لسه متظرين وحاتك ..!!

والله يا جماعه اخوانا المريخاب ديل قاعدين نحبهم شديد عشان كده بنحاول نناكفهم باستمرار بس نحن ما عايزنهم يزعلو مننا لان حلاة الكورة في تلك المناكفات البرئية .. يعني مثلا اخونا حسن محجوب من اقوان مهند وكاريكا كل يوم يلاقيني يقول لي والله بطني طامه شديد نعمل شنو .. الهزيمة حاره ناااار والله نجوم المريخ ديل قصروا لسانا والواحد بقي يخجل يطلع من البيت يمشي وين ما عارف .. الشوارع مليانه اعلام الهلال .. المكتب مليان هلالاب في البيت تشغل قناة قون يجيك ناطي مهند يقلب هوبة .. تحضر كاس العالم المانيا مضروبه .. اسبانيا مضروبه .. والله الواحد كلما يتزكر قون مهند وقلبة الهوبة يجيهو اشمئناط في القولون كرهتونا كاس العالم زاتو ..!
اما اخونا مامون ابوشيبه (متعهد التحكيم في الاعلام الاحمر ) فقد ترك الرياضة تماما وبات يكتب عن معاناة الموةاطنين في الكهرباء وقطوعاتها المتواصلة وعن الحرامية البجو ناطين ليك انصاص الليالي التقول مهند الطاهر ..!
امبارح مامون كتب عن الكهرباء .. واول امبارح بقي راجل سياسي عديل .. وقبل كم يوم كده كتب عن هزائم المنتخبات الكبيرة في كاس العالم ونسي موضوع هلال مريخ خالص .. انتو عارفين مامون سكت عن موضوع هلال مريخ لانو عارف ان الحكم بدرالدين عبدالقادر كان رؤوف معاهم وصرف للهلال ضربتي جزاء كل واحدة اوضح من التانية .. لكن مامون البعرفو لو المريخ غلب الهلال (الله لاقدر ) كان كرهنا الجرائد زاتا وهاك يا غزل وهاك يا النمرة الكاملة ..!
اخونا احمد محمد احمد بعد اتهامه الصريح للباشا .. وخزلان وارغو له بقي يكتب انو المريخ لازم يشطب ليهو اكث من عشره لاعبين .. مره كده قال والله لو شطبوا اي لاعب من المريخ ما بنزعل ونزعل فوق كم ديل الهلال ما قدرو يغلبهو نعمل بيهم شنو ..!
اما بدر الدين الفاتح وبعد كم خطبة عصماء كده طالب مجلس المريخ بشطب اي لاعب جابو المريخ من الهلال واسماهم (الطابور الخامس ) يعني بدرالدين بقصد الباشا .. اكرم الهادي .. طمبل .. كليتشي .. محمد كمال .. ونسي نائب مدير الكرة مجاهد .. ونسي ليهو زول مهم جدا عشان ما تزعلو شديد ما بقول ليكم اسمو..!
امبارح بدرالدين زاتو تحول الي عراب في القوانين وتحدث عن المادة (45) التي تقيد انتقال اي لاعب فريقه صعد الي الدوري العام لنادي في الممتاز ويقصد بذلك بكري المدينة والنادي الممتاز الفي الممتاز طبعا هو الهلال .. المهم بعد تلك الخطبة قامت لجنة التسجيلات خاطبت مجلس الهلال وقالت ليهم ممكن تسجلو بكري بعد تغيير هويته من هاو الي محترف .. التقول شداد ده قرأ عمود بدرالدين وطوالي منح الاذن لناس اسامه عطا المنان بالسماح للاعب بالتسجيل في الهلال اصلو شداد كلنا عارفنيو بطلع ليك فتاوي كده مرات قاطعها من راسو ومرات بتكون حقيقة زي موضوع بكري المدينة ده.!
امبارح القريبه دي جاني الاخ مجدي مكي واقتحم علي مكتبي بدل ما يقول لي ازيك يا قسم قال لي طوالي ازيك يا مهند الطاهر قلت ليهو كدي قول بسم الله انا قسم خالد ما مهند الطاهر .. قعد شويه وقبل ما يقوم يمشي السوبر قال ليهو كلام كده انا ما فهتمو عربي ولا رطانه المهم الفهمتو منو انو زهجان شديد وجماهير المريخ زهجانه زيو لكن يعمل شنو ما عارف قلت ليهو قول الحقيقة عارفين الحقيقة شنو .. لا صعبه شويه خلهو يقولا برااااهو ..!!
