هوبة.. دبل قبينة
قبل ان اخوض في الحديث عن مباراة اول امس..اتوقف قليلا او كثيراعند تصريحات جمال الوالي الاخيرة والتي قال فيها ان الفريق فقد الامل في بطولة الممتاز من الدورة الاولي.
انظروا الي هشاشة هذا الفريق والي ضعف ادارته ...اذا كان هذا جمال الوالي الذي سجل وارغو بـ (5 مليون دولار) وسجل كلتشي بـ (2 مليون دولار) يقول هذا الكلام وهو في قمة الهرم المريخي ..ماذا يقول الاخرون؟.
ماذا يقول المشجع العادي والبسيط اذا كان رئيس الند التقليدي للهلال يقول انهم فقدوا الامل منذ الدورة الاولي لبطولة الممتاز.
طيب (الجوطة) في شنو؟ ..اذا كنتم انتوا زي غيركم بتفقدوا الامل في بطولة الممتاز من الدورة الاولي.
عملتوا لينا لخمة في الفاضي.
دا انتوا طلعتوا اي كلام.
خليتوا للخرطوم والنيل والشمالي شنو؟.
فرقكم شنو؟...اذا كان جمال الوالي بقول انهم فقدوا الامل في الممتاز منذ الدورة الاولي.
قومتوا نفسنا في الفارغة.
جمال الوالي دا بقولوا (كان) هلالابي ...لكن الظاهر عليه انه الي الان هلالابي.
هسع دا تصريح دا.
تصريحك دا برجاس ما بقولو.
تصريحك دا لو قالوا صديق علي صالح عندنا فيه كلام...تجي يا جمال الوالي عشان تهون علي جماهير المريخ وعشان (الطبطبة) علي لاعبي المريخ تقول : (انكم فقدتوا الامل في الفوز ببطولة الممتاز من الدورة الاولي).
ليه كدا؟.
طيب (الدافي) دا متلتلنوا ...ومسهرنا وجايبنوا من المغرب في البرد دا عشان (تتوصفوا) بيهو.
يا عم روح...مليتوا البلد (وصافة).
ضربت لي تلفون لي واحد مريخبي ...الرد جاءنا علي هذا النحو: (هذا الوصيف لا يمكن الوصول اليه الان).
وصيف في عينك.
الوصافة دي ما عاوزة التعب دا كلو....الوصافة دي ناس (ريتشارد) بجضموها ليكم.
ريتشارد مين يا عم؟.
انا اول مرة اشوف لي مدافع فرقو من بوابة عبدالقيوم (رقم الفانلة).
هي بوابة عبدالقيوم بتلبس كم؟.
هسع جمال الوالي يقول عاوز اجيبها.
اقول ليكم حاجة....انتظروا (صدي الملاعب).
تتخيلوا قبل كم يوم كدا حضرت (صدي الملاعب) اتخيلت جمال الوالي يقوم يغيير المدرب.
قام مصطفي الاغا قعد يدافع عن (كاربوني).
عاد كيف ما يدافع عنو ...وهو الزول الجاب (خبرو).
انت تعال هنا ...(الايميل).
الايميل مالو؟.
الايميل حصل فيه شنو؟.
قالوا بعد ما مسحوه ...طلع ليه (قرون).
ايميل هو وإلاّ (بعاتي)؟.
والله ناس الهلال ديل ايميلاتهم من (بعاتينهم) ما بتعرفوا.
في البطولة الافريقية ناس المريخ ديل كان عندهم 3 نقاط...وفي البطولة المحلية قنعوا من اللقب من الدورة الاولي.
بيني وبينكم انا ناس المريخ ديل من سجلوا (ريتشارد) في يونيو...عرفتهم طوالي انهم (قنعانين) من بطولة الممتاز.
القناعة (كأس) لا يفني.
الحكاية ظاهرة ..ولا عاوزة ليها (كتابة عمود)...واضحة زي (البصمة).
