تتذكروا سلفا كير
> أسي رئيس دولة جنوب السودان الشقيقة
> ايوااااا
> كويس انكم اتذكرتوه
> سيلفا كير ده شفتوا طاقتو ؟؟؟
> الطاقية البلبسها دي طاقية كاو بويات
> الجماعة بتاعين كربتك كربتك كربتك ديك
> جنهم افلام
> فاتحين خيال طوالي
> وأفلام الكاو بوي روشا بعرفها كويس
> عاصرها
> وطبعاً روشا متذكر أفلام الكاوبوي
> كانوا بشغلوها لينا كتير
> كان في حاجه قبل الانقاذ يا روشا اسمها السينما
> متذكرها
> آها السينما دي كان فيها افلام كاو بوي
> يجيك الكاوبوي داقي سيستم وخاتي مسدسين بالجمبات
> السيستم ده قايلنو جديد ؟؟؟؟
> ما جديد
> قدييييييييييييييييييييييم
> لكاوبويات كانوا بدقوا سيستم لزوم القشرة والفشخرة
> عشان مع المشية المسدسات تتراقص بالجمبات
> وكانت اللقطة بتبدأ من البوت الفيهو حلقة بي ورا
> وتطلع الكاميرا مروراً بالبنطلون والمسدس والقاش
> القاش ده عريض ومليان دبابيس زي دبابيس المشمع بتاعات اليومين دي
> وتجيك للقميص
> وتطلع تدخل ليك كلوز علي الوش
> تلقي الخواجة صاري عين وفاري عين
> ويا بمدغ ليهو في لبانه
> ولبانة زمان زي اللحمة
> عشان يمدغها يفتح ليك خشمو كلو ويقفلو في المدغة الواحدة
> يا تلقاهو خاتي سيجارة بتاعة زنوبيا في قدومو ما مولعة
> وتفتح اللقطة شوية تدخل على الكسكتة
> طاقية الكاوبوي اسمها الكسكتة
> ومن اوفر شولدر تجيك لقطة لي حصين جايات من بعيد
> حصين التابعين
> الناس التركوا امرهم للكاوبوي الاول ده
> خمسة ستة حصين جايات تابعات الكاوبوي
> لاعارفين ماشين وين
> ولا ناقشين ماشين لي شنو
> ولا حاسين بأنهم تابعين ساكت
> زي ديل اول ناس بموتوا في الفيلم
> بلقطوهم ليك نفر نفر
> تلقى الحصان انقلب
> وصاحبك نطط عيوينو ووقع
> الكاو بوي بعد مرات بتم الواحد من اتباعو ديل لو انضرب
> يرجع ليهو ويشوتو ليك طلقة
> رصاصة الرحمة
> ببيعهم ليك طوالي في لحظة
> ما عندو وكت يعالج زول
> ولا بصبر على تابع من ديل لمن روحو تطلع ويدفنو
> يختها ليهو رصاصة رحمة
> ويقول ليهو
> مايك آي نفر فورقت يو
> وكربتك كربتك كربتك
> يجري بالحصان ورابط حصان مايك من قدومو في سرجو بي ورا وفاتح
> تعرف يا روشا
> السينما رجعت تاني
> وفيلم الكاو بوي رجع تاني
> لما شفت كردنة خاتي الكسكتة وواقف وسط الجماعة
> قلت امك
> الكاو بوي لملم الجماعة
> وقلت في سري يا ربي اول واحد حاياخد رصاصة الرحمة منو فيهم؟؟؟
> منو مايك يا روشا ؟؟؟؟
> وكربتك كربتك كربتك
> ايها الناس
> دايماً الكاو بويات بتاعين فوضى زي دي
> لكن في اي فيلم
> في واحد بتاع قانون
> اسمو الشريف
> الشريف ده بتعرفو من النجمة الخاتيها في جيبو كبيييييييييرة
> البميز الشريف عن كاو بويات الفوضى النجمة الظاهرة على صدره
> من زمان النجمة هي رمز القانون
> المهم
> آخر الفيلم الشريف بختها ليك للكاو بوي
> وبقفل ليهو الكلبشات في ايدينو الاتنين
> وبجي مركبو ليك في الحصان
> ورابط الحصان في السرج بي ورا
> وموسيقي تصويرية اثناء سيرهم عبر الوديان في الخلا وبين الجبال
> دخلتهم الحلة
> الحلة كلها تمرق تتفرج
> بالله ده الكاوبوي الكان فالقنا في راسنا
> في الآخر القانون أخد مجراهو وجابوهو مكلبش؟؟؟
> والناس تحتفل
> الليل ده كلو خواجات الحلة ما يخلو ليك غنية
> وبنات حلة الخواجات يجوك لابسات فساتين زمان ديك
> الفستان جاري بالواطة
> ومسرحات تسريحة بنات علب الحلاوة الزمان ديك
> والفستان منفوش زي البرشوت
> الواحدة لما تجي تقعد
> لو ما ثبتتوا يتنفخ تقول منطاد
> والحفلة مدورة
