مافى (لعب)

> تسخينه: أبيت الكلام المغتغت وفاضى وخمج
>
> من قبل إنتقدنا الأخ جمال الوالى_كثيرا جدا_ لاجل مصلحة الكيان
> وكنا ما ان تبدر منه بادرة جيدة حتى نشيد به..
>
> وإلتزامنا ذاك تجاه كل من بالوسط الرياضى.. حتى الهلال إن أبدع
> نعطيه حفقه ومستحقه...
>
> والوالى يبدو انه إستفاد جيدا من تجارب الاعوام السابقات ان كان
> على مستوى الفريق او التسجيلات او العلاقات..
>
> وهو ظل يخسر اموالا طائلة لكنه يستفيد مقابل ذلك(تجارب) قيمة تضيف
> الى رصيده الكثير...
>
> وتصريح الوالى بأنهم لن يكرموا اى لاعب ما لم يتقدم المريخ فى
> البطولة الافريقية تصريح مسؤول ومليان وواقعى..
>
> والوالى جرب من قبل ان يدعم ويحفز_واحيانا قبل المباريات_ ولم تكن
> النتائج مبشرة مع الأسف..
>
> لا على المستوى المحلى ولا على الإفريقى.. محليا نفقد الممتاز
> باستمرار وافريقيا طرنا من(بدرى)...
>
> وبما ان القاعدة تقول ان لكل مجتهد نصيب فعلى اللاعبين ان يجتهدوا
> وحينها ستحفزهم كل الجماهير الصفوية وليس الوالى وحده...
>
> لكن هذا ايضا لا يجعلنا نستهين بدور الشباب الذين إخترعوا حكاية
> الكورة الشهرية ففيها حث على الإبداع...
>
> وحسنا فعل ريكاردو حينما رفض تحديد اللاعب النجم لان ذلك يؤثر على
> بقية اللاعبين.. ريكاردو يؤكد انه فعلا مدرب واع.. ومكسب...
>
> اما باسكال واوا النجم العاجى فهو يستحق التكريم ونتمنى ان يكون
> فى هذا دافع للمزيد من التجويد لا التراجع والغرور...
>
> شكرا(جماهير) المريخ شكرا(محبى) المريخ شكرا لكل(الصفوة) وكل
> الامنيات ان نعمل يدا بيد نحو الغد!
>
> نار على نار
>
> اخشى إن نقلت الإذاعة المباريات ان يقول اتحادنا (الأثير) داير حقو.
>
> إستدعاء عصام الحاج.. الزول دا ما عامل خدمة (وطنية)؟؟ نان
> مستدعنو(فى شنو)؟؟ على الطلاق حيرتونا!
>
> إذا تم الإتفاق مع الجزيرة فإن الرعاية ح (تتجهجه).. وسودانى ح تضيع
>
> الحقوا قروشكم ما يكون الإتحاد دا إتصرف فيها.
>
> مدرب شندى يتوقع الفوز على الهلال... لاعبو شندى.. فرد شندى
> وطعمية شندى تتوقع..
>
> انتو الهلال دا قايلنو برشلونه؟؟ ما تتوقعوا.. الهلال براهو
> واقع.. وقع ليكم؟؟
>
> شان ما تعملوا ليهو قيمة اكبر منو بس.
>
> بعض الكتابات حول الاتفاقية عويره وبايخه ويحاول بعضها الاستظراف...
>
> بالطبع التعاون سيكون خارج الملعب اما اتفاقية مع ديمبا و... دا
> كلام فارغ..
>
> وأصلا(التعاون) مشى شندى.. واحتمال بكون بتوعد برضو الامة دى كلها
> تتوعد... واوعدينى بلكمة بسم الله بكلمة منك.
>
> أمس الاول الاجواء كانت عكرانه انا ما عرفت السبب إلا بعد قريت
> الجرايد الرياضية...
>
> (عصام الحاج يعكر الاجواء).. على الطلاق آ ود الحاج جهجهتنا لو
> الجكومى دا كلامو طلع صاح.
>
> اما (الاجواء فى القلعة الحمراء) فهى تمام التمام مع تحية للمجتهد
> هيثم قوون.