بصم ..ما بصم ..بصم...ما بصم.
وهو وين البرد (الببصموا) فيه ؟..اقصد وين البرد البلبسوا فيه (سيوتر)؟.
واضح انو المريخ قنعان من الدوري الممتاز ...من الوقت داك.
(القنوعة) ظاهرة في عيونهم.
اهلنا بقولوا الزول (المفارق) واضح....و(المفارق عينو قوية).
عندنا واحد خبير في الحاجات دي.
زولنا دا وقت يمشي يزور ليه زول في المستشفي ويجي راجع منو؟.
بنقول ليه : اها لقيتو كيف؟.
زولنا كان ما بجامل بقول لينا : (الزول دا زول موت...الواطة ما بصبحها).
من يلقي الزول العيان مقبل علي الحيطة ...بكتلو ليكم.
خمسة دقائق ويجبوا لينا الخبر من المستشفي والنسوان يطقن الكواريك.
زول الموت ظاهر.
مرة صاحبنا دا مشي زار ليه زول في المستشفي ...وقت قابلنا في الجامع قلنا ليه : اها لقيت المريض كيف؟.
زولكم قبل ما يجاوب لينا في واحد مننا ثبتوا قال ليه : (هسع جينا من المقابر ..عليك الله خلينا نأخذ نفسنا شوية ...ما ترجعنا المقابر في البرد دا).
في ناس بعرفوا (الموت).
وجمال الوالي دا الظاهر عليه عرفها.
قال نحن قنعنا من بطولة الممتاز من الدورة الاولي.
اول مرة اشوف لي رئيس نادي (قنوع) كدا.
والقناعة (كأس) لا يفني.
انتوا عارفين ناس الشمالي عطبرة ديل وقت انتهت الدورة الاولي كان عندهم امل في الممتاز.
تجي يا جمال الوالي انت في (البرد) دا وتقول لينا : (قنعت من الدوري الممتاز من الدورة الاولي).
والله انت لو لعبت براك تقنع.
انت وقت بتقنع من الوقت داك..ناس العجب يقولوا شنو؟.
والله ليك حق تقنع ..اذ انت نظمت بطولة سيكافا وجبت الفرق المشاركة وجبت الحكام ونزلتهم في الفنادق وصرفت ليهم الحوافز وضربتهم السمك..وطفيت الانوار وولعتها ..وما شلت كأس سيكافا بعد الكلام دا.
عاوز تجي وتشيل الممتاز.
لكن برضو ما كان تقول كلامك دا.
انتوا عارفين لو عملوا حوار مع رئيس نادي الخرطوم او رئيس نادي النيل ..بقول نحن بنافس الي الان من اجل اللقب.
لقب مين يا عم؟.
انت ما حدثوك وقالوا ليك : ناس الهلال حسموا الموضوع دا.
ناس الهلال عاوزين ليهم تلات نقاط ويربطوا علي كدا.
خلاص الموضوع انتهي بالنسبة لينا.
نحن (شفوت)...وبنطلع في شجر النخل بي (كراسي النص).
هسع واحد من الجماعة ديل يقول ليك : الايميل مسحوه.
افرض مسحوه.
هل ذلك مبرر عشان تفقدوا الامل في الممتاز من الدورة الاولي.
المدهش في تصريحات جمال الوالي انه مع هذا التصريح الغريب قال انهم الاقرب الي ان يفقدوا كأس السودان ايضا.
صاحبكم عاوز يمهد للخسارة من الان.
هل منطقي ان يقول رئيس نادي كبير هذا الكلام في هذا التوقيت؟.
والله ليك حق يا حافظ تشيل وتفك في الكورة ...تقول بتصلك بي (اذن مرور).
