في ميدان التحرير يا مزمل
واحد سايق حافله
قام واحد تاني سايق هكره دقش الحافله
الاتنين نزلو وعاينو للعربات
بتاع الهكره بعاين لي شنو ماعارف
عربيتو مطرقعه بكل الجهات
قام اتلفت علي بتاع الحافله
حافله بي ستايرها وكشبها
آخر موديل
ومظلله لط
لي هنا
بتاع الهكره قال لبتاع الحافله بركه الجات في الحديد
بتاع الحافله قال ليهو اريتها لو ماجات في الحديد
اريتها لو جات فينا
نحنا بنبرا
بي مكمدات بنبرا
بالصبر بنبرا
بي لبخة قرط بنبرا
لكن الحديد ما ببرا ساااي بالقرض
ببرا بالدفع
بالسداد
الورش بقت سوريين ومصريين وصينيين
والبوهيه بالفرن وبالمايكرو ويف
وعاين للهكره
وقال ليهو ليك حق تقول بركه الجات في الحديد
حديتك الجاها لي سوريا ماجا
جا واحد هلالابي
عاين للحادث وقال ليهم باركوها
جا هلالابي تاني قال ليهم باركوها
اصلوا اهل ناس روشا ديلعدم الشغله ومشاكل هيثم
خلوهم اي لمة يقولوا باركوها
وبتاع الهكره زاتو هلالابي
يعني بتاع هكره حايكون شنو ؟؟
المهم بتاع الحافله قال ليهم والله الحافله ما بتاعتي
وانا ضربت لي سيدا وبجي هسي
الجماعه من سمعوا سيدا
قعدوا يكوركوا
سيدا سيدا سيدا
الشارع اتلم
سيدا سيدا سيدا
سيد الحافله جا
السواق قال ليهم اهو سيدا جا
الجماعه ماشافوا الزول كويس
وختفوهو ليك
سيدا سيدا سيدا
الحادث كان في صينية الحريه
مرقوا بيهو في جامعة التقانه شارع الشنقيطي
يكوركوا سيدا سيدا سيدا
السواق ساكيهم
ياناس انتوا فهمتوا غلط
قالوا ابدا
فهمنا الصاح
سيدها مقصود
قال ليهم تاني فهمتوا غلط
ده ما سيدا
قالوا ليهو سيدا وسيدك
يا ناس
ده ما هيثم
ده سيد الحافله
قالوا ليهو سيد الحافله وسيد الكوره وسيد اي شئ
ياناس ده سيد الحافله عمك برير
وقلبوا
من سمعوا برير
مافرزوا فيها الف ولام ولا ما فيها
الشعب يريد اسقاط البرير
برير سيد الحافله لما سمع الشعب يريد اسقاط البرير
والناس شايلنوا فوق
عاين للارض لقاها بعيد
شايلنوا ناس طوال
اقصر زول فيهم طول روشا
قال نتخارج
وقعه من هنا زي وقعة من برج التجاره
تلب وجري
سكوهوا ليك
لما وصلوا صينية كبري الحريه تاني
لقوا بوليس الحركه واقف
رسم الحادث
البوليس عاين كده
قال بتاع الحافله وين
السواق اشر علي برير
وقال ليهو اهو ده سيدا
عمك برير بعد الشافوا دهنكر الحافله
قال للعسكري
لا سيدا ولا حاجه
انا مابعرف الحافله دي
ولا شفت السواق ده قبل كده
واشر علي السواق
ده سيدا
والناس اتلفتوا علي السواق
وهتفوا
سيدا سيدا
السواق جري
باقي الشافو في مشورة عمك برير للتقانه في الشمس دي صعب شديد
وسكوهوا ليك
روشا
لو لاقاك سواق جاري والناس ساكاهوا
وبهتفوا سيدا سيدا
قول ليهو العربيه في مكتب الحركه الخرطوم
والمتحري اسمو احمد آدم
رقيب اول
سيدا جنن الناس جن
شفت القصه دي يا مزمل ؟؟؟
تقول لي الجوطه في العرضه
الجوطه يا مزمل مرقت من النادي
مشت شرق الاستاد
وكان شفت يا مزمل ميدانالحافلات داك بقي زي ميدانالتحرير
جنس جوطه
فضل بس يجوا البلطجيه الراكبين الجمل ديك
وبعدها طوالي حسني مبارك يعلن التنحي
واتنحنحي
الجوطه يا مزمل وصلت شارع الحريه
ابقوا عشره علي شارع الجمهوريه
باقي الجماعه ديل بجوا دايشين
مايقوموا يدخلوا الصدي كمان ويقولوا دي مجموعة شركات البرير
قولوا ليهم ديك بهناك
بي شارع الجامعه
مايقوموا شارع الجامعه دي يسمعوها سيف الجامعه
سيد الحافله نكرها يامزمل
اها نجي لشمارات والي الخرتوم
كان شفت يا والينا
ركت في يدي باعوضه
ولا عضتني
استغربت شديد
قلت ياربي مالها
تكون عشان ركت في يدي العصر !!!
اكتشفت انها ما عضتني عشان صايمه الستوت
تقبل الله منا ومنها وجعل بيننا مودة ورحمه
الباعوض البصوم الستوت ده خلي بالك مربي يا والينا
سلك كهربا
ننساك كيف والباعوض صايم الستوت
والي لقاء
سلك