ديل نحنا القالو متنا..!!
امبارح يا جماعه قلنا ليكم نحنا برااااااااانا بنحتفل في القلعة ما صدقتونا .. طالبنا جماهير الهلال ان لا تبالغ في الاحتفالات قبل المباراة لانو في احتفالات بعد المباراة ..ووين في القلعة الحمرا .. الزملاء في الصدي كانوا ما مصدقين كلامنا .. قالو قسم ده مجنون .. معقول الهلال التعبان ده يفوز علي المريخ صاحب العلامة الكاملة .. قلنا ليهم يا جماعه الهلال ده فريق كبير ما بتقدروا عليهوا ..!
اها نجوم الهلال ديل طلعوا اثقل من خالد عزالدين زاتو .. سمعوا الكلام طوااالي شالو الاعلام الزرقا وجري للقائم الشمالي طبعا عارفين عملوا شنو طلعوا وين برضوا عارفين في القائم الشمالي وهاك يا رقيص..!
المعز زعلان شديييييييييييد من بدرالدين عبدالقادر عشان طردو بدون سبب والله اول مرة اشوف لي لاعب يضربوا الجمهور خارج الملعب بحجر في راسه يقوم الحكم داخل الملعب يشهر في وجهه البطاقة الحمرا ..!
نجي للمباراة تاني والله المباراة دي عملت للجماعه حاجات كتيره شديد والله اول حاجه انو الود مهند الطاهر قام رجع لعادتو القديمة عارفينها طبعا قام قلب الهوبة وعرفين الهوبة دي قاعده تتزعل الجماعه شديد بس الود مهند كان مصر اصرار شديد انو يقلب الهوبة وقلبا بيا ..!
اها ناس مزمل وحسن محجوب وابوشيبه بكتبوا شنو الليله .. تعالوا نقرأ معا اعمدة الاخوة الزملاء المريخاب : انتو عارفين يا جماعه كاربوني المسكين بكون اول ضحية عارفين ليه بقولوا ليك كاربوني معقول يخت لاعب زي قلق في الاحتياط .. وناس منهم برضوا بقولو معقول يشرك وارغو المصاب .. ومعقول يجلس الزومه علي الاحتياط ..!
اصلو ناس المريخ ديل اسف اقصد انو الاعلام الاحمر (السالب ) سيواصل سلبيته لكن ما عارف جمال بكره بقول شنو في الاذاعة الرياضية عليك الله يا السماني وعليك الله يا فاطمة ضروري تستضيفوا الوالي عشان يشوف ليهو حاجات تهدئ جماهير المريخ دي شويه اصلو ناس المريخ ديل كلهم خبراء في فن التخدير ..!
اها نجي للجماهير (الصفوة) والله الجماعه ديل اسم الصفوة ده جابو من وين انا ما عارف .. يا جماه الجماهير دي مافي مباراة ما قزفت الملعب بالحجاره .. اي مباراة طواااالي اول ما يجيبوا فيهم هدف يقوموا يقزفوا الملعب بالحجارة يعني الاندية تعمل شنو ما يجيبوا اقون ومرمي المريخ مفتوح علي مصرعيه .. والله ليهم حق .. انتو عارفين الجماهير دي ما زعلانه من اللاعبين الجماهير دي زعلانه شدييييييييييد من الاعلام الاحمر الشغال نفخ في لاعبين كوتهم (حبه ) انتو عارفين اللاعب لما كورتو تكون حبه طوالي بعمل ليهو مشكله زي بله جابر .. اها بخصوص بله جابر عامل فيها لاعب كبير قام عمل ليهو حركة كده قام الحكم قال ليهو اقول ليك حاجه احسن تمشي تقعد مع كاربوني لانو المباراة دي كبيره عليك اوي اوي ..!
اها نجي لبدرالدين عبدالقادر زاتو والله اول مرة اشوف لي حكم داير الكورة تطلع دورن .. فكر وقدر .. ثم قدر وفكر وحدث نفسو قال ليها الكوره دي تطلع درون كيف .. تطلع درون كيف لازم اقوم اطرد لي لاعب مؤثر في الهلال .. خاف يطرد عمر بخيت قال احسن الطرد يكون للمعز محجوب لازم اطردوا عشان المريخ يدرك التعادل .. وقال لي نفسوا معقول المريخ في القلعة الحمراء يخسر .. معقول المريخ الريسو جمال يخسر .. معقول الصفوة دي كلها تخسر لازم اطرد المعز قام طرد المعز ولو الامر بيده كان حرم الهلال من دخول الدعيع ..وبدر الدين عبدالقادر بعاين لشبكة الدعيع قام زاد المباراة زي ربع ساعه كده ده كلو عشان مريخ الحبيب يدرك التعادل لكن في لاعب ثقيل جدا اسمو كاريكا قام جاري .. هو القون وجيب من جوه ما عرف يعمل شنو يحتسبها هدف ولا ينهي المباراة والله والله كاريكا ده اثقل منو اصلو ما شفنا يا جماعه في لاعب في الدنيا دي بجيب ليهو قون في الدقيقة 103 اي في لاعب ثقيل اسمو كاريكا ثقالتو اصلو ما شفناها قبل كده ..!
اها نرجع للود كامبوس والله عمل ليك في الجماعه عمايل .. قام اخرج ثنائي الهجوم امبيلي وسادومبا علي التوالي .. انتو عارفين دخل منو دخل الود الاسمو (بشه صغيره ) ومعاهو منو تاني يا ود يا قسم .. اي اتزكرت الود الثقيل الاسمو كاريكا اول ما دخل كاريكا جدع ليهو باص مقشر كده للغزال وجيب من جوه يا محمد كمال .. صديقي العزيز السنجك من الامارات رسل لي رساله ظريفه جدا قال لي فيها 0طخو يا غزال في المليان ) قام مهند طخ الجماعه والله الاجمل من قون مهند عارفين شنو انا عارف قايتو (الهوبه) والله الهوبه دي انا بكون سعيد بيها جدا جدا .. يعني يا مهند ما تجيب لينا قون بس لازم تقلب الهوبة .. وقلبا بيا ...!!
مباراة الامس حضرناها في التلفزيون والله ما خائفين لكن دي تعليمات السيد شداد .. عارفين شداد كيف رفض يدينا بطاقات دخول .. هسي ده وقت كلام زي ده والاسياد غالبين .. كدي خلونا من شداد ده برنجع ليهو مرة تانيه المهم الان الاسياد غالبين وفرحانين وسعيدين مش ليهم حق يفرحوا ويسعدوا مش هم اسياد البلد دي ..!!
اخيرا جدا ..!
بكره السبت مزمل بجي من القاهره يعني هو عارف المباراة يوم 10 السبب البخليهو يحجز يوم 12 شنو .. والله انا خائف يمدد اجازتو تاني بامر (الهوبه) وبامر الود الثقيل الاسمو كاريكا ..!
اها ياحسن محجوب وين المسامير وين الملايين ..!
يوم عشره جا يا احمد وما غلبتو 10 وما غلبتو 5 زي ما طالبت لاعبي المريخ اها بكره بتكتب ليهم شنو .. انا خائف تكتب ليهم دلاقين .. عارفها طبعا دي الكتبت فيها مقال كامل يوم داك ..!!
نفسي اشوف سلك وابوبكر عابدين .. اما مجدي احمد البشير فاظنه سيحتجب بامر الغزل ..!
نجوم المريخ .. مجلس المريخ .. الاعلام السالب .. اذهبوا فأنتم الطلقاء ..!!