركم.. ولنا عودة باذن الله..!!