الهلال عندما يبدع يمتع وعندما يلعب يكسب ولقد قلنا من قبل أن الهلال لا يجيد اللعب فى التمهيدى عشان التمهيدى مابشبهنا ومواد الروضة الهلالاب نسوها زماااان لكن إن كان التمهيدى مجرد كبرى للوصول لدورى الكبار فمرحباً به وهذا مافعله مارد السودان الأزرق الذى تخطى بطل جزيرة القرنقل ...حرس سواحل زنجبار ...بأقل مجهود فى التمهيدى ...بمناسبة القرنقل عن إذنكم نظبط الرأس بى كباية شاى بالهبهان والقرنقل ( الرأس يسوى أوووووو ) قريفة شديدة ...إيه رأيكم نطلع فاصل ونواصل ... أنا يخيل لى حمدان شاعر حاج محمد ( ناظر عموم الجعليين ) كان هلالابى أو إحتمال الناظر ذاتو يكون هلالابى عشان حمدان قال شعر فى مدح الناظر حاج محمد لكن الشعر ( حكمة الله ) مفصل تفصيل على الهلال ونقول ليكم مسدارين بس وإنتوا ليكم الحكم ...يقول الشاعر حمدان *** سمعت بك شكروك لى وعجبتنى شكرتك *** صمد الصافنات الصف تهدو نترتك *** الشنب المبرم شوفتو ليك إتفرتك *** وا أسفى الشديد من بدرى ماعاشرتك ...*** كفات بالشمال أسد الكدادة القارح *** الحجّر غابتو من البفر والسارح *** من نظرتك الفارس يحيض والدّارة تصبح طارح *** قمر السبعتين ماهو الهلّ ود البارح ... بالله ياشباب الزول لما يسمع المسادير الجميلة دى مش طوالى يذهب الخيال لهلال السودان الذى هزم رصاصات ملاوى برباعية نظيفة بمقبرة الخصوم فى دورى 32 لأبطال أفريقيا ...والغريبة مدرب الرصاصات رمضان ناصر قال حضرت للخرطوم للتأهل على حساب الهلال وإذا الهلال نال التعادل يكون كسبان ...طبعاً الهلالاب فيهم غتاتة قاموا سلموا جوازات الرصاصات للمهاجم الخلوق مدثر كاريكا وقالوا ليه ( فارات ملاوى الداقسة دى ) أعمل ليها خروج نهائى من الأبطال وبالفعل فى الدقيقة 8 أحرز كاريكا الهدف الأول وفى الدقيقة 12 أحرز كيبى الهدف التانى ...والفرق بين الهدفين 4 دقائق فقط ...والأرقام 4 و8 فيها سر عجيب !! ماينط واحد يقول لى دى أرقام فنائل سيدى وبشة !! لا المقصود حاجة تانية إحنا بعد الشوط الأول إنتهى بثنائية نظيفة قام كاريكا فى الدقيقة 48 أضاف الهدف الثالث وختم نزار فى الدقيقة 84 بالهدف الرابع ...مع العلم أن الحكم نقض لنا ربع دستة من الأهداف وأطهر لعب كرة صدها القائم ...الحمد لله ماكانت النتيجة سباعية الوحدات كان لطشونا عين حمراء وشرارة ...يعنى أخوان مساوى دمروا رصاصات ملاوى ،ونقول ليهم نشوفكم السنة الجاية ...رباعية الهلال مافيها ضربة جزاء كلها أهداف خدمة يمين وعرق جبين !! إنه هلال الساجدين والناس الصالحين ...طبعاً ناس المريخ لما فازوا على كابو الأنجولى بثنائية والحكم الليبى أداهم ضربة جزاء وضيعوها عملوا لينا صداع !! الناس ديل من زمان مامشوا خطوة فى دورى 32 للكبار وكما يقول مثلنا السودانى ( الماشاف البحر تخلعوا الترعة !! ) بالمناسبة ثنائية الجيران إحنا جبناها فى أقل من ربع ساعة !! لذا لزم التنويه .