> في خيمة المناسبات
> خيمة المناسبات الزمان بتاعة الخواجات الزمان
> بابها ضلفتين وقصاااار
> تدفرو يفتح على اي اتجاه
> مرات الضلفتين يفتحن لي جوه
> ولو الدفرة شديدة واحدة تفتح لي جوه
> وواحدة تفتح لي برة
> ولو الدفرة دفرة صبي
> يفتحن مرة جوة ويفتحن مرة برة
> يتلولحن
> والناس تصن
> يدخل ليك كاو بوي تاني
> غريب من البلد
> يقعد في الكرسي الطويل الزي سرج العجلة داك
> ويقول لي بتاع خيمة المناسبات
> طبعاً بالانجليزي
> كب لي شربوت
> في الترجمة بكتبوها نبيذ
> لكن الصاح شربوت
> زمان طبعاً عمك قوقل ما ظهر
> عشان كده الترجمة مرات بتكون ما دقيقة
> يكب ليهو الشربوت
> لما يطلع يلقى الجماعة طفشوا بالحصان
> في حلة الخواجات زمان
> في حرامية لو ما قفلت حصانك كويس وجريت فرملة اليد
> بكسحوا بيهو طوالي
> طبعاً مافي حصان عندو رقم شاسيه
> ولا في حصان عندو لوحات
> تاني يوم تشوف حصانك قدام عينك ما تقدر تقول ده حصاني
> الحصان ذاتو ببيعك وينكر عرفتك لو رشوهو بي حبة زبيب
> ينساك وينسى النساك ذاتو
> لكن الشريف قاعد
> بجيب الحصان للكاوبوي ابو شربوت
> القانون يجب أن يطبق على الجميع حتي الغرباء
> ايها الناس
> قالوا اول امس مسرحية المهرج انتهت
> مسرحية المهرج بتاعة صقر قريش
> المسرحية بتاعة فرقة الاصدقاء المسرحية
> قام بدور المهرج محمد نعيم سعد
> وقام موسى الامير بدور صقر قريش
> أما عبدالمنعم عثمان
> فكان الفنان الذي غنى في الاحتفال بصقر قريش
> واكتر كوبليهات الاغنية أعجب بها الجمهور كان
> سيفك بره انحنا طرنا آها آها آهاااااااا
> سيفك بره انحنا طرنا وبي وراك ارح حررنا
> وكانت نهاية المسرحية ان بيع صقر قريش للاندلس
> وما خلوا ليهو شيء
> العراقي والسروال والقطرة والعقال والسيف والمركوب
> سفروه على حسب تعبيرهم في المسرحية بي صقر قريش ساي
> وكان على المهرج محمد نعيم أن يرتدي عباءة صقر قريش ليمثل على الناس
> لكن انكشفت التمثيلية
> ايها الناس
> قالوا اول امس مسرحية المهرج انتهت
> قلت ليهم يا دوبك اول امس مسرحية المهرج ابتدت
> ايها الناس
> العنتريات والاضرابات والانسحابات
> ليست من القانون في شيء
> ومن يريد ان يسقط الاتحاد (وانا منهم ) عليه ان يتبع الطرق القانونية التي تسقط الاتحاد
> عليه ان يقنع الجمعية العمومية لسحب الثقة عن هذا الاتحاد
> اما الهضربات والاضرابات فلا تقدم شيئاً
> انها مجرد فوضى
> واستغرب ان من بين المضربين والضالين عن طريق القانون الذي يسقط الاتحاد
> ان من بينهم مولانا جمال ومولانا عماد الطيب
> هل الانسحاب هو اجراء قانوني يا مولانا جمال ويا استاذنا عماد؟؟؟
> في الهند يا روشا
> انسحاب بالكل قانون اجراء كهيه؟؟؟؟
> ايها الناس
> انقضى عهد العصيان المدني الذي يسقط الحكومات
> دروب إسقاط الحكومات اختلفت شديد
> تعمل عصيان مدني
> يرفدوك زي الماحصل شيء
> وغيرك يركب في الوظيفة المستنيها ليهو سنين
> العطالة والبطالة راقدة بالكوم
> ايها الناس
> اذا الاتحادات بتسقط بالفوضى دي
> من بكرة نمرق الكرفتة ونلبس الكسكتة ونركب الحصان
> وكربتك كربتك كربتك
> نبرطع في الفوضى دي
> ايها الناس
> «إن تنصروا الله ينصركم»
> آها
> نجي لي شمارات والي الخرتوم
> كان شفت يا والينا
> لسه في تخلف فينا
> عيننا للصاح وندفن منو ريسينا
> ونعمل فيها بتاعين قانون وعدالة يا والينا
> وممكن في لحظة في سبيل مصالحنا نبيع من يوالينا
سلك كهربا
ننساك كيف والكلب لما يشوف فيلم كاوبوي بضحك علينا.. وكربتك كربتك كربتك
والي لقاء