فريق مازال في المنافسة ..وتبقت له بطولة محببة له وهو متخصص فيها (كاس السودان) ..لكن مع هذه الفرصة التي تعتبر الفرصة الاخيرة للمريخ في هذا الموسم ..يخرج رئيس نادي المريخ ويقول : ان فرصة فوزهم بكأس السودان ضعيفة.
هذه اكبر خدمة يقدمها جمال الوالي للهلال.
انا ما عارف ناس مجاهد وايداهور بيلعبوا كيف وقت رئيس النادي حقهم بقول الكلام دا.
خليت لينا شنو عشان نقولوا يا جمال؟.
ان شاءالله يوم ابتعادك من رئاسة النادي ما يجي.
الاغرب من هذا ان الوالي برر للخسائر القادمة وقال ان تشكيلة كشف المريخ الان فيه 13 لاعبا لا غير ..وهذا العدد نفسه فيه لاعبين لم تكتمل جاهزيتهم.
يعني اخسروا ساكت يا الباشا.
اخدوا راحتكم علي الاخر.
قروش عيدكم طلعت.
ما تشيلوا هم.
الموضوع ابسط مما تتخيلون.
القاعدين ليه شنو طيب...(ما تقوموا ترحوا).
اديتونا السهر.
السهر في عينك.
عين منو يا ابوالشباب؟.
ملحوظة: عين الهرم الثالث.
هوامش
تصوروا كنت عاوز اتحدث عن مباراة الهلال وحي العرب لكن المساحة ضايقت والمركبة غلقت.
اعمل ليكم شنو...اذا كان جمال الوالي بطلع لينا بي تصريحات اخر حلاوة.
تصريحات مثالية جدا.
طبعا اعلام المريخ بكون ما وقف في هذه التصريحات ..واكيد ..اكيد يكون كمان اشاد بيها.
والقناعة (كأس) لا يفني.
الاعلام السالب دا اسألوني منو انا؟.
انا ما متابع لكن ..بكونوا عملوا كدا.
انا عارفهم ...ما تغالطوا ساكت.
السنة كلها تغالطوا.
بصم ما بصم ..بصم ما بصم.
مسح ما مسح مسح ما مسح.
في مباراة الهلال وحي العرب ...مدثر كاريكا واصل هوايته ..ليس في تسجيل الاهداف فقط ..بل في التألق والفوز بنجومية المباراة.
كاريكا هذه الايامات يقدم احلي العروض.
يا كاريكا لازم بعد المستوي دا تكسر الرقم القياسي للهداف الدوري المسجل باسم هيثم طمبل.
يعني مباراة الامل القادمة ...لازم تعمل لينا فيها شيء.
ان شاءالله قون.
اجمل ما في مباراة الهلال والامل (الهوبة) الدبل قبينة ...بين مهند الطاهر وامبيلي.
هوبة مشتركة.
لولا هدف مهند الطاهر كان يمكن ان تنتهي المباراة بين الهلال وحي العرب تعادلية.
الهدف الواحد ما كفاية.
علاءالدين يوسف رغم عدم مشاركته إلا انه كان من نجوم المباراة.
اتجاه الهلال يجب ان يذهب كليا نحو مباراة الفريق القادمة مع الامل عطبرة.
نريد ان يتوج الهلال هذا الموسم ببطولة الممتاز من عطبرة ..عاصمة الحديد والنار.
عشان ناس المريخ قالوا ما بنلعب في عطبرة ...عاوزين نحن نشيل الكأس ونتوج به هناك.
ناس المريخ عرفوها.
سبق ان توج الهلال بلقب الممتاز من مدينة كسلا (الخضراء)..وجاء الدور الان لان نتوج من عاصمة الحديد والنار.
نحن اي حاجة عندنا بي نظام.
بس اقعدوا لينا ساكت ...اي زول بنصلوا في مكانو.
اها قصرنا معاكم يا ناس عطبرة.
وقطار الشوق ...متين توصل.
خبر عاجل: قولوا كمان ما بتعرفوا قطار الشوق.