اما الحبيب مزمل والله الواحد بقي يشتاق ليهو شديد .. تلفنو طواااالي مقفول تضرب ليهو يجيك الشعار ناطي طوالي بس ما قالب هوبه زي مهند (عفوا هذا المشترك لا يمكن الوصول اليه حاليا ) بقي زي الهلال في غلبو للمريخ طوااااالي غالبين .. في دوري ابطال افريقيا ثلاثية .. في كاس السودان ثنائية . في الدوري الممتاز برضو ثنائية وبرضو لسانو طويل علي شنو والله ما عارف ..!
امبارح مزمل كتب : هناك قانون تحكيم خاص بالهلال وقانون تحكيم لبقية الاندية الاخري .. وفي دي مزمل كلامو صاح 100% لانو مواهب الهلال ديل لو التحكيم حماهم بقانون خاص كان كلهم اليوم راقدين مستشفي لكن مزمل قصدو انو الحكام بجاملو الهلال ودي جديدة لنج لانو وارغو البتفتشو ليهو في اعارة ده عندو 6 اقوان خمسة منها عن طريق ضربات الجزاء .. ليس هذا فحسب بل ناس سوداني زاتم بقوا يقولو ليك نجم المباراة وارغو وبكون اسوا لاعب في الفريقين .. ما مهم الهلال ياعزيزي منجم للمواهب والحماية ضرورية حفاظا عليها من الانقراض ..!
وتحدث ايضا عن كشافات الهلال وعن دخول الاخ عبدالله دفع لشرائها بعد ان تم عرضها في المزاد .. طيب المشكله شنو خلي عبدالله يشتريها للمطبعه وتعالوا نلعب في ملعب المريخ وبرضو بنضربكم انتو قالين الكشافات قاعده تلعب .. اها انتو عندكم كشافات علمتو شنو بيها غير تطفوها لما المعز ومهند يجوا يرفعوا فيها علم الهلال .. يعني نغلبكم ونعلن عن تحرير ملعبكم وبرضو لسانكم طويل ..!
اخيرا جدا ..!
اما الاخ الحبيب ابراهيم عبدالرحيم فهو الوحيد الذي كتب بعيدا عن تأثير الهزيمة .. قال ليكم يا جماعه المجلس تدخل ووضع تشكيل المباراة .. وقال ليكم فلان الفلاني قال انو قلق وموسي الزومه ديل ما يلعبوا تقوموا تتناوشوهو كده هو عمل شنو غير الاجهار بالحقيقة .. موضوع ابرهيم زعل حاتم عبدالغفار مدير الكوره قام طلع فيهو بيان .. والزعلان شديد هو اخونا محمد جعفر قريش ده قال كلام زكرني ببيانو ايام حصول المريخ علي المركز (الطيش ) في دوري ابطال افريقيا عندما وصف الاعلام الاحمر بالاعلام (السالب ) لكن في حوارو في صحيفة النادي عقب ثنائية مهند وكاريكا قالها صراحة بعض الصحف المريخية خصما علي المريخ .. يعني اخونا محمد جعفر ومجلسه اذا كتبت عنهم واوضحت الحقائق للراي العام فانت خصما علي المريخ ده كلام ده يا جماعه ..!
نحن لو عارفين انو اقوان مهند وكاريكا بتعمل كده فيكم والله كان كلمناهم وقلنا ليهم خليكم عاقلين برضو الجماعه ديل اخوانا وحرام تعملوا فيهم كده ..!س
بمناسبة كاريكا لسع قاعدين نتفرج في كاس العالم عشان نشوف لينا هدف قريب من هدف كاريكا في المريخ وللاسف كل المنتخبات العالمية واللاعبين الكبار فشلوا في احرازه .. والله الا نودي كاريكا لمنتخب الارجنتين مثلا عشان نشوف زي الهدف داااااك عارفينو طبعا ..!!