معقول كده يا بشة ..!!
امبارح كده قريت لي حوار مع المدرب العام للمريخ الاخ فاروق جبره ... وفاروق ده قرب يتسجل في الهلال لكنه زاغ في اخر لحظة بعد ان قام مجلس الهلال بفتح حساب بنكي ليهو في بنك ايفوري علي عهد ادارة الاخ احمد دولة لكن الاخ مزمل حسن صديق قام بتحويل مسار اللاعب في اخر لحظة للمريخ حتي صار الان مدرب عام للمريخ ..!
نجي لحوار اخونا فاروق جبره القال فيهو داير يبني للمريخ فريق زي برشلونة ..اااي برشلونة حتة واحدة كده لان كل المقومات حسب رايو متوفرة ومن ضمن هذه المقومات اللاعبين .. والله يا جماعه فاروق جبرة قاعد يحلم حلم عجيب خلاص برشلونة شنو يا جبره عليك الله يوم واحد سمعت برشلونة غادرت دوري ابطال اوربا من ادواره الاولية .. طبعا ده ما ممكن لان برشلونه يضم نجوم كبار بوزن الذهب الخالص لكن تجئ تقول داير تبني ليك فريق زي برشلونة حتة واحدة كده مع لاعبين اطلق عليهم الاعلام الاحمر (جيل النكسة ) وكيف ما يكونوا جيل نكسة ولم يفتح الله عليهم الله بالفوز بلقب الدوري الممتاز من مجموع ثمان مرات غير مرة واحدة معقولة بس يا جبرة ؟
والله والله علي طريقة المشير الراحل الزبير محمد صالح لو ناس برشلونة سمعوا الكلام بتاع جبرة ده الليلة يفرتقو برشلونة ويسموها المريخ طوالي علي الاقل عشان يضقوا طعم الخروج المبكر من منافسة دوري ابطال اوربا مش برشلونة سموها المريخ .!
الغريبة انو الاخ الخبير حسون مدرب حي العرب بورتسودان قبل فاروق جبرة بيوم واحد بس قال في المؤتمر الصحفي الذي اعقب مباراة المريخ وحي العرب انو طريقة لعب لاعب المريه احمد الباشا (ولدنا ) بتشبه طريقة لعب برشلونة الغريبة ما قال ياتوا لاعب في برشلونة انيستا ولا اجزافي .. المهم قال انو طريقة لعب الباشا دي بتزكروا برشلونة .. والغريبة برضو ان برشلونة امام ريال مدريد السبت الماضي لعبت وما شفنا الباشا يكون غوراديولا قعدوا في كنبة الاحتياطي زي ما جمال ابوعنجة خت بكري الشايقي في الاحتياطي حتي الدقيقة 85 في مباراة الهلال الاخيرة ما اصلو بكري ده قال انو الطريقة الوحيدة الممكن يظهر بيها هي الاساءة للهلال بعدما ظل حبيس دكة البدلاء في عهد جمال ابوعنجة ..!
قايتو يا بكري يا شايقي مرات قاعد تبالغ عدييييل كده الهلال حتة واحدة كده كان تبدأ بالفرق الصغيرة وبعدين تجئ للهلال ..!
كدي خليكم من جبرة والشايقي وحسون تعالوا لمامون (حكام ) اسف اقصد مامون ابوشيبة والله امبارح كان كاتب ليهو عمود يضحك بس .. كل سطر بتشعر انو قون بشه ده كان صعب عليهو شدييييد ..!
اخي تقليعة لابي شيبة انو رصد اداء الحكم الدولي هاشم دقيقة دقيقة .. حارة حارة .. زنقة زنقة .. ده كلو عشان يؤكد انو الهلال فاز علي الاتحاد بمساعدة حكم المباراة لانو الهلال في عرف ابوشيبة ما ممكن يفوز في اي مباراة الا بمساعدة التحكيم .. تابعوا كل الاعمدة التي يكتبها اخونا مامون لو الحكم كان نجم المباراة والهلال فائز لازم يقول ليك انو الحكم جامل الهلال في الحتة الفلانية يعني الهلال بكل تاريخه .. وبكل نجومه الذين يعتبرون الافضل في ساحة الملاعب السودانية غير قادر علي الفوز في اي مباراة ما لم يجد مساعدة التحكيم .. طيب يوقولو ليهو شنو هسي ..!
