((())) ابقوا علي الكوكي يا جماعه :

ابقوا علي الكوكي لموسم آخر

فالرجل عمل مع الفريق وفق الامكانيات المتوفره

اجتهد كثيرا واحرز نتائج مرضيه مع الفريق

ولم يهزم فريقه خارج الارض الا مرة واحده

الكوكي فرض عليه مجلس الادارة لاعبين متواضعين ( مواسير )

لذا كان هجوم الهلال عقيما بدرجة انه كان يحرز في كل مباراة هدف واحد ( بيضة ديك )

الهلال اخوتي لم يكن مكتملا ولو كان كذلك لمضي بعيدا في هذه الكاس

الكوكي كان يعاني كثيرا من هجوم الهلال

فعندما بدأ وجد امامه جوليام وكيبي وكاريكا وبشه ومحمد عبد الرحمن وصلاح الجزولي ولا احد سواهم

ولم يواصل معه سوي كاريكا وبشه وكيبي

كم سيبدع هذا المدرب ان وجد هجوما ناريا يحدث الفارق

كاريكا رغم روعته لم يكن مؤثرا في هذه البطوله

كيبي كان عبئا ثقيلا في هجوم الهلال

جوليام كان مقلبا حقيقا لفرقة الهلال

اندرزينهو يجتهد كثيرا لكن سنه لا يسعفه علي الابداع

بشه حتي الان لم يوظف في خانته الحقيقيه

محمد عبد الرحمن ظل اسير الاصابات وتأثيراتها

نزار يوم فوق ويوم تحت

وسط الهلال لا غبار عليه

دفاع الهلال عيبه اتير توماس وكانوتيه التعبان

حراسة الهلال هي الحسنه الوحيدة في الفريق


((())) حمامه وخاتم وبودي قاردات وساماتا :

ومن بدايات بطوله افريقيا كنت علي يقين ان الهلال لن يفوز بكأس افريقيا

علي الرغم من ان الامنيات كانت تراودنا بين الفينة والاخري

واننا قد نجمع ما بين الجوهرة والاميره ولكن

وكانت قناعاتنا قد اكتملت تماما بعد مشاهداتنا الكثيره لهجوم الهلال العقيم والذي كان يسل روحنا في مباريات كثيره

و بيضة ديك في كل مباراة تكسر الخاطر

وبعكس المريخ فقد كنا نري فيه انه فريق قوي وانه ربما يتقدم في البطولة

وكنا كلما نقرأ ما يسطره اعلامه السالب نظن ان المريخ سيكسر الدنيا

وانه سيفوز بالاميره السمراء بكل سهوله

وان فوزه علي عزام والترجي وسطيف والعلمه والاتحاد كان عنوانا لتلك الحسابات الخاطئه

لان الكثير من مباريات المريخ كانت استعانه بصديق

وضربات جزاء مجانيه وعلي قفي من يشيل

لذا كانت صدمة خروج المريخ قوية علي جماهيره

وبعكس صدمة خروج الهلال فقد كانت بردا وسلاما لجماهيره وقد تعود الخروج من المربع الذهبي مرارا

بدرجة ان بعض اصدقائنا المريخاب قالوا لنا انهم وحتي اليوم مازالوا مصابون باحباطات قويه

وان اعلامهم قد خدعهم بدرجة كبيره

وانهم لن يقرأوا لهذا الاعلام الكاذب

لقد اوهمونا بخاتم غارزيتو المدفون في باحة الفندق والذي وجده المدرب العجوز وعمل منه قصة كبيره

وخدعونا بالحمامه التي ربطوا عليها شعار المريخ واطلقوها لتقف فوق مرمي كديابا لتتسبب في فوز المريخ علي مازيمبي في امدرمان

وخدعونا بتصريحات غارزيتو التي قال فيها انه من صنع فريق مازيمبي وانه قادر علي الحاق الهزيمة به داخل ارضه ووسط جماهيره

وخدعونا بالطائرة الخاصه

وخدعونا باليودي قاردات

وخدعونا بهدف شيبون

والله لا كسبك يا كاتومبي وضحكاتك السخيفه - اكيد بدولاراتك قد لعبت برأس العجوز فكانت الهزيمة القاسيه

واكيد العجوز قد باع . باع . باع باع . باع .. باع

وممكن يرجع الكنغو قريبا


((())) الهلال ونتائجه خارج الارض :

من محاسن مشاركات الهلال في بطولات افريقيا انه قد تخلص نهائيا من عقدة المباريات خارج الارض فالهلال لم يخسر الا مباراة واحده

ورغم خروج الهلال من المربع الذهبي الافريقي الا انه حافظ بامتياز علي نتائجه الايجابيه خارج اﻻرض ولعل آخرها خروجه من البطوله بالتعادل السلبى مع اتحاد العاصمه حيث لعب الهلال 7 مباريات خارج ارضه هذا الموسم وخسر مره واحده بهدف امام كى ام كى الزنزبارى فى اياب الدور التمهيدى ومن ثم تعادل بهدف لكل من الرصاصات الملاوي وفاز على سانغا بهدف مساوى فى ذهاب دورى ال سته عشر ومن ثم تعادل سلبيا مع مازيمبى فى لوممابشى فى الجوله لمرحلة المجموعتين ومن ثم تعادل مع التطوانى بهدف لكل فى الجوله الثالثه من ذات المرحله وتعادل بزات النتيجة مع سموحه فى الجوله السادسه وهو الفريق الوحيد الذى لم يخسر خارج ارضه فى مرحلة المجموعتين ليختتم مشواره الناجح خارج ارضه امام اتحاد العاصمه