*** لى حبيبنا التهانى مستمرة
لو قلت ليكم فى هلالابى نام مامبسوط ماتصدقونى ...كل الهلالاب لسان حالهم يردد أغنية *** قضينا ليلة ساهرة ...تضمنت محاسن ...من كل روضة عينة ...ومن كل عينة زهرة *** قضينا ليلة ساهرة ...تتوجت قياصر ...تلألأت كواكب من أطيب العناصر ...ولقد وصلتنى الكثير من برقيات التهانى من أحباب الهلال فمن هلالاب جدة كان الظريف فيصل الأقرع الذى سأل... ياربى هسه النقاط الكاملة والأهداف الأربعة دى نودعها فى أى بنك !! ونقول للأخ فيصل نودعها فى بنك أفريقيا الدولى ...أما أحمد قاسم من هلالاب خيبر فقال ...الليلة ننوم مبسوطين 24 قيراط ومزاجنا رايق ...أما يوسف عمر أبوضحى كان يردد ( الله أكبر ...الله أكبر ) عند هدف نزار الرابع وقال الحمد لله شباكنا بيضاء وهذه نتيجة مريحة ...أما جلال صالح من هلالاب المدينة قال الحمد لله كاريكا عاد لمستواه وبإذن الله تأهلنا من أم درمان لأن الهلال لن يخسر خارج أرضه بخماسية نظيفة ...وإبراهيم بين من هلالاب الرياض يقول الحمد لله على رباعية البرعى الكتب الأربعة والأهداف الأربعة ونهدى هذا الفوز لرئيس الهلال أشرف الكاردينال ...وهذه الرسالة من أرض الوطن الحبيب وبالتحديد من إبن الأخت الشاب محجوب على أب جكون من هلالاب ( قوز جبة ) بمحافظة المتمة فهو يتنفس أوكسجين حب الهلال ...أرسل رسالة تقول ...الخال العزيز مبروك النتيجة والأداء الهلال رفع رأسنا وشرّف السودان وربنا يديم الأفراح للأقمار ... الهلال الجمال والجمال هيلنا والهلال فى المطار هيبة زى نيلنا ...ومصطفى سمير من هلالاب المدينة إتصل قبل المباراة وهو واثق من فوز الهلال ويدعو الله فى طيبة الطيبة بالنصر المبين لهلال الملايين ...ونعتذر لمن لم نتمكن من نشر رسائلهم ...عارفنكم كلكم مبسوطين العجب ناس كتاحة وسيف الدين خواجة وأحمد الفكى وكل الهلالاب داخل الوطن وخارجه .
*** رئيس لجنة الحكام والموقف التمام
عندما داس إتحاد أبناء العمومة الأحمر على كل الأعراف والقوانين كان هناك رجل مؤمن يكتم إيمانه بأهلية وديمقراطية الحركة الرياضية هو الأستاذ صلاح أحمد محمد صالح رئيس لجنة الحكام وكان الرجل يحاول أن يتعامل بإحترافية وأمانة فى وسط نسى هذه القيم وعندما طفح الكيل وفاض السيل تقدم الأستاذ صلاح بإستقالته من رئاسة الحكام بالإتحاد ليقول لنا أن الدنيا مازالت بخير وأن حواء السودان ودود ولود ...فالتحية للأستاذ صلاح أحمد محمد صالح الذى رفض فوضى الإتحاد الأحمر الذى عجز أن يعاقب لاعب المريخ المتهور بكرى المدينة الذى تعدى على الحكم بيده وتجنى على أم الحكم بلسانه ...وليت ضمير معتصم ومجدى وأسامة يستيقظ من ثباته العميق فهل ياترى تحرك إستقالة هذا البطل هؤلاء القوم النيام أم أنهم رضوا بأن يكونوا مع الخوالف ...الغريبة الإتحاد الكسيح أوقف بكرى المدينة 6 مباريات دورية فى الدورى السودانى مع العلم أن المريخ باقى له 7 مباريات فى الدورى ومباراة الختام السابعة مع الهلال ...شايفين التفصيل ده كيف !! عشان المريخاب مايزعلوا بكرى سوف يلعب ليكم مباراة الهلال تانى دايرين شنو !! ومجدى قال لو كنا قاصدين المريخ كان وقفنا بكرى سنة !! تخيل يامجدى لو كانت أم الحكم التى نالها الأروش بكرى بالشتيمة أمك أو أم معتصم ماذا يكون رد الفعل ...وكلكم راع وكلكم مسؤول عن رعيته والتحية للبطل صلاح أحمد محمد صالح الذى راقب ربه وضميره وإستعمل آخر الدواء الكى .
*** همسة الوداع
حبايبنا الحلوين خانهم الوقار وخذلتهم الحكمة وهم يدافعون بالباطل عن المتهور بكرى المدينة الذى أساء لحكم مباراة المريخ والأهلى فى شندى ولم نكن نتوقع منهم أن يعاقبوا بكرى لأن المريخ يستخدم سلاح الدلال وحدث ذلك مع الحضرى وتراورى وبكرى ..والغريبة وصلت الجرأة بالمريخ أن يرفض حكام الخرطوم لإدارة مبارياته ومجدى قدم ليهم قائمة لمباراة الأمل والمريخ وطلب منهم أن يختاروا واحد حكم مصلح ومعاه رجل خط فاهم يامعلم ( الشئ شنو !! بوفيه مفتوح !! ) والأغرب من ذلك موقف وزير الرياضة الولائى المختفى عن الأنظار ولم يكن له موقف من هذه الأحداث كأنها لا تعنيه !! وبهذه المناسبة نهمس فى أذن الإعلام الأحمر إنتوا وزير الرياضة الولائى ده بلة يوسف ولا بلة الغائب ؟ مجرد سؤال .