الارباب وعماد علي سبيل الاعارة ..!!
طبعا انتو عارفين الليله بتبدأ تسجيلات اللاعبين للفترة التكميلية .. اها ناس المريخ قاعدين يفتشوا ليهم في لاعبين عشان يسدوا الخلل في فريقهم .. هم طبعا عارفين كويس انو فريقهم كلو ثغرات من حارس المرمي مرورا بالدفاع ثم الوسط اما الهجوم فالسكات افضل ..!
امبارح كنت قاعد اتونس مع الاخ مامون ابوشيبه لقيتو محبط بشكل عجيب جدا قلت ليهو يا راجل مالك الليله .. قال لي والله المحيرني انو ناس المريخ ديل عندهم قروش كتيره لكن ما لاقين ليهم لاعبين يسجلوهم والله محتارين يعملوا شنو .. !
قلت ليهو ناس المريخ ديل ما عتدهم حل الا اعارة (الهلال ) اااي والله الا الاعارة الجابوها ناس الهلال عارفنها طبعا يوم اعارو سادومبا وكابوندي والدرس المجاني القدموهو ناس الارباب وعماد الطيب .. نحن ما عندنا اي مشكله لو انتو عندكم مشكله قانونية وما قادرين تحلوها ولو عايزين تسجلوا وما عارفين .. ولو دايرن تعيروا وما قادرين نكلم ليكم الارباب وعماد اصلو الجماعه ديل قاعدين يزاكرو كويس جدا خاصة الارباب والله ما عندو اي شغله غير انو يقرأ طوااالي اي حاجه بقراها حتي لو سافر (نيالا) الكتب والقوانين معاهو طواالي وطبعا عارفين انتو نيالا جوها سمح شديد وزتحلو فيه القراية عشان كده ناس الهلال بكونو سعدا جدا لما الارباب يمشي نيالا خاصة قبل اي مباراة للقمة عشان يخلي الجماعه يسرحوا بخيالهم وينسجوا القصص والحكاوي .. والله الارباب القصص دي بكون سعيد بيها خالص خالص ..!
نجئ راجعين تاني لموضوع التسجيلات عليكم الله فريق مدربو بشكوا من قلة المهاجمين بل انعدمهم تماما .. ومجلس يشكوا ايضا من قلة المهاجمين واعلام جايط جدا من موضوع الاصابات دي الابعدت ثنائي الهجوم طمبل وكليتشي برضو يقوم المجلس يجيب ليهم لاعب وسط (محور ) هيثم مرابط والله الناس ديل جنو عديل كده هسي المريخ ده داير ليهو محور ولا مهاجم عليكم الله .!
ناس المريخ ديل انتو عارفهم براكم جنهم يقلدوا الهلال .. الهلال عارفنو عندو افضل نجوم محور في قارتنا السمراء (عمر .. علاء .. سيف مساوي .. حموده بشير ) والاتنين في الاخر ديل جبناهم من المريخ زاتو اااي والله من المريخ عليكم الله المريخ عندو زي علاء الدين وحموده ديل يفرط فيهم عشان يمشي تونس يجيب ليهو لاعب محور والله شفت يا ارباب ..!
اها امبارح قالوا المرابط وصل بالسلامه .. وبعد كم يوم كده بجي عبدالكريم الدافئ برضو لاعب وسط ..وقالو مطر السنغالي طلع (ماسوره ) كبيره عشان كده فكو خبرو وقالو انو اللجنة الفنية الكونها مجلس المريخ اهتدت الي ثلاثة لاعبين كبار يلعبون في خانة المهاجم الصريح ولكن الغريب والمضك معا ان اللجنة المعنية وضعت شروط للوكلاء اهمها ان يكون المهاجم ما لعب في دوري ابطال افريقيا او الكونفدرالية .. طيب يا جماعه رائكم شنو تجيبو ميسي امشو لناس برشلون يفكوهو ليكم علي سبيل الاعارة مش قلتو لاربوتا صاحب جمال الوالي ودعاهو زات يوم لحضور مباراة برشلون والريال طيب المشكله شنو .. معليش اتزكرت لابورتا قالو مشي من برشلونه وجا رئيس جديد امشو ليهو قولو ليهو جمال كان صاحب لابورتا عليك الله فك لينا ميسي ده ..!
