وفى الشوط الثانى دخل نزار بدل مهند فى الدقيقة 53 وفى الدقيقة 82 دخل سيدى بيه بدل كاريكا ، وغالباً الهلال يلعب فى دور 16
ضد ليوبارد الكنغولى الذى فاز على أول أغسطس الأنجولى برباعية مقابل هدف بالكنغو برازقيل والحمد لله شفرة ليوبارد عندنا لأن
النابى هو مدربه السابق عشان كدة سوف نسلم جوازاته لمهند الطاهر ونعمل ليهم خروج وعودة ويلعبوا كونفدرالية بإذن الله إحتراماً لمدربنا نصر الدين النابى .. وعشان خاطر الزهور نسقى النجيلة ، هى ماحدثتكم فريق البلدية ( لحق الزينين !! ) بالمناسبة خسر فى أرضه ووسط جماهيره بهدفين لهدف من ناكانا الزامبى بعد أن تعادل بزامبيا !! لذا لزم التنويه .
*** لى حبيبنا التهانى مستمرة
عندما ينتصر الهلال يبتسم الأطفال وتطرب عذارى الحى وتتفتح الأزهار ولقد وصلتنى العديد من الرسائل والإتصالات وكان العدد
الأكبر من هذه الرسائل من الرياض حيث قال العم محمد حسن الزين ( ناس مالى فى الطيران حصلوا الجيران ) أما محمد عبد الفتاح قال ... قول لى كتيبة الهلال أقدلى وسكتى الخشامة وأنزلى فى العوازل كى ، ودكتور محمد على الكوارتى يقول ألف مبروك يلا شغّل القلم ياجعلينا خلينا نطرب وصلاخ نصر يقول مليون مبروك هلال الساجدين ومن المدينة المنورة عزالدين أحمد سعيد يقول
نحن أسياد بلد نقعد نقوم على كيفنا والمهندس بابكر عوض الشيخ قال ... ألف ألف مبروك والله العظيم شرفونا والله أكبر ولله الحمد والمهندس عصام على عبدالله قال ... ما أقدر أقول إلا عايزين هلال زى كدة على طول ربنا يفرحكم زى مافرحتونا ، ومن الهفوف
الطريفى حاج أحمد قال ... الليلة يا الجعلى هلالك يشرّف الليلة أخدت إجازة من الشغل والحاجة المميزة أن البديل الجاهز يوجد فى كنبة الإحتياطى وبشة يعرف يتمركز كويس ، أما ثنائى المدينة جلال صالح فهو مبسوط 24 قيراط ورفيق دربه عبد الدائم عبدالمجيد قال خلى قدامك كباية شاى ياجعلى عشان تكتب بمزاج أما المهندس محمد جعفر فيقول ... عود لينا ياليل الفرح لابد لهذا الشعب أن يفرح أخى الجعلى والزميل الأستاذ أبورونق يقول ... مليون مبروك شرفتم السودان معاً لنبذ التعصب والهلال فى العلالى بإذن الله ، وغريب محجوب من هلالاب الدمام يقول ألف مبروك وقول لصاحبك أبو رونق رأيك شنو ؟ والأمين عبدالقادر من الهفوف ياهلال الساجدين الخير على أقدام الواردين ... ومن جدة محمد آدم مكنن الذى قال أنا مشيت الحرم من الفجر حتى صلاة المغرب يوم الجمعة والحمد لله ربنا نصر هلال الساجدين والصالحين ويوسف عمر من هلالاب محائل قال ... ياالله الإنتصار حلو والأقوان أحلى وعاد لنا هلال زمان هلال 2007 والهلال ثبت السودان فى أفريقيا حيث إنهارت 3 أركان أهلى عطبرة والمريخ وأهلى شندى وبقى الهلال كالسيف مسلولاً يقاتل وحده ... وهناك تهانى خاصة من الأساتذة الزملاء أحمد الفكى من حائل والأستاذ محمد الفاتح كتاحة من الأمارات والأستاذ سيف الدين خواجة من قطر ... ومن خيبر كان الهلالابى أحمد قاسم الذى قال سوف ننوم اليوم بمزاج أما رفيق دربه المريخابى خلف الله بلة قال جيبوا لينا التار من ليوبارد وفشوا غبينتنا وعبدالله بلل من مريخاب الدمام يقول ألف مبروك جعلينا ويتوقع من كتاحة أن يتحفنا بمجموعة صور ... ومعذرة لمن فاتنا ذكر إسمه .
*** رسائل غنائية رياضية من الشاعر ود الرضى
سوف نرسل 3 رسائل غنائية رياضية من أغنية ( أنا فى التمنى ) للشاعر ود الرضى ... الرسالة الأولى من جماهير الصفوة وهى
تكتشف خداع الإعلام الأحمر الذى يمنى النفس بأن فريقه أصبح عالمى ولكنه خرج من التمهيدى زى كل مرة والرسالة تقول
*** أنا فى التمنى ديمة هديلى ساجع ... مالقيت لى مغيث ولا لقيت لى مواجع ... والرسالة التانية من جماهير الهلال وهى تحضر بكثافة فى أستاد الخرطوم وهى تشتاق لرؤية الحبيب *** وتشتاق لهتاف الهلال وتشجيعه الداوى وتقول الرسالة *** داير أشوف حبيبى اليوم داك شفته رايق ودمعه ناقع *** يردد لى نغيماً ... تشتاق له المسامع ، والرسالة الأخيرة من جدو أوتوفيستر الذى عاد للمريخ أكثر من مرة وهو يضحك على خروج المريخ من التمهيدى وتقول الرسالة *** أعاين فيهو وأضحك ... وأجرى وأجيهو راجع ... متلاعب ليس إلا ... وما موضوع مطامع ؟
*** همسة الوداع
الحارس العجوز أحمد شوبير الذى عافته المعصية فظنها التوبة !! حاول أن يشوش على هلال السودان بكذبة مشكوفة زعم فيها
أن الهلال سوف يفقد نقاط مباراة الملعب بسبب مشاركة الحارس جمعة جينارو ، وربما تحرك هذا الشوبير بإيعاز من صديقه
مشطوب المريخ السابق الحضرى أو بدافع من بعض حواقد الصفوة... ومادرى هذا المسكين أن إدارة الهلال وجماهيره لن تنطلى
عليها مثل هذه السذاجة !! خلى بالكم شوبير لسه بيفكر بعقلية الحكم الثنائى ، وربما لايعلم أن جينارو يملك جوازين الأول من
السودان والتانى من جنوب السودان ... وبهذه المناسبة نهمس فى أذن صاحب القلم الأحمر إنت الحضرى لما كان عندو جوازين
كان سفير القاهرة بالخرطوم ولا وزير التكامل ؟ مجرد سؤال .