صفر
هو الرقم الشخصى والباص ويرد والصديق الحميم لهلال الملايين هو الملايين دى غير الأصفار فيها شنو؟؟؟
واحد
فريق واحد فى البلد دى جاب بطولة حقيقية (خلونا من سيكافا ونيسكافا) _ذلكم_ هو المريخ كما يقول الالمذيعون وبخاصة أخونا عثمان حسن مكى
والبقية تأتى هذا ما نتمناه لكنه
ولكنه (ما لم يحدث)!
صفر واحد
لكن لان المريخ والهلال توأمان وأصلا الهلال خرج من المريخ وبمثل ما ان أجهزة الحاسوب تعمل بالنظام زيرو ون، فإن كرة القدم فى هذه البلد أيضا كذلك شغالة بى نفس النظام!
(أربعة)
الهلال طلع بى أربعة نقاط والشخص الذى لا يجيد القيادة يقال عليه _نفسالرقم_ ولست ادرى اربعة بالذات ليييه؟ المهم الهلال فاشل فى قيادة سيارات وركشات البطولات!
(7+7)
لو أن الهلال إستطاع أن يحقق الفوز على مازيمبى لارتقى بنقاطه لسبع نقاط، وبفوز فيتا على الزمالك صارت نقاطها سبعة ويكون مازيمبى برضو واقف فى سبعة... لكن الكنغوليين كانوا الاجدر والأكثر إجتهادا لذلك صارت نقاطهم (عشرة على عشرة)
؟؟؟؟؟
المحل للتقبيل
فى المملكة كنا نندهش مثل دهشتكم هذه ونتساءل: (المحل للتقبيل كيف يعنى)؟؟ وإمكن كمان ناس يتخيلوا ويشطحوا.. سالنى احدهم ممتحنا: يعنى شنو للتقبيل؟ قلت ليو إيجار، ضحك قال لى عرفتها كيف؟؟ قلت (إستنتاج بس).. محل مقفول يعنى ح يكون للإيجار دى دايره ليها كاف هسه ولا فيفا؟؟ قال لى: إيجار وكمان (بى ناسو)... وفى ناس كتار فى البلد ديك طبقوا فيهم النظرية دى.. وهنا فى ناس باعوهم بى جريدتهم... فقط لم يعلنوا قبلها : الجريدة للتقبيل!
خلينا العدد (إستفاهامات) لانو كلو زول أدرى قيمتو بتساوى (كم)؟؟؟
بلى إستيشن
اعترف باننى هلال اقصد (أربعة) فى لعب البلى استيشن حتى مع الصغار.. وقد تصل هزيمتى لعشرة أو اكثر، ويحاولون أن يرضوننى بان يدخلوا الكرة فى مرماهم و(ينغلبوا لى).. ودى طبعا بتزعل أكتر من يغلبوك عديل وبعدد وافر من الاهداف.. الهلالاب دايرين يعملوا معاهم نفس الحكاية دى.. ونسوا انهم لاعبين كورة عديل ما بلى استيشن ومفروض لو قالوا ليهم تعالوا راجعين يزعلوا!
الحل بس.. فيتا
كل من لديه مشكلة صار يرى ان حلها فى فيتا
البت البايرة ليها كم سنة الحل بس فيتا
صاحبى الإتدين منى وزاغ قلت الحل بس فيتا
ناس البرازيل قالوا ح يرجعوا كاس العالم تانى طالما فى شكوى ضد فيتا
المواصلات وحركات الكماسرة والسواقين والغلا.. حلها فيتا بس
الطين الريحتو معفنة فى نص العاصمة الحضارية.. حلو فيتا بس
الدولار الزائد والحر القائد حلو فيتا
قانون الصحافة الجديد نشتكى للكاف بس مع فيتا
الفلس الضارب الناس الحل بس فيتا
الناس عطشانة للبطولات والدنيا سخانة الحل شنو؟؟
الحل فيتا بس
الزمالك عاوزة تتاهل لكين فيتا ضربتهم (رايح جايى) حلهم بس فيتا
الهلال فيتا شالت منو (أربعة) نقاط.. وخلتو (أربعة) بس ما عارف أى شئ ولا فاهم اى شئ.. حلو شنو؟؟؟..........................
ناس عماد الطيب محامين حلهم يشكوا بس
فى اربعة مباريات فاقدين فريق كامل (11 نقطة) وبعد دا كلو كمان بتشكو وشايفين حلكم بس فيتا؟
من ما لعبتو غير مازيمبى ما غلبتو اى حاجة ود الجزولى الجاب ليكم القوون ذاتو إختفى شكلو حلو فيتا بس..
هسه لو إشتكيتو مازيمبى الغلبتو دا كان ارحم
ما غبى والله إنتو غلبتو صاح لكين غلبكم صاح معناتها الحل فيتا المسكين دا
حتى لو غلبتوه هنا وهناك مازيمبى دا لو إشتكيتوهو كان طار
إنتو قايلين مازيمبى واقف معاكم لييه؟ مأمل يتاهل ويلاقيكم فى النهائى
مع انو انتو ليكم زمن ما حصلتو (نهائى) كدا
وهو مسكين لوركز الحل كان (جنبو) الحل شنو؟؟؟ ما فيتا بس.. ح يكون شنو يعنى؟؟؟
المذيعة القالت رمضان فات بى خيرو وشرو حلها فيتا بس تشتكى فيتا وتقول أنا قاصدة (الهلال) الفات بى خيرو وشرو!