ميسي دي كتيره شويه مش كده يا (سلك ) امشو للنادي الملكي عارفنو طبعا ريال مدريد جيبو كرستيانو علي سبيل الاعارة عارفين انا قلت النادي الملكي ليه لانو ريال مدريد ده بشبه الهلال اي والله بشبه الهلال شبه شديد فهو الاعرق .. والاكثر بطولات في اسبانيا ويطلق عليه النادي الملكي وهنا في السودان قاعدين نطلق علي الهلال سيد البلد والاسياد واعتقد انو المعني واحد سيد البلد يا هو الملك والملك يا هو السيد ولا سيادة لا لله ..!!
نجئ تاني لموضوع التسجيلات ده مش انتو ملاحظين انو الارباب ده ما قاعد يتلكم في التسجيلات دي خالص خالص .. عارفين ليه لانو قاعد يزاكر في القواعد العامه والله بكرة يطلع ليكم بحاجه كده تحيركم عديل .. هسي شداد ده مش قال بكري المدينة ده ما بتسجل والله بكره يقول ليكم حاجه تحتارو فيها مش قبل كده جاب ليكم (الاعارة المسكوت عنها ) اها ناس الارباب كشفوها ليهو وخلوهو يعترف بيها حتي قامو سجلو بيها لاعبين عارفين سجلو بيها منو .. سادومبا او البطاح .. والبطاح دي خلتني اتزكر مطالبة بدرالدين الفاتح بضرورة شطب اكرم الهادي وموسي الزومه الاستبدلو المنطق (بالجزمه ) او كما قال .. لكن ماورنا الادهو بالجزمه ده منو .. قايتو بدرالدين الانا بعرفو بكون زعلان لواحد من ناس النهضه هو انا ماعرف لكن اكيد من ناس النهضة لانو بدر الدين ما بثور ويطالب بالشطب كمان الا للشديد القوي ..!
اما الحاجه التانية الطالب بيها بدر الدين هي شطب كل اللاعبين بكشف المريخ الانتقلو من الهلال .. وهو بالطبع يقصد طمبل .. الباشا .. اكرم الهادي .. وكليتشي طيب يا اخوي انتو قلتو انو الهلال غلبكم عشان الجماعه ديل مافي لمن تشطبوهم بتجيبو الاعزار تاني من وين ..!
ومن عندي اضيف للاخ بدر الدين الفاتح شطب مجاهد زاتو من دائرة الكرة المريخية مش مجاهد عينو الوالي نائب لمدير الكرة بالفريق ومجاهد زاتو من الهلال والله لو ما شايفها شينه شديد كنت طالبت بشطب واحد تاني اهم زول عندكم لكن معليش مافي داعي نقلب المواجع . ولا رائك شنو يا ارباب ..!
تاني نجئ راجعين لموضوع التسجيلات البتبدأ الليله انتو عارفين انو الهلال شغال من بدري خالص فيها من شهر 12 الفات لما سجل بكري عبدالقادر (المدينة) وفيصل في اندية صديقة يعني الهلال انهي تسجيلات شهر 6 من شهر 12 الفات والله تاني شفت يا ارباب .. وعشان اوريكم انو ناس الهلال ديل بعرفو الكوره كويس في عام 2003سجلو كل الحراس في الساحه .. المعز من الموردة .. محمد ادم من اهلي مدني .. ورجعوا ابوبكر شريف من الخرطوم اها ناس المريخ بقوا يفتشوا ليهم في حارس مرمي من الزمن داك لي هسي ما لقهو برضو في العام 2006 كنا دايرن نسجل محمد كمال (ولدنا ) وولدنا دي حقيقة مش كان بلعب في هلال بورتسودان لكن محمد كما الوقت داك حسبها صاح قال والله لو مشيت الهلال احتمال تمرين ما القي لي فرصة معقول القي فرصة مع المعز وابوبكر شريف ومحمد ادم احسن امشي المريخ عشان العب طوالي ..!
برضو ناس الهلال بعد ما منوا موضوع حراسة المرمي اتجهو للوسط وتحديدا لاعب المحور قامو سجلو عمر بخيت .. وبعدو سجلو حمود او اقتلعو حموده من ناس المريخ .. وبعدو قامو سجلو علاء الدين يوسف .. وبعدو سجلو سيف مساوي من الجريف عشان تعرفو ناس الهلال ديل نظرتهم ما بتخيب في اللاعبين اصلا وخلو الساحه فاضيه من لاعبي المحور ..!
اقول ليكم حاجه تعلوا نتم القصة بكرة ..!!