انتو عارفين دايرن ابوشيبة يشيد باي حكم يدير مباراة للهلال الا يكون الهلال مهزوم دي اللحظة الوحيدة الممكن لابي شيبة يقول ان التحكيم نزيه ولم يجامل الهلال مش لانو الحكم بكون كويس لا لانو الهلال مهزوم بس ..!
يعني يا نجوم الهلال لو لو دايرين ابو شيبة ده يكون مبسوط اوي اوي من التحكيم ما تشيلو الممتاز واي مباراة ليكم تخسروها حتي لو كانت المباراة ودية ..!
تعالوا نشوف معا الفقرة دي من عمود اخونا مامون : حرصت ان ارصد اداء الحكم هاشم ادم في الحصة الثانية لمباراة الهلال والاتحاد بالدقيقة لان الحصة الثانية كانت هي المحك الحقيقي للحكم هاشم وفريق الهلال في ورطة ..!
الورطة يا عزيزي ابوشيبة مافي الهلال الورطة فيكم انتم القايلين الهلال ده ممكن يتعادل مع فريق الاتحاد .. وبدأ ابوشيبة في رصد اداء الحكم : الدقيقة 49 ثم الدقيقة 59 الي ان وصل الدقيقة 63 ثم الدقيقة 84 ولحدي الدقيقة 84 كان ابوشيبة مطمئن للغاية بدليل انو ما جاب خبر في رصده للدقيقة 92 من عمر المباراة لان الدقيقة 92 وكم ثانية كده ما عارف بددت الاحلام زي ما ببد فريق انتر كلوب الاحلام .. عارفين الدقيقة 92 حصل شنو بشة جاب القون والهدف هو اهم حاجة في المباراة مامون عمل منو نائم والغريبة ما قال اريو في الهدف يعني هل هو هدف سليم ولا الحكم جامل فيهو الهلال .. وبرضو ما تحدث عن الزمن المستقطع الذي احتسبه الحكم هاشم ادم ده كلو بدل علي انو ما مون مسألة التحكيم دي ما فارقة معاهو المهم عندو انو الهلال ما يكسب هسي لو المباراة انتهت بالتعادل كان قال في الحكم هاشم ادم شعرا ونثرا لكن بالغت يا بشه ..!!
اخيرا اخيرا ..!
الغريبة يوم واحد مامون ما انتقد اداء حكم والمريخ فائز يعني مامون ده بس قاعد يشوف حكام مباريات الهلال بس ويرصد اداء الحكام عندما يديرون اي مباراة للهلال .. طيب يا مامون الهلال عندو مباراة تجربية يوم الاربعاء المقبل امام الرابطة الامدرماني بملعب الهلال نمشي نشاهد المباراة دي علي الاقل تقيف مع ناس الرابطة .. خلاص نمشي وقوم برصد اداء الحكم وارصد الاخطاء التي يرتكبها وتعال حللها وقول لينا الحكم ده كان مفروض يطرد فلان لانو ارتكب المخالفة الفلانية والمعز محجوب ده قاعد يبدد في الزمن وهيثم بمثل علي الحكام والرابطة مظلومة ..!!
اخيرا جدا ..!
طيب بحسب فهم الاخ مامون ابوشيبة ومعظم الاقلام الحمراء ان الحكام قاعدين يظلموا كل الاندية لمصلحة الهلال .. طيب لو كان الكلام ده صحيح وانو الهلال بكل تاريخه لا يمكن ان ينتصر الا بمساعدة التحكيم بزات المنطق طيب ناس الهلال تعبانين ليه ماشين جايبين لاعبين اجانب ومدرب اجنبي ومعسكرات داخلية وخارجية كان يصرفوا النظر عن تلك الحاجات وينتظروا مساعدة الحكام مش اي انتصار بحققوا الهلال بمساعدة الحكام ..؟
وتاني بالغت يا بشة ..!