كل عام والجميع بألف خير خاصة قراء رحيق الختام الأوفياء الذين حبسنا منهم حابس الفيل والعيد والمعايدة في أرض الوطن الحبيب وعشان تدخل إنترنيت في حد ذاتها مشكلة مع رداءة الشبكة دع عندك أن تجهز مقال لقراء أوفياء أذكياء تعلمنا منهم الكثير ... إحتضنت بقعة المهدى فرق مربع الذهب للأبطال مجتمعة حيث إستضاف المريخ مازيمبى وفاز عليه بثنائية مقابل هدف أحرز ثنائية المريخ كوفى وبكرى ونقض الحكم الكاميرونى هدفاً للمريخ بحجة التسلل ... بينما خسر الهلال من ضيفه إتحاد العاصمة الجزائرى بثنائية مقابل هدف أحرز هدف الهلال مدثر كاريكا وفى الدقيقة العاشرة أضاف نزار الهدف الثانى للهلال ولكن حكم الجلاكسى جانى سيكوزى نقضه بحجة التسلل وبعد دقيقة أحرز عودية هدف التعادل للضيوف ، وإنتهى الشوط الأول بهذه النتيجة وفى الدقيقة 62 توغل بشة في منطقة جزاء السوسطارة ولم يكن أمام المهاجم عودية الذى رجع لمساندة الدفاع إلا أن يعرقل بشة وإحتسب الحكم ضربة جزاء للهلال تصدى لها الإخصائى أندرزينهو وتمكن الحارس زيماموش من صدها ...وهنا لابد لنا من وقفة !! عندما أضاع نزار ضربة جزاء أمام التطوانى قلنا لو تصدى لها أندرزينهو لأحرز منها هدف !! ونسينا أن ( لو ) تفتح عمل الشيطان ...وشاءت إرادة الله أن يتصدى البرازيلى لضربة جزاء ويهدرها !! والخير فيما إختاره الله وقدر الله وماشاء الله فعل وخسر الهلال بهدفين لهدف وضعفت آماله في الصعود لنهائى الكأس ولكنها لم تنعدم ، وعودنا هلال العشق الجميل أن يسمو فوق الجراح ويرد الإعتبار وقد فعلها من قبل أمام مازيمبى عام 2009 بعدما خسر بأستاده بخماسية مقابل هدفين وفاز بطل السودان في الكنغو بثنائية نظيفة ، ويمكن للهلال أن يتأهل لو فاز بثنائية نظيفة أو بفارق هدف إذا كانت نتيجة الفوز بأكثر من هدفين ، وماذلك على الله بعزيز ...ولقد رأينا تفاؤل أحباب الهلال وحسن ظنهم بربهم في أن يعود الأقمار بالفوز من خارج الديار ... أعجبنى علو همة الهلالاب رغم ألم الخسارة التى تعرض لها فريقهم بفارق هدف وحيد فقد كتب أحد الأحباب في منتدى كوورة سودانية مسادير شعر جميلة تقول *** عشق الهلال جد فيهو سر ... وعاشق الهلال مابنكسر ...ليكم يقولها وماها سر ... مهزوم نريدو أكتر ومنتصر *** بيت الهلال يضمنا ...واقفين وراه يؤمنا ... لو فاز سعادة تعمنا ...ومهزوم نجدد ليه المنى ...زارنى في البيت في الصباح الباكر شاعر بادية المتمة سعيد ود الأخدر الهلالابى الغيور وخاطبنى برحابة صدر الشعراء وهو يضحك ويقول ( الجماعة أمبارح غلبونا إتنين واحد !! رأيك شنو !! فأجبته بمسدار صديقه شاعر بادية المتمة عثمان حوبة *** هلال الملايين من ضمن الكبار ترتيبو ...ليلة البارح الفوز ما إنكتب في نصيبو ...تخسر ولا تربح حبك إحنا مابنسيبو ...معروف كل فارس ليهو سهماً يصيبو ... فقال الشاعر ود الأخدر في الحال ( جيب قلمك وأكتب ) *** هلال الملايين ضمن الكبار عنوانو ... ليلة البارح الفوز ما إنكتب في شانو ...قبل اليوم هزمنا مازيمبى في ميدانو ...شدر الصندل يعطر الفأس القطع عيدانو...هؤلاء هم أبناء الهلال تفاؤل وجمال ...مش ملاحظين أبطال المجموعة الحديدية كلهم خسروا بهدفين هدف !! بالمناسبة قد تسبق العرجاء أحياناً !! لذا لزم التنويه .
