لمصلحة الهلال لا يجب ان نخوض في شئون الهلال
ولمصلحة الهلال لا يجب ان نعكر مزاج لاعبي الهلال
ولمصلحة الهلال لا يجب ان نتدخل في تجهيزات الهلال
ولمصلحة الهلال لا يجب التنظير في تدريبات الهلال
ولمصلحة الهلال يجب تحويل انظار اعداء الهلال بعيدا عن الهلال
ولمصلحة الهلال يجب ان نحيد اعلام المريخ بعيدا عن الهلال
ولمصلحة الهلال دايرين نتكلم عن مواضيع بعيدة عن الهلال
ورحم الله فناننا الرائع مصطفي سيد احمد
والذي تغني :
يا ضُلنا المرسوم على رمل المسافة ...
وشاكي من طول الطريق ...
قول للبنية الخايفة من نار الحروف ...
تحرق بيوتات الفريق ... قول ليها ما تتخوفي
دي النسمة بتجيب الأمل ... والأمل بصبح رفيق
والأصلو في الجوف أندفن ... لا بتنسي لا بنمحي
لا بنتهي منو الحريق ...
يا ضلنا
والفينا من أهات أليمة ... في حكاوينا القديمة
لا بيرحل من عيونا ... لا بتنعشاه الهزيمة
والقبيل راجينو نحن ... يوم تبشر بيهو غيمة
لما تمطر يوم علينا ... والفرح يملا المدينة
والبيوتات الحزينة ...
يا ضلنا ...
سمعت هذه الاغنيه الرائعه بالامس القريب وفي نفس الوقت الذي اعلن فيه نادي المريخ رغبته التعاقد مع النابي
يعني تاني رجعت ريما لعادتها القديمه
ومن خلي عادتوا قلت سعادتو
والمريخ احلي شي عنده لاعبي الهلال
وقد حفيت ارجلهم وراء اطهر الطاهر فخرج طاهر نحو الازرق
ولا غني عندهم عن لاعبي الهلال
ولا غني عندهم عن مدربي الهلال
و المريخ اصلا ماشي بلعيبة الهلال
وتظل عيونهم تنظر للهلال نظرة المعجب والمندهش
وشكرا فريق المريخ احترامك الشديد للهلال
ولم لا فالهلال ضمن الثمانيه الكبار في افريقيا
والهلال هو متصدر الدوري
والهلال هو من تسبب في التمثيل السوداني بثلاثه فرق
وعندما يذكر السودان يذكر الهلال
لم لا فالهلال هو صاحب احلي جمهور
والهلال هو صاحب احلي لعيبه
بطولة الحوض وجمال الوالي
يقولون ان بطولة سيكافا للشئون الحوضيه من اعداد واخراج جمال الوالي
وانه ظل يخطط لاي كاس مهما كان لارضاء جماهير المريخ الغاضبه
ويقولون انه هو من حدد اسماء الفرق المشاركه
وهو من دفع حق الطيران
وهو من دفع حق الفنادق
وهو من دفع حق الضيافه و نثرياته
وهو من اراد ان تكون الفرق بهذا الضعف الشديد
حتي يفوز المريخ بأيها كاس يغيظ الهلال
ولا اظن ان الاتحاد العام المفلس والذي لا يملك 5 جنيه كما قال الجكومي يستضيف 16 فريق
كذلك لا يملك اتحاد سيكافا الفقير جدا امكانيات استضافة هذا الكم من الفرق
فأتحاد سيكافا يضم بين جنباته افقر دول افريقيا
المهم - اتت الرياح بما لا تشتهي السفن
وخرج المريخ المسكين من دور الثمانيه يجرجر اذيال الهزيمه امام فرق طلبة كليات وجامعات افريقيه كحيانه
وكان المريخ قد اعد نفسه بقوة لهذه البطوله الهزيله
ومحترفين شي من غانا وشي من الكاميرون
وشي محلي من الفاشر وشي من عطبره
وسجل يسجل تسجيلا
وشطب يشطب تشطيبا
وعار يعير استعارة
ومن 16 فريق تعبان انسحبت 5 فرق
لعدم احترام الاتحاد لها
واخوانا المصريين قالوا ان مصر حتضحك عليهم اذا اشتركوا في هذه الدورة الهزيله
وحي العرب انسحب
وناس الفاشر انسحبوا
والمان الصومالي ما لقي حق المواصلات
كذلك انسحب الجمهور المريخي هو الآخر
وانسحبت التلفزيونات الناقله عشان فلوس البث المعدومه
والناس بقت تتفرج علي مباريات الهلال الافريقيه
و ريال مدريد وبرشلونه والدوري الالماني في التلفزيون الاماراتي
وما في زول فاضي لبطولة حوض البط
وناس المريخ طينوها وقفلوا ملعبهم
وعلي وعلى اعدائي يارب
فلا دوحة نفعت ولا افريقيا نفعت ولا دوري نافع
ويابايرن هل تتذكر فريق اسمه المريخ
حالته بقت صعبه شديد
ويا ريبيري صحبك بله جابر ممكن يشطبوه
ويا روبن هل تصدق ان جماعتك اتغلبوا من تشتي تشتي وخرجوا من التمهيدي وقفلوا النادي ووزعوا الجوازات علي المحترفين
يالبايرن الهلال هو سيد البلد الحقيقي وانتو في الحقيقه غلطتوا في العنوان
ختام الفضائح :
بالمزامير والطبل البلدي طلبة جامعة فكتوريا تخرج العديلين باربابهم وواليهم وملياراتهم واعلامهم السالب من اضعف بطولات افريقيا
وفي بلدنا اتبهدلنا بسببهم
ولو سمحتوا خلوا الكوره للكبار فقط
ومع الثمانيه الكبار مش حتغمض عينيك
والله يحفظ الهلال
محمد حسن شوربجي