((())) الهلال ونتائجه داخل الارض :

وان كان الهلال قد فاز كثيرا داخل الارض الا انه خسر مباريتين مهمتين امام التطواني المغربي واتحاد العاصمه الجزائري

وهذه مصيبه يجب ان يتنبه لها الخبراء لكي يجتثوا مسببات خسارة الهلال علي ارضه وامام جماهيره وفي المقبره التي ظلت عصية علي ابطال افريقيا

اليس غريبا ان يكسر الهلال القاعدة وقد هزم الاهلي القاهري والزمالك ومازيمبي ونساروا وغيرهم لقد سقط كل هؤلاء الابطال في المقبره وانتصرت فرق مغموره لا تاريخ لها في السجل الافريقي فالتطواني اسقط الهلال في المقبره ويا للهول واتحاد العاصمه المغمور اسقط الهلال في المقبره ولا حول ولا قوة الا بالله

فما هو السبب يا تري


((())) الطرب بالتلاتة ،،، في علقة سماتا

منقول :

.............

أحمد بشرى :

يا مريخ جمال ،،، قالوا الظروف ،،، جبارة

شوف عيني المحن ، جاتك عدييييل ،، تتجارى

يوم داكا العصير ،،، الكنغو ،،، بقت نارا

جابت مطرة ،، خلت ،،، ناس فلانة ،،،حيارى

*******

أحمد مجذوب :

يا مريخ جمال ،، الكورة فوز وخسارة

لكن نجمتك بالحيل ......كتر ، بوبارا

مازيمبي العنيد شن الهجوم والغارة

والنجمة القوية ،،،، اتجندلت منهارة

*******

سوهندا عبد الوهاب :

يوم داك العصيير ،، شفت النجوم تتوارى

ساكيها الغراب في الكنغو ساي تتجارى

الخلاني بي هادي الحروف ،، اتبارى

برلومنا الوصيف ،،، اللينا قلد ، وبارى

********

أحمد بشرى :

احسن تمشي، سيكافا ،،،، الحمام ،، مجاااااني

تضرب من طرف ،،، مااا بقولو ،، كاني وماني

في دوري الكبار ،،، صدقني ياااااما ، تعاني

غايتو نصيحتي ليك :،، ( اوووعك تشارك تاني )

*********

أحمد مجذوب :

قالوا عليهو عالمي ،، نافس الالماني

سموهو الزعيم ،،،، لكن زعيم تايواني

وقفت في التلاتة ،،،، بعد دخول التاني

وما اتكرر شريط ،،، المغربي التطواني

*********

سوهندا عبد الوهاب :

عالمي ياولد ،،،، خبرك سمح ،، سراني

خلاني انتعش ،، وأنضم حروفي اغاني

ساماتا الحريف ،، صنفتو اكبر جاني

شان كتل الوصيف ، حطم معاهو اماني

********

أحمد بشرى :

دحين ما تغشوا ناسكم ،،،وبطلو ،،، التطبيل

مريخكم ملجن ،،، كورتو حبة ،، عديييل

لا نص،،، لا دفاع ،،، لا خطة ،،، لا تشكيل

اخير الرابطة منننك وناس،،، جزيرة الفيل

*********

أحمد مجذوب :

شفناها الدموع ،،،، الزي مياه النيل

كترتو الشماته ،، معاها حق بتسيل

اعقلو يا جماعة ،،، وبطلو التهويل

وود البشري اخوي قال بطلو التطبيل

*******

سوهندا عبدالوهاب :

يوم طار الهلال ،،، شفنا الفرح ،،، تهليل

شفنا شماتة ظاهره ،، ومابتدور تعليل

مفروض بدري يا ناااااس ، تجدعو المنديل

وتنسوهو النفخ ،،، ،وتبطلو ، التضليل

********

أحمد بشرى :

ارفعو شكوى في (الحكم ) ،،،، البقولوا ، نساكم

و ارفعو شكوى شان ، ( العلمة ) ماااا ،،، لاقاكم

ارفعو غايتو سااااااكت ،،،، اصلو ،،، ما ،، هماكم

ارفعو شكوى في (ودبشرى ) ،،،، ذاااااتو معاكم

********

أحمد مجذوب :

ما بتقتنعو ليه ؟؟؟؟ لمن تطيرو براكم

ضليتو الطريق ،، بعد الغراب ،، دلاكم

الفات عاااادي ، لكن غايتو شوفو الجاكم

يوم تصلو البلد ،،، أزرقنا ،،، بستناكم

********

سوهندا عبد الوهاب :

ارفعو شكوى في (ساماتا ) شان دقاكم

وارفعو شكوى ،،، في (ودسالم ) الببكاكم

ارفعو شكوى في (الحظ القبيل ) وداكم

ارفعو شكوى في (البودقارد) ونحن معاكم



صح لسانكم


محمد حسن شوربجي