مع المورده الهلال فرحنا
وبروح الشباب بدأ يجمعنا
فدعونا نحلم
ومن اطهر لتراورى
ومن ود عبد الرحمن لكاريكا
وكل الاهداف بالمزيكا
وهلال جديد
وشباب عنيد
وترجلوا ايها الكبار
خلاص ركبكم ما حتشيلكم
وأبشروا اهل الهلال فالصدارة جاياكم بأرجل شبابيه
والانتصارات جايه بطموحات هلاليه
وعافيه قال ان العافيه سترجع بالشباب
وشكرا اهل المورده
عرفتونا بعبده جابر
وعرفتونا باطهر
وعرفتونا بمحمد عبد الرحمن
وعافيه اتاريهو مو هين
ولسع فيهو باقى عافيه
وعليكم الله خلونا نحلم
وعفوا عجايز الهلال
دايرين البطوله يجيبوها الشباب
رغم كل الحاقدين
وكل الفاشلين
وكل الاربابيين
وكل البريريين
وكل شمارات المتسكعين
وما قيل وقال
عن فلس الهلال
ومشاكل الهلال
ورئيس الهلال
و اعلام الضلال
وده ولدنا
ومجلس اللوردات
ومولات
وبوفيهات
دعونا نحلم
بابداعات اطهر الرائع
ومحمد عبد الرحمن
وعبده جابر
وكل المدفونين بأمر غرزيتو
دعونا نحلم بهلال جديد
رغم سوء المورده
ورغم كل المنثور فى الهواء من بمبان احمر
وأحاديث افك
واعلام ضلال
ومزمل
وابوشيبه
وسلك
وكل المطبلين لمجلس اللوردات البريطانى
او الشايل بنقز فيهم
او البيصفر بصفاره
والكاسات الموعودة جوا
وكاس العالم للانديه
والمجد والمريخ توأمان
ويا حليلك يا دكتور عمر
شفناهم امبارح فى مدنى
لا كوره
لا اخلاق
لا تكتيك
وحجاره
وقاروره
وعينك ما تشوف الا النور
وليه ياربى المريخ مكروه فى كل السودان
ففى كل الملاعب المريخ بيتلطش من الجماهير
واين ما حل ترافقه ثورة الحجاره
ومن عطبره لشندى ومدنى نفر
كم انت رائع ايها الهلال
وكم انت رائع ياحبيب الملايين
وكم انت عظيمة يا مدرسة الهلال
فغدا سيتم تصوير الوصيف للحدث
وسوف يستنسخ اهل المريخ اطهر والفكره
ولازم يجيبوا محمد عبد الرحمن لكن بالاحمر والاصفر
وغدا ستعج الدكه بعجائز المريخ
فدعهم ايها الهلال يقلدونك
ودعهم يتعلمون الف باء
ودعهم يتفلسفون
و ينظرون
ويلطمون
وبرافو كتيبة عافيه وكل من تضم
وما تخلوا شيئ الا وتضربوهو بوهيه زرقا
ونحن ونحن الشرف الباذخ
والفينا مشهودة
عارفانا المكارم نحن بنقودا
والحارة بنخوضا
اسمعنا مره:
احلى ما قرأت زمان خالص ولاخونا الرائع ود عبد الماجد ان الكلب البوليسى فى الملعب دائما ينطط لهوبة مهند الطاهر- لا ندرى ماذا جرى لمهند وهو يجرجر رجله فى الملعب دون فاعليه يا مهند اشتقنا لتنطيط الكلب
يبالغ اهل المريخ فى تطبيلهم لمجلس التسيير (اللوردات) كما اسموه فنتائج المريخ وحتى الآن فى تدنى شديد - والظاهر لا فى مجلس لوردات ولا يحزنون وممكن عصام الحاج لسع شغال تقشف
يعتقد اعلام المريخ السالب انه وبفرق النقطتين قد ضمن الدورى الممتاز لا يا حبيبى اتذكروا 2012 وانطلاقة الهلال وفوزه بالدورى فى أخر مبارياته وحتشوفوا الحصان الاصيل
هكذا استطاع المريخ وبدعم من اتحاد معتصم ان يكسب الحكام الى جانبه فلقد عكس حكم مباراة مدنى الكثير من الحالات لصالح المريخ - الحكم الفاشل قام بطرد اخطر لاعبى اهلى مدنى دون ذنب وارجعوا للتسجيل ولا تصدقوا عمنا سيحه يوم الجمعه
اكرم طلع ممثل بارع وقد كشفته الكاميرا والحجر المقذوف يطير بعيد عنه حيث سقط وتلوى وكانه قد اصيب بدانه
بهذا المستوى التعبان لا اظن ان المريخ سيشرف السودان فى بطولة العرب - نتمنى ان يعتذر المريخ عن المشاركه بعد ان تردد ان الوحدات الاردنى ربما يشارك وأتذكروا السبعه الشهيره
محمد حسن شوربجى