(1)

أكثر المتفائلين لم يكن يتوقع أن يحقق الهلال نتيجة إيجابية على مازيمبى لأن الواقع كان ينبئ بهذا، غيرأان البعض يحب أن يعيش فى عالم إفتراضى.. قضى الهلال عطلة العيد وعطلة ما بعد العيد وعطلة الخريف لتستقبل شباكه سيل أهداف مازيمبى!

ما يؤكد أن مازيمبى_ فى أضعف حالاته_.. أفضل من الهلال فى_ أقوى حالاته_.

(2)

وإن كان البعض قد ظن أن الهلال سيحقق الفوز من منطلق فوزه على مازيمبى هناك.. غير انه فى تلك المباراة كان مازيمبى قد حسم الموضوع بخماسية لاهبة وحارقة سجلها فى (مقبرة الأبطال) ولعب تحصيل حاصل .. مثل مباراة الزمالك!

(3)

مشكلة الهلال فى سوء الفهم، بالذات مع مازيمبى .. أحد اللاعبين فى مباراة الخماسية طلبوا منه أن (يمسك موبوتو) فعمل معاو ضربة

جزاء.. والآن الهلال الجميع كان ينتظره يطلع دو (الاربعة) فوقف فى (الأربعة) نقاط!

(4)

الثورات دايما مرتبطة بأيام الجمعة، والآن مرتبطة ب (جمعة) واحد فقط لا غير..

(5)

لكين جمعة بالغ.. ذكرنا قصة الشاب الذى كان يعمل فى لورى بطيخ يقذف له بالبطيخ فيستلمه ثم يضعه على الأرض.. فسجله أحد الفرق الكبيرة حارسا للمرمى، وفى المباراة سددوا نحوه قذيفة فاستلمها.. ثم أدخلها الشبكة! النكتة دى سمعناها فى الابتدائى رجعتنا سنين يا جمعة!

(6)

الإعلاميون أكدوا أن الخسارة والطيران بسبب مجلس التسيير وعطا المنان.. وناس التسيير قالوا السبب الإعلام.. وواحدين قالوا السبب المدرب الجدي،د وواحدين قالوا القديم، وواحدين قالوا التحكيم وواحدين قالوا البرير... المهم انهم يغنون جميعا ( ولا خلاص بعد فرقتنا كل واحد يلوم التانى)؟؟؟

(7)

(التاج) (محجوب) عن الهلال... أعنى بالطبع (تاج البطولات)!

(8)

الهلال قعد إسبوعين فقد ستة نقاط.. يعنى لو قعد يومين تانى كان فقد (سوائل)

(9)

البابا عليه رحمة الله كان متميز إداريا.. وطه (حكميا)، والأرباب (قانونيا وفنيا)، والبرير فى (البنيات) التحتية، الكاردينال فى العلاقات (الإجتماعية).. إزاء ذلك يمكن أن نطلق عليه: نادى الهلال (للاعبين بغيرها)!

(10)

الهلال كان عندو مشكلة بستقبل أهداف آخر الدقائق.. ظبطوا المشكلة دى.. لكين نسوا (أول الدقائق)!

(11)

لو قالوا ليك الزول دا زى قون كاريكا.. معناتها ما منو أى فائدة!

(12)

فى الهلال يزمع المسؤولون ويطالب المشجعون بشطب 11 نقطة أقصد حداشر لاعب.. أتمنى الإستفادة منهم فى مناشط أخرى، فقد ظهرت موهبة الكثيرين فى الجرى.. أهو يظهروا عدائيين جدد، بجانب كاكى وإسماعيل.

(13)

خلصت الحكاية: الجزائريين والتونسيين بلاقوا الكنغوليين وبتأهلو وواحد بشيل الكاس... و.......... بس خلاص.

(14)

الكاردينال من ما جا ما غلب إفريقيا.. هسه يغلبوا الزمالك يجوطوا وينسوا، دا لو ما غسلوا أحزانهم فى ترعة الممتاز (الكاسرة).

(15)

من ما نقرأ الهلال الأول عربيا وإفريقيا والعاشر عالميا.. أو نسمع غُنا طوالى الهلال بطير.

(16)

مشهد ظل يتكرر فى الإذاعة الرياضية كل عام: يوم الكورة الناس شغالة غنا وتمجيد فى اللاعبين، وتانى يوم يتحدثوا عن أسباب الخسارة، ومع كدا يوسف السمانى يتساءل عن أسباب خروج الهلال.. والصحيح التساؤل عن أسباب دخول الهلال (مع الكبار)!!!

(17)

محمد موسى الكوميدى المعروف قال كان اسبير واحتياطى لى نميرى شلبى لو غاب بشتغل.. سيكافا شغالة بى نفس النظرية..

الغريبة بقت تتعمل زى إمتحانات الجامعة (مرتين فى السنة).. وبرضو المريخ ما ح يشيلها.. شيلو الصبربس!

(18)

الهلال الزمالك أداء واجب.. لعبوا فيها (الصف التالت).

(19)

قالوا: المدرب العام هزم الهلال..كيف يعنى؟؟؟ جاب 3 أقوان ولا ركبها فى قونو؟؟؟ إتقوا الله ياخ!

(20)

تخريمة: المريخ والهلال والمنتخب يتأهلوا كيف ويجيبو بطولات كيف؟ رطل اللبن بى (4) نقاط، أقصد جنيه.. وكاسة زبادى صغيرة بى تلاتة مازيمبى ونص.. والرغيف 3 بى جنيه!!! إنتو بتهظرو؟؟.. الاسعار دى بتخلى زول عندولياقة؟؟

(21)

سبحان الله! نفس اللعيبة الكانو بغنوا ليهم يوم المباراة تانى يوم بقوا عواجيز.. ذكرتونا نكتة أدروب: كان راكب فى البص وجنبو بت سمحة.. نام صحى لقى مره عجوز.. قال لاهولاااا البصدا مش كم سنة يا جماعة؟؟؟هسه بص الهلال دا مشى كم سنة فى الرحلة دى؟

(22)

فى الهلال ناس شايلين سكاكين.. وناس للحكم ساكين!

(23)

سؤال وجيه: بعد هدف كاريكا اللوحة دا الهلال ما بتأهل؟؟؟

(24)

العاجبنى فى جمهور الهلال انو عندو أمل.. الجمهور والمعلق كلهم قالوا الهلال لسه ممكن يتأهل بعد الثلاثية وق دو يحسبوا ونسوا انو فيتا بى السبعة نقاط الأصلا عندو متأهل قبل ما يلاقى الهلال، الذى لو فاز لارتفع الى 7 نقاط، وفى المواجهات المباشرة الهلال شارب فيتا هنا وهناك.

(25)

كنا عاوزين الزمالك يغلب فيتا... عشان الهلال دا يكون عمل حاجة فى المجموعة دى.. ما ممكن من ديك وعيييك.. بس غلبتو مازيمبى هنا وقعدتو؟؟

(26)

فيتا شال من الهلال اربعة نقاط ومن الزمالك ستة.. يعنى ما إحتاج لى ود بلدو ذاتو!

(27)

مسطول بحضر فى قناة أم درمان الساعة 25 ملاذ حسين خوجلى بعد شويه برنامج مع حسين خوجلى.. قال مع دى أخت ملاذ؟؟؟

آخر قطرة: بعد دا كلو كمان بتشكى؟؟؟