فى ناس عاوزة تشارك فى مسابقة (مشروعى) وما قادرة حلها فيتا بس.. ويكون هدفها من الهلال إنو يجيب بطولة.. دا مشروع بدر للبلد دى مليارات..
منتخبنا ذاتو ممكن يرجع كاس الامم وكاس العالم لاول مرة فى حياتو لو إشتكى( ناس حياتو) هههههههه دى ضحكتنى والله!
لو قدمت غلط فى التقديم الإلكترونى وما شالوك حلك بس فيتا
لو عندك ترقية إتاخرت ولا علاوة الحل.....................................
لو ولدك طردوهو من المدرسة................................................
داير تغترب، عامل جريمة وداير تزوغ......................................
جزى الله عنا فيتا كل خير فقد أهدانا حلولا لكل مشكلاتنا!
لكين المشكلة فى ناس (حق الفيتا) ما عندهم! يعنى يسكتو
ويشكوا لى ربنا بس... لانو الشكية لغير الله مذلة!!
فيتا: أشرب وأكسب
أشرب (المقلب) وأكسب تعاطف (الملايين) بالذات لو عندك جريدة رياضية!
عابر سكة
هذا هو حال هيثم مصطفى الذى فقد أراضيه.. غريبة كلما اردت ان اتكلم عن هذا الموضوع. ما عارف البحصل شنو؟؟
هيثم لحدى جيتو للمريخ كان يحظى بتعاطف المريخاب (ما عدا الما عاوزنو يتسجل) وكثير من الهلالاب (الما عاوزنو يتشطب)
وبعد أن كسب تعاطف المريخاب الذين سجلوهو بعد ان تنكر له الهلالاب (بعد خدمة طمنتاشر سنة) بقولولو اوأف من اللعب للهلال...
عاد هيثم للعب على الحبال كلها وفقد التعاطفات كلها
لم بقدم شيئا للمريخ سوى ضجة وإختلافات فى الإدارة والجمهور كل فيما بينهم وكلهم (فى بعضهم)
هيثم كان صاح وشجاعا حينما قرر الإنتقال للمريخ مع ان الأصح أن لا يلعب لأى جهة مع ان البعض يقولوا لو انه لعب لاهلى شندى كان أخف قدرا...
فقدان التعاطف هين.. المشكلة بتوقف هيثم فقد كورته ايضا
الآن هيثم كان لاعب الهلال (تاريخ بس وذكريات) 17 سنة ضاعت سدى.. وكان لاعب المريخ (سنة ما حلوة يا جميل)
غايتو هيثم دا حلو فيتا...... بس!
يكذبون ويتجملون ( سيك آفة)
مكابر من يقول أن سيكافا بطولة قوية
حتى المريخ حينما حققها ايام عظمتها كانت ضعيفة مقارنة مع بطولات الكاف الأخرى
رغم ان فرقا تشارك هنا وهناك
وإلا لماذا لم يحرز المريخ فى تلك السنوات التى فاز بها بسيكافا الكؤوس الإفريقية أو (الإتحاد)؟؟
هذا لا يعنى ان سجل المريخ ستشطب منه تلك البطولات كما شطبت الفيتا
ولا يعنى ان الدول التى تشارك فيها لم تتطور
لكن المشكلة الآن أن المريخ حينما يشاك فى سيكافا يكون هناك واحد من إحتمالين فقط:
يا بعد ما يشارك فى سيكافا طلع من البطولة (الكبيرة)
يا شارك فيها بعد ما يطلع من البطولة (تعويض)..
عشان كدا المريخاب الاصليين بشوفو سيكافا دى زى (كاس الكنغو).. وزى شكوى فيتا!
كاس.. لا
كاس ناس يمشوا وواحدين يحلوا محلهم
كاس بتعمل كل 4 نقاط أقصد كل 4 شهور
مرة براو ومرة معاو حوض النيل
لكين مع كدا النار ح تولع فى الهلال لو المريخ شال الكاس
عندهم مشكلة انو المريخ يشيل كاس غن شاء الله من الكنغو ولا بنى (يأس)
لكين حلكم واااضح...............
لا لا ياخ ما فيتا
حلكم (تسيكفوا) ليكم بطولة براكم هنا فى (المقبرة) وتشارك فيها 10 فرق
فريق الأزرق والأبيض والرديف وفريق سليمانو وفريق كاريكا وكان فريق جمعة إنسحب لعبو فريق المعز.....
لكين عارفين المشكلة ويييين؟؟؟
المشكلة بعد دا ما تشيلوها
فى الحالة دى تشتكوا فيتا إنو ما شارك معاكم... بدوكم ليها!
تلميحة: أربعا وعقاب صفر
تخريمة: منتظرين ناس فى المطار (أربعة) ساعات ما وصلوا.. هسه مفكرين نشرب اقصد نشكى فيتا!
وما يضير البحر أمسى زاخر إن رمى فيه غلام بحجر؟؟
تقفيلة: الهلال طار بى خيرو وبى شرو!
باص بينى: وفاق سطيف والصفاقس أكتر الفرق حزنا على عدم قبول شكوى (الهلال والزمالك)
آخر قطرة: خدعووووك خدعوووووووووووووووك!
وهذه بصمتى