عندما كان صغاراً وفي المرحلة الإبتدائية كنا نسعد أيَّما سعادة عندما يتم اختيارنا لنشارك على خشبة المسرح المدرسي لاداء المونولوج الوحيد الذي كان فى الساحة وهو بعنوان البعيو الكضاب .. وقبل الإسترسال في نماذج من فن المونولوج السوداني يُعتبر المونولوج رسالة اجتماعية ذات قيمة عالية هدفها و رسالتها و رؤيتها تنبع و تصب في بحر الإصلاح و التغيير إلى الأحسن و نبذ كل سلوك سلبي ، كما يمارس النقد الإيجابي المتمحور في إنَّ اللبيب بالإشارة يفهم .
و كما هو معروف أنَّ كلمة مونولوج كلمة يونانية ذات شقين مونو وتعني آحاد او فرد ، و لوج تعني خطاب او أداء او إلقاء .
ما جعلني اتطرق لهذا الموضوع هو مونولوج لا لا يا قروية الذي أرسله لنا في قروب مدرسة العمال أول دفعة ما أرسله أخي و زميل دراستي نصر الدين عوض حسين ( الراحل المقيم الفنان عثمان حسين عمه لزم) في المرحلة المتوسطة ( مدرسة العمال بمارنجان - لنا عظيم الشرف ان كنا اول دفعة إلتحقت بها و تخرجت فيها )
إضافة لذلك ما شاهدته من جميل أداء مسرحي و إلقاء يشد الانتباه لمونولوج ثورة السودان الأرض لنا من أحد ابنا ء بلادي و هو مبدع بكل ما تحمله الكلمة من معنى حيث كان مسرحه الشارع بكل صخبه و هو لا يُبالي من مرور العربات و الركشات في شجاعة أدبية نالت رضا كل. من استمع و شاهد مقطعه عبر اليوتيوب .
عودة لإرساء القيم و نبذ صفة الكذب و قول الزور كان في قديم الزمان مونولوج البعيو الكضاب الذي يمارس الكذب و تاتيه عبارات الاستهجان وعدم تصديقه فيما قال بقول كضاب.. كضاب يا البيعو يمين كضاب . و البعيو يصدق نفسه الخبيثة و يستمر في مواصلة كذبه بالدارجي (كضبه) و يأتي بفرية و يعقبها بفرية أخرى و إليكم هذا النوذج من مونولوج البعيو الكضاب :
كضاب كضاب
يا البعيو يمني كضاب
انا ما كضاب.. انا ما كضاب
اسمعوا بس يا أصحاب
راكب تيسي وما شي الغابة
لاقتني لبوة قلت حبابة
فتحت راسها بي درابة
كضاب كضاب
يالبعيو يمين كضاب
انا ما كضاب .. انا ما كضاب
اسمعو بس يا أصحاب
الليل الهادي و قمرو جميل
شلت الشبكة و مشيت النيل
هيلا هوب.. هيلا هوب
اول رمية جابت فيل
كضاب كضاب يالبعيو
يمين كضاب .
النموذج الآخر يظل الفنان الراحل المقيم المسرحي المتكامل الفاضل سعيد " طيَّبَ الله ثراه " احد رواد المسرح و فن المونولوج فكان عمله الفني الذي وقف بجانب المرأة في اختيار زوجها بشرط موافقة ولي أمرها الذي كان هو والدها فنجد قمة الإحترام و التقدير و الطاعة لسماع صوت الأب فكانت الرسالة في مونولوج غنائي جمميل أصبحت أغنية شهيرة شنفت اذن المستمع السوداني عندما تغنَّى بها الفنان محمد أحمد عوض " طيَّبَ الله ثراه " حيث جاءت الكلمات الجزلة في قالب درامي بسيط و جميل اوصل رسالته الإجتماعية ذات الترابط الأسرى الفريد فكانت :
