المشهد الاول:

البرير طلع من الباب وقال داير قروشي

والارباب جاي بالباب الشباك وزمان قال داير قروشي

الارباب جاي وفي يده هيثم مصطفي

ولا اظن ان الارباب سيخدم الهلال هذه المره

والارباب من اولها رافض التدخل الحكومي في الشأن الهلالي

والبعاند الحكومه في الزمن ده ما بياكل عيش مع ناس مرجان

والارباب بيقول انه لن يدعم اي لجنة تسيير حكوميه

وانه مع اي مجلس حر ومنتخب عبر انتخابات هلاليه

الارباب ما دايرنو مع هيثم

دايرنو مع فارس وباسيرو والدعيع و سيلا

و سيلا ده قصة براها

واصلا كان جاي للهلال

والارباب خزنه في اهلي شندي

واتعاند مع البرير واللاعب طار

وفيصل موسي قصه تانيه كمان

واتعاند مع البرير وطار فيصل موسي للمريخ

ونحن بصراحه ما دايرين الارباب يرجع لينا بهيثم

وبصراحه نحن ما دايرين لاعبين عمرهم الافتراضي في الملاعب انتهي

الزول ده بصراحه كبر

وخلاص كبرتي وليك ١٧ سنه

ومش باصاته ولمساتو الحلوه ممكن يعوضها لينا سيدي بييه الله عليه

وممكن بطريقه ماليه جديده

الزول ده السودان كله بيصفق ليهو

ويا بابا انه زمان ناس محمد عبد الرحمن واطهر الطاهر وسيدي بييه ووليد علاء الدين

واي لاعب هلالي لازم يبرز لينا شهادة ميلاده

وما حنقبل بمخالفات عمريه

وحيكون في تصحيح اوضاع وتسفير وسجن للمخالفين

يا اخوانا الارباب ولظروف خاصه به لا يمكن ان يعود رئيسا للهلال

وممكن المفوضيه ترفض عودته زي همشري البحريني

فالرجل مقيم في جده ويتمتع بالجنسية السعوديه

الارباب بحب الهلال شديد

ولكنا لن نقبل ان يدير الهلال بالرموت كنترول

و من جده كما يدير اهلي شندي

وكلما ابدع الاهلي شندي نسمع تشكرات الجميع للارباب

وانه الاب الروحي للاهلي شندي

وحتي يخرج الهلال من عنق الزجاجه لابد ان يتوحد كل اقطاب الهلال

ارباب كاردينال برير طه البشير

لا نريد اربابا يعود للهلال فيبدأ البرير حربا مستعره عليه وبعباءة المعارضه

نريد هلالا موحدا

تخيلوا اخوتي هلال خسران الدوري بفارق نقطتين فقط

وناس بولينا فرشت لهم الحكومه كل الطرق بالورود

تخيلوا هلال موحد بالارباب والبرير والكاردينال وطه البشير

كدي جربوا الخلطه السحريه دي

وعينكم يا مريخاب ما تشوف الا النور

صدقوني خسارة الهلال للدوري زي العسل علي قلوبنا

وصدق اخونا ود عبد الماجد حين قال :

في ظنى ان الالقاب والكؤوس تكون اكثر سعادة وشرفا ..عندما تقترن بالهلال ..لأن الهلال هو الذي يعطي لللقب الجمال والروعة والخلود

< الهلال لا يفقد شيئا عندما يفقد (لقبا)..وانما اللقب هو الذي يفقد الكثير

< الكأس البمشي لي فريق تاني في وجود الهلال بكون كأس (فطيس) ساكت

< كأس ما عندو رأس

< لقب لا رائحة ولا لون ولا طعم له

< الهلال بغض النظر عن واقع النتائج وروليت الترتيب هو البطل الحقيقي للممتاز هذا العام



المشهد الثاني :

هل تعلمون ان هذا الدوري سيكون آخر دوري بالطريقه القديمه وقد اقترب عام ٢٠١٤ والنظام الاحترافي الجديد

فلن يستطيع انصار المريخ تجنيد فرق تعبانه في الدوري لتعاونهم في الفوز بالدوري

وما في افتح لي وافتح ليك

مثلا لن تقبل الفيفا حواشه الحصاحيصا الشهيره

وخاصة بعد تبول لاعبي المريخ في اركان وثلاجة مكاتب الاتحاد

وبمقابل قدره ٢٠٠ مليون اعلن عنها الجكومي عربونا لذلك البول

ستنهي نهائيا استعانة المريخ بصديق

وان التفت فلن يجد مريخ الفاشر او اهلي عطبره

الحال سيتغير كليا اخوتي

خلاص باي باي للمؤامرات

دوري المحترفين ربما يقضي على الدوري والكاس

فلقد استلم الاتحاد السوداني لكرة القدم تعميماً صادراً من الاتحاد الافريقي ( الكاف ) بخصوص نظام تراخيص الاندية والزيارات التفقدية التي سيقوم بها وتشتمل على بندين مهمين متعلقين بالزام الاتحادين ومن بينها الاتحاد السوداني بتفاصيل نظام تراخيص الاندية الصادرة من الاتحاد الافريقي في حده الادنى حتى تتمكن من المشاركة و اشترط تطبيق نظام تراخيص الاندية حتى تكون الاندية مؤهلة للمشاركة في المنافسات الافريقية بدلاً عن قيام الدوري الممتاز وكأس السودان للمشاركة في كأس أبطال افريقيا والكونفدراليه

لا اظن ان اصدقاء المريخ سيرافقونه في النظام الجديد

ولا في تسيير

ولا في لوردات

ولا في والي ولا وزير

وممكن شلة الحصاحيصا تختفي والي الابد

والفيفا طبعا دايره فرق بشروط معينه

يعني بالعربي ممكن ده يكون آخر دوري وآخر كاس

ويمكن عشان كده عبد الصمد لف بالكاس علي كل مدارس الخرطوم

ويمكن عشان كده اخدوا الكاس بيت البكا

وربما تنتهي والي الابد اسطورة الرئيس طوالي

لان جميع الانديه ستتحول الي شركات مساهمه عامه

مستعدين

طبعا نحن في الهلال مستعدين لان الهلال هو فريق الشعب

والدور والباقي علي اللي متعوده دايما علي حكم الفرد

الله يكون في عونهم



ختام المشاهد :

وينك يا الجعلي لا اسكت الله لك حسا -

يا كتااااحه وين حبينا الجعلي

زمان يا درسونا ان بقايا الحيوانات والنباتات تتحول الي بترول - الآن علماء المريخ اكتشفوا ان البول يتحول فيتامين سي



ارفعوا اكف الضراعه :

ودعواتكم بالشفاء العاجل لاخونا وصديقنا العزيز عمر حامد مجذوب المريخابي المطبوع -

اللهم رب الناس ارفع الباس واشفي انت الشافي لا شفاء الا شفاك شفاء لا يغادر سقما







محمد حسن شوربجي