عندما يردد الفنان التاج مكي أغنية الشاعر الرقيق إسحاق الحلنقى ( حبيت عشانك كسلا ) والتى تقول بعض كلماتها *** حبيت عشانك كسلا ...وخليت ديارى عشانا *** وعشقت أرض التاكا ...الشاربة من ريحانا *** ظلم الزمان الخانّى ...ياريتو لو كان خانك *** يا الجرت وإتنكرت لى الساب ديارو عشانك *** كلمنى قوليها فاكر ليالى القاش ...لما الحنين عاودنى فى عطفك الجياش *** جفيت حبيب ماخانك ...من نور بسيمتك عاش *** أنا تانى مابتلقانى يوم فى طريقك ماش .... قاصد مكان فى كسلا *** صوت السواقى الحانى ...ذكرنى ماضى بعيد *** وعلى الرمال آثارك ... طرتنى ليلة العيد ***آلمنى قلبك ينسى يرفس غلاوة الريد *** باقى الطريق بمشيهو ...خلينى فيهو وحيد ...والحب عذاب فى كسلا ...عند هذه الكلمات الجميلة يذهب الخيال مباشرة لهلال العشق الجميل خاصة عبارة ( باقى الطريق بمشيهو ...خلينى فيهو وحيد ) لأن الهلال عندما عاد من زنجبار بعد ظهر الأثنين الماضى بعد رحلة شاقة فى مجاهل أفريقيا وبعد إنتظار فى المطار عشر ساعات بسبب عطل الطائرة طلب من إتحاد أبناء العمومة الأحمر تأجيل مباراته مع الأنيق الكسلاوى لمدة 24 ساعة ولكن الإتحاد الأحمر رفض !! ( هو إتحاد معتصم بلا تعبنا قاعد لى شنو !! ) ولم يكن أمام فرسان الهلال إلا أن يذهبوا للتمرين عصر يوم السفر ، وبعد ظهر الثلاثاء سافروا بالطائرة لكسلا وتمرنوا تمرين المباراة عصر الثلاثاء ولعبوا المباراة يوم الأربعاء ...وكان هدف إتحاد أبناء العمومة سلب المزيد من نقاط الهلال بالهزيمة أوالتعادل !! ولكن ياعناقيد العنب المساكين ليها رب !! ولعب الأقمار أمام أنيق كسلا وكان هدفهم رضاء الأنصار ( بالمناسبة أولادنا حساسين !! ) شلفناهم وأعادوا البسمة للديار الزرقاء وسمحنا لأصحاب الأرض بالهدف الأول فى الدقيقة 27 بواسطة جار النبى وفى الدقيقة 30أحرز سيدى بيه هدف التعادل وإنتهى الشوط الأول بهذه النتيجة وجاء شوط المدربين وإستفاد النقر أخوان من سلبيات الخندقة ولعبوا بالهجوم الكاسح وفى الدقيقة 60 أحرز كيبى هدف الفوز مستفيداً من تمريرة البديل كاريكا الذى دخل بدل فيصل موسى وفى الدقيقة 83 أضاف سيدى بيه هدف الأمان ...ماشاء الله ياهلالاب وعينى باردة ...إنتوا سيدى بيه جبتوه صانع ألعاب ولا هداف !! وكان الأنيق أنيقاً مثل جبل توتيل وهلال العشق الجميل وكان نداً قوياً لهلال الملايين وتألق من صفوفه الحارس محمد كوة ومدافع أهلى شندى النور التيجانى ومهاجم الرابطة كوستى منتصر كوة وأدار المباراة بإقتدار الحكم المميز المعز أحمد ، وبهذه النتيجة إرتفع سيد البلد برصيده إلى 15 نقطة منفرداً بالصدارة ورافعاً شعاره المحبب ...تمتع بالرحلة ودع القيادة لنا ... للهلال 9 أهداف وعليه هدف وحيد ( عشان يكف العين الحمراء وشرارة ) ولعب الهلال 7 مباريات فاز فى 4 وتعادل فى 3 .... والهزيمة الحمد لله إلا نسمع بيها سمع عند الجيران !! وجاء سلاطين الفاشر فى مركز الوصيف برصيد 12 نقطة كسبها من 6 مباريات فاز فى 3 وتعادل فى مثلها وجاء آرسنال دار جعل برصيد 11 نقطة فى مركز وصيف الوصيف كسبها من 7 مباريات فاز فى 3 وتعادل مرتين وخسر مرتين أما ... الزعيم والمريخ العظيم ...فقد تدردق ( أستغفر الله ) تدحرج للمركز الرابع... سوبر هاتريك الوصيف ...برصيد 10 نقاط من 6 مباريات فاز فى 3 وتعادل فى واحدة وخسر مرتين من فرق الولايات مرة برة الدار وجوة !! لذا لزم التنويه .