قوون
قبل ان اخوض في الحديث عن مباراة اول امس..اتوقف قليلا او كثيراعند تصريحات جمال الوالي الاخيرة والتي قال فيها ان الفريق فقد الامل في بطولة الممتاز من الدورة الاولي.
انظروا الي هشاشة هذا الفريق والي ضعف ادارته ...اذا كان هذا جمال الوالي الذي سجل وارغو بـ (5 مليون دولار) وسجل كلتشي بـ (2 مليون دولار) يقول هذا الكلام وهو في قمة الهرم المريخي ..ماذا يقول الاخرون؟.
ماذا يقول المشجع العادي والبسيط اذا كان رئيس الند التقليدي للهلال يقول انهم فقدوا الامل منذ الدورة الاولي لبطولة الممتاز.
طيب (الجوطة) في شنو؟ ..اذا كنتم انتوا زي غيركم بتفقدوا الامل في بطولة الممتاز من الدورة الاولي.
عملتوا لينا لخمة في الفاضي.
دا انتوا طلعتوا اي كلام.
خليتوا للخرطوم والنيل والشمالي شنو؟.
فرقكم شنو؟...اذا كان جمال الوالي بقول انهم فقدوا الامل في الممتاز منذ الدورة الاولي.
قومتوا نفسنا في الفارغة.
جمال الوالي دا بقولوا (كان) هلالابي ...لكن الظاهر عليه انه الي الان هلالابي.
هسع دا تصريح دا.
تصريحك دا برجاس ما بقولو.
تصريحك دا لو قالوا صديق علي صالح عندنا فيه كلام...تجي يا جمال الوالي عشان تهون علي جماهير المريخ وعشان (الطبطبة) علي لاعبي المريخ تقول : (انكم فقدتوا الامل في الفوز ببطولة الممتاز من الدورة الاولي).
ليه كدا؟.
طيب (الدافي) دا متلتلنوا ...ومسهرنا وجايبنوا من المغرب في البرد دا عشان (تتوصفوا) بيهو.
يا عم روح...مليتوا البلد (وصافة).
ضربت لي تلفون لي واحد مريخبي ...الرد جاءنا علي هذا النحو: (هذا الوصيف لا يمكن الوصول اليه الان).
وصيف في عينك.
الوصافة دي ما عاوزة التعب دا كلو....الوصافة دي ناس (ريتشارد) بجضموها ليكم.
ريتشارد مين يا عم؟.
انا اول مرة اشوف لي مدافع فرقو من بوابة عبدالقيوم (رقم الفانلة).
هي بوابة عبدالقيوم بتلبس كم؟.
هسع جمال الوالي يقول عاوز اجيبها.
اقول ليكم حاجة....انتظروا (صدي الملاعب).
تتخيلوا قبل كم يوم كدا حضرت (صدي الملاعب) اتخيلت جمال الوالي يقوم يغيير المدرب.
قام مصطفي الاغا قعد يدافع عن (كاربوني).
عاد كيف ما يدافع عنو ...وهو الزول الجاب (خبرو).
انت تعال هنا ...(الايميل).
الايميل مالو؟.
الايميل حصل فيه شنو؟.
قالوا بعد ما مسحوه ...طلع ليه (قرون).
ايميل هو وإلاّ (بعاتي)؟.
والله ناس الهلال ديل ايميلاتهم من (بعاتينهم) ما بتعرفوا.
في البطولة الافريقية ناس المريخ ديل كان عندهم 3 نقاط...وفي البطولة المحلية قنعوا من اللقب من الدورة الاولي.
بيني وبينكم انا ناس المريخ ديل من سجلوا (ريتشارد) في يونيو...عرفتهم طوالي انهم (قنعانين) من بطولة الممتاز.
القناعة (كأس) لا يفني.
الحكاية ظاهرة ..ولا عاوزة ليها (كتابة عمود)...واضحة زي (البصمة).
