عندما أعلن ( الراحل غارزيتو ) ...أنا قاصد راحل عن المريخ !! أن جمال الوالى هو سبب ضياع كأس أبطال أفريقيا تحدث الرجل بإحترافية لأن القمة السودانية فرطت فى الكأس بعد أن وصلت مربع الذهب وإحتل السودان 50% من هذه المساحة !! تخيلوا لو أن مصر أو تونس أو الجزائر نالت هذه المساحة هل يمكن أن تفرط فى الكأس !! وغارزيتو بخبرته يعرف أن الكرة العالمية لا تلعب فى السندس الأخضر فقط ...فهناك لعب خارج الملعب لايجيده أهل السودان كما قال المدرب التونسى فوزى البنزرتى إن الكرة السودانية بها مهارات فردية ولكن ينقصها الخبث الكروى ...وقيادات هلال مريخ يعتقدون أننا فى عهد الخلفاء الراشدين ولسنا فى عصر عيسى حياتو وأمثاله ...المهم غارزيتو منذ حكاية ( خاتم المنى ) الذى وجده فى أحد فنادق الفاشر كان يمهد الطريق للكأس وهلل الإعلام الأحمر لذلك وكتب عن رائحة الكأس الجوى وذهاب الصفوة للمطار ...وبعد ثلاثية مازيمبى جاء المريخ ( ضهلان ) لكأس الممتاز ولكن يقف فارق النقاط الست عقبة فى طريق أحلام المريخ حيث قام الإتحاد بتخفيضات هائلة لصالح المريخ بلغت نسبتها أكثر من 80% وتقلص فارق النقاط الست وأصبح نقطة واحدة فقط ويمكن تجاوز هذه النقطة بصافرة وديدى الفاتح أوعمار كريمة وداس الكسيح على كل القوانين فى سبيل أن ينال المريخ كأس الممتاز ...ولكن هلال الحركة الوطنية ومعه فهود الشمال وأنيق الشرق رفضوا العبث وإنحازوا بجانب الحق ...وفاحت رائحة فساد الإتحاد الأحمر حتى وجدها وشاهدها كل السودان حكومة وشعباً ووصلت القصر الجمهورى وقبة البرلمان ...ولو كان قادة الإتحاد الكسيح تعرف خدودهم حمرة الخجل لقدموا إستقالات جماعية ...وتحرك القصر والبرلمان بطبخة الجمعية العمومية وإستفادوا من تراث وطن الأجاويد ودفع سيد البلد ضريبة ( فضح الباطل ) ونال المريخ الكأس فطيس وتم إستثناء الأمل من الهبوط ... وأعتقد أن الهلال رفع راية الحق وجاهد فى سبيلها ولكن يجب ألا تكون التضحية أكثر من ذلك ولاداعى لجكاية الإنسحاب من الموسم الجديد ...لأن هناك 12 فريق فى الدورى وقفت متفرجة بينما مثلث الحق يتقى بصدره سهام الباطل ولم نجد من يحمى ظهرنا ...وعرف الجميع أن الدورى إنسرق بكأس الورق بعد أن منح إتحاد معتصم الكأس للمريخ من المكاتب بعد أن خسره فى الملاعب .... تخيلوا بالله نهائى كأس يغيب عنه هلال العشق الجميل يكون كيف !! عندما تغيب البدور يختفى الألق والنور ولله در القائل *** لما رأيت القوم قد رحلوا ...وراهب الدير بالناقوس منشغل *** شبكت عشرى على رأسى وقلت له ...ياراهب الدير هل مرت بك الإبل *** فحنّ لى وبكى وأنّ لى وشكى ...وقال لى يافتى ضاقت بك السبل *** إن البدور اللواتى جئت تطلبها ...بالأمس كانوا هنا واليوم قد رحلوا ...من غرائب الصدف أنه فى هذه الأيام شغالة فى قاعة الصداقة مسرحية ( السرقونا إنعرفوا ) وهى مسرحية كوميدية تأليف على أبنعوف وإخراج عبد الحكيم الطاهر وتمثيل ياسر رضى ومحمود عبد اللطيف وسميرة محمد سعد وإنصاف مدنى ( نجن ذاتنا السرقونا إنعرفوا !! ) ويقوم الممثل ياسر رضى بدور صيدلانى يكتشف دواء يعيد الإنسان لمرحلة الشباب ...بالمناسبة معتصم جعفر برضو صيدلانى وعنده شركات أدوية !! لذا لزم التنويه .
