مناسبة عيد الإستقلال المجيد مناسبة تنعش الوجدان وتعزف مقطوعة الطرب فى كل أنحاء السودان وتخليداً لهذه المناسبة الحبيبة تلتقى قمة السودان بأستاد الخرطوم مساء السبت 24 يناير ونتمنى أن تكون القمة عند الكلمة وتقدم مباراة تليق بجلال المناسبة وليت هلال مريخ يقدموا لنا مباراة للتاريخ مثل مباراة الهلال والنصر والأهلى والزمالك لأن شعبنا الطيب المضياف يعشق الفن الجميل ولأن مباريات هلال مريخ الجميلة تعد على أصابع اليد ، ونتمنى أن تسود الأخلاق الرياضية بين الإخوة أثناء سير المباراة حتى تقدم القمة لأندية الممتاز الأخرى متعة التجانس وروعة التنافس وليت المغلوب يحضن الغالب بمودة كما قال الشاعر الراحل حميد فى قصيدته الشهيرة... البلد الليلة هلالابى والتى تقول بعض مقاطعها *** البلد الليلة هلالابى ...القمر البيتو قصاد بابى ...حبيتو لأنو هلالابى *** ياليم ياالكورة وكت تبقى ... أخلاق موروثة مع الخلقة ... الغالب حاضنو المغلوب بمودة ...وجمهور بيشجع مصحوب بالنغم الطيب والصفقة ... يافريق بيطلع كم فرقة ...يامارق بينا من الزنقة ... وحدنا شعبنا من الفرقة ... ياريت يا أبونا يا أبو الحرقة ...لو نقرأ بياضك والزرقة ....نعم من حق جماهير القمة أن تشجع ومن حقها أن تستمتع بفن كروى رفيع واللاعب السودانى لديه مواهب فطرية ، ولكن من يضمن لنا أن يكون إتحادنا العام عند حسن الظن !! ولو مرة واحدة ...ويتعامل بإحترافية وإنصاف مع مباراة القمة فى درع الإستقلال !! وكما نعلم أن هذه أول مواجهة فى العام الجديد والجماهير متعطشة لمشاهدة نجومها وهى أول مواجهة بين الفرنسى غارزيتو وفريقه السابق الهلال وأول إختبار لمدرب الهلال البلجيكى باتريك وهو يرى على الطبيعة إنفعال جماهير القمة وليس من رأى كمن سمع ، وهذه أول مرة يواجه بكرى جماهير الهلال وهو بشعار المريخ وأول مرة تشاهد جماهير المريخ فيصل موسى بشعار الهلال وبالرقم 11 ونتوقع أن تكون القمة عند الكلمة وتخرج لنا مباراة تليق بمناسبة الإستقلال المجيد ...من الطبيعى أن تكون المناكفات البريئة بين إعلام وجماهير القمة ولكن ليس من الطبيعى أن يصاب لاعب من الفريقين إصابة تمنعه اللعب وكما نعلم أن رجل اللاعب هى رأس ماله .
*** قضية بكرى المدينة وكأس الميناء
كما هو متوقع مازال إتحادنا العام فى ضلاله القديم وهو ينحاز بشكل سافر للمريخ فى قضية بكرى المدينة الذى قبض مقدم العقد ووقع للهلال ثم ذهب ووقع للمريخ وهذه الهرجلة والفوضى لا تحدث إلا فى جنبات إتحاد أبناء العمومة الأحمر الذى إكتمل نصاب لجنة إستئنافه فجأة ورفض إستئناف الهلال وأيد قرار الإتحاد العام الذى إعتمد صحة تسجيل بكرى للمريخ !! يعنى بعد كدة الهلال مجبور يمشى محكمة لوزان بعد أن وجد الظلم والإجحاف من إتحاد عام السودان الذى يتربع على قيادته مثلث الفوضى العجيب الذى تتكون أضلاعه من معتصم ومجدى وأسامة والضحية سوف يكون بكرى المدينة !! وبكرى المسكين بلا لوزان كهربته زائدة !! الله يستر مشية العقرب دى ماتطير ليه فى رأسه زى الملاريا ...