العصابة فى اللغة تعنى العمامة أوالتاج أو مايعصب به الرأس كما تعنى جماعة من الناس أو مجموعة منظمة من المجرمين ولا أعتقد أن عصابة إتحادنا هى التى عناها شاعر الخزرج حسان بن ثابت عندما مدح الغساسنة قبل إسلامه بقوله *** لله در عصابة نادمتهم ...يوماً بجلق فى الزمان الأول ... ياجماعة بصراحة فيكم زول مبسوط من إتحاد أبناء العمومة الأحمر ناس معتصم جعفر وأسامة عطا المنان ومجدى شمس الدين ( البلابل ديل بسحروهم ) غطسوا حجر الرياضة السودانية ولسه مكنكشين فى الكراسى ، لانريد أن نتحدث عن فضيحة مساوى ولن نتحدث عن إهمال المنتخب القومى اليتيم ولا عن مداومة مجدى ومعتصم فى المطار من الصباح حتى المساء لإستقبال المريخ العائد بكأس كيجالى التى لاتساوى ثمن الحبر الذى كتبت به ولن نتحدث عن إهمال شكوى الهلال للكاف فى لاعب فيتا دادى بيرورى أو إسم الدلع تاجى عندما تقدم مجلس تسيير الهلال بواسطة الدكتور عمر النقى بشكوى فى اللاعب المزور بعد مباراة الخرطوم ولكن المريخابى أسامة عطا المنان ثبطه بحجة أن الشكوى غير مكتملة وكان يمكن للكاف أن يمنح النقاط للهلال وفق المادة 29 كما فعل مع الكنغو برازفيل والآن أصبحنا نطارد المادة 24 الخاصة بالتزوير ونجرى وراء إستئناف الفيفا ، وإتحادنا العام يكتفى بدور ساعى البريد ويوصل فقط خطابات الهلال ويلتزم جانب الحياد ... حقيقة أزمتنا دائمة وعصابة إتحادنا نائمة ، الغريبة ناس المريخ جمهورهم وإعلامهم أصبح يسخر من شكوى الهلال ويردد ( الشكوى طلعت دكوة !! ) إنتوا بتعرفوا الدكوة كمان !! كأس الدكوة جابوه ليكم محسن سيد وبرهان تية من كيجالى ...ليكم حق تسخروا من شكوى وإستئناف الهلال عشان كنتوا لاعبين فى دورة ( كيرى ) لاضابط لا رابط ...دورة سيكافا شغالة على كيفها زى الطفل الذى يعانى من مرض التوحد !! ولقد وجدت مسادير فى منتديات الهلال للشاعر ود البشرى تتحدث بلسان الصدق عن مهزلة كيجالى ونهدى هذه المسادير للعريس شاعر بادية كردفان عبدالرحمن عيد الذى يقضى أيام شهر العسل فى كردفان الغرة أم خيراً جوة وبرة كما نهديها للأستاذ كتاحة بالأمارات وللمريخابى إبن الوهاج بالأمارات وللأخ عبدالله بلل القرياتى بالسودان ولخلف الله بلة فى خيبر ورفيق دربه أحمد قاسم أبوزيد الذى يقضى إجازته بأرض الوطن الحبيب وتقول مسادير ود البشرى *** إتلموا الحمام كمبالا وأطلع برة ...رصوا بنابرم من تانى عادوا الكرة ... غايتو سؤال مابقصد بيهو أى مضرة ...سيكافا العجيبة بتتلعب كم مرة !! *** سيكافا العجيبة الأصلو مابنساها ... شالا التشى تشى وجوة البلد شفناها ...يا المريخ حكايتك غايتو ماعرفناها ... سيكافا رواندا التانية شن معناها ***ماشفتوه كيف مريخ جمال الوالى ... تمّ رجالتو فى التنزانى والصومالى ...كان بى الصح زعيم قارة ومقامك عالى ...مابمرقوكا من دورى الكبار طوالى *** لو بالصح زعيم بهديك غناى وقصيدى ...بهديك القوافى وتبقى فرحى وعيدى ... نجمة سيدة هوى أوعك تبالغى تزيدى ...ود البشرى عارفك لسه فى التمهيدى ...طبعاً فرق زامبيا إنسحبت من سيكافا لأنها أصبحت أكثر ضعفاً وكذلك إنسحب الشباب التنزانى وجاء بدله عزام ...بالمناسبة الهلال منذ عام 1999 لم يشارك فى سيكافا لأنها بتعمل لينا إشانة سمعة !! لذا لزم التنويه .