>
> لجنة الإنضباط محتاجة تنضبط شويه. كفايه (تأخير)
>
> استاد الحصاحيصا ما مكتمل وستلعب المباريات فى استاد(الكاملين)..
>
> انتو ال40 وال60 فى الميات البتشيلوها دى بتمشى ويييين؟؟
>
> اوع تقولوا للمساكين؟؟ مساكين اكتر من الاندية دى؟؟ ديوان زكاة انتو؟
>
> ساخن بارد
>
> بدل ما تغنوا للمدينة الرياضية، اقلعوا اراضيها من الناس كايس
> اراضيهم (الغنوا) منها..
>
> وزمن كايس أراضيهم وصفوا لينا درب الشوك عشان نوصل اراضيهم يا مرسال.
>
> اول مره فى التاريخ الشاعر شاف لى حمامة تتكلم واول مره فى
> التاريخ المغرب الفاسى يشيل السوبر..
>
> هذا بعد ان هزم الترجى4|3 بضربات الجزاء..
>
> الترجى إنضرب من السد فى كاس العالم ومن الفاسى فى السوبر..
>
> عملاق باب سويفة دا متخصص فى بوابة ناس المعز (جاى رايح) مسيكنى لو!
>
> الهلالاب لو بى مرادهم يقلبوا لينا البرمجه نلعب اول مع مازيمبى..
>
> انتو قايلين الكاف دا إتحاد ناس ستين فى الميه ديل؟؟
>
> الزميل الاستاذ مامون ابو شيبة قال الربيع جا كتاحة وناكل نيم..
>
> نحن غايتو عندنا (نيم) كويس الكلام الناس الخطوطهم كلها كعبة.
>
> الحالات السالبة يجب ان تلاقى بسلبية شان تبقى موجبة شويه.
>
> انتو آ جماعة دحين اخونا اوتو(بنك) دا فى منو خبر؟؟
>
> الكتابة الساخرة زى اللعب (باليسار) موهبة من ربنا والبجيدوها شويه!
>
> (امس كانت الصحيفة قبلة لكثير من_رياضيو_ نادى المريخ) اخطاء(بلا
> حدود) من رياضيو كيف يعنى وقعيها لينا؟؟؟؟
>
> برشلونه لا يموت برحيل احد وبوجود غوارديولا وبغيابه البرشا هو البرشا.
>
> وطبعا الريالاب جربوا كل السبل وما وصلوا لهزيمته..
>
> لذا فهم فرحون لأن الاخبار تتحدث عن رحيل المدرب !
>
> يا ناس المريخ على الطلاق تقديم ناس امجد وتسابيح دا نقدم ليكم
> احسن منو مية مرة ادونا فرصة معاكم شنو مقفلين علينا (القنوات) كدا!
>
> قال اسامة عطا المنان لغة الوعيد لا تجدى معنا.. نحن برضو
> والله(نفش الشئ).
>
> سيدو كيتا قال لن اصلى لعودة كيتا.. عفيت منك راجع راجع ما راجع
> ربنا يهون عليهو.
>
> مورينيهو قال ما داير اكسر ارقام.. بطولة بس.. عاقل والله هى
> الارقام دى بكسروها ساكت كدا!
>
> ياصديقى عابدين نحن عندنا مباريات بعد يوم يومين وانت تقول لينا
> 2013 ودورى محترفين؟
>
> نفكر من هسه فى الفين وتلطاشر.. ليه نحن قطر؟؟ وبعدين الشروط دى
> على كل نادى ولا على البلد؟؟
>
> وقووول ما شاركنا شنو يعنى؟؟ ما كم وكم شاركنا الحصل شنو يعنى؟
>
> تخريمة: المدينة دى لو بنيتوها طوبه طوبه كان وصلت (اعلى سقف)!
>
> أجر وعافية استاذنا داود مصطفى!
>
> ويظل المريخ الحاضر والمستقبل والتاريخ... وكلنا مريخاب
>
> ويا مريخ بتكتلنا وبتقعد.
>
> آخر قطرة:ما يضر البحر امسى زاخرا.. إن رمى فيه غلام بحجر؟؟؟
>
> وهذه بصمتى!