*** النمور تكشف المستور
قال لى جلال صالح من أبناء دنقلا الحبيبة ومن هلالاب المدينة المنورة إنتوا يا الجعليين فلاحتكم بس مع الهلال وصلاح إدريس سوف يفتح للمريخ ...فقلت له إن الأرباب صلاح من طينة الكبار ويتعامل بشرف الخصومة وإذا لم يتعاون من عشقه الهلال بالتأكيد لن يتهاون من المريخ وكتب الأستاذ معتصم محمود فى عموده الموج الأزرق ( مضيق كسلا وكبرى شندى ) ونقول للأستاذ معتصم إن شندى لا تعرف الكبارى إلا كبرى واحد هو كبرى المشير البشير على النيل الذى يربط شندى بشقيقتها المتمة ...و كان أرابيب دار جعل فى الموعد وقلنا لهم فى الرحيق السابق ( النازلة البحر عدوها بس معقورة ) وبالفعل إستضفنا الجماعة فى فندق الكوثر الجميل على النيل وشندى أم رؤوم ومدينة حنون تجمع كل أطياف المجتمع السودانى فهم أبناء شندى ...وبدأت ملحمة دار جعل ولسوء حظ الجيران كان قائدهم هو أحمد الباشا وناس شندى جنهم وجن الباشا وحتى الفنان على إبراهيم اللحو كان فى أغنية المك نمر يقول *** نمراً مابفز حاشاهو كلا وحاشا *** لمام للهمايل البى العتامير طاشة *** ذو عفة وثبات كرماً معاه بشاشة *** وتشهد دار جعل يوم حريقة الباشا ...فى إشارة لحريق إسماعيل باشا القائد التركى الذى إحتل السودان ورغم عدم تكافوء ميزان القوة وتركيا وقتها كانت من الدول العظمى ، ياجماعة الخير كان سرحت أكتر من كدة الهلالاب ديل بفتحوا فوقى بلاغ !! طبعاً قلنا فوز المريخ على حمام عزام فوز صناعى وخاصة عندما يرتبط بمستحقات باسكال ( كان القديمة ولا الجديدة !! ) لكن ماعلينا خلونا فى شندينا وباصات شندى جات شايلات الشباب كما يردد الفنان الشعبى ( البشيرة ) وإلتقى المريخ مع النمور وإنكشف المستور منذ الدقيقة السادسة عندما أحرز ( إسمو مين ياربى !! يا أخى هناى داك !! ) إحنا باقى فوز الهلال والآرسنال بعمل لينا زهايمر والواحد فينا كان قلت ليه إسمك منو بدل محمد يقول ليك محمود !! وبمناسبة محمود الجاب قون النمور هو عمر محمود عماريه ...والمباراة ( قرطت على كدة ) وفى آخر الدقائق كاد المريخ أن يحرز هدف التعادل بعد أن تخطت الكرة عبد الرحمن الدعيع ولكن حولها سعيد السعودى برأسه للكورنر ... غايتو زمان عندما جبنا نقطة من شندى كنا زعلانين لكن تشوف مصيبة غيرك تهون عليك مصيبتك ...أعجبنى هيثم مصطفى لأول مرة منذ تركه للهلال عندما أعطى عجوز مصر أيمن سعيد دروساً مجانية فى الأخلاق والكورة ...حالتو دى كلاتشى وأديس وحمودة مالاعبين ...الحكم القومى صديق الطريفى أدار المباراة بقوة وحكمة ورغم ذلك أصاب الحجر رأسه مساعده عبد الجبار هدية من الصفوة كعادتها .
*** مناكفات هلالية بعد هدف الشنداوية
طبعاً عندما تعادل الهلال مع أهلى شندى سلقنا الإعلام الأحمر بألسنة حداد والآن جاء الدور لجماهير الهلال لترد الصاع صاعين فقد شاهدنا طرائف فى منتديات الهلال ومسادير جميلة منها ...بنطون شندى عدّ وجابة ياناس الوصافة حبابة ...ود عمارى جاب القون ...خبط النجمة ضرب اللون ....ياناس شندى مالكم ومالو ...أصلو الوصيف إنكشف حالو ...كما تم تحوير وتحريف أغنية التراث ( ضيعنى ساكن الموردة ) والتى تقول ...أنا بى وصافتك بفتخر ...وإنت المهازل سيدا ...مهما أعاين فى الحمام ...وين زى وصافتك أوجدا...ياالوصافتك بى قلوب العاشقين مستفردة ....ماعندى مانع حتى لو نزلت زى الموردة... وغيرها من الأهازيج .ويجب ألا تشغلنا هذه المناكفات البريئة عن الإستعداد لمباراة أهلى مدنى مساء الأ حد 8 مارس بمقبرة الخصوم وبعدها منتصف مارس مباراة الهلال الأفريقية مع رصاصات ملاوى ، والمريخ مباراته القادمة مع الأمل بأم درمان وبعدها يلعب مع كابو الأنجولى بالبقعة أيضاً .
*** همسة الوداع
حبايبنا الحلوين دخلوا الخوف فى عالم الخروف عشان فى مباراة عزام تسعة خرفن وتيس ماكفن والغريبة فى مباراة أهلى شندى سوسيو ماضبحوه ( الشئ شنو !! ) طبعاً الصفوة عاملين فيها ذوق عملوا لوحة مكتوب فيها ...كلنا بشر ...وكلنا على جعفر ...لكن على جعفر مابنفع فى الدفاع ...إنتوا متأكدين الزول ده لاعب كورة !! هلالابى ظريف قال الزول ده ينفع زول طمبور!! هسه الجاب على جعفر لى جعفر السقيد شنو !! الحاجة المامفهومة ليه ناس المريخ نسوا الضبائح مرة واحدة هسه كان ضبحتوا سمكة إمكن كان تطلعوا درون !! وبهذه المناسبة نهمس فى أذن الإعلام الأحمر معقول فجأة كدة بقيتوا نباتيين ؟ مجرد سؤال .