*** صحافة الجزائر تنصف هلال الضمائر
عندما خسر الهلال من التطوانى في المجموعات بهدف كتبت منتديات كوورة جزائرية إن خسارة بطل السودان بأرضه دليل براءة على نزاهته وعدم إستمالته للحكام والآن بعد أن خسر الهلال من السوسطارة بهدفين لهدف كتبت كوورة جزائرية إن الإتحاد خطى خطوة نحو التأهل لنهائى الكأس ولكنه لم يضمن التأهل لأن بطل السودان يمكن أن يقلب الطاولة وقد سبق للإتحاد أن شرب من نفس الكأس عندما فاز على الوداد بالمغرب وخسر من الوداد بالجزائر ...وقال مدرب الإتحاد ميلود حمدى ...قدم الهلال السودانى مباراة قوية وكان أفضل منا في كثير من الأحيان وتحدثت صحيفة الهداف الجزائرية قائلة ...إن الحظ إبتسم للإتحاد وذلك عندما صد الحارس زيماموش كرة كيبى التى حولها إلى ركنية في الدقيقة 89 كما صد من قبلها كرة الشغيل وأندرزينهو وكرة مدثر الطيب كما مرت رأسية مساوى جوار القائم بسنتمترات ...ومباراة الرد بالجزائر يوم السبت 3 أكتوبر ويديرها الحكم الجنوب أفريقى فيكتور قوميز ويلعب المريخ يوم الأحد 4 أكتوبر في لوممباشى ويدير المباراة حكم الجابون إيريك كاستان ( الله يكفينا شر كاستان والغربان ) يا الأقرع وأبوحسن باقى ليكم المريخ بجيب عمار من لوممباشى ( واللا أم الحسين إنفخت ) طبعاً الصفوة فرحانة لكن هدف وحيد في لوممباشى في شباك جيمى يخلى الهلالاب يرددوا عبارة ( المرحوم كان طيب !! وتحت تحت يقولوا المرحوم كان نيتو سوداء ) ...ونطلب الدعوة الكاربة لهلال الساجدين والناس الصالحين من الأحباب في الداخل والخارج خاصة هلالاب مكة والمدينة أنا عندى إحساس غايتو فرقنا دى واحد فيهم بفوز بهدفين والتانى بخسر بهدفين وصاحب العقل يميز وبراكم أحكموا شوفوا لوممباشى دى غير الهلال في فريق جاب في طيارتو هدفين !! لكن الجزائر المريخ جاب منها 3 أهداف من حمام العلمة ( أستغفر الله ) مولودية العلمة .
*** قهوة الفضل ووليد والحماس الشديد
كنت في شوق لمشاهدة المباريات في متمة الأشراف وزينة البلدان لأن إنسان المتمة بطبعه يعشق التحدى وجلسنا في قهوة الفضل ووليد أبناء الخال الراحل ( محمد حامد زند ) وذلك لمشاهدة مباراة المريخ ومازيمبى وأصحاب القهوة مريخاب على السكين ومعهم بعض المريخاب على رأسهم إبن العم عثمان عمر الجعلى أما أغلبية الرواد طبعاً تبع هلال الأغلبية وعندما أحرز مازيمبى هدف التعادل صفق بعض الهلالاب وعلى رأسهم أبنائى ( عثمان وحذيفة ) المنحازين للهلال بدرجة إمتياز مما جعل إبن العم عثمان عمر يصيح في وجههم قائلاً ( أطمنوا مابناخد خمسة زيكم ) وبعد نهاية المباراة رقص الفضل للهلالاب رقصة كديابا ...وحضرت مباراة الهلال والإتحاد في نادى النيل بالمتمة ووجدت الحضور بنفس الكثافة وكانت الشماتة هذه المرة من نصيب المريخاب الذين شجع بعضهم السوسطارة بحرارة ورغم الحشود وكثرة الوفود إلا أن الإحترام كان سيد المقام والمناكفات بريئة وبعد نهاية المباراة إحتفل بعض المريخاب بالألعاب النارية وحكى لى بعضهم أن الدائرة لو كانت على المريخ لرأيت العجب العجاب من الهلالاب وهذه هى المتمة وسماحتها في صراحتها ...وبنفس السماحة والصراحة إحتضنت مؤتمر تطوير المتمة الذى ناقش أربع ورقات ... الخدمات العامة والتعليم والصحة والرياضة وشرفه بالحضور معتمد المتمة عثمان يعقوب ونائب الدائرة التوم أبوحوة ووزير الشباب والرياضة الولائى الفكى الطيب ورئيس إتحاد الكرة بشندى محمد خالد حسن حسين ولفيف من أبناء المتمة بالداخل والخارج وزين المؤتمر بالحضور زملاء الدراسة بمدرسة المتمة المتوسطة الشعبية ( بدون ألقاب وترتيب ) مصطفى محمد أحمد وحسن كباشى وحسن عكور وأحمد إبراهيم ود اللواء وتاج السر محمد صالح وعبد الرحيم عوض وعصام عيسى وعلى بشير أرتولى وهذا الثنائى الأخير ( مريخابى لا يخلو من خبث ) حيث سأل على بشير صديق الطفولة عصام عيسى ( أها صاحبك الجعلى كتب شنو بعد هزيمة الهلال !! ) فأجابه صديق الطفولة ( يكتب يقول شنو !! ) شايفين الصفوة ديل كل التقول عليه موسى يطلع فرعون .
