تعالوا نحتفل بالفوز في القلعة ..!!
والله انا معجب جدا بشجاعة الاخ اشرف سيد احمد الكاردينال يا جماعه الراجل ده واثق من نجوم الهلال ثقة عمياء بدليل انو اعلن علي الملأ انو متبرع لنجوم الهلال بمبلغ 100 مليون جنيه ليس هذا هو المهم لان الكاردينال عود نجوم الهلال علي هذا الدعم السخي طيلة الفترة الماضية لانه رجل معطون بحب الهلال ويجري الهلال في عروقه مجري الدم تماما لكن الغريب في الموضوع ان الكاردينال اصر ان يسلم الحافز لنجوم الهلال عقب المباراة مباشرة وتحديدا في ملعب المباراة وكما هو معروف فان المباراة تقام باستاد المريخ او قلعتهم الحمراء كما يسمونها ..!
ما مشكله يسموها حمرا .. يسموها صفرا .. يسموها برتقالية .. يسموها الوالي .. يطلقوا عليها شاخور ما فارقه معانا كتير المهم عندنا ان الاسياد سيفعلونها اليوم عارفين ليه لانو المباراة سيتولي التعليق عليها المعلق الكبير عدنان حمد الحامدي طبعا ناس المريخ عارفنوا كويس .. ولو ما عارفين ما مشكله نوريهم ليهو .. ده يا جماعه عدنان العلق علي مباراة الهلال والمريخ في ملعب المريخ في العام 2002 والتي كسبها الهلال بهدف معتز كبير .. اها قولوا معتز كمان ما بتعرفوهو .. طيب نفترض انكم ما بنعرفوهو نزكركم ليهو معتز ده هداف الممتاز اربع مرات علي التوالي مره بشعار المريخ وثلاثة منها بشعار الهلال اها عرفتوهو .. نرجع لمباراة معتز كبير وفيها كان المريخ قد حسم بطولة الدوري الممتاز تماما وجماهير واعلام المريخ دخلوها تحت عنوان منتصرين شايلن الكاس .. مهزومين برضو شايلن الكاس بالضبط كده زي ما قاعدين يكتبوا هذه الايام لو الهلال غلبنا برضو متصدرين .. ولو درون متصدرين ولو مغلوبين برضوا متصدرين اها ده الكلام البخلي نجوم الهلال يهزموكم طوالي يهني نجوم الهلال جنهم وجن تقول ليهم المريخ متصدر الدوري بتاعكم .. اي الدوري بتاع الهلال منذ الفوز به مرتان علي التوالي دون ان يجرؤ فريق علي الفوز علي الهلال ومرة واحدة بتعادل واحد .. وفيها الهلال حقق معجزة والله المريخ الشفناهو ده داير ليهو علي الاقل 100 سنه ما 100 مليون بتاعت الكاردينال كدي قولوا بسم الله الرحمن الرحيم انا قاصد الدوري الفاز بيهو الهلال بفارق 18 نقطه وال18 نقطه دي ما الفارق بين الاول (الهلال ) والفريق الذي يحتل المركز الاخير .. ال18 نقطه دي هي الفرق بين الهلال والمريخ .. تصدقوا يا جماعه الفرق بين الاول والتاني يكون 18 نقطه .. اها دي برضو قولو ما عارفينها .. ما مشكله لو ما عارفنها نزكركم ليها اصلو نحن شاغالين شنو شغالين نزكركم التاريخ القاعدين تطمثوا فيهو طوااااالي ده الدوري ده كان الهلال مدربو مصطفي يونس اوعي تقولوا ما بتعرفهو كمان مصطفي يونس ده راجل ثقيل بشكل من معسكر الفريق الاعدادي الاقاموهو بمدني قال عبارتو المشهور (السنه دي المريخ بعيط ) وصدق يونس فيما قال وعيط اهل المريخ عياطا مرا لسببين الاول عشان حادث امغد والثاني عشان الهلال شال الدوري بفارق 18 نقطه ..!
ده كلو ناس المريخ نسوهو يجي حسن محجوب هسي يكتب لينا المريخ المابنقدر عليك الله يا حسن مهاجمكم راجي عايزين تغلبوا الهلال .. اها جينا لمباراة الليله وفيها ندعو جماهير الهلال لاحتلال ملعب المباراة من عصرا بدري بس بوصيكم ما تكملوا الاحتفالات قبل المباراة خلوها لبعد المباراة عشان تكون احتفالات كبيرة جد جد .. بس برضو بوصي اخونا كمال دحيه الكشافات ما تطفيها معقول نغلبكم وما يكون عندكم روح رياضية .. برضو بوصي جماهير الهلال (العلم ) لازم يكون كبير .. طبعا العلم عارفينو القاعدين نرفعوا طواااالي في ملعبكم لكن المرة دي فاقدين جوليت عارفينو طبعا القاعد يرفع العلم في القائم الشمالي .. ما مشكله لو جوليت مافي مهند الطاهر قاعد اصلو مهند برضو ثقيل زي جوليت طواااالي بنط في القائم ويعلن تحرير تلك المنطقة لمصلحة الاسياد ..!
اها نتلاقي في الاستاد يا جماهير الاسياد ..!
واحد بس ما دايرن زيادة فاهمين يا اولاد ..!