ﺃﺑﻮﻱ ﻳﺎ ﻳﺎﺑﺎ ﻣﺎ ﺗﻘﻮﻝ ﻟﻴﻬﻮ ﻻ
ﻭﺍﻓﻖ ﻋﻠﻴﻬﻮ ﺃﻧﺎ ﺭﺍﺿﻴﺔ ﺑﻴﻬﻮ
ﻋﻠﻴﻚ ﺍﻟﻠﻪ ﻣﺎ ﺗﻘﻮﻝ ﻟﻴﻬﻮ لا
ﻣﻦ ﺯﻣﺎﻥ ﺑﺤﺒﻮ ﻭﻫﻮ ﻟﻲ ﺣﺒﻴﺐ
ﻣﺎ ﺧﺎﻥ ﻋﻬﻮﺩﻭ ﻭﺟﺎ ﻗﺎﻟّﻲ
ﺧﻄﻴﺐ
ﻗﺎﺑﻠﻮ ﺑﻲ ﺣﻨﻴﺔ ﻭﺑﻲ ﺻﺪﺭ ﺭﺣﺐ
ﻗﻮﻟّﻮﺍ إن شاء الله ﺧﻴﺮ
ﻳﺒﻘﻰ ﻓﻲ ﺍﻟﻨﺼﻴﺐ
ﻋﻠﻴﻚ ﺍﻟﻠﻪ ﻣﺎ ﺗﻘﻮﻝ ﻟﻴﻬﻮ ﻻ
ﻳﺎﺑﺎ ﺃﺭﻉ ﺑﺘﻚ ﻭﺃﻓﺮﺡ ﺑﻲ ﺟﺪﻳﺪﻫﺎ
ﻭﺭﻳﺪﻥ ﻳﺎﺑﺎ ﺳﺎﻣﻲ
ﻭﺍﻟﺪﻣﻮﻉ ﺷﻬﻴﺪﺓ
ﻣﺎ ﺗﺤﺮﻡ ﻗﻠﻮﺏ ﻗﺼﺘﻬﻢ ﻗﺼﻴﺪﺓ
ﻭﻗﺼﺔ ﺣﺒﻬﻢ ﻳﺎﺧﻲ ﻓﻲ
ﺍﻟﻐﺮﺍﻡ ﻓﺮﻳﺪﺓ
ﻋﻠﻴﻚ ﺍﻟﻠﻪ ﻣﺎ ﺗﻘﻮﻝ ﻟﻴﻬﻮ ﻻ
ﻳﺎﺑﺎ ﻣﺎ ﺗﺸﻚ ﻓﻮﻗﻮ ﻭﺗﺪﻭﺭ ﺍﻟﺸﻮﺭﺓ
ﺑﺘﻚ ﻳﺎﺑﺎ ﺑﻴﻬﻮ سعادتها و سرورها
ﻣﺎ ﺗﺤﺮﻡ ﻓﺆﺍﺩﻫﺎ ﻭﻣﺎ ﺗﺠﺮﺡ ﺷﻌﻮﺭﻫﺎ
ﻭﺍﻟﺨﻄﺎﺏ ﻟﻮ ﺑﺎﻟﻐﻮﺍ
ﺯﺍﺩﻭﺍ ﻓﻲ ﻣﻬﻮﺭﻫﺎ.
ﻋﻠﻴﻚ ﺍﻟﻠﻪ ﻣﺎ ﺗﻘﻮﻝ ﻟﻴﻬﻮ ﻻ .
أما لا لا يا قروية مونولوج حواري بين بنت العاصمة و بنت القرية وفيه من القيم الإجتماعية التي يحملها الحوار و إصحاح للوضع الذي في مخيلة الفرد . و أحيلكم إلى رسالة الواتساب التي ارسلها لنا الأخ نصر الدين عوض حسين :
*شاعر وملحن لا لا يا قروية هو المرحوم الشيخ عمر الضوء وهو من أبناء جزيرة توتى بمشاركة الغناء في العمل زهرات توتي والعمل سجل بتلفزيون امدرمان فى العام 1975م من مجموعة من البنات تتراوح أعمارهن فى ذلك الحين بين 10 و12 عاما.*
ياربي متين اشوف الخرطوم
لا لا لا يا قرويه
ألقرويه :-
يا ربي متين أشوف ألخرطوم
قالو لي في الخرطوم جنينة البلديه
وحدثوني وقالولى الفسحه بالعصريه
وقالو لي كان شفتي البت تسوق عربيه
أحييييييييييييييا وتصرف الماهيه
** ** ** ** ** ** **
ألمدنيه:-
لا لا الليله يا قرويه
وانتي يا قرويه ما تغرك المدنيه
وانتي ماك منسيه والله انتي غنيه
بزراعتك المطريه وبهايمك المسعيه
** ** ** ** ** ** **
ألقرويه:-
ياربي متين أشوف الخرطوم
قالو لي في الخرطوم البت بيمشوا حديثها
ودخلوها الجامعه ووظفوها رئيسه
وقالو لي كان دارت تقوم تنقي عريسها
الدبله الدبله تمشي تقيسها
** ** ** ** ** ** **
ألمدنيه:-
لا لا الليله يا قرويه
منو بلاك يتحمل يمسك الطوريه
منو بلاك يعمل يبني ميزانيه
منو بلاك يمووووول وزارة الماليه
** ** ** ** ** ** **
ألقرويه :-
ياربي متين أشوف الخرطوم
قالو لي في الخرطوم البدره والمنكير
ويا حلاة البت يوم تمشي للكوفير
أحييييييييييييا متين اشوف ألكوفير
** ** ** ** ** ** **
ألمدنيه:-
لا لا الليله يا قرويه
انتي يا قرويه بالكرم معروفه
وفي هبابيب الليل تقوم تعشي ضيوفها
وانتي يا قرويه بالقيم موصوفه
* آخر الأوتاد :
كل الأمنيات و الأماني ان لا يندثر ويجف بحر عطاء فن المونولوج الذي هو المرآة التي يُنظر على سطحها إعوجاج الحال .
بمناسبة عيد الفداء كل عام و أنتم بخير و عيدكم مبارك و اعاده الله عليكم باليمن و الخير و البركات و رفع الله عن الأمة جائحة كورونا و عاجل الشفاء للمرضى و الرحمة و المغفرة لمن فارقوا الدنيا الفانية .