سمحين نحنا ولا شينين ناس دروغبا؟؟؟


* سبحان الله وبحمده سبحان الله العظيم
* نفرح لاننا خسرنا بهدف
* والبعض منا يدعي باننا كان يجب ان نكسب
* ان نكسب دي احساس راود البعض بعد صافرة النهايه
* بعدما الشوالي حمس الطار
* ونحكي
* عن اهداف اضعناها
* ونسكت عن اهداف اضاعوها
* في واحده منها المعز في الشوط التاني قبض كوره ميته سبعه مرات
* قبيض القبور بس
* وننسي يسارية دروغبا وهو علي انفراد والتي اطاح فيها بالكره الي خارج افريقيا زاتها
* ننسي اننا لعبنا باقصي مانملك
* بنمره اربعه
* ونتناسي انهم لعبوا بالتقسيمه
* ونتجاهل ان اضعف دفاع في الدنيا هو دفاعهم
* والكلام ده حاتشوفوهوا لي قدام
* ايها الناس
* طموحنا كان الوصول للنهائيات
* لذلك نحضر في النهائيات من اجل الظهور
* فريق ساحل العاج العيني شافتو ده حمام البطوله
* لكن طالما نحنا مشينا بدون الاهتمام بصناعة اللعب
* وبدون الاهتمام بالهجوم
* لابد وان نخسر
* اي هدف يلج شباكنا لا نعادله
* الا صدفة
* والشوالي قال لو السودان وجد مهاجم قناص كان غير النتيجه
* يبقي العله واضحه
* ولكن اصرار مازدا هو السبب
* مساوي لم يك سيئا برغم ضربة الجزاء التي فاتت علي الحكم
* ولكن هل نضمن فوات القادمات علي الحكام ؟؟؟؟
* اكتل نص باعوض البلد دي كلها واعرف مهام ناسنا بتاعين النص كانت شنو
* واخص باعوض الترع المنتشره جوار استاد ناس محمد عبدالماجد
* وبالمناسبه ناس محمد عبدالماجد مامحتاجين للناموسيات
* متعودين
* ولو ماسمعوا طنين الوعد
* اقصد طنين الباعوض ما بنوموا
* انينينينينينينيني
* دي النوامه
* اكتل نص باعوض البلد دي التاني وافهم كيف تلعب بطريقه دفاعيه واطرافك نزعاتهم هجوميه
* بله وفداسي
* انت داير تدافع بتدافع بي باكات عديل كده
* ناس باك الحكومه الزمان ديك
* لكن الاطراف البتهاجم وترجع دي مابتنفع الا تكون لاعب مهاجم
* او علي الاقل بتوازن
* نتمني باي صوره ان نستمر في البطوله
* علي الاقل نصل مرحله افضل من مرحلتنا بتاعت غانا
* كورة ساحل العاج دي كانت دايره لاعب وسط خفيف وحريف وسريع وصغير
* انشاء الله النعيم
* ماداير اقول فيصل موسي
* عشان ناس ود عبدالماجد ما ينونوا
* الله يسألكم بتتذكروا باص العجب لي كاريكا الساكيها كاريكا للقون ؟؟؟؟
* غايتو
* معاويه فداسي ده مازدا عارف انو بجيد اللعب في خانة الوسط المهاجم ؟؟؟؟
* وطيب
* اللهم بالفي بالمافي انصرنا في الكورتين الجايات
* اللهم ولا تعدنا من المرحله دي
* اهلنا اللهم انشاء للمرحله القادمه بس
* غايتو النهائيات الفين واربعطاشر ما سائلنك يا مازدا
* لكن الفين وسطاشر لو الهلال جاب مهاجمين قناصين علي البرنس ده تكون تشكيلتك تمت
* ووقتها يمكننا ان نحلم بكأس افريقيا للامم
* ايها الناس
* البقت بقت
* ولكن بعد البقت البتبقي شنو ؟؟؟؟
* هذا الاتحاد لايخدم للود قضيه
* ويتبعه كل هيلمانة المنتخب الوطني
* يبقي بعد نرجع بالسلامه
* نحل مشكلة الاتحاد
* ونجيب جهاز فني للمنتخب
* نترك له حرية الاختيار
* ونقول ليهو دايرين كأس افريقيا الفين وسطاشر
* نبعد عنه الخيار والفقوس
* ونعطي الفرصه لآخرين يعملوا في ادارة المنتخب
* كفانا
* دايرين نمشي لي قدام
* هذه العواطف لن تقدمنا
* وهذا التراخي لن يخدمنا
* والصعود للنهائيات لضعف المجموعه ليس انجازا
* ولكن العمل باستراتيجيه واضحه هو الذي يوصلنا لمنصات التتويج
* نسأل انفسنا بكل صراحه
* اين نحن
* ونجيب بكل تجرد
* ونسأل اين نريد ان نصل
* ونجيب بكل تجرد
* ونسأل
* كيف نصل الي النقطه التي نريدها
* الشغل كده
* اما علوق الشده
* وتسريح لاعبي المنتخب عشان انديتهم لاعبه
* والخيار والفقوس في الاختيار والمعامله
* كلها امور تجعلنا اذا تعادلنا مع تشاد (نسابتنا ) نفرح
* واذا انهزمنا من افريقيا الوسطي بهدف نعتبر ذلك انجازا
* بالطريقه دي يبقي المنتخب لا يشبه الوطن
* ولا يشبه طموح المواطن
* ولا يستحق لقب صقور الجديان
* فصقور الجديان لاتهاب احد
* المهم
* نجي لشمارات والي الخرتوم
* كان شفت يا والينا ناس محمد ناموسيه قالوا ابادة الباعوض ما شغل الولايه
* يعني دايرين يسرقوا شغلك عديل كده ويقلصوا اختصاصاتك
* ماتخليهم
* وكان شفت يا والينا الباعوض قالوا ما بجيب ملاريا
* قالوا الباعوض ما اصلي
* قالوا الباعوض زاتو بقي صيني
* مازي باعوض زمان التقيل داك
* وكان شفت يا والينا ادريس دبي عرس مننا
* انشاء الله بيت مال مال شنو ؟
* بيت دولار
* تغلبو بالعيال ويغلبا بالدولار
* تجيب ليهو عشرين ولد
* عشره يبقوا وزراء في تشاد
* وعشره يبقوا مؤتمر وطني هنا
* المهم العرس تم
* ناسبونا بعد ناصبونا
* يعني عرسه من ارتيريا ونضمن كل الحدود
* وانا بسويها ليكم
* خدمه ساي للوطن
* ياناس
* سمحين نحنا ولا شينين ناس دروغبا ؟؟؟؟؟
سلك كهربا
ننساك كيف والباعوض طلع صيني !!!!
والي لقاء
سلك