عالم نائمين ومشخرين
اتيح الفرصة اليوم لصاحب المفردة الانيقة والتعبير البليغ والتنكيد اللذيذ الحبيب مامون احمد محمد خالد المقيم بمدينة الدمام بالمملكة العربية السعودية ليستريح على هذه المساحة ويريح الالاف من عشاق الازرق الذين ظلوا يسألون عنه على الدوام منذ ان اطل لاول مرة قبل نحو شهر تقريبا وآخر مرة قبل اسبوع.
نبقى مع المامون:
نرفع القبعات تحية وتقديراً واجلالاً بمقدار اميال البلد للعلم والقامه القائد الارباب ,, ولعمرى انه كمالغيث اينما حل نفع ... ففى صمته عبر وفى حديثه درر وعظات ومنافع لسيد البلد ( وضله ). لو اكتفى بالمسكوت عنه وتغيير الهويه لكفتاه . حيوا معى هذا الرقم رئيس رؤساء عموم اندية السودان . ,,,والتهنئة مرات لامة الهلال ببصمات سيدا ,,,وديدا راكل المليار ,,, والابنوسى ود التعاون وفاكهة التسجيلات بكرى عبد القادر ,,,
وبدون مقدمات وعلى طريقة ابو الهماشر نقول:
*جنى وجن زول مو( دافع ) يقول دة مــو( نافع) .
* جنى وجن زول من غير( مبررات) يقدم (الاستقالات) .
* مدرب الستات جلب الستات .
* المدرب مو قلقان قال القلق من (سبعة ) ولى فوق ... لاقى مبررات ... حد قال الوحدات ...
* مدرب (يابانى ) مكنة (ستة ) سلندر مركب مساعدات (مازدا) والعكوس (بشداد )واحد ,,,
* ناس العرضة جنوب بقوا زى ناس البكاء مستقبلين ومودعين ,,ادريسى جاى ,,, كواسى ماشى .,, مرابط جاى ,,, دافى ماشى ,,, ودضيف الله جاى ابراهيما ,,,والضائغ خازوق وارغو يخاف من صراريج غاسروكا .
* ديالو,,, وارغو ,,,نافيو ادريسو ـ تتعدد الاسماء والمواسير واحدة .
* ود الوالى ضربوا سقط لندن قال ماشى بعد التكميلية .. تمشى وين ووارغو ما لاقين ليهو لا اعارة ولا دبارة ,,, قال ماشى قال ,,
* ابناء العمومه لا طالوا بكرى( المدينة) ولا معز ( امدرمان ) . عليكم بهنو (اليمن ) سمك الموردة وعسل حضرموت ..
* وصيفابى مسطل قال الجماعة ح يسجلو (مهدى ود ضيف الله ) اخو (الطبقات ).
* التسجيلات شيخى العارف بالله ( عبد القادر الجيلانى) سيدى (المهدى ود ضيف الله ) عليكم باوراد الاول وراتب التانى الحبة دى ما بتجيكم من نيالا ,,,,مدد ,,,مدد.
* ده نادى ولا مسيد ,,,, يا لحاق بعيد ...مدد...مدد.
* بعد سنة ونص , اكتشف الاعلام السالب انو وارغو غير متخصص فى هز الشباك يعنى يا اخوانا وارغو لا (بهز) ولا( برز) والادارة( تبـز) ..اعيرررررررررروه.
* اكتشف الوصيفاب انو سبب الهزائم الدائم الطابور الخامس :-
اكرم الهادى وود كمال هللاب مندسين
الباشا قلق هللابى مندسين
مجاهد محمد احمد وعبد الله حسن عيسى هلالاب مندسين
جمال الوالى هلالابى ..من سنين
,,,,, عالم نائمين ومشخرين ,,,,,
* وصيفابى زهجان جداً سمع الجماعة قالوا عاوزين ( نادى) لوارغو قال ليهم نادى ولا (..... ), والعهدة على الراوى .
* لو كنت مكان الارباب لدفعت مليار للبرنس لرفضه تسجيل وارغو واكتشاف انو ماسورة من اول وهلة .
و لو كنت مكان ود الوالى ...لاستشرت البرنس فى تسجيلات المريخ حتى لا اتورط .
و لو كنت مكان ود الوالى لدفعت راتب شهرين ( لهمشرى ) وطالبته باحضار ( الفنلة ) والريموت ...وفك ( الكادوك ).
ولو كنت مكان جمهور الوصيف ( لامطرت حجارة من سجيل) على رؤؤس الاعلام السالب.
قالو ا وارغو الهلال حارقو ,,, سوالب ليس الا ,,,
ويا وصيفاب تعالوا بكرة