*نهر عطبرة فى جبينو هلال ... عندما يردد عقد الجلاد أغنية عطبرة :-
من قمت من بيتنا ومشيت
بطاقتي صورة مصغرة
شايل معاي شنطة صفيح
حزمة هموم ...
ولدا متين بقي للسفر والاغتراب والدردرة
كان الزمان لسة رضى
والناس ظروفها مقدرة
وانا في القطار اصغر صبي
امال تفيض متفجرة
لما القطار صفر وقف
بهرتني صورة عطبرة
دي محطة الوطن الكبير كانت تضج متحضرة
عند هذا المقطع يذهب الخيال مباشرة لمباراة الإكسبريس والهلال مساء الثلاثاء 3 سبتمبر ، وفى هذا اليوم سوف تكتسى عطبرة باللون الأزرق لأن لهلال العشق الجميل وجود مقدر فى عروس الشمال ووقتها سوف نشاهد نهر عطبرة فى جبينو هلال !! وسوف يستمتع جمهور عطبرة الذواق بإبداعات كاريكا وإنطلاقة بكرى المدينة وبينية الفنان سيدى بيه ورأسية الدكتور بشة ولمسات الصنديد الشغيل وكنترول المعلم عمر وفنون الفتى الأبنوسى أتير توماس وسوف يكون فى حرس الحدود مالك وعلى النور وبوى وسامى وغيرهم من أبناء الهلال الميامين ... ونتوقع أن تخرج عاصمة الحديد والنار عن بكرة أبيها لتشاهد أقمار أم در والسودان على الطبيعة فى أرض عطبرة الفتية ... وإن شاء الله نقاط عطبرة سوف تنزل برداً وسلاماً على أحباب هلال الساجدين والناس الصالحين ... كما أنها سوف تكون طعنة نجلاء فى خصر أحباب الظلام وأعداء النجاح ... وإنتصار كتيبة هلال الملايين تجعل الجميع يردد *** أستعدى عشان نسافر فى عيون المستحيل *** سرجى الخيل التسابق زمنى للريد النبيل *** ختى فى الأرض الخصوبة ... وزيدى موية النيل عذوبة *** ونادى للأطفال يغنوا ويشدوا للزمن الجميل ... يلا ياناس الداخلة والدامر وبربر وشندى والمتمة وكل المدن والأرياف تعالوا للمتعة والروعة .
*** العنقالى من برة هلة هلة ومن جوة يعلم الله
العنقالى محمد سيد أحمد لما نشوفوا ( ظابط عمة نقول بابكر ودالجبل ) كنا فاكرين القبة تحتها فكى !! لكن طلع من برة هلة هلة ومن جوة يعلم الله ... على رأى المثل المصرى ، وقلنا الزول الملتزم بالزى القومى ده أكيد سودانى وخليك سودانى !! ولكن ظهرت الحقيقة وإكتشفنا أن العنقالى هو وكيل ( حلويات العبد ) الشهيرة بالقاهرة وعمل فروع كتيرة فى العاصمة ومن أم درمان عمل فرع فى الثورة الحارة الأولى والغريبة كل العمالة مصرية !! ديل أعضاء إتحاد ولا سماسرة وتجار !! تاجر باسطة يامفترى !! وليته حاول مساعدة البسطاء بالأسعار المعقولة ولكن الجشع والطمع رافقه حتى فى تجارة الباسطة !! بينما كيلو الباسطة بى 25 جنيه ، الكيلو عند العنقالى بى 35 حنيه ... ياربى معقول العنقالى ده يتبرع بى صينية باسطة للمنتخب القومى اليتيم الذى يلعب ضد ليسوتو مساء الأحد 8 سبتمبر صدقة لى عمره !! بينى وبينكم الزول الداير الصدقة مابخلى العمالة كلها مصرية ( بختك يا الحضرى عيد ميلادك ميتة ) بالمناسبة أول مرة نشوف زول سيد باسطة ولسانو مسيخ !! لذا لزم التنويه .
*** النجمة وقعت بين الهلالين
حبايبنا الحلوين كانوا مرتاحين حتى نهاية الدورة الأولى للممتاز لأن الخرطوم الوطنى كان خندق بينهم وبين الهلال وكانت مشاكل الهلال الإدارية والفنية تمثل لهم ( الدرب ) الذى يتغذون به ... ومع بداية الدورة الثانية بدأهلال سيرته الأولى وعاد لسكة الإنتصارات ، ولم يكن أمام أعداء النجاح إلا الإستعانة ببدوى المريخ الذى يتحين بقاء يومين من مباراة الهلال ويعلن كل مرة عدم شرعية مجلس الهلال ... وكان رد الهلال بالهوبة أم مشية العقرب ، وكانت إدارة الهلال ذكية وهى تفهم اللعبة وترد بلهجة الإنتصارات ، والآن فريق النجمة الذى يؤيده الوزير وقع فى مطب الهلالين حيث يوم الثلاثاء 3 سبتمبر يلعب ضد هلال الجبال فى كادوقلى ويوم الخميس 12 سبتمبر يلعب ضد سيد البلد فى البقعة ( يعنى النجمة وقعت ماسمّت ) وكما يقول المثل الدارفورى ( كان جيت لى محمد أخوى نار عديل كدة وكان جيتنى أنا أحسن ترجع لى نارك ) ...طبعاً مدرب هلال الجبال الوزير طارق أحمد آدم وهناك من النجوم فى فريق الأسود وليد علاء الدين وماجد علاء الدين وفضل بابور والحارس حافظ أحمد و حمزة آدم وشعيبو وغيرهم من النجوم ... وهلال الجبال تعادل مع القمة فى البقعة .
*** همسة الوداع
ناس المريخ عندهم لعبة مكشوفة بكرروها كل مرة خاصة فى المباريات الحساسة ، يشوفوا اللاعب المميز وين فى الفريق الخصم ويفاوضوه ويعلنوا ذلك فى صحفهم من أجل تشتيت ذهن اللاعب وعدم تركيزه فى مباراة فريقه ضدهم !! وآخر مثال خبر مفاوضتهم لنجمهم السابق وليد علاء الدين ...نجم هلال كادوقلى الحالى !! طيب إنتوا بتشطبوا ساكت !! وين اللجنة الفنية !! ولا شغالين بسياسة شختك بختك !! وبهذه المناسبة نهمس فى اذن صاحب القلم الأحمر فى الإسبوع الرابع مباراتكم مع سيد البلد !! رأيكم شنو تفاوضوا نصر الدين الشغيل ؟ مجرد سؤال