الأقمار يتفاءلون بمعسكر الأمارات ففى فبراير 2010 عاد الهلال بكأس أبوظبى الجوية ووصل مربع الذهب لكبار أفريقيا فى عهد الأرباب صلاح إدريس والمدرب كامبوس والآن فى عهد الكاردينال يبدأ هلال العشق الجميل إطلالته المباركة من معسكر الفجيرة بالأمارات ، نعم يتبادل أبناء هلال الديمقراطية دفة القيادة فى الأسطول الأزرق ويظل الهلال هو الهلال ويظل جمهور الهلال هو قمر الأقمار ، وهلال العام الجديد يسير فى طريق النصر بخطوات رزينة وواثقة ...وخاض الهلال عدداً من المباريات الودية وكان النصر حليفه فيها كلها ...وآخر هذه المباريات كانت مع أحفاد الإمام البخارى وعالم الرياضيات ومخترع علم الجبر الإمام الخوارزمى وبالتحديد مع فريق لوكو موتيف الأوزبكى ، وكما نعلم كرة الخواجات سريعة ومنظمة ولكن خواجاتنا شرفوا الوطن كالعادة أمام كرة الإتحاد السوفيتى ، نعم الخواجات بمتازون بالمهارة والقوة وماشاء الله وتبارك الله على ناس كاريكا وصحبه ، الأولاد ديل بسحروهم وقلنا لى كتاحة وبكرى النيلين ساعدونا بالبخور واللبان الضكر لكن يبدو أن جمال كرة الهلال والمتعة فى حضرة الأقمار أنستهم ذلك ، هسه كان أولادنا كانوا فى الدوحة كان سيف الدين خواجة جاب بخور التيمان واللبان الضكر قبل ماتقلع الطائرة من الخرطوم ، معليش ياشباب نسيت نتيجة المباراة وسرحنا مع جمال الهلال !! ناس كتاحة ليهم حق !! تخيلوا خواجات السودان هزموا نجوم أوزبكستان ( والله زى ما أقول لكم ) والنتيجة كمان ربع دستة مقابل هدف ...عن إذنكم أظبط الرأس بى كباية شاى بالهبهان ( الكلام ده كدى مابجئ ) ... عدنا ليكم ياحبايبنا ...أول حاجة بدينا الخطوط الخلفية بحرف الميم ...مكسيم فى حراسة المرمى ومساوى فى الدفاع بجانب أتير توماس وسليمان سيسيه وبوتاكو ...يلا جينا لى خط الوسط ( بالمناسبة السنة دى فى ناس بجيها زهايمر !! ) من خط وسط الهلال ( بس الكلام ده بينى وبينكم ) ...طبعاً خط الوسط بقيادة الشغيل وسيدى بيه ونزار وبشة أما خطوط الهجوم يوجد (جنابو كاريكا ) والجزولى ...تخيلوا الخواجات تقدموا بالهدف الأول فى الدقيقة 33 وكادوا أن يضيفوا الهدف الثانى فى الدقيقة 37 لولا أن تصدى الحارس مكسيم للكرة وحولها ركنية بفضل الله تعالى ...وإنتهى الشوط الأول بهذه النتيجة ، وبدأ شوط المدربين والخواجة بتاعنا مستر باتريك ( طلع تفتيحة ) قام سحب جوز العرسان سيدى بيه وبشة وأدخل إتنين من الشباب وليد علاء الدين والموسيقار فيصل موسى !! أنقروا الحصل شنو !! خواجات السودان قالوا لى خواجات الإتحاد السوفيتى ( سابقاً ) نار الله جاتكم ... وطريقة لعب الهلال تغيرت وأصبحت باللغة الإنجليزية !! قام الموسيقار فيصل أحرز هدف التعادل مستفيداً من تمريرة الجزولى وقام صلاح الجزولى أحرز الهدف الثانى مستفيداً من تمريرة كاريكا ، والحكاية ماوقفت على كدة عشان الخواجات ماعندهم ضمان وعايزين هدف الأمان وبالفعل أحرز كاريكا الهدف الثالث مستفيداً من تمريرة فيصل موسى وإنتهت المباراة برفع دستة ، خلى بالكم الخواجات يكونوا فاكرين الموسيقارفيصل برازيلى ونقول للأستاذ أمين زكى لو سألوكم قالوا ليكم الموسيقار ده جبتوه من وين !! أدوهم النصيحة قولوا ليهم جبناه من المريخ ولو قالوا ليكم ناس المريخ فكوه كيف !! قولوا ليهم أصلو ياهو حالهم ...قبل كدة أدونا الصنديد الشغيل ....ياشباب أنا سرحت فى إبداع الهلال مايقوموا يلطشونا عين !! العين الحمراء وشرارة قريبة منكم فى الدوحة ، دى عين مش تعبر الحدود دى عابرة قارات أخطر من صواريخ توماهوك .
