كذلك من زمانك
ايها الناس
ماذا قال المراقب في تقرير المباراه ؟؟؟
ولماذا اتهمه اعلام الهلال بالمتهمشر ؟؟؟
طبعا ماممكن يكون كتب الحكم كان عادل
ممكن يكون كتب ان تحيز الحكام قرب يفسد المباراه
ويمكن يكون سجل دهشتو من التحكيم الافريقي الوضيع
وممكن يكون سجل صوت لوم للذين يتعاملون مع الحكام تعاملات همشريه محدده
الحكم ما سوداني
وبالتالي ما هلالابي
وليست له مصلحه في ذلك التواطوء القبيح الا مصلحه محدده
ومعينه
ومعروفه
لذلك اتهم الاعلام الهلالي المراقب النزيه بالهمشره
وانا لو مكان المراقب كان كتبت
الحكم يضيع علي المريخ نصرا مؤكدا علي فريق ضعيف
فريق تنهشه المشاكل
الكابتن مختلف مع المدرب
الجمهور بين مؤيد ومعارض
الاعلام منقسم
جزء يري ان البرنس علي حق
والجزء الآخر يري ان المدرب محق في ابعاد البرنس
اللاعبون منقسمون
مابين مؤيد ومخندق مع البرنس
ومابين من يبحث عن الفرصه لابعاد البرنس
مجلس اداره فيهو تلاته انفار
واحد رئيس
وواحد بطمبر للرئيس
وواحد شغال ركشة حكام
والنادي مغلق في وجه الرواد الشرفاء
فريق تنهشه المشاكل
كل يوم لاعب مشتكي في الفيفا
مطالبا بالنفقه
ولاعب عديييييل رجع اهلو ومافي زول قادر يقول ليهو يا عيد الحب تعال
لانو كان قالوا ليهو تعال بقول ليهم ادفعوا
فريق ماقادر يقنع سادومبا باعادة التسجيل
فري يستحق الهزيمه النكراء
ولكن الحكم الغريب ابي
لو كنت المراقب كان كتبت اكتر من كده
ايها الناس
بعد كل الظروف دي ناس روشا يلوموا جمال
جمال طرد جماهيركم من النادي ؟؟؟
جمال سفر عيد الحب نيجيريا ؟
جمال خدع الهلالاب وقال ليهم سانيه خطييييير
جمال قال لغارزيتو هيثم بره
ولا جمال قال لي ناس امولادي اشتكوا في الفيفا ؟؟؟
جمال جاب ليكم هونج كونج الماسوره وضيع قروش النفايات
ولاجمال جاب ود غارزيتو مدرب مع ابوهو ؟؟؟
جمال يستاهل ياروشا
لانو لو سجل مهند ووقع عقد مع سادومبا
كان عرفتو حاجه
وكان الليله في ميدان عقرب تداقشوا
لكن جمال ما عملها
عطف عليكم
عشان كده مافي داعي تقحموهوا في مشاكلكم
جمال بعد ده لو عليهو يكسي ليكم مدربكم ابو فنيله واحده سوداء ده
ايها الناس
يجب ان نرفع مع تقرير المراقب شكوانا
مدعمه بالشريط
ومن هسي
ناس روشا حايقولوا عملنا فوتو شوب للشريط
لكن الاتحاد الافريقي وبالذات لجنة التحكيم
يجب ان يعرفوا حاجه
ايها الناس
امس القياده العامه كانت مجتمعه بدار النادي
تخطط للتشجيع يوم شندي
ولمت الشمل
كل المريخاب
بمختلف مشاربهم كانوا حضورا
وده دليل علي انجاز جوي جديد
مانديلا داير اختو الكونفدراليه تقعد جمبو
وطالما نحن كذلك
شفووووووووووووووت
سنحقق ما حققناهو زمانك
جوووووووووووووويه
انتوا كا شنو يا روشا ؟؟؟
لاعندكم كذلك ولا عندكم زمانك
ايها الناس
اسامه عطا المنان
لن ترضي عنك الشفوت ابد الدهر
ولن ترضي الشفوت عن غيرك من اعضاء الاتحاد العام
اخترتم عداوتنا
هنيئا لكم بعدواتنا
وبعدين ورونا طعمها كيف
ايها الناس
كلنا حضورا دائما في رحاب الزعيم
من هنا للمباراه النهائيه والتتويج بالبطوله
جويه جديده
يجب علي كل مريخي ان يشارك فيها
الفاتتو سيكافات ومانديلا ودبي
الفرصه متاحه لك الآن
والسوي شئ قبل كده بسويهو تاني وتالت ورابع
نكره الاصفار
والفرق الصغار
التي لم تجلب لهذا البلد الطيب اهله
غير الهزائم والانكسار والسمعه الدمار وتغيير الارقام
اتنين تبقي اطناشر
ناس يوسي ماس ماعملوها دي
نحن المريخاب نتحدي فريق في البلد دي جاب كاس بالطياره
ولو من الكنغو
وبتاع اخت الرئيس
وهدية شخصيه
حتي ولو كان كاس فهيمه
هذه انجازاتنا
العندو زيها يقول انا
كان خجلان يرفع ايدو ساااي
ساكتين مالكم ؟؟؟
اها
نجي لشمارات والي الخرتوم
كان شفت يا والينا التوازن البيئي اختل جدا
اصبح قصاد كل مواطن مية وخمسه باعوضه وتلاته وتلاتين ضبانه وخمسمية حشره واربعمية عقرب
اعيدوا يا والينا التوازن البيئي
يا خفضوا عدد الباعوض والضبان والحشرات والعقارب
يا زيدوا عدد الناس
انشاء الله تتمونا بنغاله يا والينا
سلك كهربا
ننساك كيف ونحن كذلك من زمانك
والي لقاء
سلك