وآخر مشية عقرب مشاها بكرى فى بورتسودان وهو يتوشح بالأحمر لكن مشية مسيخة بلا طعم ( زى أكل المستشفى ) لأنها تفتقد مؤازرة جماهير الهلال ، طبعاً أنتوا عارفين المريخ جاب كأس جوى من الميناء بعد أن لعب فى بورتسودان مع كمبالا سيتى ( فريق جمال سالم السابق ) مباراة ودية وأحرز المريخ كأس السياحة والتسوق من بورتسودان ( والله زى ما أقولكم ) المريخ فاز بهدفين لهدف وأحرز أهداف المريخ بكرى وآلان وانغا فى نص الساعة الأولى وأحرز كمبالا هدفه فى الشوط التانى ...مش حاجة غريبة فجأة كدة المريخ الذى خسر بثنائية من الخريطيات تالت الطيش فى الدورى القطرى يفوق على كمبالا سيتى ...وسيتى سيتى كمبالا ...المريخ إشترى من كمبالا ( ما تفهمونى خطأ !! أنا ماقاصد المباراة !! ) قاصد المريخ إشترى من كمبالا بالدولار الحارس جمال سالم ...والدولار عند ناس المريخ أفضل سفير للنوايا الحسنة !! هل تصدقوا إعلام المريخ فرحان ( آوى آوى بى كأس الميناء ) مع العلم أن الهلال فى فبراير 2010 أحضر كأساً جوياً من الأمارات وكان يشارك فى هذه الدورة الرباعية أبو الهل ومن الأمارات فريق بنى ياس والأهلى والوحدات الأردنى !! والوحدات جاء تانى الطيش !! وأطلق الإعلام السالب على هذه الكأس الفخيمة ( كأس فهيمة ) ...بالمناسبة ماتتوقعونا نعمل عيد ميلاد لى كأس القارات الجبتوها من الميناء دى !! لذا لزم التنويه .
*** برهان تية يهضرب والمكانيكى مساعد مدرب
جمال الوالى قال بعد شهر يونيو تانى مابقعد فى المريخ والمسكين ليه حق !! الهزائم الكتيرة عملت ليه عقدة !! ولدنا سلمناكم ليه يتلتل هسه أصبح أكبر من غارزيتو ... والصفوة الفأر بدأ يلعب ( فى عبها ) وعهد التقشف جاااااااكم كان الله أداكم ...وأخشوشنوا فإن النعم لاتدوم ، وبكرى المدينة وجمال سالم فى ديسمبر القادم كان شفتوهم فى أهلى شندى ماتستغربوا ...الجابرهم يقعدوا فى جو الفلس شنو !! قول بكرة الكهرباء قطعت ...لعيبتكم ديل تانى بتقبوضهم كيف !! وغارزيتو المسكين فى النور مابشوف سمح !! معليش ياشباب سرحنا ونسينا تية والمساعد الميكانيكى ...طبعاً المساعد المقصود مامساعد لورى ولا مساعد حلة !! المقصود مساعد مدرب المريخ ( ود غارزيتو ) عشان غارزيتو حلف ستين يمين بلا ( أنطونيو ) مايقبل بمساعد مدرب يعنى ناس محسن سيد تمومة جرتق وكومبارس ساكت ، ونقول للمك محسن سيد أمسك درب المكوك وأتخارج من بدرى ( جاياكم ضلمة تانى الجنبك مابتشوفه !! ) تخيلوا الصفوة ماعندها عشرة ...برهان تيه فكوه عكس الهواء وجاء بدله أنطونيو وأنطونيو قال أنا مهندس مكيكانيكى وكرة الفدم مجرد هواية !! لكن أبوه قال لازم يكون مساعد مدرب ...الكلام ده كدى مابجى لكن يابرهان قسمتك !! الله يستر على محسن ...والصفوة المسكينة ( مبكمة قاعدة ) والرئيس طوالى دى ذاتها أصبح فيها قولان بعد يونيو .
*** همسة الوداع
حبايبنا الحلوين تغزلوا فى محسن وبرهان لما جاء كأس سيكافا وعملوا حفلة بى إنصاف وفرفور ...هسه بعد جاء كأس الميناء برهان المسكين راح فيها ( هسه إمكن الزول ده جاتو نفسيات !! ) والغريبة مساعد المدرب ود الخواجة طلع ميكانيكى !! أول مرة أشوف لى خواجة ماعنده دم !! قال ماعايز فلوس وكرة القدم مجرد هواية !! مجرد هواية يامفترئ !! وبهذه المناسبة نهمس فى أذن الإعلام الأحمر مادام جبتوا ميكانيكى عشان يعمر ليكم الكوامر القديمة دى !! ليه معسكركم مايكون فى المنطقة الصناعية مع ناس بنجوس ؟ مجرد سؤال .