بصم ..ما بصم ..بصم...ما بصم.
وهو وين البرد (الببصموا) فيه ؟..اقصد وين البرد البلبسوا فيه (سيوتر)؟.
واضح انو المريخ قنعان من الدوري الممتاز ...من الوقت داك.
(القنوعة) ظاهرة في عيونهم.
اهلنا بقولوا الزول (المفارق) واضح....و(المفارق عينو قوية).
عندنا واحد خبير في الحاجات دي.
زولنا دا وقت يمشي يزور ليه زول في المستشفي ويجي راجع منو؟.
بنقول ليه : اها لقيتو كيف؟.
زولنا كان ما بجامل بقول لينا : (الزول دا زول موت...الواطة ما بصبحها).
من يلقي الزول العيان مقبل علي الحيطة ...بكتلو ليكم.
خمسة دقائق ويجبوا لينا الخبر من المستشفي والنسوان يطقن الكواريك.
زول الموت ظاهر.
مرة صاحبنا دا مشي زار ليه زول في المستشفي ...وقت قابلنا في الجامع قلنا ليه : اها لقيت المريض كيف؟.
زولكم قبل ما يجاوب لينا في واحد مننا ثبتوا قال ليه : (هسع جينا من المقابر ..عليك الله خلينا نأخذ نفسنا شوية ...ما ترجعنا المقابر في البرد دا).
في ناس بعرفوا (الموت).
وجمال الوالي دا الظاهر عليه عرفها.
قال نحن قنعنا من بطولة الممتاز من الدورة الاولي.
اول مرة اشوف لي رئيس نادي (قنوع) كدا.
والقناعة (كأس) لا يفني.
انتوا عارفين ناس الشمالي عطبرة ديل وقت انتهت الدورة الاولي كان عندهم امل في الممتاز.
تجي يا جمال الوالي انت في (البرد) دا وتقول لينا : (قنعت من الدوري الممتاز من الدورة الاولي).
والله انت لو لعبت براك تقنع.
انت وقت بتقنع من الوقت داك..ناس العجب يقولوا شنو؟.
والله ليك حق تقنع ..اذ انت نظمت بطولة سيكافا وجبت الفرق المشاركة وجبت الحكام ونزلتهم في الفنادق وصرفت ليهم الحوافز وضربتهم السمك..وطفيت الانوار وولعتها ..وما شلت كأس سيكافا بعد الكلام دا.
عاوز تجي وتشيل الممتاز.
لكن برضو ما كان تقول كلامك دا.
انتوا عارفين لو عملوا حوار مع رئيس نادي الخرطوم او رئيس نادي النيل ..بقول نحن بنافس الي الان من اجل اللقب.
لقب مين يا عم؟.
انت ما حدثوك وقالوا ليك : ناس الهلال حسموا الموضوع دا.
ناس الهلال عاوزين ليهم تلات نقاط ويربطوا علي كدا.
خلاص الموضوع انتهي بالنسبة لينا.
نحن (شفوت)...وبنطلع في شجر النخل بي (كراسي النص).
هسع واحد من الجماعة ديل يقول ليك : الايميل مسحوه.
افرض مسحوه.
هل ذلك مبرر عشان تفقدوا الامل في الممتاز من الدورة الاولي.
المدهش في تصريحات جمال الوالي انه مع هذا التصريح الغريب قال انهم الاقرب الي ان يفقدوا كأس السودان ايضا.
صاحبكم عاوز يمهد للخسارة من الان.
هل منطقي ان يقول رئيس نادي كبير هذا الكلام في هذا التوقيت؟.
والله ليك حق يا حافظ تشيل وتفك في الكورة ...تقول بتصلك بي (اذن مرور).