***همسة الوداع
حبايبنا الحلوين ماصدقوا يفوزوا على مازيمبى بهدفين لهدف خاصة بعد خسارة الهلال من السوسطارة مع العلم أن الإتحاد العاصمى لعب مع الهلال بكامل نجومه ولعب مع المريخ بالصف التانى ومازيمبى ده إحنا غلبناه بثنائية في الكنغو وكان الموضوع عادى ووصلنا نهائى الأبطال مرتين عامى 1987 و1992 وكان الموضوع أكتر من عادى ...والجيران لما لعبوا مع الترجى في تونس إستعانوا بأنطون كان منسدح وراء الكراسى وخارج الشبكة... ونحن فوزنا خدمة يمين وعرق جبين ...إنتوا في مباراة المريخ ومازيمبى مش كانت في ( حمامة راكة في العراضة ) فيكم زول لاحظ ذلك !! ولا نكلم كتاحة ينزل ليكم صورة الحمامة عشان يكون البيان بالعمل !! وبهذه المناسبة نهمس في أذن الإعلام الأحمر نحن جيران لمريخ الكجور هل ممكن تدونا هدية بدل الحمامة حتى لو زرزور ؟ مجرد سؤال .
تحيه قلبيه بى شوقى مرويه
وسلام من الاعماق واشواق هلاليه
كل عام وانتم بخير وعيدكم مبارك
تنقلت بين الحروف والكلمات الراقيه وذاد العشق للهلال
نحن نعشق الهلال فائزا كان او مهزوما...وماقدمه الاعبون من عرض وسيطره ميدانيه
يجعلنا نقول ...اليوم ما كان يومك ياهلال...معليش خسرنا جوله ونسال الله العلى القدير ان ينتصر الهلال بالجزائر ويعود الينا غانما باذن الله تعالى
اكثروا من الدعوات احبائى الهلالاب والباقى على الله..
ولك الشكر الجزيل
عثمان وحزيفة وباقي الاسرة الكريمة وجميع الاهل في المتمة وجميع الاخوان هناك اما عن
مبارة الهلال والاتحاد الجزائري لقد حزن القلب علي النتيجة ولكن الحظ لم يحالف الهلال
كما كانت هناك اخطاء من المدرب ومن اللاعبين دون المستوي المطلوب بزات قي هذه المرحلة الاخيرة من النهائي ولكن فدر الله ذلك **** اما بخصوص اهل الصفوة اليشوف الفرحا
علي الفوز علي مازمبي يقول خلاص الجماعة خشو النهائي هههههههه لسه ياناس المريخ انتو جداد علي المراحل المتقدمة دي ما تتخلعوا ساي
وكانت فرصة عظيمة انزل ليك صورة الحمامة لكن للاسف وبعتذر انا بعيد من الاجهزة وطلبك حرقني شديد وكان نفسي انفذ ليك طلبك لكن ما باليد حيلة وغالى والطلب رخيص يا ابا عثمان
وبالمناسبة خلف الله بله عذبني عذاب قبورة شمتان علينا فى الواتس اب ما خلى ليه رسالة ماشمت علينا فيها وانا قلت ليه :
ايها الناس
اطلعوا منه خلوها تعمر وخليكم مع لوممباشي بتاعتكم والشماتة ما كويسة عشان نحن عارفين مازمبي بلحقكم امات طه ولا يلحقكم التطواني وطبعا هم مصدقين غارزيتو الضاحك عليهم ونحن ما بنشمت لكن المرة دى بنعملها
التحية لاهلي الحنان فى المتمة والنصر للهلال بحول الله ولا نامت اعين الشامتين والمتربصين واقعدوا عافية