*** هلال العام الجديد رائع وصنديد
أحرز هلال الأمة الدرجة الكاملة فى تسجيلات هذا العام حيث أضاف لهلال الشباب المزيد من الشباب وإن كان الهلال بعناصره الواعدة قد بلغ مربع الذهب الأفريقى فإن هلال الملايين بعد الإضافات الجديدة أصبح عجوة معطونة فى عسل ...تخيلوا الهلال يزين كشفه بهذه الكوكبة الشبابية أبو عاقلة نجم أم بدة وعمار الدمازين نجم أمل الحديد والنار وولاء الدين موسى نجم سيد الأتيام وحتى الند التقليدى المريخ تناولنا منه أعطر شبابه أحمد عبد المطلب الشهير بأحمد ميسى ( سيد البلد إيدو لاحقة !! ) وحقيقة القادر بسوى ...تعرفوا أحمد ميسى سجلناه لمدة 4 سنوات يعنى وصيف دنيانا لو عنده رغبة فى ميسى نقول ليه قابلنا عام 2020 ميلادية ( إذا ربنا حيانا ) ياجماعة أعذرونى لن أتكلم عن محترفين الهلال الأجانب وإنتوا عارفين السبب ...ناس نعسان وعطرون وجردقة يقوموا يلطشونا بى عين حمراء وشرارة تانى نقبل وين ... الحمد لله فريقنا خطوطه إكتملت بعد إضافة هؤلاء الشباب وكمان نضيف لهم مكسيم ومساوى وكاريكا وبوى ونزار وبشة وبقية النجوم ...غايتو الوصيف ممكن نمد له يد العون خاصة بعد أن غادر ولدنا جمال الديار الحمراء بعد 13 سنة من الكبت والحرمان عن المتعة الحقيقية والإبداع ...جمال الوالى ولدنا والعايز يتأكد يراجع مباراة الهلال والأهلى القاهرى فى نهائى الكأس عام 1987 والطالب الجامعى وقتها جمال يلوح بعلم الهلال فى القاهرة ....مفروض الهلالاب يضبحوا لى جمال كرامة عشان إدارة المريخ أصعب من الخدمة الإلزامية وأخطر من سجن غوانتنامو !! ليه الناس إحتفلت بى سامى الحاج بعد ما إتخارج من ورطة غوانتنامو وما إحتفلوا بى جمال !! نحن متعودين نمد يد العون للجيران من زمن ولدنا حسن أبوالعائلة عليه رحمة الله .
*** قصيدة رائعة هلالية بمنتدى كوورة سودانية
لو قلنا ليكم ما إشتقنا لى الهلال ما تصدقونا ...وأى هلالابى عنده شك يسأل نفسه التى بين جنبيه ...شوفوا بالله كدة فى العام الجديد ناس أحمد ميسى وولاء الدين فى الجوهرة الزرقاء ...أعجبتنى قصيدة رائعة للشاعر صلاح سلك من هلالاب الدنمارك سطرها بمنتدى كوورة سودانية يتحدث صاحبها عن عشق الهلال وهلال العشق الجميل وعنوان القصيدة زيك منو ...وتقول القصيدة ...
*** زيك منو وإنت الهلال ...شبهك منو يا أحلى فأل
*** زيك منو فى كل جيل إنت الفريد...دائماً من الأنجم بعيد
*** ريدتنا للابيض هنا...والله للأزرق شديد...زيك منو
*** لى ريدك الأطفال تميل ...ويسهر لى ريدك كل جميل
*** حب الشباب أكبر دليل ....أما الشيوخ تهواك أكيد
*** والحكمة أماتنا القبيل ....زيك منو
ماشفنا فى الأكوان صفاك ...وماعشنا فى السودان بلاك
***أزرق سماء وأبيض ملاك ...أفريقيا والعالم مداك
*** وشعارك النيلين كفاك ....الزيك منو
*** ياهو الهلال إبداع فريق فى الكون عديل
***الهامتو سامقة فى كل جيل ...القامتو زى طلع النخيل
*** الريد لغيرك مابكون ...والدنيا غيرك مستحيل
*** ياهو الهلال سيد الطرب ...كاسات موشحة بالدهب
*** لاجات حظوظ لا واحد وهب ...هلالنا يا الأحباب صعب
الزيك منو ...الله ...الوطن ...الهلال ...أصدق قيم وأجمل مقال
...نتمنى أن نجد فنان يلحن هذه الكلمات الجميلة فهى أغنية الحاضر والمستقبل .
*** همسة الوداع
حبايبنا الحلوين حتى الآن ما إحتفلوا بالكأس المزعوم وكأس المرحوم ...معقول أسامة ونسى مازول طرب وجفلات !! ناس المريخ عودونا لو فازوا على إيلمان الصومالى يعملوا حفلة بى إنصاف مدنى وحرم النور وكمان معتصم فاز برئاسة سيكافا ومنتخبنا فاز فى سيكافا بشق الأنفس وبضربات الترجيح على منتخب الجنوبيين ( والله زى ما أقول لكم ) ... وبهذه المناسبة نهمس فى أذن الإعلام الأحمر ليه معتصم ماقام بتعيين العنقالى سيد الباسطة رئيس فى لجنة الإنضباط السيكافية !! ولا سيكافا مافيها ضبط وربط ؟ مجرد سؤال .