*** هلال الأصل يستبدل النصر بالوصل
بعد ماحضرنا مشاعرنا فى الرياض لإستقبال سيد البلد ومباراته مع النصر السعودى وناس فيصل الأقرع فى جدة أخدوا إجازة باقى الإسبوع عشان يحضروا المباراة بالرياض وناس منعم أب شنب من الدمام طلبوا منى أعرف درب زريبة الغنم بى وين عشان الضبيحة...ولكن قام الهلال إعتذر لفريق النصر عن المباراة لأنه سوف يلعب الساعة الخامسة ونصف مساء الجمعة 16 يناير مع الوصل الأماراتى لتكريم نجم الوصل والمنتخب الأماراتى ناصر خميس ، وهلال الأصل يعرف الأصول ويشارك دولة الضيافة تكريم أبرز نجومها وفريق الوصل هو ثامن الدورى الأماراتى الذى يطلق عليه دورى الخليج العربى ويقود هجوم الوصل البرازيليان كايو وأدرسون بالإضافة لعبد الله الكاظم وسعيد الكثيرى ، وبالتأكيد سوف تكون فرصة للإبداع والإمتاع يعنى الهلالاب يوم الجمعة يقرأوا سورة الكهف من بدرى ويصلوا مغرب الجمعة ويكونوا جاهزين للجمال والروعة ...طبعاً مساء السبت 24 يناير سوف نلاقى حبايبنا الحلوين بأستاد الخرطوم فى درع الإستقلال ومفروض الهلال يلعب هذه المباراة بالصف الثانى من أجل تجهيزه عشان لو لعبنا بتشكيلة هلال 2015 سوف نحرج إتحاد أبناء العمومة الأحمر ونضطره ليختار وديدى الفاتح لإنقاذ المريخ والإحراج مافى ليه داعى ، وأظرف حاجة برمجة الممتاز أوقعت الهلال فى مباراته الأولى مع الآرسنال فى شندى والمريخ بأستاده مع الرابطة كوستى وجعلت مباراة هلال مريخ نهاية الدورة !! هسه دى برمجة ولا صينية باسطة من محلات العبد لصاحبها محمد سيد احمد ، طبعاً الهلال والأهلى جاهزين ليرى غيرنا كيف يكون شرف الخصومة واللعب الجميل داخل المستطيل الأخضر .
*** إدارة الكرة بين شمال الوادى وجنوبه
عندما قام لاعب وسط الزمالك مؤمن زكريا بالتوقيع للزمالك ثم التوقيع للأهلى تقدم الزمالك بشكوى لإتحاد الكرة المصرى الذى قضى بإيقاف اللاعب شهر وتغريمه 100 ألف جنيه ، ولكن عندما حدثت نفس الحالة عندنا فى السودان ووقع بكرى المدينة للهلال وإستلم مبلغاً من المال وقام بالتوقيع للمريخ أيضاً أجاز إتحادنا الكسيح هذا العبث ولم يملك الجرأة لمعاقبة اللاعب بعد إنتمائه للمريخ لأن هذا الإتحاد المسخرة لن يصمد دقائق أمام ضغوط جمال الوالى صاحب الأيادى البيضاء على اللإتحاد الأحمر وحتى عندما تقدم الهلال بالخطوة القانونية الثانية وهى خطوة الإستئناف ثم التوجه بعدها للفيفا تهرب أعضاء لجنة الإستئنافات ولم يجتمعوا حتى لا يكتمل النصاب ، وهذه الفوضى لاتحدث إلا عند إتحاد الفشل العام ، طيب مادام شلة الأنس متهربة ليه ماتطلبوهم يجتمعوا ولو عن طريق الإنتربول !! نعم إدارة الكرة فى شمال الوادى تتعامل بإحترافية أما فى جنوب الوادى فبوصلة المصالح هى التى تحدد سير هذا الإتحاد المتهالك !! بالمناسبة الإتحاد المصرى فرض هيبة القانون على الجميع لأنه لا يضم بين صفوفه معتصم جعفر سيد شركة الأدوية وإبن عمه محمد سيد أحمد سيد الباسطة وأسامة عطا المنان سيد وكالة التاكسى للسفر والسياحة ورابعهم مجدى !! لذا لزم التنويه .
*** همسة الوداع
حبايبنا الحلوين كان مالعبوا مع شالكة بتلقوهم كلهم فى العناية المركزة عشان يموتوا فى الفشخرة موت وقالوا مدرب شالكة ومدرب بايرن ميونخ عايزين يستفيدوا من تجربة المريخ !! طبعاً السنة الفاتت كشف المريخ كان زائد وناس الإتحاد الأحمر ( ساقطين حساب ) ما إكتشفوا العملية دى لأنها تخص إبنهم المدلل !! والفضيحة التانية نجمهم الشاب محمد شمس الفلاح قال إنه تم تسجيله بإسم أخيه محمد وإسمه هو الحقيقى مازن !! تخيلوا !! والإتحاد العام برضو ماعارف حاجة !! وبهذه المناسبة نهمس فى أذن الإعلام الأحمر مادام إنتوا بقيتوا معلومين سوابق فى التزوير !! الضمان شنو مايكون بلة جابر إسمه الحقيقى كمال ولا كوكو ؟ مجرد سؤال .