[[]] هلال بالانجليزي :

اعلن قطاع الهلال الرياضى رسميا اليوم ان لاعبى الفريق سيدخلون كورس بجامعة الخرطوم يوم الخميس القادم وقال عمر النقى رئيس القطاع ان الكورسات التى سيخضع لها لاعبى الفريق تشمل ادارة الوقت والتخاطب باللغة الانجليزية وأضاف النقى الى ان الكورس سيشرف عليه نخبة من دكاترة جامعة الخرطوم وبمتابعة شخصية من مدير الجامعة نفسه

ايه النعيم ده

طبعا الهلال هو سفير الوطن بلا منازع

والسفير يجب ان يجيد كل اللغات الاجنبيه

وبعد الانجليزي عايزين نتعلم فرنسي والماني

ولا مانع ان نتعلم لغات افريقيه

فثقافة اللاعب هي الطريق للعالميه

وما عايزين عالميه جربنديه

ونلعب مع البايرن ونقلع منو العالميه

ما عايزين عالميه زائله كعالمية الوصيف

ويومين عالمي والتالت قاعد في ضل النيمه وهات يا ونسات مع ستات الشاهي

قرار رائع ان يوسع لاعبو الهلال مداركهم

وان كان الهلال يغص بالاطباء

دكتور محمد حسين كسلا

دكتور علي قاقارين

دكتور عمر النقي



[[]] سانسحب والعارف عزو مستريح

وبخطوط حمراء عريضه صدرت صحف المريخ تقول :

المريخ سينسحب من الدوري

وتجمعت النساء لتبكي وتولول

وووووب علي يا مريخنا يا عالمي ولا تكلمني

وين حتسيبنا وتروح

وعلي طريقة المصريين : يا جوزي يا مستتني ويا مسكني في شقه برحه

في 3 شارع النسيان الدور الثالث الشقه 5

لم يلتفت احد لبيان المريخ الهزيل

ولم يكترث احد بالموضوع

اصلا المريخ كأنه غير موجود في الخارطه الرياضيه السودانيه

وقد خرج مبكرا من تمهيدي افريقيا مذلولا مكسورا

وخرج من اضعف بطولات البط العائم مهزوما محسورا

يعني المريخ لم يعد منافسا لسيد البلد الهلال

وكان ده زمان

وجدودنا زمان وصونا علي الوطن

المريخ مثله مثل فرق الدوري الاخري عليه ان يتحلي بالوطنيه

عليه ان يوافق بتعديل مواعيد مباريات الهلال

فالهلال ليس في نزهه ايها الحاقدون

الهلال هو السفير فوق العاده لكل اهل السودان

والمريخ ما علي راسه ريشه حتي يرفض ويهدد بالانسحاب

وان كان انسحابه هذا صوري وشوفيني يريد من وراءه ان يقول ان ادارته قويه في غياب الرئيس جمال الوالي

ولا اظن اصلا ان جمال الوالي كان سيوافق علي قرار كهذا

ولا اظن ان الهلال كان سيقوم بنفس الفعل ان كان المريخ في بطولات افريقيا

مازال اخوتي تهديد المريخ ماثلا رغم ان الاتحاد العام قام بتغيير مواعيد مياريات الهلال الثلاثه

ولم ينسحب المريخ حتي الآن

وسكت وكانه لم يصدر بيانا

فيا له من خذلان ان يتجرد المرء من الوطنيه ولاسباب واهيه

قال ايه : الهلال سيسبق المريخ بعشره نقاط

فيا اهل المويخ ما لكم كيف تحكمون

المنافسه في متناول الجميع

والمريخ قام بتسجيل اكثر من ثمانيه لاعبين جدد

وبعكس الهلال الذي سجل نيلسون واطهر الطاهر

والمريخ وكما يقولون (عاطل ) ووليس كالهلال الذي ارهقته المشاركات الافريقيه والمحليه معا

قرار المريخ قرار غير صائب

ولا اظن ان عقلاء المريخ يقبلون بتعريض ناديهم لعقوبات محليه وافريقيه

القرار المريخي قرار اجوف اغضب كل اهل السودان

ولو كنت مكان الاتحاد العام لاصدرت عقوبات صارمه في حق نادي المريخ لاصدارها قرارا يمس السياده والوطن

مشاركة الهلال الافريقيه مشاركة ترفع اسم الوطن



[[]] اسوء خبر لناس المريخ :

اعلن رئيس نادي المريخ السيد جمال الوالي تمسكه بالرحيل عن المريخ في اكتوبر المقبل

وبصراحة ورغم هلاليتي لم اتمني يوما ان يغادر السيد جمال الوالي نادي المريخ وقد جعله ندا للهلال ولكن كان اختلافنا معه في الصرف الغير رشيد علي نادي المريخ وتسجيل 50 محترف اجنبي لم يفلح فيهم احد

جمال الوالي صرف علي المريخ صرف الخائف من الفقر ولكن كان من حوله رجال اقل قامة منه فشلوا في مساهماتهم لتطوير هذا النادي ولو وجد في المريخ ادارة واعيه مع المال الوفير الذي كان لكان للمريخ شأن عظيم ولكن الحلو ما يكمل -فلقد كان بنادي المريخ اسوء اعلام وكان اسوء اداريين وكان اروع رئيس فكان الفشل الكبير

وداعا ايها الرئيس الرائع

و دعني اقول لك هذا خيارك والعارف عزو مستريح



[[]] هيثم مصطفي دوخ المريخ:

هيثم مصطفي هو مشكلة المريخ اليوميه - وقد فشلت ادارة النادي ايقاع اي عقوبه في حق هيثم المتمرد ووفود رايحه لمسيد الشيخ محمد خير ووفود جايه ويا اخوانا باركوها ويا هيثم ريح الجماعه وما تعذبهم - وهيثم وراسه والف سيف الا تتبدل اداراة المريخ ويشطبوا كروجر ويشطبوا اتو فيستر ويشطبوا ابراهومه ويشطبوا مزمل ابو القاسم ويسجلوا الارباب في المريخ - وانا هيثم اللي دوخ الهلال ودوخ البرير

قلنا ليكم يا اخوانا هيثم مصطفي رغم انه لاعب موهوب وفنان الا انه خميرة عكننه عكننت ادارة الهلال طويلا فشطبوه وها هو الآن يعكنن ادارة المريخ ووراهم النجوم في عز الضهر وقد شربوا من الكاس التي شرب منه الهلال - نصحهم العقلاء بعدم تسجيل هيثم مصطفي ولكنهم ساروا في الطريق الخطأ نكاية بالهلال

لو سمعتو النصيحه كان عزكم مستريح



محمد حسن شوربجي