إحــذروا فـــخ الإنسـحاب يا هــلالاب ...
كما نعلم تعرض الهلال فى الدورة الأولى لتآمر أحمر لئيم بطله وزير الرياضة الولائى الطيب حسن بدوى وكان من نتيجة ذلك أن فقد حامل اللقب خمس نقاط بالتمام والكمال ذهبت لصالح الجيران ( وهم قاعدين بس لى تكفين الميتة !! ) لأن الهلال خسر مرة واحدة وتعادل ست مرات بينما المريخ خسر 3 مرات وتعادل مثلها ، أما نتائج المواجهة المباشرة بين القمة فالنتيجة بالطبع تشير لصالح المارد الأزرق الذى حصد 4 نقاط مقابل نقطة واحدة للجيران !! وبعد كدة يتفاصحوا يقولوا إحنا جبنا الصدارة بعرق الجبين وليس بجهد الآخرين !! عالم نكارين جميل بشكل !! معليش يا أخوان فارق الخمس نقاط كان من برنامج الأمس فى الدورة الأولى أما فى الدورة التانية فقد رفع هلال العشق الجميل شعار ( أكسح وامسح ) وكما يعلم الجميع الفرق أصبح نقطتين بس !! عشان كدة جاء الدور على إتحاد أبناء العمومة الأحمر ليفسح المجال أمام مريخ اللوردات لينال كأس الممتاز ...وكانت مهزلة القرارات التى إتخذها الإتحاد بغرامة الهلال عشرة آلاف جنيه ولعب مباراته أمام النسور بدون جمهور وتعويض المريخ عن تكسير بعض الكراسى !! طبعاً الهدف واضح وهو أن يرتكب الهلال حماقة الإنسحاب من الدورى الممتاز ليخلو الجو للمريخ وينال الكأس !! ولقد تفطنت إدارة الهلال للمؤامرة الخبيثة وقررت مناهضة الظلم بالقانون !! والإتحاد مفروض أن يتعامل بحيادية وعدالة مع كل فرق الممتاز ولكن إتحاد الذل والهوان ينسى حديث كلكم راع وكلكم مسؤول عن رعيته ... إن شاء الله ربنا يسلط عليهم شداد يشيلوهم بالفيفا ... قولوا آمين ، طبعاً مباراة الهلال القادمة بعد النسور يوم الأربعاء 9 أكتوبر مع إبننا الكردفانى فى كادوقلى وبعدها إجازة عيد الأضحى ، و المريخ بعد الأهلى الخرطوم يلعب مساء الثلاثاء 8 أكتوبر خارج أرضه مع الخرطوم الوطنى ناس عنكبة وآدم ساير ، ولكن السؤال الذى يطرح نفسه هل يفلت المريخ من كمين الجيش كما فلت من كمين شرطة النسور !! بالمناسبة الطريق لدولارات الوالى يمر عبر شباك أكرم الهادى يا مصعب عمر وهنو وعبدالرحيم أم بدة !! لذا لزم التنويه .
*** مليارات الجنيهات ومعسكر فخيم بالبيت الأزرق
رصد مجلس شورى سيد البلد بقيادة حكيم الهلال طه على البشير مبلغ 3 مليار جنيه للتسجيلات القادمة من أجل إستجلاب محترفين من العيار التقيل للبطولة الأفريقية القادمة !! بالله الهلالاب ديل مامفترين !! هسه الفريق ده ناقص حاجة !! ماشاء الله وتبارك الله ... والغريبة الجنرال صلاح آدم قال رغم تألق بوى وأتير والشغيل وكاريكا ومهند والمعلم وبشة ونزار فهناك فى الطريق عمر سيدى بيه وتراورى ومحمد أحمد ومروان صالح ( غايتو الجنرال ده يوم بكتل ليه صفوة !! ) طبعاً أنا ماذكرت تألق المعز وسامى ومحمد عبدالرحمن وخليفة و بكرى خوفاً من العين الحمراء وشرارة عشان الأيام دى حايمة أكتر من إنحياز التحكيم للمريخ ... هى إنتوا فى شنو !! تحليل سيحة أصبح فضيحة ، ويارضا مصطفى الشيخ لاتفسدوا برنامج عالم الرياضة بإنحياز سيحة للمريخ وجيبوا لينا الخبير الطاهر محمد عثمان ، ياجماعة نسيت أقول ليكم الأقمار دخلوا معسكر للنسور فى البيت الأزرق الفخيم بالمهندسين .
*** رابطة الروائع بالصالحية ماضى أنضر وحاضر أخضر
الرابطة الرياضية بالصالحية بالرياض التى أسسها وترأسها الهرم الرياضى الأستاذ عبدالمنعم عبدالعال حميدة وإستلم الراية الآن المهندس عبدالمنعم عمر تستعد هذه الرابطة الفتية فى قادم الأيام لإقامة كأس الوفاء لعضو الرابطة الراحل ميرغنى عبدالله الشايب بمشاركة 12 فريق مقسمة على مجموعتين الأولى تضم الخرطوم ونجوم كرمة والحفير وودنوباوى ومدنى وجزيرة كومى ... والمجموعة الثانية تضم بشاير الشمال وودحبوبة والدويم والسلام ونجوم الدرادر ونجوم الجزيرة ... ولنا ذكريات جميلة مع رابطة الصالحية عندما شاركنا بفريق المتمة الذى فاز بكأس الإستقلال عام 2003 ... ورابطة الصالحية هى السودان المصغر وهى ساحة للمحبة والوفاء برجالها الأماجد وفيهم أيوب الصالحية الزميل التيجانى إبراهيم والزميل ياسر فضل المولى وكبوش وصلاح خضر والكوتش عصام ودالسكة وممثل الطب الرياضى عبداللطيف المقدم وفاكهة الصالحية صديق الموج والهلالابى الغيور محمد أحمد ودالمصطفى وعلى خليل المريخابى الأصيل ومعذرة لمن لم نذكره من الأحباب وغيرهم من الأوفياء .
*** همسة الوداع
الكاف منح جمهور الهلال وسام الجمهور المثالى بينما عاقب الصفوة عدة مرات بسبب الشغب مرة فى مباراة الترجى عندما تم حصب الملعب بالحجارة ومرة أمام زيسكو وآخر مرة فى مايو الماضى أمام ريكرتيفو ... وعندما حطمت الصفوة كراسى الهلال فى مباراة أفريقية قمنا بتسوية الموضوع بحس وطنى ... والآن عندما تحطمت كراسى أستاد المريخ بعد هدف بشة التالت والصفوة ( معلومة سوابق طبعاُ ) لكن الإتحاد الأحمر قرر تغريم جماهير الهلال عدد 1250 كرسى ( عدد مقفول كدة ) وقالوا سعر الكرسى 70 دولار يعنى 560 ألف جنيه !! تخيلوا !! الناس ديل معقول يكون نقلوا كراسى القصر الجمهورى فى أستادهم !! وبهذه المناسبة نهمس فى أذن صاحب القلم الأحمر إنتوا كرسي أستادكم بأكتر من نص مليون جنيه !! الشئ شنو !! دى كراسى مصنوعة من بلاستيك !! ولا صندل ؟ مجرد سؤال