*** مازدا ود الحيشان التلاتة
المدرب مازدا أبت نفسه إلا أن يخسر من منتخب زامبيا فى الودية بالثلاثية ...وكما نعلم أن مازدا برمج نفسه على ربع الدستة عشان كدة لو خسر بهدف أو هدفين ممكن يصاب بصداع نصفى !! والعجيب فى الأمر أن مباراتنا يوم الجمعة 5 سبتمبر مع جنوب أفريقيا بالخرطوم ورغم ذلك هاجرنا للثلاثية فى زامبيا ( بهاجر ليك وين ماكنتى والحاصل بى سببو إنتى ) ..ومنافسة أمم أفريقيا 2015 بالمغرب بها 7 مجموعات يتأهل لدورى 16 الأول والثانى من كل مجموعة بالإضافة لأفضل ثالث فى السبع مجموعات وصاحب الأرض والضيافة منتخب المغرب ...ومجموعة السودان تضم بجانبه جنوب أفريقيا ونيجيريا والكنغو ...وسوف يلعب منتخبنا أمام جنوب أفريقيا يوم 5 سبتمبر وبعد 5 أيام سوف نسافر للكنغو لنلعب ضد منتخبها يوم 10سبتمبر وبعد شهر سوف نستضيف نيجيريا بالخرطوم ومباراة الرد بنيجيريا بعد 5 أيام منتصف أكتوبر وبعد شهر سوف نلعب ضد جنوب افريقيا مباراة الرد وبعد 4 أيام من هذا التاريخ سوف نستضيف منتخب الكنغو بالخرطوم يوم 19 نوفمبر ، ونسأل الله النصر لمنتخب صقور الجديان ...بس أهم حاجة يكون المنتخب إشترى تذاكر السفر لزامبيا من وكالة أسامة عطا المنان !! ويا أسامة مادام إنت أمين مال الإتحاد ( المارقة ) أولى بيها إنت وكون المنتخب ينهزم أو الجمهور يرتفع عنده الضغط مامهم !! المهم عدادكم إنتوا يكون رامى .
*** بشرى سارة لأحباب الفنان الطيب عبدالله
قبل ساعات كنت على إتصال بفنان السودان الكبير الطيب عبدالله الذى أهدانا أجمل الأغانى ممزوجة بأعذب الألحان فهو صاحب السنين والأبيض ضميرك وفتاتى ونبع الحنان وأيامى الخوالى وغيرها من الروائع ...وسألت الأستاذ الطيب الذى ينوى السفر لأمريكا فى الأيام القادمة ليلحق بزوجته الأستاذة سارة حسين كمال المقيمة هناك ...وقلت للطيب من حق جمهورك أن يحاسبك بأغانيك ويقول لك ...كيف هان عليك ياحبيب تسلانى ...تنسى عطفى عليك وحنانى !! فأجابنى فنان السودان الكبير نعم سوف أسافر لأمريكا ولكن لن أستقر بها وسوف أعود لأرض الخير والطيبة لمعانقة هذا الجمهور الوفى ...وحاولت ممازحة الأستاذ الطيب وقلت له ...شايفك بتكسر فى التلج فى صحيفة اليوم التالى فأجابنى إنت عارفنى أنا زول صريح ذكرت فى لقاء صحيفة اليوم التالى وقلت الإخوة عمر البشير ونافع على نافع أبناء منطقتى ودفعتى بمدرسة شندى أما حكاية فخامة الريس وسعادة الدكتور فهذه بهارات وضعتها صحيفة اليوم التالى ولا دخل لى بها ورغم ذلك تعرضت لهجوم من صحيفة الراكوبة بإعتبارى كسار تلج وهذا ليس من طبعى كما تعلم أخى الجعلى ...وطلبت منه أن يختم بنكتة كالعادة فأجابنى ضاحكاً عند بدايتى الفنية كنت صغير فى السن لكن قابض الجو قبضة صاح وكنت فى حفلة ومعى العازف محمد حسن الشايقى فجاءت عمتنا من الشوايقة ست طويلة وضخمة وقالت للشايقى أنا متمنية أشوف الطيب عبدالله وعندما أشار لها ناحيتى قالت بإستغراب !! ده !! ثم أضافت بلهجة أهلنا الشوايقة الجميلة ...حقيقة ( النصيبى مامن كتيرى !! ) . ونتمنى للأستاذ الطيب زيارة سعيدة وعودة حميدة .
*** همسة الوداع
حبايبنا الحلوين بعد أن زال عنهم بنج سيكافا وشافوا أنهم أسرفوا فى الأفراح بلا مبرر فى بطولة الضعفاء وناس قريعتى راحت ... زعموا أن الهلال فى عام 1988 عندما أحرز برونزية سيكافا عمل مسيرات وأفراح وأغانى ...ونلفت نذكر الجيران بأن هلال العشق الجميل أحرز فضية الأبطال مرتين 1987 أمام الأهلى القاهرى وعام 1992 أمام الوداد المغربى فهل عملنا حفلة بى حرم النور أو جمال فرفور !! سيبك من فضية سيكافا !! وبهذه المناسبة نهمس فى أذن الإعلام الأحمر بينى وبينكم سيكافا كيجالى كلفتكم كم ؟ مجرد سؤال .