الهلال وسمعة البلد
لن تكون مهمة الهلال اليوم امام مضيفه الاتحاد الليبي في الجولة الاولى لدوري المجموعات للبطولة الكونفدرالية سهلة او ميسورة , بل على العكس من ذلك فاننا نتوقع ان تكون صعبة جدا وربما محفوفة بالمخاطر.
فالاتحاد الليبي الذي تدحرج من دوري الابطال للكونفدرالية بفارق هدف وحيد امام (فريق القرن في افريقيا) الاهلي المصري, يلعب في هذه المنافسة بطموح الفوز باللقب , وهذا ما يشكل خطرا على الهلال وعلى الفرق الاخرى.
وهناك بعض الظروف الاخرى التي قد تتسبب في عرقلة انطلاقة الهلال او منعه من الفوز في مباراة اليوم , كانحياز الحكم البنيني للفريق المضيف والذي تحدثنا عنه امس, وحذرنا منه اللاعبين.
لكن رغم ذلك لا بد ان نؤكد على ان الهلال الذي يضم في صفوفه مجموعة متميزة من اللاعبين الكبار, ويملك مدرب كبير سيكون قادرا باذن الله على تجاوز هذه الظروف والعودة من هناك بالنتيجة المرجوة.
كما ان الهلال الذي اصبح يدافع وحيدا عن سمعة الكرة السودانية في بطولات (الكاف) , بعد خروج فرق الخرطوم والامل والمريخ سيكون حريصا على تحقيق افضل النتائج الاستمرار في البطولة حتى الفوز بكاسها.
خرج الخرطوم من دور الـ 32 في الكونفدرالية , وتبعه الامل وودع من دور الـ 16 في نفس البطولة, ثم تدحرج المريخ من دوري الابطال للكونفدرالية الى ن سقط امام الجيش في دور الترضية, وليس من المعقول ان يودع الهلال قبل التاهل للنهائي.
امنياتنا بالتوفيق لرفاق البرنس في مباراة الليلة , والدعوات لهم بتحقيق النصر. وما النصر الا من عند الله.
مريخ ما بعد الوالي متعادل طوالي
المساحة التالية نخصصها للاخ الصديق مأمون احمد محمد خالد الذي عاد بعد غيبة وفيها يداعب اخوتنا المريخاب بعد التعادل مع الاتحاد مدني باسلوبه الظريف.
* المسيرة لبيت جمال طلعت صفر على الشمال.
جمال شغل ليهم أغنية ...كيف الرجوع لى زول قنع ...
حبوبة سلك قالت لى ماشى وين قال ليها ماشين نعمل مسيرة( لجمال) قالت ليهو بعد دة جمال لاتنفع معاهو لا( مساير) لا( ضفائر) لا (مشاط ) ... عليكم بالبيان ...
المحيرنى ادارة تصر على مشاركة فى دورة من غير اعدادات والدورة
مشارك فيها (الوحدات) ****
كمال دحية مشى مع الجماعة مدنى عشان يجى يقول مشجعين الهلال كسروا كراسى طابق شاخور **** فى تكسير وشخير اكتر من تكسريكم وشخريكم
الجماعة ركزوا على رحلة دبى ومباراة سيد البلد اكتر من مباراتهم
مساهرين الليل كلوا مع مازدا يوصو فيهو ...يا زول سادمبا ...يازول تمريرات البرنس
مسكوا سادمبا طلع ليهم يوسف هوت ...ده جا من وين دة ؟
مسكوا البرنس طلع ليهم المعز ...من المعز لكاريكا للقون .. دة شنو دة ؟
الجماعة فى طريقم لمدنى وبين (كلكول) و(الكاملين ) رئيس البعثة شعر بى طعنه يا زول وقف مالكم قالوا ليهو طعنة ... السواق قال ليهم طعنة شنو دى ذى( طعنه )(سيف) ما منها خوف .. طعنة سيف لشداد مرقت بندق فى بحر ...
البص فى طريقو لمدنى كل الجماعة شغالين حوالينا ولا علينا ...خائفين من الوحل والطين ...وناسين محسن سيد يا مساكين .
الوصيف فى مدنى فى وحل ومن غير وحل وضعوا فى خطر
ومريخ ما بعد الوالى متعادل طوالى
مريخ كيغان اصبح تعبان
فى الحصاحيصا يا احبائى بص الوصيف وقف ... الجماعة نزلوا وقفوا دقيقة واحدة تضامناً مع معتصم جعفر سموها دقيقة تضامنية ....نزلو النيل فشربوا منه الا قليلاً منهم (القليل ديل ناس وارغو لانو شربان ) . الجماعه( شبعانين) بس العطش كاتلم.
كان رجع (معتصم ) الخير علينا بعم وكان رجع (شداد) الرماد كال حماد
كان رجع ( جعفر ) النقاط تكتر وكان رجع ( شداد ) اتوقف العداد
وفى( نقطة) فداسى البص وقف الجماعة نزلوا الجرسة حصلت بكاء شديد صلوا صلاة الحاجة لفوا فداسى .. ودعوا يا كبير يا متعال ترجع جمال .. يا ربى تكفينا شر البيانات ومشى المسيرات ...يا سميع يا غفار ترجع الدولار ...يا سيد اللوح والشرافة ترجع لينا جمال يصرف علينا زى ما صرف على سيكافا هىهىهى هى ..
فات كاربونى وجا كيغان والوضع كما كان ...
طارك (محتار ) وممبرش
..واحد ثقيل قال وارغو دة السنه كلها مدنقر حقو يشغلوا ساعاتى
ناس مدنى شكلهم كانوا محترمين الوالى
تانى حدكم( الحصاحيصا) اى نقاط بعد (فداسى) ما مضمونة
مهدى قاعد (ضيف) وهيثم لسه (مرابط )
خبر الغد الوصيف يواصل النزيف ....
و يا وصيفاب تعالوا بكرة ...
آخر الكلام
قبول الطعن الذي قدمه المرشح لرئاسة اتحاد القدم صلاح ادريس حول عدم شرعية فرز الاصوات من فبل لجنة التحكيم الشبابية سيكون كافيا لاعادة الانتخابات.
لكن السؤال الذي سيفرض نفسه .. هل سيقبل الدكتور شداد باعادة الانتخابات تحت اشراف المفوضية ام انه سيتمسك بموقفه ويشكل لها لجنة من بعض القضاة بواسطة اتحاد الكرة؟.
لكن هل ستقبل وزارة الشباب والرياضة الاتحادية بهذا الاجراء الشدادي وتقبل بابعاد المفوضية عن اللعبة .. ام سيكون لها راي آخر؟.
الحل في تقديري يتمثل في تعيين مفوض جديد قبل اعادة الانتخابات , بدلا عن المفوض الحالي الريح وداعة الله , وذلك بعد ان اتضح ان الخلافات الشخصية المتراكمة بين الدكتور شداد والريح وداعة كانت سببا في تفجير الموقف بين الطرفين وعدم قبول اي طرف بالآخر.
ونسأل الله العلي القدير ان يعين الوزير الاتحادي حاج ماجد سوار ويوفقه في تجاوز هذا الامتحان الصعب باصدار قرارات تسهم في حل الازمة دون المساس بسيادة الوطن وقوانينه , وبما لا يتسبب في تجميد نشاطنا الخارجي.
آخر خبر : الجماعة قبلوا المشاركة في دورة دبي ببطونهم فقط.
يعني لا نثريات ولا حوافز ولا مصاريف جيب ولا يحزنون.
حوالينا ولا علينا.