فريق مازال في المنافسة ..وتبقت له بطولة محببة له وهو متخصص فيها (كاس السودان) ..لكن مع هذه الفرصة التي تعتبر الفرصة الاخيرة للمريخ في هذا الموسم ..يخرج رئيس نادي المريخ ويقول : ان فرصة فوزهم بكأس السودان ضعيفة.
هذه اكبر خدمة يقدمها جمال الوالي للهلال.
انا ما عارف ناس مجاهد وايداهور بيلعبوا كيف وقت رئيس النادي حقهم بقول الكلام دا.
خليت لينا شنو عشان نقولوا يا جمال؟.
ان شاءالله يوم ابتعادك من رئاسة النادي ما يجي.
الاغرب من هذا ان الوالي برر للخسائر القادمة وقال ان تشكيلة كشف المريخ الان فيه 13 لاعبا لا غير ..وهذا العدد نفسه فيه لاعبين لم تكتمل جاهزيتهم.
يعني اخسروا ساكت يا الباشا.
اخدوا راحتكم علي الاخر.
قروش عيدكم طلعت.
ما تشيلوا هم.
الموضوع ابسط مما تتخيلون.
القاعدين ليه شنو طيب...(ما تقوموا ترحوا).
اديتونا السهر.
السهر في عينك.
عين منو يا ابوالشباب؟.
ملحوظة: عين الهرم الثالث.
هوامش
تصوروا كنت عاوز اتحدث عن مباراة الهلال وحي العرب لكن المساحة ضايقت والمركبة غلقت.
اعمل ليكم شنو...اذا كان جمال الوالي بطلع لينا بي تصريحات اخر حلاوة.
تصريحات مثالية جدا.
طبعا اعلام المريخ بكون ما وقف في هذه التصريحات ..واكيد ..اكيد يكون كمان اشاد بيها.
والقناعة (كأس) لا يفني.
الاعلام السالب دا اسألوني منو انا؟.
انا ما متابع لكن ..بكونوا عملوا كدا.
انا عارفهم ...ما تغالطوا ساكت.
السنة كلها تغالطوا.
بصم ما بصم ..بصم ما بصم.
مسح ما مسح مسح ما مسح.
في مباراة الهلال وحي العرب ...مدثر كاريكا واصل هوايته ..ليس في تسجيل الاهداف فقط ..بل في التألق والفوز بنجومية المباراة.
كاريكا هذه الايامات يقدم احلي العروض.
يا كاريكا لازم بعد المستوي دا تكسر الرقم القياسي للهداف الدوري المسجل باسم هيثم طمبل.
يعني مباراة الامل القادمة ...لازم تعمل لينا فيها شيء.
ان شاءالله قون.
اجمل ما في مباراة الهلال والامل (الهوبة) الدبل قبينة ...بين مهند الطاهر وامبيلي.
هوبة مشتركة.
لولا هدف مهند الطاهر كان يمكن ان تنتهي المباراة بين الهلال وحي العرب تعادلية.
الهدف الواحد ما كفاية.
علاءالدين يوسف رغم عدم مشاركته إلا انه كان من نجوم المباراة.
اتجاه الهلال يجب ان يذهب كليا نحو مباراة الفريق القادمة مع الامل عطبرة.
نريد ان يتوج الهلال هذا الموسم ببطولة الممتاز من عطبرة ..عاصمة الحديد والنار.
عشان ناس المريخ قالوا ما بنلعب في عطبرة ...عاوزين نحن نشيل الكأس ونتوج به هناك.
ناس المريخ عرفوها.
سبق ان توج الهلال بلقب الممتاز من مدينة كسلا (الخضراء)..وجاء الدور الان لان نتوج من عاصمة الحديد والنار.
نحن اي حاجة عندنا بي نظام.
بس اقعدوا لينا ساكت ...اي زول بنصلوا في مكانو.
اها قصرنا معاكم يا ناس عطبرة.
وقطار الشوق ...متين توصل.
خبر عاجل: قولوا كمان ما بتعرفوا قطار الشوق.
قوون
